معقوووووووووووووول

استئجار (النائحات) في المآتم هي إحدى ظواهر عديدة اجتاحت المجتمع السوداني الذي تسارعت فيه عجلة التغيير في السنين الأخيرة. هذه الظاهرة تناولها بطرافة : كتاب
(عجائب الخرطوم السبع).
لفت نظري قبل ثلاثة أسابيع في منزل ضخم واسع بوسط محافظة الخرطوم حيث ذهبنا لتعزية صديق في والده, لفت انتباهي مرور امرأتين في حالة بكاء وعويل وهما تدوران حول المبنى الداخلي وبالتفرس في وجهيهما وسحنتيهما أيقنت أنهما ليستا من أقارب المرحوم ولاحتى من معارفه, ولما اشتد بي (الشمار) سألت أحد أقارب المرحوم من الشباب عنهما فقال لي: ديل يا عمو (بكايات) يعني ببكن بالقروش، المستطيع يأجرهن طوال أيام المأتم والعاجز يكتفي باليوم الأول فقط!! لاحظ العاجز دي..
تحضر النائحة إلى منزل العزاء وتطلب الـسي في ، أي السيرة الذاتية للميت من زوجته أو ابنته الكبرى:
العمر: 70 عاما.
المهنة: ضابط معاش وله وكالة سفر وسياحة.
المستوى التعليمي: دبلوم الحربية زائدا بعض الكورسات في الترجمة والحاسوب.
أسماء أكبر الأبناء والبنات: فيصل, أحلام, رابحة, عواطف.
هل قام بأي عمل بطولي: نعم, محاولة انقلابية فشلت في فترة الرئيس نميري.
تأخذ النائحة المعلومات وتعقد اجتماعا عاجلا بزميلاتها وبعد التداول يخرجن للملأ وهن يرددن: الليلة ياب دقنا دايرة وخدودا نايرة وقدرتن فايرة وشيكاتن طايرة- كتلنا فيك الليلة يا أبو أحلام يا الشالوك للصالح العام وحكموا عليك بالإعدام – ما دايم إلا الله ووووووووووووووووووووووووب وأحييييييييا.. الليلة يا السايق الكراون يا أب مدفعا هاون وينك لينا؟ أوروروووووووووووووووك.. وهنا يهج البيت ويفور بالعويل والنواح وتميل النائحة يسارا ثم تنحني ضاغطة بيدها اليسرى على أنفها ثم تنظر إلى ابنته الكبرى نظرة ذات فحوى ولسان حالها يقول: لقيتيني كيف؟ وتواصل في الوصف وتعديد مآثر الفقيد: الليلة يا الساكن ديم لطفي أب كلمة تشفي الما متزوج عرض زايلة وخربانة (يعني مازول دنيا) ، البجيك بتجبرو والواقع بتشيلو يا السايق الباجيرو.. مو دار عمار فقدتك السكرتيرة والطربيزة المستديرة والمرسيدس الخنزيرة خليتنا لمنو ياخووووووووووي يي يي يييي إهيء ؟! لاحظ العربة قبل دقائق كانت كراون!
بعد ذلك تذهب النائحات إلى غرفة قصية حيث يؤتى لهن بالثريد والإدام والزواحف والبارد والساخن وعند الانتهاء من هذه المأدبة تنقد البنت الكبيرة النائحات مبلغ 300 ألف جنيه وتقول لهن همسا: ضروري حضوركن بكرة المغرب عشان ناس السعودية والبلد جايين.. كويس؟

النائحات : ألله أكبر ، أجي ! عاد دا كلام يا بتي ؟ نحن بنقصر ؟

سلام الله عليك اخي فضل الله
والله عجب !!!!!!!!!!! ياما نعيش ونشوف
لكن دي موضة باريس ماتنتج زيها
دمت بخير

و الله يا فضل الله دي تقليعة غريبة و قاسية في نفس الوقت. هل معقول ان يحدث هذا في السودان؟

والله كلام غريب وعجيب جدا ان يحدث مثل هذا في السودان الدنيا الحصل فيها شنو

العزيز قله الموضوع جميل ولذيذ ياخوي خايفين بعد شوية الجماعة ياجروا ليهم رجال يدفنوا ويشيلوا الفاتحة نيابة عن ذوي المرحوم ... السودان بقت المظاهر والشوفنيه هي ديدن الجميع .. أي زول عايز أركب أجمل عربية ويشيل احدث موبايل ويلبس أجمل الثياب ويأكل ما لذ وطاب ويعرس ليهوا أربعة نسوان ... وفلان قام وفلان قعد ... باي وسيلة لازم يكون عندك ظهور وحضور في كافة المناسبات وإلا الناس بتشيل حالك ... واختفى مسمى مدفع الدلاقين لانوا الكل بقوا مدافع وصواريخ ... تعرف أخر مرة مشيت السودان ماشى اركب الحافلات للخرطوم لاقاني واحد قال لي ماشي وين قلت ليهوا ماشي موقف البحر اركب الحافلات للخرطوم تتصور قال لي شنوا ((يأخي ما تأجر ليك عربية وتريح روحك الجلدنه العليكم شنو)) استغربت قلت ليهوا أجر عربية ليه الزمن ده كلوا ما راكبين الحافلات والباصات وماشين وجايين الحصل شنوا .... يأحوي ربنا يهون وييسر ولك تحياتي وواصل ...

لدي مداخلة طريفة جداً عن هذا الموضوع في سودانيز أون لاين
بالطبع لاتحضرني الآن
ولكن والله بصراحة الاستثمار في { البكيات } اصبح شيء مغري جدا
والله العظيم حينما كنت صغيراً كنت { أجعّر } وأزعج كل البيت
وكانت والدتي تقول لي لو تم توظيف صوتك في الغناء لأصبحت لينا أكبر فنان
يعني الآن جاء دورك يا ابوحراز
تمشي تستقر في السودان وتشوف ليك بكاء في العمارات
وآخر في المنشية
ومثله في الرياض
وهاك ياجعيييييييييييييييييييييييييييييييير
أحبس ليكم الصيوان وكلما اشوف { عمة ملفوفة } كبيرة أرفع ليكم صوت الحلق
كويس من ثلاثة بكيات تطلع ليك بي { 900 } الف
والحمد لله أن الموت لايتوقف ابداً بالسودان
يعني الشغلانية ارباحها مضمونة
وفي نهاية اليوم تمشي لزوجتك تمسح ليك حلقك بي زيت سمسم

الم تسمع بذلك الرجل الذي لايشيل الفاتحة في عزاء الرجال
يعني أول ما يسمع بي بكاء طوالي يمشي على صيوان النسوان
وأقرب { إمراة } جميلة يقوم يقلدها ويبكي معاها
ولو قابلته في الطريق إمراة شينة مابيشتغل بيها اي شغلة
المهم يوم في واحد عمك مات
وصاحبك تووووووووووووووووووووش على صيوان النسوان
قابلته واحدة جميلة جدا
قام قلدها ليك وقعد يجعر
جاء ولد المرحوم وقال ليهو ياعمي الزولة دي ماعندها اي علاقة بالمرحوم { فكها تشوف شغلها }
قام قال ليهو { والماتوا ليها قبل كده شوية } !!!

يا اخوانا والله دا كلام غريب والله يستر