من تتوقع فوزه بالانتخابات لرئاسة الجمهورية

المحبوب أحمد الأمين كتب:

كيف يعني يا وليد ؟؟
مالو المؤتمر الوطني ؟؟
يعني أي واحد يجي يؤجج نيران التأييد ،،
ويقج صيوانات التعضيد ،،
يقوم في الآخر يقول ما عندي علاقة بالمؤتمر ؟؟
والله كلام عجيب ،،
حزب سياسي قابض الناس من العزيزة ،،
عذب عذاب الثبور ،،
وزف ملايين الشباب للحور في القبور ،،
تعملوا ليه الدعايات ،،
ودقوا ليهو في الطارات ،،
وواقفين ليهو صفوف في المطارات ،،
تجو في الآخر تقولوا ماعندنا بيهو علاقات ؟؟
انتو أكان قاصدين علاقات النسب ورونا !!

[b]
المحبوب انت قلت لى قايم بى خمسة
٠٠هسع كلامك دا عداد العربية بيقول ليك نزلنى
٠٠٠٠فوالله والله والله العظيم ثلاثا لست لى اى علاقة بهذا الموتمر الوطنى ٠
٠٠فاذا كان تايدى لعمر البشير فمن وجهة نظر شخصى الضعيف
اننا ارهقنا تجارب من حكومات عسكرية وديمقراطية
والتعرفة خير من الحايكون رئيس ونبدا من الصفر
وانا لم اقل انى مع الموتمر الوطنى
ولم اخرج فى حياتى فى يوم لدق طار لحزب او شخص
وانا طول عمرى سيد نفسى
٠٠٠وفى بوسط اخر اعلنت تايدى للدكتور معتصم جعفر وذلك من واقع معرفتى به ومن المصلحة لمدينتنا الحصاحيصا ٠٠٠٠ولك منى كل الود

يا وليد نشكرك ياخي على سعة صدرك وسعيدين جدا بالتحاور معك ،،
وأنا يا خي بصدقك بدون أن تحلف ،،
وبعدين ليك الحق في أن تؤيد وتفعل ما تشاء ولا وصاية على حدا ( دي باللبناني)،،
إنت شايف البشير مناسب ونحن شايفين غير كدا ،،
ولمن أقول نحن ما بالضرورة يكون القصد التحدث بألسنة آخرين ،،
ولمن أقول طبول وصفوف فأنت لست المعني بالضرورة ،،
وبالنسبة لي فإسقاط البشير هدف أساسي أتمناه وأعمل من أجله ،،
الأسباب عددت جزء يسير منـها فوق ،،
وحسب وجهة نظري ان التجارب السابقة لا تصلح ان تكون سبب للوقوف مع المؤتمر ،،
وجن تعرفو خير من جن ما بتعرفو دي فيـها قولان ،،
فإذا كنت بتعني بالجن المعروف لديك جماعة المؤتمر ،،
فكيف حكمت على أعمال الجن الانت ما بتعرفوا أصلاً ؟؟
أعتقد بأن الكثيرين واقعين ضحايا لإعلام المؤتمر المضلل الذي يكرس لهذه الخدعة ،،
ونقطة تانية ،،
أرجو إنك تتمهل شوية قبل ما تخت يدك في يد المؤتمر ومرشحه في الحصاحيصا ،،
فمن ناحية المؤتمر فما تفتكر بأنـهم دايرين أكتر من صوتك لزوم شرعنة النظام والنأي عن الملاحقات المحلية والدولية عن جرائم مهولة ،،
والكلام دا مش تنظير لكنه واقع معاش ،،
فأنظر داخل خيمة المؤتمر المترهلة ،،
فستجدهم مقسمين لفسطاطين قدامى وجدد ،،
فامتيازات قوش ونافع والجاز ما زي امتيازات سبدرات وشيلا والزهاوي ابراهيم مالك ،،
ولهذا السبب فقط انا شائف الناس عايز تمكن لمن هو متمكن أصلاً على رقابـهم ،،
وبالنسبة لمرشح المؤتمر فما عندنا عداء معاه فقد كان موضع حبنا وتقديرنا ونشهد له بأكثر مما يقال هنا ،،
لكن لمن مشى ود الفادني وإحتمى بالمؤتمر وبسلالم المؤتمر المتكولة على رقاب الناس ،،
قلنا لا مش كرهاً في شخصه إنما رفضاً قاطعاً لسياسات المؤتمر التي لن يكون في مقدوره التبرم منـها ناهيك عن معارضتـها ،،
وأسوق ليك مثال بسيط يتمثل في الصراع حول موقف نادي الشبيبة الانت سامعو دا ،،
بيان الشبيبة أعلن الوقوف مع مرشح المؤتمر ابن المنطقة ،،
بمعنى خرجوا بالنادي من كونه مؤسسة رياضية اهلية تعبر عن راي اعضاء بمثابة ألوان الطيف ،،
حولوه لمؤسسة سياسية داعمة لخط أحد المرشحين التابعين لحزب سياسي معين وهو المؤتمر ،،
ود الخط البتبناهو المؤتمر الداير يسيطر على الاندية والاتحادات ويحولـها لمنابر وقواعد داعمة له للعمل على خدمة أغراضه ،،
الخط دا رفضه أعضاء الاتحاد العام ورفضوا مشروع قانون الهيئات الرياضية الذي يتم الاعداد لإجازته ،،
فالآن مرشح المؤتمر في موقف الاختيار بين توجه الدولة الشمولي الداير يكوش على الاندية والاتحادات ،،
وتوجه إتحاده العام الذي ينادي بأهلية وديموقراطية الحركة الرياضية ،،
ولهذا السبب أنا ما ممكن اقيف مع مرشح المؤتمر لأنه ببساطه لن يجرؤ على لجم فرس المؤتمر المنفلت ،،

ونواصل ان كان في العمر مدد
وبشكرك جداً تحملك عناء متابعة إطلالتي وإطالتي

المحبوب انت بتستبعد الزول الوحيد الفائز
كيف تستبعد عمر البشير وهو سيد المقعد المضمون الشعب كله معاه ولو في مليون صوتو لغير البشير اكون ديل الناس الكبار صوتو غلط من كثرى بطاقات الانتخاب ويعني كم واحد زيك ماعاوزين المؤتمر الوطني ولا البشير
لكن بشيرنا بفوز وبتحكر تاني رئيس جمهورية واقول كدا اعرض يوم الفوز ونحن بنعرض معاه واظنك من شدة الكيف بتعرض معانا

المؤكد فوزه الي الان هو المواطن عمر حسن احمد البشير أنشاء الله ......................
ســــــــــــــــــــــــــــــــــــــــــــــــير ســــــــــــــــــــــــــــير يا بشير