بكى محمد الامين في بتتعلم من الأيام ،، ومصيرنا في مُقبِلـها هل يُبكِينا ؟

تسمرت عيناي مساء هذا اليوم ، وأنا أُشاهد الاستاذ محمد الأمين ينتحب ، ويزرف دموعاً سخينة في رائعته بتتعلم من الأيام مصيرك ، مع إنـها ليست المرة الأولى ، فقد شاهدت الواقعة على الهواء مباشرة مساء عيد لم يُعد بحاله كما هي أعيادنا ، ومن حينـها ظللت دائم التفكير في أسباب الدموع التي جادت بـها عينا الاستاذ محمد الأمين على مرأى العالم ومسامع الدنيا ، وبالتأكيد قد تكون لـها عدة أسباب ، منـها ما خفي ، ومنـها ما بطن.
نعود إلى عصر هذا اليوم الاماراتي المغيم ، فقد ظللت أتابع الأغنية ، وأنا بين مصدق ، ومكذب لإحساس إنتابني في بداية الأغنية تماما ، وأصدقكم القول بأني قد بكيت قبل أن تأتيني دموع الاستاذ محمد الأمين ، وزادت حِدة البكاء عند اللحظة التي إستل فيـها الاستاذ قطعة من القماش الأبيض الناصع مسح بـها دموعه ، ولحسن حظي فقد حجز فريم النظارة بعض دموعي حتى تيبست هناك وكفاني الفريم شر الجرس ، أو كما يقال ، وما أبكاني حقيقة تلك الدلالات التي حملـتها الأغنية " بالنسبة لي بالطبع" ، فقد كانت أخطر مما كنت أتصور ، وما أن أفرغت ما تبقى لي من دموع والأغنية في نـهاياتـها ، إلا بالشجرة الخضراء " المابتغباني " تظهر أسفل الجـهه السفلى لشاشة النيل الأزرق أقصى اليسار ، مع شريط مكتوب عليه باللون البني الفاتح " ننتقل بعد قليل للساحة الخضراء لنقل إحتفالات فوز المشير عمر البشير برئاسة الجمهورية " أو كلام على هذا النحو ، وعندها إكتمات لدي الصورة ، والمتبقي من أيام حتى يناير 2011 ، فبكينا مع محمد الامين من بكرة ، فهل سنبكي من مصيرنا عندما يقرر الجنوبيون كرهاً الإنفصال ؟؟ إنه نعم الوأد وبئس المصير ،،
وأد الديموقراطية ومصير السودان
وبكرة حا تتعلم من الأيام مصيرك

بتتعلم من الأيام مصيرك بكره تتعلم
وتعرف كيف يكون القيد وليه الناس بتتألم
****
متين عرف العدل قلبك متين صابك برحماتو
متين سهر عيونك ليل طويله طويله ساعاته
وحاتك لسه ما بتقدر تقاسم قلبي دقاته
ومصيرك بكره تتعلم
وتعرف كيف يكون القيد وليه الناس بتتألم
وتتعلم
****
أقابلك وايدي ملوية واقاوم نظرتك ليا
لحاف غضب العمر كله حا يفاجأك يوم في عينيا
بالضربات كسرت ضلوع ومشيت من غير تحس بيا
ومصيرك بكره تتعلم
وتعرف كيف يكون القيد وليه الناس بتتألم
وتتعلم
****
بكره القيد بدون مواعيد يزورك يا ضياع عمري
تقول يا ريتني لو تنحيت زمان من بدري
قتال صبحت ليالينا قتال والسنين تجري
ومصيرك بكره تتعلم
وتعرف كيف يكون القيد وكيف الناس بتتألم
وتتعلم
"بتصرف"

المحبوب .................
هذه الاغنية ... لها صدى خاصة في نفس كل سوداني عاشق محب للكلمة الطيبة الحنونة .........................................
إنشاء الله يوم ما نبكي بالدموع على السودان ما يجي ... ونسال الله يجنب وطننا الحبيب الفتن ما ظهر منها وما بطن وأن يكفينا شر الذين يضمرون للسودان كل الشر .
السودان إنشاء الله لن يقسم ... ولكن عندما امريكا تشتري زم ناس الجنوب بانها سوف تجعل من غابات الجنوب منتجعات وتجعل من قطاطي الجنوب فلل ومسارح ومراقص وديسكوهات ، ويستمع أبناء الجنوب الذين لهذا الحديث ويعملوا على تحقيقه تبقي هنا المشكلة .
نحن في من زمن بعيد أبناء الجنوب كانوا مميزين عنا كانوا الطفل المدلل السموح له يسكنون الداخليات مجاني ويتعالجوا في كل المستشفيات والعلاج من الصيدليات مجاني .
أصبحوا الأن يستغلوا كل الشعب السوداني بهذا الانفصال ضيعوا السودان لسنين مرت واعتقد وكبت حرب الجنوب كلها وشفت هذه الحرب كم كلفت السودان وكم مات فيها من خيرة أبناء البلد .
إتفاقية السلام كانت مجحفة في حق الشمال إلا ان الشعب السوداني قابل جون قرنق بالورود والإناشيد ليقفلوا صفحات دامية في حياتهم وإستبشارا بعهد وحياة جديدة .
تواطا الجنوبيين وقتلوا جون قرنق مع الموساد لانه أصبح وحدوياً ونادي بالوحدة في كل المنابر ... وقال لي احد حراس جون قرنق كان هذا الرجل يبكي كثيرا عندما يكون لوحده للدماء التي سالت بلا سبب وقال مستر جون كان كلما يجلس وتذكر إستقبال اهل الشمال له يجهش بالكباء وفي اكثر من محفل قال سوف تكون هناك وحدة ولن يكون هناك انفصال ، رحل وترك لنا صبيان لم يستقوا من نهجه جداً .

المحبوب ... نسال الله ان يحفظ السودان ........... لا تبكي كثيراً ووفر لنا قليل من الدموع حتي نبكي غدا بدموع الفرح لوحدة السودان .

يا ابورائد يا رجل يا فنان وين انت
شنو من يوم ما فوزت بالكاس تاني ما ظهرت
يا الاغنية البكت محمد الامين دي والله الا يكون محمد الامين شاف مآلات الانتهابات وتداعياتـها
بعدين
ايام
وتتعلم
ومصيرك
بكرة
كلام لو مشينا بيهو تجاه الوطن بكون مرعب
تسلم على كل حال

يا أستاذ المحبوب.. مالك علينا..؟؟
ود الأمين و (بتتعلم من الأيام) كمان..!!
وحاة الله أنا بكاء الأستاذ ده منذ حضوري لهذه السهرة يومها علي الهواء و من يومها و أنا أبكي.. أي و الله حتي أنني أصبحت أتفادي الإستماع لهذه الأغنية الأخاذة.. و الله أنا أكتب الأن و (أقطقط و أقشقش) في الدمع الذي يملأ المأقي تفادياً لفضول صغاري من حولي أو أن تنتقل لهم الحالة..!!
لا أود أن أجنح بما كتبت هنا بعيداً عن مرماه (الأدبسياسي) إن جاز لي التعبير.. لكن أستميحك في مداخلة أخري أدرج بها و للمرة الثالثة علي هذا المنتدي بعض من خواطر عن هذه السهرة الغنائية و عن هذا الموسيقار الخلاق العملاق.
و دمت

في حضرة من نهوي.. الموسيقار/محمد الأمين

الأستاذ الموسيقار/محمد الأمين قمه شاهقه غير أيله للسقوط(فنياً) في سماوات الفن السوداني الأصيل، وتبقي كلماته و ألحانه أثراً لا يمكن أن يمحي أو يزال، تماماً كالمعادن النفيسه، لا يذيدها الطرق إلا لمعاناً..
ذاد الشجون، تتعلم من الأيام،الحب و الظروف،سوف يأتي،مراكب الشوق،زورق الألحان،مسيحيه،وحياة إبتسامتك،عويناتك،كلام للحلوه،الجريده،حلم الأماسي،بهجه،أربع سنين،خمسه سنين،حروف إسمك،بهجه،أسمر،همسة شوق،غربه وشوق،كلام زعل،وعد النوار،يا معاين من الشباك،بعد الشر عليك،أسمر،أنا و حبيبي وغيرهن حسناوات من الأغاني الوطنيه التي ترنم بها موسيقار الطرب الشجي الشفاف ليشاطر هذا الشعب عواطفه وأهاته مع الغرام و الثوريه..مؤكداً أن عاطفة العشق للمحبوب والوطن همساً منساباً وإن أبي الزمن!!؟؟
(في حضرة من نهوي)، سهرة تلفزيونيه رائعه قدمتها قناة النيل الأزرق في أولي أمسيات عيد الفطر الماضي..قام بتقديمها الدكتور الخالد/عمر محمود خالد، ترنم فيها(الباشكاتب) بباقه ورديه منتقاه من بستان فنه الباسق.. وكان ذلك في حضرة ثلاثه من شعراء الأغنيه السودانيه الأماجد،د/مبارك بشير،صلاح حاج سعيد والأستاذ/فضل الله محمد.. وغاب عنها لظروف السفر الأستاذ الشاعر والملحن/إسحق الحلنقي..
والبلاد تكرم الأستاذ/ محمد الأمين في مقبل الأيام، تقبلوا مشكورين سردي هذا.. كما لا يفوتني أن أشكر الصديق/عبود عثمان أزيرق الذي ذودني بنسخه(منضبه)لشريط فيديو لتلك السهره، كما لا يفوتني أن أذكر في هذا المقام أصدقائي وأشقائي أنور قاسم عبد الحفيظ و هزاع إسماعيل معاويه و وائل يوسف الخضر وثلاثتهم جمعني بهم(التنقيب) في نفايس الأستاذ الذي كثيراً ما طوق جلسات سمرنا إستماعاً،طرباً،أنساً نديأ و ودا..
الأستاذ لا يشكل عندي مساحه للإستماع و الطرب فقط، بل ذكريات خالده عالقه أبد الدهر مع أصدقاء أعزاء بهذه المدينه الفاضله و غيرها و طلاب نجيبون أماجد جمع بيننا عشق الأستاذ قبل الأستاذيه التعليميه..
كان طلابي في مدرسة عبد المنعم حسونه الثانويه بنين(أول السودان حينها لسنوات متتاليات) يترصدون حفلات الأستاذ بنادي الضباط بالخرطوم حيث يجمعنا الأنس الشجي خارج أسوار المدرسه.. كنت أحرص علي الحضور للنادي قبل بداية الأغنية الأولي للحفل و التي يترنم فيها الموسيقار بإحدي رائعاته ذوات الطرب المنضود.. ذاد الشجون، تتعلم من الأيام، الحب و الظروف، مراكب الشوق، و حياة إبتسامتك أو طائر الأحلام.. كانت و لا تزال إحداهن هي البدايه و كنت ولا زلت أسميهن المعلقات السته و لا زلت أنتظر السابعه من منتوج هذا العملاق الخلاق.. و عند حضور الأوركسترا الماسيه، نجلس نتكهن أيهن هي البدايه الموفقه دوماً.. و أقضي تلك الليله بين ما يطربني مفرطاً في الطرب و من يقدرني حد الأخاء..؟؟

أخي الرشيد ،،
شكراً علي الإضافة وياخي المكان مكانك أحكي لينا من فيضك خاطرة من حصدانك يالفريد في رصدك ،،
لاحظت يالرشيد لحدي الان الناس ما عرفو البكى محمد الامين شنو ،،
زول واحد قدر سألو مافي ،،
غايتو شجون فكاها في الهوا الداير يبكي يشيل ويبكي ويستريح

زائر

علاء الدين ابراهيم
اين انت يا رجل
تحياتنا للخال
مبارك شنقولي
والوجية عادل الشيخ

العضام عضامك ارمي لي من فضلك قطعة قدام بكانك يالفريد في عصصصصرك

المحبوب كيفنك

الزول ببكي لان الاغنية بتعني ليه اشياء كثيرة في تلك اللحظة

طوالي تقوم توديها للشجرة

يالله
لله درك يالمحبوب
انت( بتنكت) الحاجات دي من وين؟
والله العظيم انا اصابعي ماقادره تشيل اعصابي للكتابه
ووالله العظيم انا متمنيه في يوم اسمع الاغنيه دي للنهايه
وحتي هذه اللحظه لم استطع
وكل مايوصل الاستاذ (متين عرف الهوي قلبك )-تخنقني العبره واقفل الاغنيه طوووووووووووووووووالي
خوفا من الدموع والشجن والالم الي يعقب سماعي لهذه الاغنيه
الله يجازيك يالمحبوب

والله كان كده انتو متيمين شديد
وبصراحة الاغنية دي كانت بتعني زمن معين في حياتي
امكن المحبوب بعرف الزمن دا كويس وبعد ذلك اصبحت الاغنية بالنسبة لي تحمل معاني اخرى وكثير جدا تبقى الاغنية بكلماتها شامخة ولكن يتغير تفسيرها للانسان حسب الاحداث فمثلا ود الامين نفسه يغني هذه الاغنية لاكثر من اربعون عام وفجاة ابكته ولانه كان بغني هذه المرة وفي داخله حدث محدد ربطه بالاغنية

حبابكم واليوم السعيد الليلة جابكم يا ايمان وحافظ وابو عثمان
البكية دي فيها سر غريب
لا معروف في الكلام
لا معروف من المزيكا
لا معروف من بكرة ولا من المصير
اللهم اجعلو خير

بكري طبعاً انتو قلوبكم حجر جنس الغنا المميز دا ما بنفع معاكم ،،
عشان كدى جبنا ليكم القدركم أها قوم تِب وأعرض ،،
المدفع الرزام طلقاتو من صدرك
يا جبل الضرا المافي سيل حدرك
النار ولعا وإتوطا فوق جمرك
بعدين تاني يا سيدي اللمانتي ليك عندكم واحدة تانية بتقول :
يا نفس أقسمنا لتنزلن
لتنزلن او لتكرهن
قد اقسم الناي وشد الرن
مالي أراك تكرهين الجنة
مالي أراك تكرهين الجنة
الجنة
كفاية ولا قرفنا

طبعا يا بكري كفاية في مصر
وقرفنا بالقرفة والنعناع عندنا في السودان

الاستاذ المحبوب لك تحياتى والاسرة

شغلتنا أم مشاغلاً ما بتنتهى...... عن المتابعة

بالله قولى يا أستاذ ... الما ببكى الاستاذ شنو ؟؟؟؟؟؟؟

إذا ناس ما تعلمت فى ربع قرن من الزمان ...... هل تستطيع أن تتعلم فيما تبقى من شهور أو أيام .. ؟؟؟؟؟؟؟؟؟؟؟؟؟

وبتعلم من كان له إستعداد لذلك .......

الله يرحم السودان الكبير ..... والايام الجميلة .........

وسوف نزرف قريباً ماتبقى من دموع على الاطلال .... وحينها لن يرى دموعنا أو يسمع نحيبنا غيرنا ...........

والله أستر من ما تحمله الايام ........ واللهم أجعله خير....

مع تحياتى

المشكلة يا عوض الاخبار البدت تتسرب
معارك رهيبة في دارفور
وناس الحركة اشتكوا من تحركات جيوش المؤتمر من معاقلها في النيل الازرق وجنوب دارفور متجهة نحو الجنوب
البحزن الى الان الناس ماخدة الموضوع هظار
وبكرة قريبة وحا نشوف البحصل

علييييييييييييييييييييييييييك الله يالمحبوب
ماتحول البوست دا لي منبر سياسي (صريح)
خلينا مع روائع ابو اللمين

المحبوب والله ذكرتنا ايام خير السيد الله اديه الصحة لو عايش ويرحمه في كل الاحوال

المحبوب رجعتنا سنين ...

وخليتنا ندندن بهذه الأغنية الفريدة ... من أول امس خارجة داخلة داخلة خارجة ( ميتن عرف الهوا قلب متين... ميتن صابك باهاتو متين )

انت عارفه يا ايمان بعد شويه حا نتكلم عن الأغنية طبعاً مش بالعمق بتاع أهل الغنا ،،
بس كمستمعين مساكين سارقانا السكين ،،
طبعا في جماعه الصبر غلبن ناس ابو ( هناي + هناي ) = شجدر حراز خدارو موسمي (خداري البي حالو ما داري جخاني)
ولمن غلبن الصبر كمان دايرين يغنوا معانا وقال ايه دايرين يزرفوا الدموع ،،
هو انتو خليتو ليكم دمعة ولا ملاح لايوق ،،
ما غنيتو وغنيتو ( فتح الغين التانيه ) تحت الشدرة لمن قلبكن انقطع وزرفتو الدموع حباً وشوقاً وجرياً ورا المحبوب اللعما شايل كسار التلج ،،

المهم تسلموا كلكم

هل بكي أستاذنا محمد الأمين علي الأيام الجاية ؟ ولا علي المشت وتسربت ؟ أنا بفتكر أنو ود الأمين ببكاءه ده أجاب علي السؤال وهو أن ساسة السودان كآل بوربون لايتعلمون شيئاً ولا ينسون شيئاً وتبقي الأيام بدروسها ولكن مين اللي بيفهم ويتعلم ؟

» حادث مؤسف يؤدى الى اغتيال الامين محمد الامين
» رئيس لجنة تكريم المطرب محمد الامين ..من الحصاحيصا .. الف مبروك
» هند جابر محمد الامين
» الاستاذة حنان محمد الامين في رحاب الله
» الموسيقار محمد الامين يودي تكبيرة عيد الفطر المبارك