سجل احساسك باالغنية البتحبها

بالجد ألأغنية دي قمة الإبداع والروعة

لســـــــــان الحــــــــــال
كلمــــــــات : حاتم حسن الدابى
غـــنــــــاء : جعفر السقيد
معذرة.. لو معاك منى الكلام حـــــره .. و معليش الخطاب كاتباهــــــو مضطرة
حـــــــــــرام والله مننـــا إنت تتبرا .. خمسة سنين تفوت تجى فيها فــــــد مرة
وراك أنا كم شقيت وعشت فى مرة ..وتعبتا مع الصغار والهم للعيون غرة
بيخاف الغرق الغاص ورا درة ..
حليلى أنا الزمن زى فاطرى ما انفر .. وخمسة سنين غياب مابتحملن حرة
أنا الحاضنة العذاب وآمالى محتضرة.. وإنت الفى النعيم ما خات حساب بكرة
مسكينة التقول فى الإغتراب سترة .. وتتناسى القروش فى يوم تكون ضرة
حليل زمنك وكت عايشنا بالأُجــرة .. يا ريــــت لا عرفـــــــت ولا مرق برة
**********
الكاتمة في جواي كتير
متملك الجوف والعصب
ما كنت دايري أقولو ليك
لكن لسان الحال غلب
ما بنسى يوم ودعتنا
وسافرتا في غرة رجب
خليت وراك الدار حزين
يتباكي والدمع إنسكب
أعذرني والله العظيم
لولا الضرورة أنا ما كتب
وأنا خايفي في بعدك يكون
الضاع هو ضعف المكتسب
اليوم داك ناس البلد
هنوني شياقية وعرب
قالوالي مبروك خير وجاك
يكتب سلام زول إغترب
قالوالي دوب نجم السعد
طلاكي من بعد اتحجب
يا دوب بالك يستريح
تنسي العذابات والتعب
فضلت أحسب في الشهور
قاعدالي فوق نيران لهب
صابري وحريصة على الولاد
لا يبقوا للريح في المهب
سديت خانتك من مشيت
قايمابو واجبي كأم وأب
والاسرة يضنينها المسير تتهاوى
لو ما فيها رب
والله ما بنكر جميلك
لينا برضو ثناك وجب
موكب هداياك ما اتقطع
كان سترة في الزمن الصعب
لابسين وماكلين والنعيم
كايلنا في يوم ما نضب
وعايشين عيشة المترفين
طولنا ما الطبع إتخرب
حامدنو كان قلت الأكل
والله للتين والعنب
أما الجناين شيلها تب
للفواكه والرطب
البيت مفرش بالحرير
وملايني إيدي بالدهب
لكن خسارة على محل
عاش سيدو خمسة سنين عزب
الشئ المهم ما قلتو ليك
ليهو إنتا ما ظنيت حسب
كبروا الصغيرونين خلاص
وخايفالهم الطبع الكعب
وصلوها مرحلة الخطر
والأمن ما زال مستتب
وأنا كنت قادراهم زمان
لكن بعد كبروا إتغلب
حصلني قبل الجد يفوت
دوب إنهم فوق العتب
قبال نحصد الخير ندم
وما بيجدي لو لمت وعتب
خايفالهم الطيش في الدروس
وما برضى لو واحد رسب
خوفي المتعبني الكبير
بعدين يمرقوا بلا أدب
وريتك الحاصل على
لا فيهو ثورة ولا غضب
شان الحديث ما يبقى ني
والواحة يجتنفها الجدب
أنا قلبي ما زال لسة حي
ونجمو الملاهج ما غرب
وآخر كلامي تردو لي
لا أبقا بكرة أنا السبب
الكاتمة في جواي كتير
متملك الجوف والصعب
ما كنت دايري أقولو ليك
لكن لسان الحال غلب

رد المغترب لسان الحال
كلمات الشاعر : علي عبد الماجد

أنا ما كنت داير الاغتراب
لكني مجبور ابتعدت
أرجع وأقول إنتي السبب
قلتيها لي ما بترضي بي
عيشة وسط
دايرها فوق عيشة رغد
قاريهو في عيون الصغار
طلباتم الما ليها حد
حسيتو في عيناك سؤال
احترت ما لاقيلو رد
نظراتك الحادة النبال
سيطان بتلهب في الجسد
وانا كنت صابر زي بلال
كان ردي ليك أُحد أُحد
الكاتمو في جواي كتير
من حرقتو الجوف اتهرد
ما كنت قاصد أقولو ليك
لكن لسان الحال سرد
ما بنسى يوم ودعتكم
وبي حسرة غادرت البلد
ختيت على جرح الفؤاد
فُرق البنيات والولد
ما اعتدت أفارق للصغار
والوجعة فرقت الفي المهد
زفر القليب آهات حزان
حسيتبو جواي ارتعدت
كان انتي شوقك لي بحر
كيفني انا المكتول كمد
خليت معاك الروح والقليب
و سافرت بي باقي الجسد
عارفك حريصة على العيال
فوقك بعد الله اعتمدت
في الحارة تسوي لك رجال
للمايلة والمحتاج سند
اتغشن القالن وراي
هلن لي نجمات السعد
ما اتغربن وضاقن معاي
مر عيشة الهم والنكد
لو عني كررتي السؤال
أنا بيني وبين الفرحة سد
سهّيت وغايتو علي حال
يعلمو الفرد الصمد
عزّابي في قاطوع صغير
في ضيقو زي ود الأحد
في السوق صباحات الله خير
حايم وازازي بلا غرض
الزي بيهو الليل يطول
يتقلى فوق جمرو الوقد
اتوقعي البجي ليك يقول

في الغربة محبوبك فقد
البي ده ما بيغباهو زول
يحكيهو طرفي الما غمد
سنتين افتش في كفيل
لي حالي فد زول ما نشد
في التالتة رب العزة قال
حامدنو حلال العقد
مكتب ولا كان في الخيال
في الفارهـ الدور قعدت
عربية والراتب كبير
ورابطلي خرزة من الحسد
بليت عروق قلبي المرير
عِزة ورفاهية وسعد
لكني يا حظي التعيس
تميتلي شهرين واترفدت
قالوا الوظيفة اتعممت
محجوزة لي أهل البلد
شوفي الضرايب فوقي كم
كان جيت أفكر في البلد
وزي الكلام ده يزيدني هم
ويرفع لي إفراز الغدد
قوليها لا تهابي الحروف
كان في غيابي الشوق برد
البي ده كلو من الظروف
والله ما لي فيهو يد
اليبقى في نفس الحريم
ماخدنو من فك الأسد
بي ضحكة او خطوات جحيم
لي دمعة اتبلابه خد
أنا شان رضاك أرحل بعيد
لي غربة لي دمعة وسهد
وأنا فيها ساهي البال شريد
أفكاري فيكم وفي البلد
سامحيني لا تابعي الظنون
ما زلنا بيناتنا الوعد
والغربة من أجلك تهون
وطعم العذاب يصبح شهد
جوابك الظاهرو الوداد
كاتباهو بي دمع الحرد
يجي ردو في نفس المعاد
نتلاقى طيارة الأحد
الكاتمو في جواي كتير
من حرقتو الجوف اتهرد
ما كنت قاصد أقولو ليك
لكن لسان الحال سرد..