ممكن نتلاقى!!!!

يا جماعه ...
انا عندى اقتراح .. نعمل حاجه ..اى حاجه .. رحله .. لقاء..
نقعد .. نتفاكر .. نتناقش .. نتشاكل .. نغنى .. نتونس ..
نحدد اليوم .. ممكن تكون فى شكل رحله وفيها غناء .. نشوف الحصاحيصا دوت كوم ماشه كيف وحتمشى كيف؟؟
افيدونا
بكرى

والله يا بوس الفكرة تراودنى منذ ايام وتتخمر واذا بك تفجرها ... طبعا المسالة فيها شتات وداخل .. ناس الشتات هسه نخليهم .. اها ناس الداخل ما يدونا لمة حلوة اكان فى الحصاحيصا اكان فى الخرتوم اى مكان تتلاقو نكون نحنا معاكم وطبعا التوثيق مطلوب .. والفكرة حلوة لانو فى ناس اتعرفت على بعض من خلال المنتدى بس ماشافت بعض ... وياريت اللمة تكون مستمرة يعنى تتحدد وناس الشتات وكتين يرجعو يتلموا مع الناس ...

يا ريت ،،
فكرة ساطعة ،، بتاعت زول مليان حنان ،،
تسلـــــــم يا راقي ،،

لو عايزين ( شربوت ) كلموني ،،
أمين ركابي ،،
وقـــ المغارب ـــت

فكرة حلوة والتعارف شئ جميل ولكن
انا شايف لسة دة ماوكتو ........احسن نتعارف اكترواكتر عبر هذا المنتدى حتى نعرف من هو حسن وراق وبكرى ووليد والصادق وامين الركابى وابوحراز وراشد وعبد المنعم سيد احمد وابناء تلودى ومحمد جبريل وجندى .............الخ
هنا فى المنتدى من الممكن الواحد ان يتعرف على كل واحد معرفة حقيقية عبر كلماته ومشاركاته ونقده وتاييده ثقافته وميوله وبعد ذلك يكون اللقاء نافلة
المهم هو رائى الشخصى وان كان خطاء فهو رائ وبس
اخوكم
المغربى

أمين الركابي كتب:

يا ريت ،،
فكرة ساطعة ،، بتاعت زول مليان حنان ،،
تسلـــــــم يا راقي ،،

لو عايزين ( شربوت ) كلموني ،،
أمين ركابي ،،
وقـــ المغارب ـــت

امينكو بركة الجيت ... وين كت طاشى ؟
الشربوت ان ما عندك اكون وين ؟ ماعدمناك

الاعزاء المتداخلين ..شكرا
اول حاجه ياراشد امين ده بعد الطشه دى انا خايفو يجى بى حاجات تانيه...
الاخ الصادق انت اخير ليك تعرف الناس بالعديل ولا بالفه ياخى انا ماعارف اكون فى ولا مافى لكن حسن ده لو شفتو لايف الا يمرقنك كرعينك..
الكونى ..غيب وتعال بحلو الكلام .. انت هسع وين..بره ولا جوه!!!
الحبيب حسن .. انا مولع بيكم .. وكبريتك لمها عليك..
كونوا بالف صحه..
بكرى

الفكرة جميلة يادكتور لانو انا من جيل جديد كل مااشوف لي اسم بسأل الوالد والوالدة فلان الفلاني دا بتعرفوه وساكن ياتو حي انشاء الله يتلم الشمل وتتعارف الناس

والله أنا لى من الرحلات سنين عددا وفى الزمن دة ممكن بى لاب توب البرة والجوة اطلعوا رحلة عاااااادى ومعاهم ناس الخرطوم ان شاء الله فى الغابة بتاعة المقرن بى فواصل بتاعة أحمد الطريفى وأنا ح أتبنى الفكرة الرائعة دى لو زاد عدد المؤيدين قولوا خير...
فى زول ما بعرف حسن وراق يا مغربى وللا دة ضرب مثل؟؟؟؟؟.