جزارة الحصاحيصا ممنوع الاقتراب والشراء وصحة البيئة خرجت ولم تعد ( توجد صور )

الحل نتصل بولاية الخرطوم ، يدونا عنوان الشركة الصينية السوت ليـهم الباصات ، وناخد العنوان ونتصل بالصينيين يعملوا لينا بصات ، وبدل الكنب يعملوا ترابيز صغيرة الحجم ونضع الترابيز قصاد الشبابيك ، والبص يكون عندو سواق تابع للمحلية ، وفي مقصورة السوق يعملوا لينا تربيزة تخصص للبيطري ، يقوم البص من الصباح يمشي السلخانة ، السلخنجية يركبوا من نقاط التجمع في أبوفروع والصداقة بالنص ، والامتداد والمزاد والحلة الجديدة ، الحي الشرقي والحي الاوسط ، وبعداك المايقوما واركويت ، وقريب صلاة الصبح تكون البصات وقفت في السلخانة بالصف ، ويخصص مثلاً البص رقم واحد للحوم الضان ، والبص رقم اتنين للحوم الأبقار ، والبص تلاتة للروسين والعفشه ، والبص رقم أربعة العكو والجلود ، والبص رقم خمسة للوزن بالقباني.
وحوالي الساعة السادسة صباحاً ينتظر المستهلكون البصات حسب الأرقام ، يعني داير كمونية ولا جقاجق تنتظر البص رقم تلاتة ، وطبعاً حاندي كل واحد من الجزارين بطاقة ممغنطة للدخول للبص عشان التقطيع والتوزيع ، وفي آخر اليوم البصات كلـها تمش لقسم التلج والتبريد عشان اللحم الباير وتفرغ الحمولات هناك لحفظها وبيعها لاحقاً بأسعار مخفضة.
وبعد ذلك نودي البصات البحر جنب الفكي الزوين للغسيل والنضافة ونتمرا ونوديها تقيف في شجر المحلية ، وطبعاً الشركة الصينية ما حا تعمل لينا البص بأكتر من 100 ألف دولار بالله فكرة ولا ما فكرة