كفارة عواطف عمسيب ((يوجد حرامى ))

يا عواطف انا امس اتصلت بواحد فكي لزوم الحواطة وكدا ، تصوري الفكي قال لي شنو " يا ولدي ما تتعبوا ساي الموبايل دا الشالو ختاهو في قندراني مليان حديد وماكينات ، والقندران اتحرك من الحصاحيصا وإتجه شمالاً ، لكن الغريب في الأمر الفكي قال لي شاف الماكينات تبكي بكا شديد وموبايلكم دا يضحك ولا هاميه ، في مكنة جنبو سألتو قالت ليهو " هويا البتضحك دا إتا ما ذاتك مسروق زينا البضحكك شنو؟" اها موبايلكم إنفقع ضحك وقال ليـها حسب رواية الفكي بي عضمة لسانو " سجم خشمكن إتن ما مسروقات ساي إتن مسروقات ومبيوعات ، وكان ما عارفات النحدثكن ... حا يودكن مدينة جياد ويسوحوكن في الغلايات وإهرسوكن ويعجنوكن زين لمن تجيبن الزيت ، وبعداك إمكن يسوكن مجروسات ولا بالميت يسوكن مظلات لي ناس الدفاع الشعبي وتاني اليوم كلو جهاد نصر شهادة"
وقامت المكنة قالت ليهو "وإتا ؟ " " أنا والله في الحقيقة إمكن السارقني دا يشغلني يومين تلاتة ويسرق ليهو واحد تاني ، وإديني لي بتو البتقرأ في الرباط وخلاص تاني داير شنو في الدنيا دي عليك الله"