الشيخ ســــيرو

زائر

لاشك أن عرس الشيخ الغنا ليهو الكابلي في غنية الشيخ سيرو...كان عرس يحكو عنو وقعد مقالة لي يوم الليلة... ووصفت الغنية الشيخ كيف كان عرسو في غاية التبذير... والإسراف.... حيث كانت الشيلة على حسب ماورد في الغنية تتكون من :- دخل البقعة جالا وكمل قماش النصارى(اشترى القماش الفي السوق جت) تلاتة ارادب عشا..وتلاتة ارادب غدا (ما عارف الفطور ليه ما حسبوهو)... وتلاتة قدور محلبية... تلاتة قدور صندلية..تلاتة قدور ريحة نية... ونسيبتو بعد دا كلو زعلانة وقالت شوية حرمان ما يدخلن عليها...طبعًا الشيلة تتضمن شيلة الدكان... دا بالاضافة الى انه اي الشيخ العريس.. دفع المائة للمشاطة.... حكو قبل ايام عريس يطلق عروسو في الكوفير لانها جايبه معاها بنات اهلها وصاحباتا عشان يتكوفرن... علي حساب العريس.... العريس احتجا العروس مرفت عليهو واظنها كانت النوع النضمو دُراب...قالت ليهو انت وقت ما قادر تدفع حق الكوفير العرس العليك شنو؟.. فما كان من العريس الا ان يجر العروس من اضانا.. ويركبها في العربية .. ويوديها ويطلقها.. عند ابوها ... ويمشي... اما صويحبات الكوافير ما معروف خبرن شنو؟...ارجع للشيخ ود الشيخ مصطفى.. الذي في مناسبة عرسو كسا الناس هدوم لي حدهن (العريان قلب الكسا)..لأنو قطعًا قماش النصارى دا ما داير يسويهو جلاليب للعروس....ولو كان هو مكان العريس الطلق عروسو صاحبة الكوافير... لكان كل الناس اتكوفرو في ذلك اليوم المشهود... كما ذكرو لي ان احد الزيجات في الخرتوم كانت الزفة بي فيل... والحفل باصالة نصري مما جعل العروس تدخل في هستيريا من البكا المتواصل وهي مصنقرة في الكوشة... لانو الناس خلوها هي وقعدو يتفرجو في اصالة .. وهي مسكينة ليها اكتر من شهر تتحكحك وتتنضف وتتجيه عشان اليوم دا... ويجو الناس في النهاية العميان شايل المكسر ويتفرجو في اصالة؟.....انا المحيرني الفيل جابوهو من وين؟... وبعدين اصحاب الفيل ديل ما سمعو بالسورة (ألم ترى كيف فعل ربك باصحاب الفيل)؟.... حساب شيشنة وحساب زول علاقتو بالقروش لا تتعدى حدود العشرة مليون لو افترضنا ان متوسط تكلفة حفلات الزفاف في الخرتوم هي عشرين مليون... وفي الشهر يكون هناك تقريبًا عشرين حفل فان تكلفة ميزانية حفلات الزفاف في الخرتوم تكلف تلاتة مليارات وستمائة مليون جنيه في السنة... وتلاطاشر مليون شاب وشابة يصابون بالإحباط وتجيهم نفسيات....عشان ما قادرين يعرسو.. وما يفوق الالف طفل لقيط يذهبون الي المايقوما ومثلهم الى احشاء الكلاب الضالة... دا غير حالات الاجهاض غير الشرعية...المهم !... اغلى حفل زفاف في العالم هو حفل زفاف ابنة الملياردير الهندي لاكشيمي ميتال امبراطور صناعة الحديد الصلب والفولاذ كلف ستين مليون دولار.. ونسيبتو قالت شوية... وكان الحفل في قصر فرساي في فرنسا... ومعزومين فيهو مية وتلاتين شخصية عالمية... بي وليداتهم....عشان يجو يصوطو العرس!!!....واغلى فستان زفاف بلغت تكلفتو تسعطاشر مليون دولار...!!!!....بينما يبلغ ايجار فستان الزفاف عندنا تلاتة ملايين.. دا الفستان البيقول انا انا... برضو قالو واحدة عروس من عروساتنا ماشة والعريس جنبها واظنو من الفرح والهوشة عفص فستان الزفاف والعروس قربت تقع.... اتلفتت عليهو وجرت فيهو نور طويل وقالت ليهو ما عفصتا الزفت دا بالرغم من انو العريس قال ليها بسم الله فوقك.. فما كان من العريس الا ان لوى ضنب الفستان الزفت في يدو وقبل راجع كاري العروس وراهو ... ووداها جنب ابوها وقال ليهو استلم الزفت بنتك دي طلقانة !!!!
(سجيمان - الباب البجيب الريح )

اغنيه الكابلى مع بساطتها بس مليانه تعبير رغم الشيله المطر الكباها للنسيبه مش العروس عشان اسكتها برضو قالت حرمان ميدخلن على ..كان زمان الكلام ده هسى اخى حافظ البنات بتمو الشيله للعريس وبشيلو سوى بس هو كيف اكون جادى .
المستويات هى البتعمل الاحباط لمن تشوف اعراس الفوق تجيك نفسيات عديل ناس فطور العريس البى الدفار والصالات الفخمه والبزخ الا نهائى.... قول يالطيف

جداغنية الشيخ سيرو مليانة بزخ بس ايمكن كان قادر على كدة بس الشباب الزمن دا بحن عليهم لانهم مابقدروعلى سوات الشيخ وبعد دا اجو القدح كل تكلفتة خمسة مليون ماعليك الا توقف عربيتك وتشيل .بس قول جبت ليك مال عشرة مليون ارجع ليك خمسة مليون فى قدح وماتنسا فى رقيص عروس مليون وفنان اتنين مليون وصالة خمسة نجوم خمسة مليون .....الخ.بس فى علم جميل وبسيط الخمسة حقت الفطورتعرس ليك لحد الخروف حق الحلالة .ويكون جيران ناس العشرة مليون بس الكلام على القناعة.

انا افتكر كل حد يعمل قدر قدرتو يعني العندو ذي الشيخ اليعمل عمايل الشيخ
والماعندو يعمل قدر العندو
وفي ناس بترضي يعرسوا بالفاتحه(ومالو؟ اصلو العرس بالفاتحه ياناس ماحلال؟)
المهم الاتفاق

» الف مبروك لرحاب احمد الشيخ ولكل ال احمد الشيخ
» فى زمة الله / د/يحي الشيخ
» الترحيب ب هجو الشيخ
» أمونه بت الشيخ حمد
» مبروك منارعادل الشيخ