الحاجة طلعت تفتيحة

الألفى أيام شبابنا الباكر ظهرت فى العامية السودانية بعض الالفاظ التى لم نكن نعرف مصدرها لكننا كمراهقين فى ذلك الزمان الغابر كنا نستخدمها مع بعضنا البعض كلغة شبابية جديدة وهى عبارة عن كلمات متجانسة أذكر منها (السنقة فى الرنقة) و(القزازة فى البزازة) و(والعملية فى النملية) . وعلى الرغم من أن هذه العبارات عبارات خاوية لا تشير أو ترمز إلى شئ[/size]

] معين مناسبة هذه المقدمة هو أن جارتى (س) قد حكت لى وهى شبه منهارة أنها لاحظت أن إبنيها المراهقان يتحدثان بلغة غريبة عليها لم تفهم منها شئ .، قلت لها إن الأمر بسيط فما عليك الا التوجه للمكتبة القريبة من المنزل وشراء كتاب (القاموس الرائع فى الزمن الضائع) الذى قام بكتابته (واحد من شباب اليومين ديل) .
قامت جارتنا (س) بالذهاب إلى المكتبة وشراء القاموس وبعد أن قامت بتصفحه أصابها الهلع لما قرأته من مفردات ومصطلحات يستخدمها شباب اليوم.
فى مساء ذات اليوم سمعت إبنها الأكبر يخاطب شقيقة :
- أيه رائك نقوم ندقس الجلكين ونديهو (مكنة) نقول ليهو معانا واحد زميلنا أبوهو إتلحس عشان يعمل لينا (زيدان أبراهيم) للضحاكات نقوم نظبط بيها (عشة الفلاتية)
ما أن إستمعت جارتنا (س) إلى ما قاله إبنها مخاطباً شقيقه حتى قامت بتصفح (القاموس) بسرعة فى محاولة لفك الرموز لتجد أن الترجمة هى :
- أيه رأئك نقوم ندقس (نغش) الجلكين (الراجل الكبير يقصد والده) ونديهو مكنة (كضبة) نقول ليهو واحد زميلنا أبوه إتلحس (مات) عشان يعمل لينا زيدان أبرهيم (زياده) للضحاكات (القروش) نقوم نظبط بيها عشه الفلاتية (العشاء) .
بعد خروج إبنيها عشان يعملو (عشة الفلاتية) بعد ان مشت (المكنة) فى (الجلكين) جلست جارتنا (س) ممسكة بالقاموس وقد ألت على نفسها أن تقوم بحفظه (صم) حتى تستطيع أن تتعرف على ما يقوله إبنيها من كلمات وعبارات وتراكيب بعد أن أضحت هذه اللغة هى لغة التخاطب بينهما فى كثير من الأحوال .
فى اليوم التالى بينما كانت (س) وإبنيها يجلسون يتناولون الشاى بالمنزل بعد عودتهما من الجامعة سأل الأخ الأصغر شقيقه :
- عملتا شنو مع (الحنان) القاعد (تحنك) معاهو اليوم كلو فى الكافتيريا ده؟
تعرف اليوم كلو أقعد (أحنك) ليك فيها لكن هى عاملة ليا (عبدالعظيم حركة) بس أنا مرات بعمل ليها (الفاتح النقر) ومرات كده بعمل ليها (عمر إحساس) وكم مرة كده عملت ليا (شرحبيل أحمد) لكن أنا ح أقوم أعمل ليك (جوزيف لاقو) واقوم أمشى أعمل ليك (محمود الخطيب) للبقاقة دى قالو أبوها (مقندل) وماسك كهرباء شديده
- طيب أفرض قال ليك إنتا لسه وعمل ليك (الجزيرة أبا) ؟
- ما مشكلة بعمل للموضوع (كمال ترباس) طوالى
- طيب وكان ورطك وقال ليك عمل ليكم (إيهاب توفيق) ؟
- خلاس أقول ليهو نعمل (عقد الجلاد) بعد ما نتخرج
- طيب أفرض قال ليك تعمل (عرس الزين) طوااالى
- ما (بدق ليهو جرس) طوااالى
- وكان أصر على (عرس الزين)؟
- بسيطة بعمل ليهو (الفتيحاب)
معانى المفردات :
- الحنان = الحبيبة
- أحنك = أقنع
- عبدالعظيم حركة = عاملة حركات
- الفاتح النقر = بيفتح ليها كناية على عدم الإهتمام
- عمر إحساس = يعمل فيها حساس
- شرحبيل أحمد = الشرا وعدم الحضور للمواعيد
- جوزيف لاقو = مجازفة
- محمود الخطيب = الخطوبة
- مقندل وماسك كهرباء شديده = مرتاح وعندو قروش كتيره
- الجزيرة أبا = رفض
- كمال ترباس= يقفل على الموضوع
- إيهاب توفيق = الموافقة
- عقد الجلاد = عقد القرآن
- عرس الزين = الزواج
- دق جرس = للرفض بشدة
- الفتيحاب = يفتح ليهو
وسط دهشة إبنيها ما أن إستمعت (س) لذلك الحوار حتى هبت واقفة بعد أن تحزمت بثوبها وهى تصيح :
هووووى يا أولاد إنتو قايلينى (فاره) وما (ناقشة) حاجة .. إنتو ما عارفينى خلاس بقيت (تفتيحة) وشايلا (مفاتيحا) .. هوووى يا أولاد أقيفوا بعيد (وجرو شخيط) وأوعكم تقيفو فى الظلط وتتكلمو غلط ، أبوها شنو (المقندل) وماسك كهرباء .. نحن ذااااتو هينين ولا لينين نحمد الله الغدا ضأن و التحلية برتكان والعشا حمام و التحلية شمّام و تربية بيت و فرش موكيت ولدونا فى الإمتداد و حبّينا فى البلاط .. قال شنو يمشى يعمل عقد الجلاد .. إنتا لسه بصرفوا عليك يا الما عارف أيدك من كرعيك .. يودوكم للقراية تحنكو (الجكساية) .. (وهى تجر فيهم نور طويل)
- سجم و كمان عدم فهم ؟!!
- (فى صوت واحد) : معقوله؟ الحاجة طلعت تفتيحة !

كسرة :
أيها الأباء .. إيتها الأمهات .. عليكم بإقتناء القاموس الرائع فى الزمن الضائع حتى لا تكونوا (فارات) ويقوم الأولا يدقسوكم

)

رساله وصلتني في بريدي الاكتروني

كسرة مني:

وطبعا هذه لغة قديمة يعني ياناس المحبوب الان في لغة جديدة دي قاموسها لسة ماطلع وربنا يستر علينا منها وخوفي يامحبوب يجيني حسن ويسخن براسي بكلمات لا انزل الله لها من سلطان لكن برضو اخوك تفتيحة مابدقس لكن انت فطومة بتلف براسك

</BLOCKQUOTE>

كيموفى زول بلدو فى الامتدادبحبا فى البلاط اسالنانحن الولدونا فى الدايات وحبينا فى البلاط وبعدين حسن مع الفيس بكالحايم ساكت ده يبرلم عشره زيك لمن تجيب نضارتك وتجى يكون شخبط ليه عشره حيط والسنجه فى الرنجه

والله فعلا الجاحة لطعت مجفتحة

يا كمال ذكرتنى ب (العملية فى النملية ) عمنا محمد عبدالغفار من
مدنى ،فى إحدى جولاته اليومية فى السوق الكبير بمدنى ، لمؤانسة
اصدقائه وسط حفاوتهم ، عزومة الشاى والجبنة ، ودع أصدقائه متجهاً الى
منزله ، فاذا بالشباب يصيحون عليه :
العصاية فى الكباية !!
عم محمد : ياربى الاولاد ديل ...
الشباب : العصاية فى الكباية !!
عم محمد : يا ولادى زمان كنا بنقول العملية فى النملية !! دا كلام
جديد ولا شنو ؟؟
فعندما كترت عليه العصاية فى الكباية !! وسوس لنفسه ،الاولاد ديل
برئين ما بيكونوا بيقصدوا كلامنا العجيب داك (العملية فى النملية ) كدا النشوف
عصايتى دى مالها ، فاذا به يجد عصايته لابسه فى كباية !!
####
ياكمال ، تعرف شباب الايام ديل ما يحيلك منهم الا الشديد القوى ! لا تفتحيه
أو ولوكنت عندك مفاتيحها !! فشد حليك !! والبليد المحن لابد يلولى صغارن .

والله يا كمال مبالغه ده كلها من الاجازه نحنا بنمشى وبنجى مسطحين ساى

» يوم طلعت القمرة
» يوم طلعت القمرة..الخير يا ابوى تودينا لى اهلنا بيسالوك مننا..
» يا معتمد الحصاحيصا .. برافو عليك .. طلعتا تفتيحة لكن عليك بابجيقة و اعوانه الزبالعة حتي تدخل قلوب ناس الحصاحيصا!!!
» الموزة الجدعوها لـ"داني ألفيس" وأكلا !! الله الله أنا قايلا هدية !! للأسف طلعت عنصرية دا كلام دا ؟؟
» الحاجة ام جمعة تاج الدين يوسف المقدم