(صلاح ادريس ) فى الحصاحيصا دوت كوم

الخرطوم :عمار تلودى
قال رئيس نادى الهلال السيد صلاح ادريس ان المستشارية القانونية لنادى الهلال
صباح أمس طلب مراجعة لدى المحكمة العليا في مواجهة القرارات التي صدرت الأسبوع الماضي من المحكمة ، وقالت بعدم شرعية مجلس إدارة النادي بعد إبطالها لإجراءات الجمعية العمومية التي انعقدت العام الماضي ،واوضح الارباب ان المذكرة التي شارك في صياغتها (22) من القانونيين طالبت المحكمة بمراجعة وإلغاء الحكم لمخالفته القانون واستعادة حكم محكمة الاستئنافات المؤيد لقرار المفوضية.
وعن المدرب الجديد كامبوس اوضح الارباب صلاح ادريس انهم وجهوا المكتب التنفيذى بتكملة اجراءات وصوله لكى يقود الفريق فى الدورة الثانية ودورى المجموعات وقال الارباب ان كامبوس يعتبر من اميز المدربين فى الساحه ويتوقع منه ان يحقق للهلال الكثير
وعن المدرب السابق دى سانتوس قال انهم عقدوا اجتماع معه وسوف يغادر دى سانتوس مساء اليوم الى البرازيل عن طريق طيران الامارات
وواصل الارباب حديثة عن القضايا الهلالية موكدا انهم لم يحددوا مكان للمعسكر حتى الان وانهم فى انتظار وصول المدرب لكى يحدد ذلك
وقال الارباب ان مسيرة الهلال ماضية ولن تتوقف
وللحوار بقية
سانشرها لاحقا

تحية طيبة اخي عمار تلودي كلام عين العقل بس دايرك توصل رسالة لي صلاح ادريس عدم مشاركة الهلال في سيكافا وايجاد معسكر ياتي بنتائج ايجابية

يا عمار الزول دا كرهنا الهلال ,داير تكرهنا المنتدي مالك ؟

لا والله ياتلودي.
نحن خلينا ليهو الهلال
معقولة بس ؟

محمد علي جبريل كتب:

تحية طيبة اخي عمار تلودي كلام عين العقل بس دايرك توصل رسالة لي صلاح ادريس عدم مشاركة الهلال في سيكافا وايجاد معسكر ياتي بنتائج ايجابية

قصة سيكافا ديه يا جبريل نخليها للناس الحمام الميت
وسيكافا ديه زون فارقناهو زمان
وعشان كده ما دايرين نشارك

أبوحراز كتب:

يا أخي والله دخلت البوست وأكاد أقع على { خشمي }
وتوقعت أن الأخ صلاح إدريس أصبح عضواً معنا بالمنتدى
وهذا سيكون بارقة أمل كبيرة لنا جميعا
علنا نترك هذه الغربة اللعينة
ونضوق قريشات صلاح ادريس
ونبني لنا منازل تأوينا من الحر والمطر
صراحة كل الأعضاء هنا { مفلسين } وحكاية القلم دي ما بتأكل عيش
في مرة من المرات قلت لزوجتي أريد أن أنام
وإياك إياك أن تصحيني من النوم والا 00
المهم مانمت دقيقتين الا واتصل صلاح إدريس
فاتت مسرعة وقالت قوم ياراجل النايم ليها شنو ؟؟
متصل عليك صلاح إدريس
وصحوت مخلوعاً
لأجده صلاح ادريس الذي يعمل بالمحكمة !!
وكانت خيبة أمل كبيرة جداً
ولم أرد عليه وذهبت وتغطيت بالبطانية في عز الصيف
قال محكمة قال !!!
لدينا حبوبتنا لديها حكمة عجيبة جداً
أولها ماتصاحب الناس المفلسين
قالت { بيفقروووووووووووووووووك }
وماتصاحب واحد سرواله مقدود ؟؟؟
وهذه لم تفسرها لنا حتى ماتت !!! الله يرحمها
لكن عملنا جميعاً بوصيتها رجال على نسوان
ولازم تصاحب ناس بابكر ود حاج عبد الكريم
لكن ماتصاحب ناس محمد علي أحمد الشيخ
طبعاً ناس محمد علي كل أسرتهم بتموت ما بين الخمسين والخمسة وخمسين كاقصى حد
أما أسرة { بابكر } فهؤلاء 90% منهم ماتوا بعد المائة سنة
يعني لو الواحد من هذه الأسرة رقد في السرير في عمر ال 70
يحولوه شمال يمين ويمين شمال أكثر من 40 سنة وبعديها { يتلحس }
ويقلبوه زي اللقيمات
ومرات زي أهل الكهف
ويبقى زي التلفزيون
المغرب يطلعوه بره
الساعة تسعة يقول ليهم دخلوني أنا بردان
وعليك أمان الله ياكل لحد الرمق الأخير
أصغر واحد مات قبل فترة بعمر 96 سنة وكانت هذه حالة شاذة بينهم !!
عليك الله شوف لينا صلاح إدريس خليهو ينضم للمنتدى
وماعندك اي مشكلة لو قال نبدله ببكري حمد وعبد المنعم واولاد الجاك
فليأخذ الثلاثة وحانشوف ليهم منتدى آخر
أأسف لو اخذتكم بعيداً عن المستديرة

أها وعد مني انا مريخابي على السكين
واكتب بالأحمر
لكن لو الراجل بنى لينا البيت
والله اقلب { أزرق } طوالي
وأول شيء ابدا ليكم بلون الخط

تمام يا ابو حراز
انا اكلمو ليك
لانك انت مفروض تكون من ناس سيد البلد
ما من ناس الحمام الميت

خليل كحيل كتب:

يا عمار الزول دا كرهنا الهلال ,داير تكرهنا المنتدي مالك ؟

كحلة تغيييييييييييييب وترجع ...وترجع زى الدبيب تلسع فى الصميم
اتخيلتك واقف قدامى وبتكلم فى عمار...
ياخى عليك الله كلم عمار قليهو خفف علينا شوية ...
هسى بنقوم نعمل لينا منتدى رابع .....نعينك ادمن على طوووووووووووووول

خليل كحيل كتب:

يا عمار الزول دا كرهنا الهلال ,داير تكرهنا المنتدي مالك ؟

يا خليل
ده رجل يخدم فى الهلال بكل ما يملك
وخليك ابنوسى