اليكم بعض اجمل ماخطه يراع الصحفى الهلالى خالد عزالدين وهو يتغزل فى سيد البلد ...
في مقولة شهيرة أطلقت على لاعب الهلال السعودي الحريف.. الثنيان.. قالوا الثنيان بديك باص بخليك انت وضميرك والمرمى!!
هيثم مصطفى بديك باص بخليك انت وضميرك ومن غير حارس مرمى.. تجيب قون يعني تجيب قون!!
الهلال بنافس روحو.. أحسن دفاع أحسن هجوم أحسن وسط.. المهاجمون بتنافسوا على لقب الهداف.. والغريبة تلقاهم كلهم متعاونين.. أي لاعب بقول لي زميلو ياخي إنت ابقى الهداف.. لا ياخي انت ابقى الهداف.. لا والله انت ابقى الهداف..
التنافس وصل مرحلة التعبير.. مهند بالهوبة العادية.. بكري المدينة بي هوبة العقرب.. وكاريكا كل قون بي حركة جديدة!!
تقول لي برشلونة.. والله متعة الهلال دي في هلال الحصاحيصا مافي!!
نحن ماشين الدوري المصري..
عايزين منافسة شوية.
على الأقل الأهلي المصري ده عندو تار معانا من زمن ريتشارد..
عايز يغلبنا كده من غير مساعدة حكم..
المصريون قالوا الحكم كيف ما شاف (يد) إينرامو..
ويد فلافيو (الدفر) بيها (مرق) دي كانت صناعية!!
ضوقو حنضل التحكيم الإفريقي!!
التحكيم الإفريقي مع الأهلي القاهري.. زي القاعدة مع أمريكا.. أدوهم السلاح واستعملوه ضدهم في النهاية!!
خلينا مع دورينا.. لحدي ما نمشي الدوري المصري..
نحن ماشين وجايين وبرضو متصدرين..
في زول يقدر يقول كلام غير ده..
يعني حتغلبوا أهلي مدني كم.. لو غلبتوا..
واحد اتنين تلاتة أربعة خمسة لحدي ستة نحن معاكم ! انتو معاهم يا الفاتح خضر..
البشوف خوفهم من الأهلي يقول لاعبين مع الأهلي السعودي. هم مش كان اتعادلوا مع الاتحاد يا مزمل؟؟!!
الأهلي زعلان وأخلاقو ضايقة.
نحن قلنا ماشين الدوري المصري.. شايف حسن محجوب مشى الدوري التونسي من زمان.. بقى بشجع في الصفاقسي..
حسن محجوب بلعب في لعبة ظاهرة.. عامل فيها بشجع في الهلال عشان (يشربو) الشراب بالنية يا حسن !! لو نيتك معانا أشربنا !
مزمل أبو القاسم قال أنا شربت الأمل.. والحقيقة أنو الأمل حلت عليهو لعنة الهلال..
خلوا بالكم يا ناس نيل الحصاحيصا.. البعطل الهلال ما بمشي لي قدام.. ده شئ معروف من زمان..
لعنة الوالدين ولا لعنة الهلال..
أجمل حاجة في مباريات الهلال أنو الفريق بكون مقتنع بالهزيمة.. الهلال ما بديك فرصة تفكر الا بعد الهدف الرابع.. الجماعة يا دوووب بعد الرابع بفكروا ياخروا الكورة.
تلقى الفريق مغلوب ستة وبرجع في الكورة لي وراء وحارسو بأخر في الزمن!!
والله أحكام يا زمن..
محسن صالح.. أقصد محسن سيد لما خلاااص غلبتو بقى يغالط مساعد الحكم في رمية التماس!!
يا ناس.. ده هلال ولا أنناس..!!
المصدر : صحيفة الصدى
موضوع: دا هلال ولا انناس !!!!!!!!! 
الأربعاء 27 أكتوبر 2010 - 15:21
