رجل في كشف أسماء "أمهات الشهداء" اللاتي وقع عليهن الاختيار للحج هذا العام

عشرين سنة ونحن شقالين ملاوزات " أيوة بالقاف "
عشرين سنة "ونيف" شقالين مجابدات قريبي أجبد لي وأنا أجبد ليك
فاكتسبنا خبرات تستحق التسجيل لزوم "براءة الإقتراح" و"الملكية الفلكية"
طيب رايكم شنو لو شفنا نشأة الملاوزات والمجابدات ومراحل تطورها
الملاوزات والمجابدات أصلاً بداها أجدادنا القدماء الله يرحمن ويغفر ليهم
قالوا مرة كانوا قاعدين محتارين في كيفية تنجيض صيد ثمين "بالسين أي عارفا"
المهم جابدوها بي جاي وبي جاي بالحجار والحطب ولعوا النار مش قلت ليكم كانوا بتاعين ملاوزات
ومن ديك وعيك يحتاجوا لي اي حاجة طوالي ملاوزات مع شوية مجابدات يقوموا يخترعوا الحاجة
باختصار فهمنا من هذه التجارب الوئيدة بان "الحاجة ام الاقتراع"
وطبعا القصة اتطورت عبر مراحل عديدة
من زمن شي لله ياحسن وتموت تخلي لمن وصلت قدر ظروفك
مش قلت ليكم الحاجة ام الاقتراع
اليوم ومن شدة التطور الحاصل بقى "الحاج أماً للإقتراع " شفت كيف
الاقتراع هو "الشهيد"
وكيف يكون الشهيد اقتراع
المهم زول مات في حرب مات في اي حاجة شهيد وخلاص "براءة الاقتراع والملكية الفلكية"
الشهيد ذاتو "رضي الله عنه" ما خليناها مكوع مع الحور العين يشرب في قهوة العصر
لا غلغلناها ودردرناه وسوينا ليهو الطفش ما هو الشهيد الضحى بي رحوا عشان الملكية الفلكية
لم نكتف فعملنا ليهو المنظمات والهيئات والجمعيات وتفرعت بعد ذلك القصة وانتو عارفنا
هيئة لدعم اسر الشهداء
منظمة الشهيد الخيرية
دمغة الشهيد
رسوم الشهيد
مائدة رحمن للشهيد
صلاة الغائب "إنتو قايلنو منو إياهو الشهيد ذاتو"
وعرس الشهيد "أمانة ماعرس والله المغترب البقول أنا أنا ما يعملوا "
وروني عريس يقدر يجيب قيقما واحساس ومتولي وشنان وفرفرا
والله الا ود البرير
المهم بعداك جات
بعثات حج الشهيد
وبعثات عمرة الشهيد
وبعثات تعليم الشهيد
مستشفيات الشهيد
سكك حديد الشهيد
وسودانير الشهيد " مع إنو دي إستشهدت في رقبتا "
أفران الشهيد "تاكل عيشا تستشهد بالهناي بتاع البوتاسيومياً "
المدارس والجامعات والروابط بقت بعدد الشهداء
عارف كلامي كتير وفارغ ساي لكن اهو الواحد ينفش شوية
كنا واقفين وين ؟؟
أيوا
فالكلام دا غير حتى في شكل الغنا ومفرداتو أو الفراوده بتاعينو وتسمع المناجاة للشهيد
قربك لي سعادة شوفتك لي مفيدة ..
بشكيلك حظوظي وظروفي العنيدة ..
يا الناعسات عيونك لي عيناً سهيدة ..
بي حالي وسهادي نجوم الليل شهيدة ..
شفتو الحالة الفيها الشهيد أريتا حال الهنا والمنى ،،،،
والله أيامك ساكوبيس يالشهيد بي هنا وبي هناك مرطب ،،،،،
أبساطور معروف وهو من الجماعة اياهم يلطش أي حاجة ولا يجد في نفسه حرجا
حديد خشب طوب اسمنت ياكل بدون ما يلوك يعني دودة ارض
لكن مابدخل فرض في فرض "عشان ما نظلموا ساي"
أول أمس مشى "المحلبية" لقى نسوان كتار متلمات وواحد قاعد في تربيزة وقداموا دفتر
سال الحاصل شنو
شبت ليهو مراة كبيرة شايلة جوازا في يدها ومعاهو التظكرة " دا كشف بعسة أمات الشهيد آآعشاي"
طوالي فج النسوان "كدي زحن لي كدي " ووقف قدام الراجل الشايل الكشف
ياحليو الدهشة عقدت لسانو "أبساطور دائر شنو هنا كمان "
وكانو سمع ما حاك في نفس الموظف المرتعش
"سجل لي إسمي في الكشف دا"
لكن يا ابساطور دا كشف أمهات الناس الشهيدين يعني كشف نسوان
"برضو تسجل لي إسمي مش شغلك "
طيب يا ابساطور أسجلك أم الشهيد منو

سجلوا يا المحبوب (سجل شركاتك ما انت العسل ذاتك )
ام الشهيد ابيى

نسجلك وين يامهند الطاهر إنت
والله يابدريتو تعيش كتير تبقى وزير تحج ملخ
تكون عوير تموت فطيس يحجوا الناس باسمك غايتو البركة في حور الميل اربعين
مع خالص الشكر على المرور