خلعوا "هتلر" كلب الغناية ندى القلعة ، وقال ايه : جيت أحفظا أغنية ل "نصرة البشير"

جر
جر جر
جر جر جر
ياهناية ما تمسكي عليك كلبك دا
الكلب ما خلعني خلعة شديدة خلاس
هيانا ما شغال بعمل في لحن لأغنية جديدة عشان البشير
هو لكن كلب نصاح والله المعبود بالحق تقول متورت ..ملظلظ وسمين
خلعك بلا يخمك ...
الكلب التقول حرشو علي
ولا التقول طالب فيني مغسة
والله كيتاً علي الكلب دا أكان أواصل في عمل اللحن بتاع الأغنية
ما ممكن نخلي الزول في الورطة دي عشان كلب
والله أبداً ما حا نشمت فينا الأعادي
وسنقتلهم جميعاً بسهام الأغنية الحا ألحنا وتغنيها هناية .

وقد صدق جرير عندما قال :
زعم الفرزدق ان سيقتل مربعا
أبشر بطول سلامة يامربع

(( أكًد الملحن حمدان أزرق أن الفنانة ندى القلعة لم تحرش له كلبها (هتلر) وإنما تركته واقفاً بجاوره لا يحرك ساكناً لفترة من الزمن. وأوضح أن ما حدث بالضبط أنني ذهبت إلى الفنانة ندى القلعة في منزلها بجبرة الخرطوم بغرض تحفيظها نصا غنائيا خص بنصرة المشير عمر البشير رئيس الجمهورية وعندما وصلت المكان ودخلت المنزل وجدت كلبها الذي تدعوه هتلر في وجهي مباشرة، وتابع لكنني أنفي بشدة أن تكون ندى قد أطلقت علي كلبها بالصورة التي سعى البعض لإظهارها بتلك الطرفة المثيرة في تفاصيلها وما حدث بالضبط لا يمت لذلك من قريب أو بعيد، وتابع المهم أنني تجاوزت الموقف رغما عن صعوبته وأنا الآن أقول إننا تركنا هذا الخلاف جانبا وعدنا إلى التعاون من جديد.)). الراكوبة/صحيفة فنون

" ......المهم أنني تجاوزت الموقف رغما عن صعوبته ...."

صعب صعب يا كلب
العض صعب ياكلب

أولاد أبوك يا كلب
ما بشبهوك ياكلب

السيسبان يا كلب
أسود كحيل فنان ياكلب

شارع الظلط ياكلب
مرسوم غلط ياكلب

ما في ملحن يلحن دي

توجد طينة ود الطريفي بعد العض
ولا ياود عيسى ما تشوفوا لينا مستشفى رفاعة فيهو حقن سعر ولا مافيهو

والله هتلر دا لو لقيناهو هنا
يعضعض لينا الزول بتاع "علوق شدة حمار الوحدة"
بدل الخلعة الدخلت في الملحن دا
أنا ما عارف الراجل دا الخلعو وخلاهو يخاف للدرجة دي شنو
فكونه ملحن فأكيد يكون شائل ليهو "عود" أو كمنجة على الأقل
يعني قولة هوهو
يشل العود ويسج الكلب في فاخورتو يجيبوا واطة
بدل البهدلة الاتبهدلا دي ....
والله القصة دي ذكرتني قصص وذكريات كتيرة مع خلعة الكلاب
لو في زول مذكر حاجة من قبيل هذه الخُلعة يحكي لينا
غايتو أنا ببدأ بي قصة رجل في القسم الأول بود مدني
جائي نص الليل مصلح وقايد عجلتو قوادة من دردق
والليل بارد والهواء ضربو بقى ماشي كما لو كان شايلو النسيم وكمان يدندن في حبور
ولمن قرب من البيت وفي واحدة من اللفات
والسكون يلف المكان
والظلام يرخي بسدوله
وفجأة
"هو هو هو "
شب ليك فيهو كلب قرب يجننو
المهم بي شبعتو ديك ثبت شوية وختف الطرمبة من العجلة عندها الكلب تراجع
نص الفي الراس طار
وبالبقي دور ليك حوار مع الكلب
والكلب واقف متحفز يسمع في الشتيمة وكل ما يقرب عليه "هي هييييه "
" ياكلب يا تافه يا حقير "
"بس يا هو دا ال الله قدرك عليهو "
" ياكلب يا جبان يا قليل الاحسان .. تخلعني أنا مالك سببك علي شنو "
"ملعون أبوك يا كلب يا لئيم .. أنا من العصر قاعد أصلح في راسي إنت عارف مزتي بي شنو "
"أقسم بالله لحمة ضان يا جيعان "
" وبعدا تجي انت يا تافه تخلعني جنس الخُلعة دي وتكمل المعاي ؟ "
ومشى خطوتين ورجع للكلب تاني
" عليك الله أعملا تاني عشان أفرج فيك أمة لا اله الا الله "
خطوتين وجا راجع
"الكلاب طلعت القمر وانت قاعد لي هنا "
خطوات وتاني
"تفي عليك وعلي الخلفوك "

لكن عمر السماني كان راجل قوي وكلب شنو البخلعو والله الأسد ما يزحزحو خلي كلب
وقف جنب باب صديق الماحي وقولة كو كو
شب ليك ليهو الكلب بي فوق الحيطة
ومن شدة الخلعة ولمن أسرعو وفتحوا ليهو الباب
" س لام ع ليك م آآآآنا س .. كيف حالكم كلبين "

ولا لمن وقفت أناهر جر جر جر في الكلب الواقف لي جنب المزيرة الليل كلو العطش كاتلني
جات بت العوض "عليها الرحمة " وسألتني مالك في شنو .. قلت ليها الكلب الفي المزيرة دا ما شايفا
تقدمت خطوات لمن مسكتو من أضانو
أنقرو ما طلع "سِخيل"
ضحكت وشتمتني وفاتت.

مافي زول يقول لي قالت ليك شنو
بس كمان يخونا الكلاب دي فعلاً بالليل بتتحول لي شيطان

أعوذ بالله من الشيطان الرجيم
بسم الله الرحمن الرحيم

الدنيا ليل والاحتياط واجب ولا شنو

يخلعو كلب ودائر يحمس البشير بالغنا
ياربي الاغنية كلماتا كيف والكتبا منو
وبعد الخلعة دي ما أظن يكون فيها ما تعارف عليه في غنا الحماسة :

من قومة الجهل ما خوفوك باخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبمرق المخ

شدوا لك ركب ..فوق مهرك الجماح
ضرغام الرجال... الفارس الجحجاح
السم النقوع...للبدن نتٌاح
تمساح الدميرة ..الما بكتلو سلاح
عصار المفازة ..للعيون كتاح
المال ما بيهمو ...إن كتر وإن راح

غني وشكريه يا أم وريداً حز
بحر الاتبراوي الساقي الرجال بالنز
العشاما بتجيك انت ليهن حد
غرضي إن ما انقضي خلي دار جعل تنهد

الحسن والحسن في عايلة ماتسمّا
ضباح الربايب سيد القدح لمّا
دالي وبرمكي وببرّد حشا العمّا
دا ولادة النجاح الما بتدرك البلما
شوف عيني التساب الفوق البلد عمّا
ود ضبعة التساب الفوق البلد عمّا

أنا نميت جبتا قلبو
فشلو القالوا قصو دربو
ديل رازوهو وشافوا ضربوا
دق السنداله قلبو
وانا ليكم بجر كلام
دخلوها وصقيرا حام

يا جرعة عقود السم
يا مقنع بنات جعل العزاز من جم
الخيل عركسن ما قال عدادن كم
فرتاق حافلن ملاى سروجن دم

الإعلان صدر واتلمت المخلوق
بى عينى بشوف أب رسوه طامح فوق
كان جات بالمراد واليمين مطلوق
ما كان بنشنق ود أب كريق في السوق
الإعلان صدر واتلمت الحلال
نصبولو السلاح واتكرنف الخيال
قدر الله الحصل و الزمان ميال
منسول من ابوك ماك ود حرام دجال

تقول لي خلعوا كلب .. وبمناسبة الخُلعه دي واحد رسلوا للتمرجي يجيبوا على وجه السرعة
باقي مصطفى قرصتو عقرب
التمرجي ساكن في أطراف الحلة "الهامش" والدنيا ضلام تتكل فيهو العكاز
الزول شعفوفة لمن بقى عند باب الحكيم
ودقتو للباب
الكلبة شبت ليهو خلعتو ودرت فهمو كلو كلو
الحكيم لمن فتح ليهو الباب لقاهو راقد رز
"آآزول نعل ما عندكم عوجة "
الراجل الدخلت فيهو ما مرقت رد علي الحكيم قال ليهو
"قالوا ليك تعال سريع مصطفى ود امحد نور قرصتو كلبة