البت أم وضيب إتعاودوها عساكر بسوط العنج إلا الضمير مو حاضر " فيديو"

يا المحبوب ،سلام ،الفيديو ماشغال.
This video has been removed by the user

عاطف صباح الورد
وبجيك راجع بالتسجبل

الضحية والجلَّاد

إلى "البِنَيَّة" الرمز والقضيَّة، إلى "القشَّة التي قصمت ظهر البعير السوداني"، إلى التي كشفت دعاوى النخوة والرجولة، إلى التي كشفت المستور، وأخرجت المقبور، وفدت حرائرنا، أُفدِّيك بكلِ غالٍ ونفيس، إن كان هناك من غالٍ ومن نفيس سواك، ولن تكوني وحدك أبداً في الميدان..(يبقالي فتحتي الما بنسده)..(إلا بي راجلاً تِلِب راضع لِبا أمُّو) هل تذكرين حبيبتي، ونور عيني، "مقتل أنديرا غاندي؟!!"..

نادت أُمَّها وقِنْعَتْ من الباقِين
والسوط داهَمَا من راسا للكرعين
لا خلا الأباط لا النَحْرِ لا الخدين
والحولك وحوش لا زين ولا زينين
فرتاق حافِلُنْ أنا في رجاك لِمتين؟!
بنعيلك رُجال كانوا بيكيلوا العين
أنا ما مِنَّهُم أنا في الخَرابْ كومين
هطَّال للدموع أمسح شمال ويمين

يا شعبي الكريم قشَّاش دموع العين
رحَّام لليتيم لَحَّام كسور البين
لَحَّاق للضُعَاف غَتَّاي عُروض أم زين
ستَّار للعرايا كشَّاف فعايل الشين
انا راجيك دَهَرْ حرَّمت ماك ضنين
أزْأرْ زَأرتك وكسِّر فروع النيم
واطلع طلعتك علِّم بليد وغشيم
شِنْ راجيهو بس؟ باطِل معاهو لئيم
والشيطان يمين في كيدو ما هو عظيم
أهون من هوان ضعيف هزيل وسقيم
والوالاهو زَيُّو ذميم مصاحبو زنيم

البت أم وضيب اتعاوروها عساكر
بي سوط العنج إلا الضمير مو حاضر
داك يضرب شمال والتاني ضربو مشاتر
والمسكينة تصرخ يا يُمَّة دايراك ساتر
ما رحمو البنية "غزال تهاجمو كواسِر"
شقيش ما يقبِّل يلقاهو سوطاً جاسر
والقاضي اللئيم واقف حداهو دساكر
لا سِمعو الصياح لا بجبرولُن خاتر
الجُرم الأكيد قالو اللباس مو ساتر
واللابسين عرايا من الضمير الظاهر

يا شعبي العظيم جاييك عندي شكيَّه
إنت الصبر فُتُّو بقياسنا فُتَّ الميَّه
صابر راجي مين الشينه ما محريَّه
ديل أنجال لهب ما جابتُم مرضيَّه
أكتر من كِلاب طرَّاد أمامو ضحيَّه
في ظاهرو الضحك وفي باطنو ألف أذيَّه
أصحا كفاك صبُر ما تخدِّرك شرعيه
الكِضِب انكشف مو دين هديك دنِيَّه
أكلو الدنيا بي دينك وزادو شويَّه
عَرضَك ما حموهو وطَبَقُولَك إنتَ الكيَّه

عيسى إبراهيم / النصري امين / سودانيزاولاين

المحبوب نهارك سعيد
ولك الود وللشاعر والفنان،ولكل المستنكرين لضرب غرائب ألبل للفتاة المكلومة .. والخزى والعار للانقاذين ،وللخضر ،للطيب مصطفى ،وخالد المبارك
ونافع ولكل من دار فى فُلك الصمت .
(وديل حُراس رزق ذى التكن أمانة
ما يهمك لباسهم والعروض عريانة
ذى أبل الرحيل شايل السُقى وعطشانة)

عاطف كيفك يازول يارائع
امبارح فشلت في نقل الفيديو من سودانيزاولاين
طبعا بقوا ينزلوها بطريقة غريبة ما قدرنا نفك شفرتا
تصور خلو اليوتيوب
المهم اليوم لقيت واحد منزل الفيديو وطوالي جبتو
ونشكرك على رفع البوست
والنظام زاد من وتيرة الضرب في الاجساد والمعنويات
ولنقف جميعا في وجه هذه القوانين