أجلد ساي لكن كان قطعتا بالكبري أحسن ليك من الخلاف ولا شنو ؟؟ "فيديو"

البشير تاني رجع لحركاتو الزمان ديك
السوط العالي والقطع طوالي
بصراحة كدا عيب برضو رئيس القضاء زميلك ووزير الداخلية برضو
وناس الشرطة حبايبي الحلوين هداً جلدوني وأنا ما قائل حلوين زي يدقوني
يعني كلكم أهل ولا الأهلية كملت يالبشير راحت ولحقتا شمس المحنّة كمان غربت طاحت
يعني عاجبك كدا تفرج فيهم أمة لا إله إلا الله وتسألن قدام الناس البجلدوهم
كان تعمل ليهم حساب في القضارف بكلفك شنو عليك الله
حساب بسيط بالمحلي الدخل عطبرة ما زي بتاع "لويدز" عليك الله مش أحسب من البهدلة
ياخي خلي ناسك
وزي ما قالو "النفس أولى من الساحب"
كان تعمل لي رقبتك حساب في القضارف
انت مهما كنت رئيس منتهب
من الله خلقك شفت ليك رئيس منتهب بعمل كدا
ما بجوز تفتوا كدي في الصقيعة وتطلعن ما عارفين شغلن
بصراحة ما بجوز للاقربين يتفاتتو الأنقاص في السهلة كدي قدام الغاشي والماشي
مالك ما عارف الناس دي شايلا كاميرات في الموبايلات اسي كان صوروك ما بتهز صورتك
يعني ناس القضاء والشرطة عملوا شنو غير رفدوا ناس قدو قدو
اها اسي رئيس القضاء ووزير الداخلية ديل يعملوا شنو يلحسوا كلامن يعني ولا كيف
أسي كان صبرت ورجعت لي مكتبك
وناديتن أديت أي واحد فيهم تسعة أصواط ما كان البطن فيها وجعة
صحي نحن ما عندنا شغلة بالموضوع ودي مشكلة بينك وبين اللاعبين بتاعنك وانتو مخيرين
لكن الناس البتستمع ليك ديل واقفين من الصباح في الشمش
مريوقين الله يعلم بيهم الفطر منهم يكون سف ليهو سفة تمباك
عليك النبي كان قسمت ليهم حاجات تمونية ما كان أحسن ولا ما سمعت بأسعار الدقيق والسكر
وما تقول لي دا كلام المندسين والمرجفين
أمش أرجع لي ناسك بتاعين المجلس الرتني "اليوم كلو ينضموا"
أسال عن رغبتهم في استجواب فريق وزير المالية ومنتخب وزير الزراعة بسبب الفجوة الغذائية
الناس القاعدة دي سمعت بي موضوع ويكيليكس وسمعو بالرقم الفلكي وجايي تعمل ليهم فكي
ناس فقرانين حق الصعود ما عندهم حتى موية الشراب في تلتلة
والغنيانين فيهم البنوك مزرزراهم اسي أكان كلمت ليهم لويدز ما كان لقى ليهم دبارة
مالك نسيت الأصوات الادوك ليها "بي جختا " مالا ما فوزتك وبقت رئيس زي العجكو
ترقص ليهم وتحتو قرض وتحتحت ليهم فروع شدرتك سياط للجلد
أمانة في ذمتك جابوك شان تجلد ولا تسو الاستباليات والمدارس وتدعم المواد التمونية
بدل جلد جلود الناس الرهيفة دي يا خي ما تجلد الشوارع ينيبك ثواب عند الله
تسمع لي كلام ناس غازي سليمان يضحكوا عليك
وينفخوك تقيف زمبارة ودائر تجلد وكمان تقطع من خلاف
ما فكرت كلو كلو في الناس الدائر تقطعم ديل يقبلوا علي وين بعد القطع
زول بعد تقطع يدو اليمين ورجلو الشمال يمشي وين ويعيش كيف
ما أغلبية السودانيين بعتمدوا على أيديهم في سبل الكسب المشروع وبعدا عايشين الكفاف ويالله الله
فلمن تقطع يد المنفلت منهم ببقى عبء إعاشتو على رفاقتو المعدمين أصلاً
نحن ما نا سائلين من القروش الحوشتها خلال سنين حكمك وقالوا خاتيها في بنوك أجنبية
شوف لينا الفلوس المنهوبة من المال العام برضها مليارات
وأظنها وصلت ستة وشوية حسب التقرير الاخير
شوف الفلوس البتدفع لجيوش الوزراء ووزراء الدولة ومشمستشارنك دي ما مليارات
ما دائر أقول ليك الولاة ونوابن وعيييك
ياخي حق سفر مصطفى عثمان وأمين حسن عمر في خلال العشرة سنين الاخيرة للدوحة بس
يعمل اسطول طيارات تكفينا لجنى الجنا
البشير !!
انت بتشوف ولا أعمى ؟؟
سألتك بالله الواحد الأحد بتشوف ولا ما بتشوف
الزي السودانيين والسودانيات ديل بشيل منهم قروش وأصرفا على ناس يقنتوا من الشبع
ما بستحقوا المستشفيات العلاجية ذات الرسوم المخفضة
ما بستحقوا المدارس ودور التعليم بدل البهدلة الشايفنا دي
ما بستحقوا اسواق نضيفة وسبل مواصلات تراعى فيها مواصفات السلامة
البشير ما سمعت بموضوع قروش الحُجاج
ودا ما كلامي أنا كلام ناسك الشكلتن لي رب السما داخل البرلمان البقى عنبر مجلودات
البشير
البشير
البشير هوي ها
ما تستقيل وتكفي البلد شر الفوضى
البشير الناس دي تعبت ووصلت الحد كفاك أقيف

أجلد ساي لكن كان قطعتا بالكبري أحسن ليك من الخلاف ولا شنو ؟؟ "فيديو" Shifad11

المرضي/ سودانيزاولاين

نهارك سعيد اخى محبوب
الليله اول مره اشوف الفيديو بتاع البنت السودانيه والله قلبى وجعنى وجع لحدى ماقادره اكتب واقول شنو عملت شنو يستحق كل ده لا حوله ولا قوه الابالله العلى العظيم...حسبى الله ونعم الوكيل

الأخت الفاضلة اميمة
كيفك ونهارك أسعد
الشريط مؤلم
واهانة المراة ظلم
وبعدا يجي البشير يقول :

(( قال المشير عمر البشير خلال مخاطبته الأحد 19 ديسمبر اللقاء الجماهيري بساحة أسواق المحاصيل بمدينة القضارف بمناسبة الاحتفالات بعيد الحصاد القومي ,

(إذا حدث انفصال للجنوب لا قدر الله، فإن الدستور سيعدل في كل شيء كان يخص الجنوب، وسنبعد من العبارات «المدغمسة»، وستصبح الشريعة هي المصدر الرئيسي للتشريع، والإسلام هو الدين الرسمي للدولة، واللغة العربية هي اللغة الرئيسية للبلاد، ولا مجال للحديث عن دولة متعددة الأديان والأعراق الثقافات).

ودافع البشير عن رجال شرطة أظهرهم تسجيل فيديو على الإنترنت وهم يجلدون امرأة بطريقة قاسية وهي تصرخ. وانتقد إعلان الشرطة والسلطة القضائية التحقيق في التسجيل وطريقة تنفيذ العقوبة، قائلاً: (في هذه الأيام البعض يتحدث عن الفتاة التي جلدت وفق حد من حدود الله، والذين يقولون إنهم خجلوا من هذا، عليهم أن يغتسلوا ويصلوا ركعتين ويعودوا للإسلام).

ورأى أن (الحدود في الشريعة الإسلامية تأمر بالجلد والقطع والقتل، ولن نجامل في حدود الله والشريعة الإسلامية). وعقب على إعلان القضاء والشرطة التحقيق في الحادثة، متسائلاً: (في ماذا سيحققون؟) . )) نقلاً عن حريات

http://www.hurriyatsudan.com/?p=7204

أجلد ساي لكن كان قطعتا بالكبري أحسن ليك من الخلاف ولا شنو ؟؟ "فيديو" Crazzyman

البشير متدغمساً

أسي دا يقولوا فيو شنو
وعليك دينك يغتسل الاتعاطفوا مع البنت ولا إنت المدرع السكسك والريش في راسك؟؟
بالله عليك كان صرفت ليك مليارين تلاتة وسافرت اتعالجت بيهن ما كان أفضل
براك تجيب في الشِبك هو في الحقيقة ما بتقدر تسافر بسبب خوفك من عدالة الدول
بالله عليك تخاف من عدالة الدول وما تخاف الله في شعبك المطحون فقر ومسغبة
شغلك دا شغل زول مجنون والحكم كان ديني ولا مدني ما كدي شوف الرؤساء التانيين
شوف لبسهم وشوف طريقة مخاطبتهم لشعوبهم نفس بارد وبال طويل لا رقيص لا كشكشة
لا ريش لا تنفشة ولا نفشة
والحمد لله الجنوبيين قالوا ليك مش لو لبست ريش طربوش
لو رقصت ليك نعامة في راسك ما بسمعوا ليك
وخليت الجنوبيين وقبلت علي البنية مكسورة الجناح
هل معقول شريط البنية أزعجك وخلاك تهدد الناس بالضرب والقطع خلف خلاف
بعدين إنت خلفت منو من أئمة المسلمين ؟؟
فاكيـها في روحك "شريعة شريعة"
خليفة مسلمين جائي بإنقلاب عسكري ؟؟
خليفة مسلمين ومنتخب بدستور مدني عائز تقلبو اسلامي بعد إنفصال الجنوب
وعشان شنو ؟؟
جلد وقطع وقطع من خلاف وصلب
والقال ليك منو الاسلام جاء عشان القطع والجلد
لا سمعت بسماحة محمد
ولا برزانة أبوبكر
ولا بعدالة عمر
ولا بكرم علي
ما سمعت بتحملهم لمسئولية البغلة البتعتر في سقط لقط
وجائي لامي ليك في بنية لقِط
بغلة يالبشير في العراق
بنت تستنجد وتفر لرحم أمها تفتش للرحمة
وانت واقف تجلد فيها بسياط صوتك المسموم منفوخ شائل عصاتك زي الرائح ليك حمار
وكمان بتهدد الناس الاتعاطفوا معاها وتطالبهم بالغسل
إغتسل إنت ويمم وجهك شطر لاهاي
وامكن تجر علي "لويدز"
نسيت اللحقتهم الغتس وجائي تهدد الناس بالجلد والقطيع وتهدي المتعاطفين مع البنت علي الغسل
يغتسل من لطخ يديه بدماء الناس من الضباط في قبايل العيد وناس مجدي موجرجس
ناس علي فضل
وشباب الجامعات
مذكر ولا نسيت
يغتسل من أثرى بحقوق الناس الفقراء
يغتسل من زان راسه بالنعام والخزف
وأفرغ فؤاده من اي رحمة
بس ما قلت لينا ياتو نوع من الغسل تريد

وعلى النقيض من موقف الرئيس بشأن قضايا المرأة "عموماً" نجد السيدة "حرم الرئيس" تقف مع رياضة المرأة والانطلاق بها للعالمية ، ووفق الراكوبة :

حرم الرئيس تؤكد دعمها لرياضة المرأة للوصول بها للعالمية

أجلد ساي لكن كان قطعتا بالكبري أحسن ليك من الخلاف ولا شنو ؟؟ "فيديو" 118581

أكدت حرم رئيس الجمهورية فاطمة خالد التزامها بدعم وتطوير رياضة المرأة الوصول بها للعالمية وأشادت لدى تشريفها أمس ختام فعاليات منافسات الكرة الطائرة للطالبات ضمن فعاليات الدورة المدرسية القومية الـ(٢٢) والتي تستضيفها ولاية الخرطوم، بدور الطالبات خاصة فيما يتعلق بجانب الرياضة النسوية التي اعتبرتها إحدى الفعاليات الداعمة للمرأة ونجاحها في المجتمع.

ووصفت المشاركة بالظاهرة الحميدة التي تدل على قدرة المرأة السودانية على الإبداع ، إلى ذلك قامت حرم الرئيس بتتويج طالبات ولاية الخرطوم واللاتي أحرزن كأس الكرة الطائرة وذلك بصالة هاشم ضيف الله.)) منقول بالصورة من الراكوبة / الرائد

ديل ناس شرق السودان "بحر أحمر وكسلا والقضارف"
أصحاب الصناديق المخجوجة مذكر ولا نسيت
جيت الآن عملتهم قاعدة لصواريخ جهلك بأمر الدين والعباد
أكان ما شفتهم حقو تجلد الناس الهتفوا ليك ديل
ولو تمعنت في الصورة إمكن تكتشف بأنك دائر تعنف ليك بي ناس الموت أقرب ليهم من حبل الدلو
وبي كدا أرقص رقصتك القاطعا من راسك دي
ووفر عليك عقوباتك لا قتل وقطع ولا قطع من خلاف
يخلف ليك الكي قول آمين
الناس ديل خيط دُبارة ولا حتى خيط كرورية بودي الواحد فيهم الآخرة
خلي سياط العنج
ديل ناس تسلم علي أي واحد فيهم ممكن تاخد كفو في كفك
وإنت عمرك ما حا تسمع ولا حا تشوف بمأساة هؤلاء لأنك محنط رقبتك في "رئيس"
رئيس علي منو يا كافي البلد لا جغرافيا ولا ديموغرافيا

أجلد ساي لكن كان قطعتا بالكبري أحسن ليك من الخلاف ولا شنو ؟؟ "فيديو" Tookerunr

أجلد ساي لكن كان قطعتا بالكبري أحسن ليك من الخلاف ولا شنو ؟؟ "فيديو" Tookerunr

لكن المنظمات الدولية "الما معروف ليها دين" طلعت بتقرير عن احوال هؤلاء
فهم أدق منك وبالأرقام بدون لف ودوران
فقر عارف شنو فقر
مش فجوة غذائية يامستهبلين

(برنامج الأمم المتحدة للتنمية ترجمة: سيف الدين عبد الحميد) ..

قام فريق من برنامج الامم المتحدة للتنمية بمسح ميداني لولايات الشرق الثلاث (البحر الأحمر، كسلا والقضارف) نتج عنه بان :

- إن 58% من السكان في البحر الأحمر و50% من السكان في ولاية القضارف يعيشون تحت خط الفقر القومي «بمعدل 148 جنيه سوداني للشخص في الشهر»، ويعتبر هذا المعدل من بين أعلى المعدلات في شمال السودان.

- يعاني 62000 لاجئ وما بين 40000 ــ 120000 نازح في ولاية كسلا – حيث تشكل أعداد كبيرة من اللاجئين والنازحين – من مشاكل في الخدمات الاجتماعية والأمن الغذائي.

- يلاحظ أن نسبة النقص في الغذاء تبلغ 44% كما تبلغ حدة الجوع 370 كيلوسُعُر في البحر الأحمر وهي من بين النسب الأعلى في ولايات السودان الشمالية.

- إن نسبة 33% من الأطفال في القضارف ممن هم تحت سن الخامسة تنقص أوزانهم في حين أن نسبة 17% منهم يعانون من سوء تغذية مزمن أو في حالة متواضعة......الصورة وما تحته خط

منقول من حريات على الرابط

http://www.hurriyatsudan.com/?p=7008

مصير الرئيس السابق..عمر البشير..؟

(( كنت في مقال سابق ومن خلال هذه المساحة قد تحدثت عن نوايا حكام الانقاذ في التعاطي مع شعب شمال السودان ..بعد ان يودعوا صداع الجنوب الذي كان يعرقل خطي مشروعهم الحضاري الذي ولد مشلول الأطراف..ظنا منهم ان في انقشاع غمامة الجنوب المسيحي ..الفرصة الكاملة للاستفراد بأهل الشمال وأعادة فيلم التنظير العقيم وتطبيق تجاربهم التنطعية لاذلال الشعب الذي يفترضون انه مسلم / عربي خالص لايملك بعد ان أجهده الجوع والسعي وراء تكاليف الحياة الا ان يجثو علي ركبتيه خوفا واذعانا لنظامهم الفاسد . وتمكينهم المزعوم...وقد وجهت كلامي محذرا كمواطن بسيط من مغبة ذلك التفكير الذي ينم عن خطل أهل الآنقاذ السياسي الذي لم يتح لهم التعلم من اخطائهم في التعاطي مع هذا الشعب العظيم الذي قد يصبر ولكنه لاينسي..وقد كان ذلك الحديث علي خلفية ..خطاب الدكتور نافع ..في افتتاح مؤتمر قطاعات الزراع والرعاة بالحزب الحاكم ..والذي قال فيه ما معناه ان انفصال الجنوب هو فرصة عظيمة للانفراد باعداء الأنقاذ.. وباقي بيت الشعر طبعا لايحتاج الي حصة في علم العروض..

وماهي الا ايام قليلة حتي تكاملت حلقات ذلك الوعيد الصريح وسبق الأصرار علي اقبال شمال السودان علي مرحلة جديدة من التنكيل بالناس باسم الدين واحياء المشروع الموؤد..وذلك بالتصريحات النارية التي أطلقها رئيس نظام الانقاذ ..في القضارف لتصب في ذات المجري الذي فتحه..نافع لاغراق بارقة الامل في ان يتعقل النظام ويراجع نفسه باجراء المزيد من الاصلاحات السياسية والاقتصادية للعبور بوطننا المفجوع في سقطتهم بتقسيمه ايد سبأ في سوق مزايداتهم الخبيثة..

ولعل اتفاق كلام نافع الأعوج ..مع خطاب البشير الانفعالي ومنطقه الأهوج .. يعطي مؤشرا واضحا.. الي انهما يقودان معسكرا للتشدد داخل اروقة الحكم / حكومة وحزبا..مقابل تيار أخر يقوده نائب الرئيس ذو العقلية الثعلبية..علي عثمان وربيبه صاحب الذهنية الاستخباراتية ..صلاح قوش ..للدفع بمعسكر البشير /نافع الي هاوية التهور ككباش فداء يتحمل معسكرهما بكامله تبعات تقسيم السودان ونية اثارة الفتنة في الشمال كمسوغات لاحداث انقلاب داخلي..يتم بموجبه تسهيل مهمة الجنائية في الوصول الي الرئيس الذي سيكون مخلوعا سابقا ومن ثم اقتياد بقية الرهط المطلوب للمحكمة بحبال رفاق الامس الذين لم يتورعوا قبلا عن بيع كبيرهم الذي ارضعهم الدهاء السياسي ومكر التقلب..

فينال علي عثمان باعتباره مهندس استقلال الجنوب الذي كان مضطهدا في نظر الغرب المسيحي..ينال جائزة نوبل للسلام مناصفة مع سلفاكير بدلا عن الراحل /قرنق لكون الجائزة لا تذهب للموتي وفقا لقانونها..
فيا سيدي الرئيس..لك ان ( تعوعي ) كما شئت كديك المسلمية علي حبال غفلتك التي طالت منذ ان تغولت بطغمتك الظالمة في ليل بهيم .علي حرية بلادنا المتحدة المسالمة. والي الان..وهاهو زيت الحساب يغلي ببصلة التحمير علي ( حلة ) التاريخ .. فلكم يوم جميعا انتم وهم..و ان خلصونا منكم ومن معسكركم فلا شكرا.لهم. علي رد مظلمتنا الينا..وسياتيهم الدور ويدكم حافر الغضب في شوارع الغد القريب.. فنحن لسنا خرافا في زريبة ..حزبكم تهشونا بعصا التخويف من جولة جديدة لهيجة حكمكم الزائل لامحالة

فالسودان الشمالي بعد انفصال الجنوب الذي يفرحكم ..ليس اوسا خالصا ولا خزرجا نقيا لتفرضوا عليه لغة بعينها ولا صومالا مسلما بالكامل ولا قريشا لتطبقوا علي اهل الذمة فيه شرعا لا يعتنقونه.. فهو خارطة ملونة من الديانات ايضا وكريم المعتقدات .. وبلادا للنوبة والمحس والزغاوة والفور والبجة والفلاتة بمختلف لهجاتهم . الذين عمر بهم الله ارضه شعوبا وقبائل للتعارف والتعايش...الى جانب من تسميهم العرب..والمسلمين ..وسيظل يحتضن أخوتنا وأخواتنا من بقايا أهل الجنوب ..وسورا حصينا وآمنا لكنائسهم ..ولن تهان كرامتهم ا ن هم بقيوا بيننا .. كذا و ليحوي كاتدرائيات اخوتنا من مسيحي الشرق وأهلنا المسالمين من الأقباط.. وفضاءا رحبا تتعانق فيه اصداء الاجراس مع تقاسيم الاذان..كما كانت منذ الأذل.. رغم انف عقليتكم الطالبانية والحمساوية الغريبة عن طيبتنا وسماحة أخلاقنا وتسامحنا..

فارقص كما شئت علي مسارح وهمك ..ونغمات الاصوات التي تهتف لك في غيبوبة الجهل..وهي لاتدري انك تقف علي ارض مائدة تتحرك عليك من جهتين ..نفر من اهل حكمك ينتظرون سقطتك في هاوية الشرك..وقبضة الجنائية التي ستلتقطك منه.. وصورة صدام ماثلة في أفق الأمس القريب...مثلما صور كل الذين سقطوا قي فخاخ الوهم بديمومة البقاء علي أنفاس الأمم.. التي حرقتهم زفرتها الحرى المشبعة بلهيب الغضب.. فذهبوا غير مأسوف عليهم بين سابق وراحل وسجين في.. حنايا ذاكرة التاريخ..والشعوب التي لاتنسي قبيح الاقوال وسيء الافعال.. والله المعين وهو من وراء القصد.. )).
محمد عبد الله برقاوي/ الراكوبة

تسلم عزيزنا برقاوي ووالله وفيت وكفيت
يعني جبتها من قاصرا
ولكنها الحقيقة بس لافينها وقايلين لمن يرفعوا شعار الدين خلاص حا يكتموا نفس المعارضين
بعدين المحكومين بيهو من 89 دا ما مستمد من الشريعة
طيب مستمد من وين ؟؟
والأهم لماذ أصروا على التمسك به وتفضيل خيار الانفصال دون التفريط فيه !!!!!!
وبعدا كلو يطلع ما عندو علاقة بالدين ؟؟
دا تنظيم سياسي بلعب علي وتر العاطفة الدينية بس الزمن غير والادوات مختلفة هذه المرة
وحا يشوفوا عاقبة لعبهم بعقول واجساد البشر

ونرجو شاكرين تزويدنا بالمقال المشار إليه في صدر حديثك هذا

يا المحبوب ،البشير دا مُُُُُندعر فوق
كم ،اذا كان القضية أنتهت؟ولماذ يتدخل
فى صلاحيةالجهاز القضائى والشرطة؟ ولا
هذه الاجهزة ليس لها هيبة؟وين العاجب
وسبدرات ؟ لو عندهم اى كرامة يفترض
يستقيلوا !!يخلوا ديك العدة دا ينطط
لامن تهبر فيهو قلوبية أوكامبو ولا قلوبية شعبنا تلحقوا الزينين الخترو .

يا عاطف مساء سعيد ومشكور ياخي عالاطلالة "نظام مصري"
زولك راح ليهو الدرب في الموية
في زول ببستف القضاء بهذه الصورة غير المحتشمة ؟؟
إلا إذا كان القضاء أصبح تحت السلطة التنفيذية يقولو ليهو يمين يمين شمال جنوب
الرئيس بتكلم عن فصل الجنوب وكان الأمر عادي
نعم نحن نحترم حق الجنوبيين في تقرير مصيرهم
لكن في نفس الوقت فالبشير بتحمل وزر عدم محافظته على وحدة البلاد
بإصراره على أن تجاهل التعدد الاثني والثقافي وتكريسه للدولة البوليسية حتى بعد الانفصل
ناسياُ قسمه المغلظ حينما ردد عند إحتفاله بالتنصيب :

((أقسم بالله العظيم
أنا المواطن عمر حسن أحمد البشير
بوصفي رئيسا لجمهوريه السودان
أعمل علي أن أصون تراب أرض هذا الوطن
وأن أعمل علي عزة ومنعه السودان
وبسط الشوري ))

دا كلو يتنسي
فإذا لم يكن ذلك حنثاً باليمين فبالله عليك كيف يكون الحنث؟؟

المحبوب سلام ....بالله ده ريس لينا ...حقو اجلدونا كل زول عشرة كل يوم عشان الرئيس دة ....وعشان بنستاهل لانو ساكتين وبنتفرج وكمان عندنا عين نشكى ونبكى من الغلاء والفقر والبؤس....

» فيديو الزلزلة : والي الخرطوم بعد ما كشف حال البنت فإنه يحذر من جعل صورة النظام أكثر ظلاما "فيديو"ً
» ما هكذا يدار الخلاف في ذكري انطلاقة دوت كوم؟؟؟
» مبادرة دوت كوم لاحتواء الخلاف بين مزمل والجكومي
» طى صفحه الخلاف بين الجكومى والصحفى مزمل يعقوب
» الم يأن لهذا الخلاف ان يترجل( ولمتين يلازمك فى هواه مر الشجن؟)