بـــــــــــــــــــــــــــــــاراك !! سجم البباريك

باراك أوباما ود خالةً لينا مسك إدارة أمريكا
إستبشرنا بيهو خيراً وقلنا الجنى مننا ولينا
شدة ما تفاءلنا بيهو لمن قلنا حبوبتو أم أبو شلكاوية
مشينا ليهو في البيت الابيض وباركنا ليهو وقلنا ليهو بخيت وسعيد
والله أكرمنا وجاب لينا الشربات وإنبسطنا منو غاية الانبساطة
شرحنا ليهو مشكلتنا مع ناس الادارة الامريكية السابقة
الكانوا حاقدين علينا وشايلنها معانا سبة برا سبب
من زمن اولبرايت وفرايزر في حكومة كلنتون وبوش
ما خلينا ليهو حاجة وكلمناهو بمؤمرات الاوربيين البيض الحاقدين علينا
ناس ساركوزي واولمرت الليلت المانيا أم عصيبات ديك
الجنى ما جنانا كيف ما نوريهو
الراجل والله ما قصر وقال أمشو كدي جيهوا الاستفتاء بدون معوقات وبعدين نشوف
وأكد لينا وقال حا تلقوا نفسكم بعيدين من قائمة الارهاب
وكمان وعدنا بشطب الاتهامات المغرضة ضد البشير
وقال لا في لاهاي ولا في كلام فاضي
والديون قال كلها ربوية وحايتكلم مع الحرامية المرابيين في البنك الدولي ويعفونا منها
وما طالبني حليفة لمن جينا ما شين قدمنا لحدي خشم باب البيت الابيض
وقلدنا واحد واحد وودعنا وقال لينا سلموا على الجماعة
وقلنا ليهو الله يسلمك ويطول عمرك ويديك الفي مرادك
ومن جينا ترا شغالين والتزمنا بكل الكلام القالوا لينا
والاستفتاء الحمد لله إنتهى بسلام والنتيجة حا تكون زي ما يريد أهل الجنوب
وسنعلن النتيجة في خلال الايام القليلة القادمة وناس الجنوب فرحانين تاني في شنو ؟؟
السبب شنو البخلي مساعد وزيرة الخارجية الأميركية للشؤون الإفريقية السفير جوني كارسون
يقيف في نص الصحافيين الشمشارين وفي واشنطن "حسب الراكوبة" ويقول:
إن بلاده صممت نظاماً كبيراً للعقوبات على حكومة السودان !!
وترتبط معظم العقوبات بإيجاد حل للصراع في دارفور!!
كمان شدد على ضرورة استجابة البشير للتعاون مع المحكمة الجنائية الدولية !!
دا كلام دا يا باراك يابوما تلحس كلامك القلتو لينا في بطن بيتك ؟؟
نستاهل نحن الجيناك وسوينا ليك راس وقعر
في ذمتك الجا بارك ليك منو غيرنا نحن ؟؟
ما جينا بركنا ليك في البيت الابيض زي ناس المِحنة
أسي الدخل شطبنا من قائمة الارهاب بموضوع دارفور شنو ؟؟
وانت مالك ومال دارفور ؟؟
سببك عليها شنو ؟؟
بعدين لمن تربط لينا الشطب من قائمة الارهاب بقضية دارفور !!
كدا حانكون في القائمة دي ليوم القيامة وكِدا والله ما صاح يا اوباما
بعدين شنو حكاية نتعاون مع المحكمة الجنائية أنت دائر تودي الرئيس في داهية ولا شنو ؟
غايتو الفيك اتعرفت لكن حا نرجع تاني للهتافات البتزعجكم
وللتهديدات والتصريحات البتخوفكم وتكطع قلبكم
ومن اسي حا نفك ليكم ناس مندور وغندور وقندول ونوريكم لحس الكلام المابتعرفوا لي
والاستفتاء غير نزيه وغير شفاف ومخالف للمعايير الدولية
والحشاش يملا شبكتو