يا جماعة...السلام عليكم و رحمة الله

الاخوة و الاخوات في موقع الحصاحيصا
تحية و سلام
في البداية اشكر للاخ المهندس الدكتور بكري دعوته الكريمة للاشتراك في موقعكم الموقر و الناجح باذن الله... و لنا عندكم اصدقاء اعزاء علي راسهم اخونا حسن وراق لكم و لهم التحية.
طبعاً يا ناس الحصاحيصا انا قلت لاخونا بكري و الله حقو تعفينا من موضوع الاشتراك دا لانو حنخرب عليكم ساكت انا زول من العقدة و بالنسبة لناس الحصاحيصا من "الضهاري" و في احسن الاحوال من ناس "غرب الكنار" و ها دي البتجيب المشاكل بيناتنا !!! و دي من زمن كنا في حنتوب و اظن بكري بيكون عارف!!!
علي اية حال انا سعيد جداً و انتو ما طالبني حليفة و الله للحصاحيصا مكان في القلب و بعدين حنجي و نتكلم عن سفريات " ود هجا" و "سلطان الكيف" و "فرات" و كما عجبكم ركوب الكارو من السوق الي موقف البصات علي المشرع و المرور من تحت كبري السكة حديد لو ما اكون نسيت!!!

مرة اخرى الشكر ليكم جميعاً

اخوكم

صديق عبد الهادي

الى صديق عبد الهادى
الف الف الف مرحب بيك
نحن فى شوق لذكرياتك فى حصاحيصا الجمال
كل الود

الاخ وليد العشي
الشكر علي الترحيب و ربنا يقدرنا على المساهمة مع الاخوة و الاخوات
تحياتي

صديق.

صديق عبد الهادي كتب:

الاخوة و الاخوات في موقع الحصاحيصا
تحية و سلام
في البداية اشكر للاخ المهندس الدكتور بكري دعوته الكريمة للاشتراك في موقعكم الموقر و الناجح باذن الله... و لنا عندكم اصدقاء اعزاء علي راسهم اخونا حسن وراق لكم و لهم التحية.
طبعاً يا ناس الحصاحيصا انا قلت لاخونا بكري و الله حقو تعفينا من موضوع الاشتراك دا لانو حنخرب عليكم ساكت انا زول من العقدة و بالنسبة لناس الحصاحيصا من "الضهاري" و في احسن الاحوال من ناس "غرب الكنار" و ها دي البتجيب المشاكل بيناتنا !!! و دي من زمن كنا في حنتوب و اظن بكري بيكون عارف!!!
علي اية حال انا سعيد جداً و انتو ما طالبني حليفة و الله للحصاحيصا مكان في القلب و بعدين حنجي و نتكلم عن سفريات " ود هجا" و "سلطان الكيف" و "فرات" و كما عجبكم ركوب الكارو من السوق الي موقف البصات علي المشرع و المرور من تحت كبري السكة حديد لو ما اكون نسيت!!!
مرة اخرى الشكر ليكم جميعاً
اخوكم
صديق عبد الهادي

والله يا صديق شرفتنا كثير جدا، وأصلوا ناس الضهاري ديل لمن تجي منهم فلته بتكون كاربه ومميزه.
يعني الخاتم ومصطفي وصديق عبد الهادي
كافيه تب

اخوك ابراهيم

صديق عبد الهادي
حبابك ..حبابك ونورت الموقع والجزيرة
مرحب بي عمدة فلادلفيا وبنسلفانيا ونتمني ان يكون موقعنا خفيفا علي الغربة اللعينة ومسكناً لآلامها.. ويا صديق انت محتاج ليك لاستراحة من كلام الاقتصاد الجاف وبكون جميل لو تطرقت لتجربتك في الدنيا الجديدة وحكاوي زمان اما الحصاحيصا اعلم انها لاتبارح ذكراك الامكنة والشخوص وتقبل تحيات الجميع هنا ..جعفر عبد الرازق.. الرشيد محمد الحسن .. الطيب الامام..معروف علي احمد.. النعمة النعيم وآخرين.. بعدين اهل العوض كتار في الموقع بس عاملين فيها اولاد مدن.. الحصاحيصا كانت حدودها الجنوبية , المايقوما فقط يعني ناس ابراهيم الحاج كان ضقالي اهل عوض وكان ودسلفابي اهل عوض ولكن بارك الله في الحكم المحلي الخلي الضقالة من احياء الحصاحيصا السكنية ومن قولة تيت عينوا منها وزير الحكم المحلي يعني الضقالة دي لو كانت جوة الجك من بدري كان يكون رئيس الجمهورية زاتو منها!! والعقدة يا صديق مدينة وحضارة مرحب بيك مرة اخري والدار دارك..
ودام صفاك موفور[img][/img]

صديقي ابراهيم الحاج
كيفك يا رجل؟ و كيف اخبار الاسرة الكريمة؟
شكراً علي الكلمات الطيبة...و بعدين يا اخي مرة واحدة كدا مع ناس الخاتم و مصطفي...يا عزيزي ديل ناس شواهق، صحيح انهم نبتوا في الجزيرة و لكنهم حلقوا عالياً في سماء السودان.
تعرف لامن مشيت السودان بعد عشرين سنة في يناير 2007م و جيت ماري بالحصاحيصا و الله هاجت الشجون و طفرت كم دمعة!!! لانو اهلي لاقوني علي تقاطع شارع مدني مع الظلط الجديد النازل علي ود سلفاب و ماشي لحدي الفريجاب!!! يا زول دا كان موضوع غريب و عجيب...تعرف كتبت لكن ابيت انشر و بدون سبب ظاهر لحدي هسع إلا كان ناس موقع الحصاحيصا ديل اجبرونا ساكت
الحصاحيصا ليها مكان في القلب
و خليتك عافية، و لي قدام
مودتي،

صديق.

الاخ العزيز حسن وراق
سلام و تحية و شكراً علي الترحيب الحار.الناس الذكرتهم ديل وين هم؟ اتمنى انهم يكونوا بخير و كويسين.
والله الواحد سعيد انو يكون معاكم في موقع الحصاحيصا، و الشكر لاخونا الباشمهندس د.بكري. و طبعاً الحصاحيصا دي مدينة ناس كتار ما بعرفوا جمالها!. اتمنى ان يعرض الناس لكل ابداعات المدينة خاصة الفنية منها و الرياضية و غيرها فلقد اضافت مدينة الحصاحيصا الكثير للسودان في هذه المجالات.
مودتي،

صديق.

مرحب بيك في دارك .... واحنا منتظرين كل الكان

الاخت الفاضلة بت امها،
الشكر الجزيل علي الترحيب.
و تعرفي من الذي كان هو انني في طريقي الي مدينة ود مدني اول ما قبلوني في الثانوي العالي وقفنا في مدينة الحصاحيصا و كنت في صحبة الوالد ، طوّل الله في عمرو، و قام اشترى لي شبط، لا مؤاخذة، من ناس "باتا"، و الله كان من اجمل ما لبست من شباطة، و كان ليهو طعم خاص، و كمان قدلت بيهو في حنتوب قدلة خاصة!!! يعني دي اول افضال الحصاحيصا علينا في انها ادخلت علينا بهجة لا تنسى.
و لي قدام

تحياتي

صديق

الى صديق عبد الهادى
مرحبا بيك فى دوت كوم
والله سعداء جدا بوجودك
ونرحب بكل اهلنا فى العقده
ومليون سلام
مع حبى عمار تلودى

الاخ عمار تلودي
تحية و سلام
اشكرك على الترحيب، و ان شاء الله موقع الحصاحيصا يسع الجميع كما المدينة نفسها اللي كل زول ليهو بيها علاقة عندو معاها ذكريات اثيرة و قريبة للنفس.
تعرف من الذكريات اللي ما حأنساها انو لامن كنا طلبة في حنتوب بنحب نسافر عن طريق الحصاحيصا الي مدني...و كان عندي صديقي من ناس قرية "ابسير" في منطقة الحلاوين، اسمو محمد يوسف محمد امام و ساكنين في داخلية واحدة في حنتوب فكلما اكون طالع الخميس و ماشي الي "العقدة" كان بيقول لي "عليك الله امشي عن طريق الحصاحيصا، و ما تنسى التمباك"!!! لانو دائماً يحب يقول للناس في الداخلية "دا صعوط من الحصاحيصا مش اي كلام"!!!. الله يطراهو بالخير و يطرى الحصاحيصا بخيرين.

الشكر ليك مرة تانية،
مودتي،

صديق عبد الهادي.

مرحب بيك في منتداك.......................الحصاحيصا دوت كوم
ومشتاقين نسمع عن ذلك الزمن الجميل
وارد الله غربتك