عرس القرن الواحد وعشرين "الدعوة خاصة عشان ما تتخمخموا تحرجونا ساي"

أول أمبارح كان يوم تاريخي أو ممكن تسميه يوم الجرجرة والطيران العالمي
المناسبة تحقيق خطوبة الأبناء وليام وبنتنا كيت من قرية برادفيلد بمقاطعة يركشايـر
العريس ود المرحومة ديانا والعروس بت ميدلتون عماً لينا من ناس برادفيلـد
في الحقيقة عزمونا قالوا موديين قولة خير حسب العادات والتقاليد البريطانية
خمسة حافلات واتناشر بوكسي وكيلك صغيرة وأتوس ركبت فيها حبوبة العريس أم أبو
قبل ما نتحرك نسوان بريطانيا أطربننا بغنا الدلوكة والشُتامة مع إنو كان قولة خير بس
الدلوكة والشتامة دقا بقا .. دبا دقا.. دقا بقا .. دبا دقا..دقا بقا .. دبا دقا.. والزغاريد ما تديك الدرب
غنوا "ياعديلة يابيضا ويا ملائكة سيري معا الليلة شويم بقدرة الله "
وكمان هوي بي هوي بي وليم العريس يالله تتم ليي
هوي بي جاب البص كبير
هوي بي وما فضل صغير
وهوي بي وما فضل صغير وهو بي العقبة للوزير يالله تتم ليي"
والله عرضنا لمن فترنا وركبنا الحافلات يا الله من تعب العرضا
إتوكلنا وركبنا حوالي الساعة أربعة من لندن ووصلنا حلة برادفيلد مع صلاة المغرب
ونزلتنا من العربات دخلنا ديوان ميدلتون وفي الحقيقة ما خلا زول في يركشايـر ما عزمو
واحد من بتاعين الحافلات والعربات قرب يكتل ليهو شافع من الشفع الجو جارين وراء عربيات السيرة
الشربات بالبراميل يغرفوا ويكبوا في كبابي الشُب تشرب واحدة ويحلفوا عليك تتنيها "المشوار ما بعيد"
انا طبعا بالي في قولة خير قلت "ياربي ديل حا يدفعوا كم ؟؟ وياربي بالجديد ولا بالقديم ؟؟؟"

والله العظيم مبروك
ما لعاب قمار وما شراب سجار
المحبوب العريس راجل ود رجال

يظهر ان اهل العريس من العائلات الثرية الذين يطلقون عليهم
( الناس البيشربو الشاي ويدفقو تفلو).

شكراً لكما إخوتي العشي وعبد اللطيف عوض الله وبالفعل حايكون عرس القرن الواحد وعشرين بدون منازع
وللشي الشفتو في قولة خير دا غايتو يوم 29/4/2011 المقدم الله الضيوف إلا يوزعوهم على دول الاتحاد الاوربي
بس إن شاء الله ألقى وقت عشان انزل ليكم مشاهد قولة خير عشان ما أي واحد يدفع خمسة مليون قولة خير يجي يتبوبر علينا

بعد الشربات والرز واللقيمات قام أبو العريس ومعاهو إتنين من أقربائهم بالتوجه نحو الباب الداخلي "باب داخل الديوان"
ساروا بخطوات بطيئة حتى يتقدمهم أهل العروس"حسب العادات البريطانية" إلى داخل الحوش المخصص للأسرة
بعد لحظات سمعنا زغاريد باهتة ومتقطعة "تنم عن عدم رضا" من داخل حوش الأسرة الذي يفصلنا عنه حائط قصير جداً
وبيني وبينكم غلبني الصبر "دا شمار القرن" وإتسحبت "بالراحة" ودخلت عن طريق نفس الباب
لقيت نفسي وجهاً لوجه بأهل العريس الذين ألجمتهم الحيرة وهم وسط نسوان أهل العروس والرجال وقفوا بعيد "ما هماهم"
ولمن شفت الكلام زاد وكِتِر تدخلت بسرعة خوفاً من إندلاع "تفرتق" علينا يوم التاسع والعشرين الذي ننتظره بفارغ الصبر
سألت واحدة يبدو انها بتاعة شمارات واقفة بعيد لكن راخية أضانا تتصنط وقلت ليها "مالن الجماعة ديل نعل مافي عوجة؟؟"
قالت لي بصوت منخفض "الظاهر أم العروس وأهلها شافوا مبلغ 10 مليون جنيه ــ قولة خير ــ شوية عليهم"
وطوالي إتجهت لواحدة "متنفشة وصوتا عالي وتوبا واقع من راسا" وناغمتها بالسلام وردت علي بعد أن عملت لي إسكاننق
"الموضوع بسيط ياحاجة وما تزعلي نفسك كِدا خلينا نشوف الموضوع بالراحة"
جرت فيني جرة كلب " أسمع هنا بالراحة ولا بالردمية أنا ما عائزة نقاش في الموضوع دا كيت ما عوراء ولا ها حوصاء"
تراجعت شوية حتى لا أصاب بشظايا من المدفعية الثقيلة الفكتا فيني وبي قلبي " ياولية إنت قايلاني الزاوية ولا مصراته؟؟"
ولاحقتني " هدي مارقريت بت عبد الدافع الهوينة دي داكي الليلة دفعوا ليها 15 مليون قولة خير "
وأضافت بسخرية البريطانيين المعروفة " ...مع إنو العريس مغترب في بلجيكا العفينة دي !!"
وزادت " إجينا وليام ود دينا يدفع لينا 10 مليون ويسوينا ضحكة وسط نسوان برادفيلـد .... حدثني؟؟
رديت ليها "إستهدي بالله وروقي شوية بنزيدك وعلي الطلاق أكان ما دفعن وليام حبوبتو اليزابيث المكرفسة دي تدفعا "
هدأت شوية وجرينا لينا عنقريب بعيد شوية وبديت أوريها ان المسألة بسيطة وما بتحتاج لكل هذه الثورة

نواصل

لا تغيب ها المحبوب اخوي باقي نحنا شفقانين بندور بنعرف الحاصل

"قومي علي حيلك ومصمصي كريعاتك ديل بشوية موية وأعدلي حالك وتعالي إستقبلي ضيوفك زي الناس"
"إنت جائيك وليام ود ديانا سبنسر شخصياً والله أنا أكان ناسبوني جنس الناس ديل مرتي حا تزغرد بي ايدها الاتنين"
ضحكت وقالت لي" أنا ما بتهمني القروش هديلك العربات في الجمارك مخلصة والشيكات في السمسونيت مدبسة"
"طيب البهمك شنو آآلمعولقة .. وقتين الله فاتح عليك بجنس دا تاني كشف الحال لزوموشنو ؟؟" تمتمت في سري
وكأنها سمعتني فقالت " أنا موجعاني حقرتن لينا دايرين يخلو كيت بتي مسخرة كان يعزوها شوية ولا رايك شنو ؟؟"
وفي الأثناء حضر زوجها "والد العروس" وقال ليها "الحمد لله الناس كلها إتعشت لكن دايرين لينا صينيتين زيادة"
قامت متثاقلة ونادت على إحدى الموجودات "عليك الله في عقاب لحمة في التلاجة طلعيها زيدي بيها البواقي وجهزي صينيتين"
وإلتفتت إلى زوجها الذي يقف أمامها زيو وزي أي طفل مدرسة إبتدائية أمام معلمه " أنا ما سألتك الصينيتين لي منو ؟؟"
"ديل ناس قالوا أصحاب العريس جائيين من شيفلد والعربية خسرت بيهم في الطريق عشان كدا إتأخروا " أجابها بلطف
وفي الأثناء صاحت ليهم واحدة "ياختي كان عندك موبايل المشى يجيب لينا زيادة العيش دا ما تتصلي بيهو يسرع شوية"
عندها قالت لي "عليك الله إتصل لي في الرقم دا موبايلي والله محل ختيتو ما عارفة الله يسترنا ساي اليوم دا"
"والله السترة فارقتيها يوم وضحوه قولي الله يدي العافية قلت في نفسي دون أن أتجه ناحيتها"
أديتا الموبايل وأدارت الرقم وإنتظرت مسافة تنهدت فيها تنهيدة حارة وعندما رد عليها قالت ليهو"يازول الحكاية شنو ما يلا ؟ "
عندها سمعت جلبة وزغاريد سألت قالوا لي دي العروس جايبنها لي أهل العريس باقي فيهم ناس قالوا ما شافوها
والحقيقة كان موكب هادر فتحوا ليهو الممرات الآمنة وسط العناقريب وحلل الملحات وبراميل الموية حتى مشارف الديوان
وهناك جهز الحاضرون كاميرات الرصد الالكتروني لفحص ملامح العروس للتأكد من ملاحتـها وأناقتـها في هذا اليوم البهي
وقد أبهرت الحاضرين بحسن إختيارها للتوب السويسري الأحمر المزركش"بالأورقنزا" والفستان "الأوفوايت" القصير
وهمهم البعض ولزم الكثيرون الصمت بينما بدأت محركات السيارات في الخارج في التحرك إيذاناً بالعودة إلى لندن
والحقيقة فقد خلفت غزوة "قولة خير" دماراً شاملاً في الأموال والممتلكات أما الأرواح فإنها مزهزقة لامحالة في قادمات المعارك
فهناك معركة "سد المال" ومعركة "الشيلة والشبكة" وأم المعارك" يوم سيرة الدُخلة في 29/4 الجاري " وليمة ما تعتر ليهو
ونواصل
ياودعيسى حبابك ياخي
29/4 معانا
ولا مع عرس ود ديانا ؟؟

متعك الله فى الدارين يا ود الحبوب ... لكن اكيد ما ذى متعة ود المغربى .. عشان ما تتخمخم وتجى تحرجنا ساكت..!!!

يادكتور هلا بيك وإمكن نفكر نكلم ليك الجماعة تجي يوم 29/4 تحضر العقد ومن الغدا تتخارج تشتت مع الجلاكين
وعلى فكرة الحفلة الخاصة بـ" خلاس المال " حا تكون يوم 18/4 بي آني لينوكس
حفلة "الشبكة والشيلة" بي الفنانة أماندا هولدن
وحنة العريس "قعدتين" بالدلوكة بس
الاولى بي ديانا روس
والتانية مادونا
يادكتور إنذار أخير صلح علاقتك معانا شوية خليك من ودعيسى وودالمغربي والجاهوري ديل كورتن فكت

حتى تكونوا في الصورة كشف العريس بدأ
فقد أهدى السير بايدن جيفرسون العريس تور فريزيان وخروفين استراليين مبغبغين
ديفيد بيكهام أهدى العريس جلابية مطرزة بلون الطاقية والشال
وإعتذر عن حضور القيدومات بسبب فيكتوريا الله يرحما الماتمت الحول

اخ المحبوب ربنا اديك الصحه والعافيه...
10مليون النسيبه قالت شويه وحرمانه مايدخلن على والله قصه

والله يالمحبوب انت تحفة هذا المنتدى ....دايما تحلق بنا فى اجواء ممتعة ومذهلة ,,,,ودمت ودامت كتاباتك

شكراً لكم إخوتي الأفاضل أميمة الهميمة وأم راما الحبوبة وعزيزي خرومي وسعيدين بوجودكم معانا
تصدقوا وتامنوا بالله البصات إتحركت من برادفيلد في "يوركشير" إلى لندن في الواحدة صباحاً "اليوم التالي"
وبيني وبينكم قلت ما دام نحن أصلنا راجعين بعد بكرة المقدم الله عشان سد المال فقلت أحسن أبيت مع الجماعة هنا برادفيلد
معاي اتنين من شيفيلد وواحد من مانشستر فرشوا لينا سراير داخل ديوان في بيت جار ناس عمنا ميدلتون "أبو كيت"
للصباح عيني ما غمدت من السقط والزيفة لمن صحيت لي واحد من آل البيت قلت ليهو يجيب لينا دفاية من "الكدكدة"
سألتو عن سر السقط والزيفة قال لي "اليومين ديل زاد شوية بسبب "الموية الفاكنها في القمح في حواشات برادفيلد "
وما تميت كلامي معاهو قام طلع ليهو "كرستالة" شال منها جغمتين غلاد ونام في محلو وخلاني في كدكدتي ديك
بعد ساعة كدا صحي قال لي في شنو ؟ قلت ليهو "ياخوي قوم قلع القمح خلينا ناخد لينا نومة الله إلعن أبو دي قولة خير دي"
في الصباح جابوا لينا فرش أسنان وبشاكير وصابون لايفبوي ريحتو سِمت سِمت وقالو الشاي عند ناس ميدلتون
وحقيقي ما قصروا الشاي بالحليب المقنن كفتيراا قدر حلة الفول شربنا لمن قلنا شكراً وأنا دعيت ليهم بالزيادة والخلف
سألونا عن جماعة شيفيلد أها كلمتهم قلت ليهم قامو مع الآذان قالوا لاحقين أول بص أصلوا قفاهم أعوج بلحيل
حوالي الثامنة صباحاً أسمع ليك الباب "كو كو كو كو " فتحوا الباب من الحوار عرفت دا بتاع التلج "اللليلة في سري"
قلت الله يستر كمان ما يجي بتاع حاجة تانية وقد صدق حدثي "بما لدي من مخزون ولائمي وقرون إستشعار والحمد لله"
الحيطة بتاعة النسوان ما قصيرة أسمع ليك "قالت ليكم بت الزين أدونا التوب الأحمر والفستان وتعالوا شيلو خاتم الأمانية"
إتاري الفستان اليل البارح "عارية" قلت هوييييي مالي ومال المشاكل أنا جني وجن الديانة إنسحبت قلت ليهم ماش السوق
لفيت في السوق وقلت أفطر فطرة مدنكلة وبعداك الغداء ما مشكلة والعشاء ناس سد المال بجو من لندن وهكذا دلاليك
شغلت أجهزة الانذار المفكر ولفيت على مجموعات المطاعم إستقر بي المقام جنب واحد يقطع ليهو في سلطة في فناء مطعم
وتبين بأن الامدادات بقت تجيهو كل دقيقة إجي واحد الشايل دكوة والشايل زيت سمسم في كيس والشايل عيش حار من الفرن
كتلت حيلي والراجل منهمك في توضيب السلطة "وما طالبني حليفة" الجرجير والدكوة والطماطم والبصل عجنن تقول أم فتفت
بعد شوية جابوا اللحم المقلي في الصاج وشوية فول "حاف" إتأكدت تماما بان ديل ناس الادارة المركزية في برادفيلد
طوالي "السلام عليكم ورحمة الله تعالى وبركاته" ويشهد الله قبل مايردوا السلام أسمع ليك "إتفضل تعال جاي عليك الله "
ومشيت علي حوض الغسيل غسلت وجيت "إنقشطت ليك في نصهم زي الدافع" وهاك يانقاش شي كورة وشي سياسة
فطرت وشربت الشاي ولمن عرفوا بأني زائر لفترة قصيرة وماشي مانشستر جابوا لي قهوة تمت الكيف وزادت عليهو
سألتهم مانشستر دي بعيدة من هنا ياشباب ؟ شب لي واح شِفِت قال لي " لو مشيك بسرعة أكلك والله تصلا في تلاتة دقائق"

والله ناس الادارة المركزية دى نعنشت النافوخ وطلعت المتلبت وراء الخياشيم وفرتكت رباط العتوت وتلخ لولخ بخ بخ .....
يا محبوب زويلك بتاع الكريستالة دا دحين ما اداك معاهو شفطة شفطتين بكلامك البين لافطتين دا .....
اجازى محنك أأأأأأأ المحبووووووووووووب !!!!!

ودالجاك طمنا عليك ياخي وعلي عيالك في الدنيا الجديدة
باقيلك كان اداني جغمغة بكدكد ؟؟
دا فكا فينا موية القمح ونام
نتمنى ان نسمع عنك كل الخير آمين يارب العالمين

المال خلسوه ودفعوا 25 مليون جنيه إسترليني "بالجديد" كلمتني أوبرا وينفري جات من أمريكا مخصوص لخلاس المال
وفي البداية والله ما عرفتـها لمت فيها جنس شحمة البنطلون دائر يطق والشعر تحلف تقول دروقبا والوش إتكرفس لحق حبوبتي
أها بعد ما سالمتـها وطايبتـها مشينا قعدنا جنب كيت ونسليت وتوم كروز وجوليا روبرتس والمخرج السينمائي رومان بولانسكي
إغتنمتها فرصة وسألت اوبرا قلت ليـها " إنت يا أوبرا شعرك دا كان دهنتي بي حبة زيت ومشطيهو مالك البشتنه دي لزوما شنو"
وواصلت قلت الفرصة دي تاني ما بتجيني " بعدين بصراحة ما حقو تخلفي رجلك لانو فستانك يا الله واصل ركبتك"
ضحكت وقالت لي " يعني الشغل بتاعنا دا كلو ما شفت فيهو حاجة غير الشعر والفستان عليك الله الناس في شنو وإنتو في شنو؟"
إعتذرت ليها وقالدتـها وقلت ليها تعفي مني والله دي ملاحظات ساي لكن برنامجك من أحسن البرامج الحوارية في العالم
شب فيني توم كروز وقال لي " ياخوي خلينا من أوبرا انت ما شفت الصحف البريطانية سمت العروس ب كيتي ويتي "
قلت ليهو "معقول شمار زي دا يفوتني .. أتاريهم حارقم الشمار بتاع 2007 لمن قامت كيت وشوكشت وليام بعد علاقة 6 سنين"
كلهم إتجهوا نحوي وإستغربوا وفتحوا خشومن من الدهشة وواصلت " كيف إنتو ما عارفين القصة ولا عاملين فيـها رايحين ؟؟"
أها النحدثكم " البداية كانت في الجامعة لكن لمن سألوهم قالوا صداقة ساي وما مفكرين في عرس ولا أي حاجة يعني علاقة بريئة"
" الموضوع إتطور شوية ولمن عملوا تخريج وليام في سانت هيرس كيت جات وحضرت التخريج ومن ديك وعييك"
" طيب وبعدين ؟؟ " سألتني كيت وينسليت " إنت ياكيت بتتراوشي مالك ما تصبري علي شوية دي معلومات ملكية مش شمارات"
"أها شوية شوية البنية بدأت في التقرب منو وفي ناس شافوها تتزحلق معاهو في الجليد علي جهة يورك "
" ولمن بعض الصحف نشرت الصور شافتا أمها وقالوا قالت ليـها "أصبري ياكيت يابتي الجنا المندرعا فيهو دا ما ولد ديانا ؟؟
شبت لي أوبرا " هو لكن من درعا ولا من بني ياس ؟؟" رد عليها بولانسكي وهو ميت من الضحك " أوبرا بالله ما تقاطعيهو "
أها من اليوم داك مسز ميدلتون سوت الدرب ساساقا وهاك يازيارات ما تسمع ليها بي مناسبة في ويستمنستر تلفح توبا وتجر
لكن في 2007 قالوا قال ليها " كيت يآآختي والله أنا ما بقدر أعرس وعمري لسع ما وصل سن 28 سنة ودا الزعلا منو حينها "
جوليا روبرتس قالت بصوتها الرقيق " كُر علي يا كيتي 11 سنة معلقة جنس التعليقة دي وبعدا يقولو عليك كيتي waiti "
"المهم العلاقة رجعت سريع وقالوا أسي مشوا كينيا قعدوا ليهم في منتجع بعيد من الشمشارين ولبسا خاتم الخطوبة هناك "
" ويوم خلاس المال سمعت واحد صاحبي من برادفيلد قال لي أمها بتاعة فقرا وشافوها دائما بتتردد علي بيت شيخ محمد"
"دا بتاع جاكات ساي وليام مكسر فيها وقال لي حبوبتو اليزابيث كان تقطعي شطرك كان تخلي غيرا ما بعرس" قالت روبرتس
الجماعة بي هناك دفعوا المال والزغاريد قجت جعلت الناس كلها تتجه لأهل العروسين " وربنا يتمو علي خير ما تديك الدرب"
وبعد صمت قلت ليهم " ياجماعة 25 مليون دي ما شوية أسي أم العروس دايرا ليها موية رمضان بي كم ؟"
شبت لي أوبرا " موية رمضان لي منو انت ما سمعت بي انو أمو ميته الله يرحما ويغفر ليها !!!!!!!!"
قلت ليها " معاك حق والله يا اوبرا لكن حبوبتو أم عصيبات دي ما بتروق ان ما دفعتن دم قلبن "
وقال رومان بولانسكي " داك الليلة ناقرت ديانا لمن لحقتا الرقدو الله يستر علي كيتي ويتي "
الجماعة قطعوا علينا قعدتنا ونادونا للعشاء "ضلع" ضربنا زين والله عشا أحسن من بتاع قولة خير
ودعناهم والعربات دورت في منتصف الليل راجعين لندن "ويستمنستر" وبنجي صادين مع السيرة يوم 29 المقدم الله
إندرعت ليكم في كيت وينسليت قلت كان عندها فرقا في عربيتا توصلني معاها إن شاء الله تجدعني في الظلط الباقي بتمو كداري
وبسم الله ما شاء الله العربية رولزرويس قعدت في الكنبة الورانية جنب بت أختا وبتسوق بسرعة جنونية تقول ناشلة ليها جزلان
الشافعة ملظلظة قاعدة بي ورا بالله سلمت عليها ما قالت لي الله يجيرك ثغيلة ثغالة تقول شايلاني في راسا
ما إشتغلتا بيها الشغلة إتونست مع كيت شوية ومن الشبعة ولفحة الهوا نمت إلا كيت صحتني جنب الحلة
شكرتها وقالت لي "باي ماي دير سي يو نيكست فرايدي إن ويستمنستر إن شاء الله"

اها ناس الادارة المركزية ديل ما عرفت فيهم زول باقي كلهم اصحابنا واولادنا وعاوزين نعرف اخبارهم

ودرضوان عليك السلام وطارق الامين سلام ومرحباً بكما
معليش إتأخرت عليكم في الرد بسبب اللابتوب الكنت خاتيهو مع الطباخين ومرقت
ركبت لي كارو من صباح الرحمن لإحضار الصيوانات من ناس ويدينق سيرومينز سيرفيسز في لندن
أنا قلت الصيوان أفضل وأفيد لي من الوقوف في صفوف العيش ومصانع التلج وجمع عازفين الحفلة بالليل
خصوصاً الدنيا سقط وإحتمال لي حداشر النظام العام ما يطلعوا ليك "باقي لواييق زي لاعبي الكرة"
والحمد لله جبتـها من الصباح وأتفرغت للمساسقة بين الطباخين "لزوم المضاوقة" وإستقبال الضيوف الملكيين
طباخين الضيوف الملكيين براهم و ناس بريكستون وستوكويل وازلنغتون ونيوهام وهولوواي براهم
فطباخين الضيوف الملكيين جابوهم من فلندا والخرفان من استراليا و5 تيران من هولندا "فرزيان"
البـهائم جابوها في عربيات إسعاف والخضار مقرطس بأوراق السولفان ملفلف حبة الطماطم تقول شمامة
الطباخ قال ليـهم تجيبوا لي زيوت خاليه من الكلسترول عشان "الضلع" والبطاطس وسلطة الأسود
لكن باقي الأكل كلوا بالبخار وشائف مهندسين جوا ركبوا عدة الطبيخ من أول البارح ووصلوا الكهرابا
غير طباخين النسوان والشفع الله يعينن فقد ظفروا بالعشفة وجدعوا ليهم شوالين ملخوية و 10 قرعات
وشفت تلاتة شالن الكرشة وزحن بيـها بعيد "لزوم حاجات البيئة" ووصلن ليـهن خراطيش بس مطافي
و سألت عن الرغيف بتاع النسوان والشفع قالوا "اليزابيث" قالت يدوهن طاولتين ويركزن على الكسرة
غايتو لحدي الآن ما عرفت الناس المعزومين عددهم كم لكن أمبارح سمعت في البي بي سي بأنـهم 2000
وعرفت من البي بي سي بأن من بين المدعوين ستة وأربعون شخصا من أعضاء الأسر المالكة في العالم
خلاف عدد من المشاهير والشخصيات العامة و ذوي الجنود البريطانيين الذين قتلوا في العراق وأفغانستان
والله قلت لو عزموا أسرة كتشنر المات عندنا كان لقيت سبب عزمت ناس دكتور بكري وبعض أعضاء الموقع
وأهو بالمرة تشوفوا "التون جون وديفيد بيكهام وزوجته فكتوريا وروان اتكنسون" ماعنكم بخِت "الشقي ما بسعد"
ألزابيث حبوبة العريس أصرت على أن يتم العقد في ويستمنستر وحيرتنا وقطعت راسنا في موضوع السيرة
والعقد في ويستمنستر بالخسارة معانا لأنو كنا نفطر نقيل ونتغدى في لندن ونركب مع السيرة نمش ناس العروس
كلو من حبوبة العريس أم عصيبات دي "طابة" يد راجلا دوق أدنبره في "أباطا" كان سوت لينا سيرة مالا
والغايظني ولدا تشارلز قالوا قال لي مرتو إنت دوقة كرونل والله حلة ملاح واحدة بتشديـها مافي "كسترد بس"
كارول ومايكل ميدلتون جوا وجابوا فطور العريس بحلل القيزان الكبار معاهم 200 نفر من راجل لي إمراة
سألت عن العروس قالوا مشت الكوافير من الصباح قلت الله يستر ما يضحكن عليـها البنيات يظلطن وشها
داكي الليلة واحدة قريبتنا عروس مرقت من الصباح للكوافير لا فطور لا غدا جات الساعة سبعة مع الحفلة
الوش مظلت والروح مارقا منـها أهل العريس قالوا إلا يشوفوها ويرقصوها ليـهم والبنية مسكينة إستجابت
دقوا ليـها أغنية "سوحي وبالجنبة موحي" ساحت السوحة اللياها قاعدة في العناية المركزة يومين "مِكوفرة"

محبوب ماتخمنا ساي بي حكاويك اهم حاجه الكشف ختيت فيهو كم باقي الناس ديل لواميين

نضال والله بعد جبت الصيوان ما يقدر واحد يفتح خشمو معاي بكلمة
الصباحية كلها حايم بالكارو في لندن ارفع واخت في المواسير
تاني وبعدا كلو دايرني اخت في الكشف "يكشف حالهم"
وانت مالك ما تسكت هم اسي قايلني من اهل العروس

كثر خيرك يا المحبوب .. بعد ما اديتنى الامل بالعزومة .. ومجهز شنطتى وبدلتى الما خمج عشان ارفع راسكم مع ناس كيتى وود ديانا .. تقول لى عشان ما دعوا اهل كتشنر ما بتنادينى للعرس ... انا مالى ومال ناس كتشنر .. انا اول بالتبادى من اهل العروس لزم مش صلبطه ساكت ..كدى شوف بناتى الفى البروفايل بتاعى ده ما بشبهوها!! وكان لى وليم العريس انا كل مره طالع ونازل فى هيثرو وما حصل مره واحده فتو بالسلام من المطار ... وكم مره قال لى تعال بيت يوم يومين قبل ما تمشى امريكا .. وانا كل مره بزوغ باسباب واهية عشان ما يقد اضانى بمواضيعه بتاعة كيتى وشبهها لى بناتى ...!!! انا بعد ده راجع لى ناس ود عيسى والجاهورى الخليتنى بوظت العلاقة معاهم راجى دعوتك ... بعد ده بدعو عليك وان شاء الله فى الحفلة يجيك واحد من المشوكشين ويديك واحد عكاز مصلح عشان لخبطك البتسوى فيها دى ... كن بخير ...

مستر المهبوب-نحن مامتخمخمين ساااااي
نحن العزومه جاتنا من الليدي ساره فيرجسون دوقة يورك -الزوجه السابقه لي عم العريس ادوارد-
باقي هي صاحبة خالتنا واصرت لااااااااااااااااااذم نجي نمشي في السيره
عشان كده يوم الجمعه حاتلاقينا قدامك
ولنا عوده

ما شفناكم في العرس

فااااااااااااااااااااااااااااااااااااااتكم والله-عرس مبااااااااااالغه