جيت ماري بالسلخانة ..سكوني بالجبخانة "هيق" .. لو المعتمدية نصيحة الضبحة في روتانا ..

جري دمعي بالمايق جرى دمعي ليه "هيق"
يالراكب العربية
وديني للمعتمدية
يدوني قطعة ارض وادور الحولية
وجرى دمعي ليه "هيق"
"تدور الحولية بي سكرتك دي ؟؟ ياراجل ما تدور تمش علي بيتك تنوم "
ياولية ما خلعتيني مالك سببك علي شنو ؟؟
وما أسكر كان سكرت السكر ما هول الرجال
بعدين تعالي هنا أنا سكران بي قروشك ؟
ما سكران بي حقي "هيق"
"هيامي هييي إحلنا الله ياخوي خلاص طير مننا كدي كدي"
ياطير ياماشي لي هلنا
بسراع"هيق" وصل رسائلنا
وبالشوق ما تنسى ياطائر
لكل البسألك عنا "هيق"
عليك الله يا حاجة أسي ساعتك عاملة كم ؟
"الساعة سبعة مساء خلاص ياخوي شتت خلينا نشوف أشغالنا"
أشغالنا أشغالنا إنت قايلة رقبتك شغالة في المعتمدية عاين دي بالله ما ست شاي
أنا زمان واحد قريبي قلت ليهو إتوسط لي أشتغل في الخرطوم ساقني شغلني ست شاي في السوق الشعبي "هيق"
"السكرة دي بتفك وبكرة بجي الخريف واللواري بتقيف وياكا الراجع لي أنا دي "
"يانادية دينيني يانادية دينيني نعلت إسم أبوي تاني كان طارن عليك إلا ألقيهن"
"من الصباح شابكني هيق هيق والله لو بقيت إلكساندر هيق زاتو ما أشتغل بيك خلاص تمانية قربت أمش نوم"
يعني يا نادية زعلانة عشان بقول ليك دينيني "هيق" طيب لو قلت ليك دثيرني كنت سويتي لي شنو ؟
بعدين شنو فاكاها في نفسك أنا كان دايرلي دين تاني بجيك إنتي ما لي أعمى ما بمش بنك أمدرمان الوطني
وكان ما حدثوك الدين بالدولار ويحلـها الحلال
بالدولار بالدولار يا أبشرا
بالدولار إن شاء الله راجل مرا يا أبشرا "هيق" قولي آمين ويكون عندو تلاتة بنات وولدين والله تاني الشاي في البيت ما تشدي
"شديتك في الشيخ حمد أبعصاية
شاحداهو راية راية
إحقق لي منايا
ولي سكرك نهايا
وليهو جبنة بي شايا "
دقيقة ياختي مالك شاداني بي حمد ابعصاية ــ راية راية ولا زنقة زنقة ــ دا كلو عشان أخلي السكر ؟
عليك الله يانادية تفي الكلام دا من خشمك الزول دا يدو لاحقة ــ التقول شغال مع ناس محمد عطا ــ يقوم يعوقنا ساي
عليك الله أسي عاملة ليك محل شاي جنب عيادة أمراض باطنية الناس البتجي هنا كلهم بطنهم طامة البشرب منك منو ؟
"أنا ما ببيع للعيانين ببيع لي الناس المرافقين أها ديل بطنهم البطمما شنو ؟ "
كيف البطمما شنو ما بطمما الرفقة دي أكان مرافقين ليهم واحدة ماشة العمرة ولا الحج معليش لكن ترافق ليك عيان "هيق"
جيت ماري بالسلخانة
سكوني بالجبخانة "هيق"
لو المعتمدية تمام نصيحة
الضبحة في روتانا
إنت عارفة يا نادية الأغنية دي أمبارح غنيتا في السلخانة أدوني أمفتفت تفكك من جوانتنامو
والله الواحد لو غناها في دار الأوبرا كان بقى سيوبر ستار وبالمرة أكون "سكران قوت تلنت"
وعاد تاني بي هنا ما بجي والشمار كتير وانا تاني مابجي
بس من الام بي بي سي للألبسي اللبنانية
تضحكي وأنا زعلان
رسلت ليك أجمل خطاب
ولليلة ردك ما وصل
زعلانة ولا شنو الحصل
زعلانة ولا شنو "هيق"
ناديـــــــــــة الزول المتكلنو دا مودينو وين ؟
"مدخلنو للدكتور يعني حا يكون مودينو وين ؟
الله يكون في العون المرض كِتر والسكر بقى غالي أقصد العلاج بقى غالي "
دقيقة النتكل معاهم الزول ابفاخورة دا والله الإحتياطي المركزي ما يتكلو
ها جماعة سلا ل م"هيق" عليكم نعل ما عندكم عوجة كدي عليكم الله أجر وصل
أيوة كدا خش لي جوة أسي يدوك حقنتين وبندول وكوز ليمون تبقى زي الصلاة علي النبي
هويا القاعدة دي ما تزحي لينا شوية ما شايفة الزول دا تعبان كيف ؟
"قاعدة ولا طالبان"
قلت لي شنو ؟
"ياراجل هيي ما تصرف عربي كتير أنا براي روحي محرقاني"
لكن يا ختي دا قالوا دكتور باطنية دايرة دكتور حراق الروح أمشي دكتور ضحايا المعتمدية
قالوا ليك داك دكتور متخسص ومنتدب من هيئة الامم المتحدة لمدة عشرين سنة
أهلاننن مولانا كيف حالك نعل ما عندك عوجة "هيق" جائي دكتور الباطنية ؟
"أبداً والله جيت أحلل السُكري"
مولانا السُكري ما حلال ما تحلل لينا السُكر

يجازي محنك يالمحبوب

يا المحبوب شنو توووووووشك من كيتي ووليمنا للسلخانة والمتعمدية (رأيك شنو في الأسم الأخير ده لأنو مش خطأ إملائي ).

ابداع عديل والله يا أستاذ
تحياتى.

جزى الله عنا المحبوب بما حفلت اشعاره من جواهر
راى الصدق اسمى منزلا
در عند اهل البصائر تحياتى انت مبدع يامحبوبنا ,قد كشف جملة من القضايا ذخيرة اسمها الكمات الحقيقة أن الكمات ذخيرة
حية على مسرح الصراع ان الالهاءقصة على مسرح مشاهدها وصورتا وانت بوسع الخاطر
دائرة الالتزام بمضمنات المعنى بكل الايحاءات الملازمة لدلالتها
الشكر كل الشكر الى اخونا المبدع محبوبنا
تحياتتتتتتتتتتتتتتتتتتتتتتتتتتتتتتتتتتتتتتتتتتتتتتتى