الفرفور والطرطور ..

مسرحية : الفرفور والطرطور
تأليف : رضا الهجرسي

المشهد الأول



أمامك يا صديقى القارئ أختيارين ...
1- قراءة المسرحية وتخيلها والحكم عليها
2- أو مشاهدتها فيديو على اليو تيوب وهى معروضة
على مسرح فيصل ندى ..وحصولها على المركز
الأول فى مهرجان أبداع ..وكانت لجنة التحكيم
مكونة من : المخرج هانى لاشين ..المخرج المسرحى
فهمى الخولى ..الكاتب..د. نبيل فاروق ..الكاتب..لينين
الرملى ..الكاتب .أيمن سلامة ..وقد حصلت على المركز
الأول بأجماع اللجنة ..
وقد أردت مشاركة جميع أصدقائى فى المنتدى ..وتشجيعهم على الكتابة للمسرح ..فقد كانت هذة المسرحية
أول محاولة لى فى كتابة مسرحية الفصل الواحد..فتشجع وأكتب للمسرح ..وأعرض مسرحيتك فى مسرح
المنتدى ..قد تكون كاتب مسرح ولم تكتشف موهبتك بعد ..


الفرفور والطرطور

المشهد الاول

فى مواجهة المسرح كرسى يشبه كراسى الحكم موضوع عليه طرطور احمر . مرسوم على ظهر الكرسى مثلث مقسم الى اقسام (مرفق رسم كروكى للكرسى و الرسم و الطرطور) … تظهر راس رجل ينظر يمينا و يسارا ثم يدخل وكانه يتسلل و ينظر يمينا و يسارا.. الرجل نحيف الجسد و اسمر البشرة يلبس قطعة قماش قديمة مفتوحة من الجوانب و يربط حبل على وسطه و قطعة القماش تصل الى قبل ركبتيه و يديه عاريتين .. قطعة القماش تشبه الشوال المفتوح من الاعلى لدخول الراس و مفتوح من الجانبين للذراعين .. يذهب الرجل الى الى الجانب الاخر من المسرح و ينظر يمينا و يسارا ثم يعود الى منتصف المسرح و ينظر باتجاه الكرسى و يقف امامه ثم يقترب منه بحذر و يتحسسه و هو يبتسم و علامات السعادة تكسو وجهه.. ينظر الى الطرطور و يمسكه فى يده و يرفعه فى احترام و هيبة .

الفرفور : بقه انت بقه اللى بتحكم و تؤمر.. روح يا شيخ ربنا يورينى فيك يوم زى قرن الخروب ده انا شفت الويل على ما قدرت اوصل لك (يفكر باستغراب و هو يكلم الطرطور) بس انت بتعمل ايه لوحدك و فين لابس الطرطور.. كل الفرافير اتربت و اتعلمت ان لابس الطرطور و الطرطور حاجة واحدة و ان لابس الطرطور و الطرطور عمرهم ما يفترقوا.. ياكل لابسك .. يشرب لابسك.. ينام لابسك.. ي.. بلاش دى علشان الرقابة برضه لابسك.. طب هو فين و سايبك لوحدك ليه و مش لابسك ليه.. (يتلفت بنظرات خبث ضاحكة) طب ايه رايك لو لبسك الواد الفرفور حتى و لو يوم واحد.. لا.. لا يوم. كتير.. نص يوم برضه كتير.. ااقولك.. انا حالبسك ارجع بيك المعزة اللى بتوكلنى و بتوكل العيال و بعدين اقلعك (و هو يوجه كلامه للطرطور) هااه موافق الله يسترك من ساعة المعزة ما دخلت وسط معيز لابس الطرطور العظيم و انا عيالى جاعت و ماشربوش اللبن من ساعتها.. هيه موافق.

يرفع الطرطور ليضعه على راسه و يسمع اصوات آتية من الخارج فينزل الطرطور و يرجعه مكانه على الكرسى بسرعة و فى حركات سريعة يجرى يمينا و يسارا كمن يبحث عن مكان يختبىء وراءه ثم ينظر ناحية الكرسى

الفرفور : آه استخبى ورا الكرسى ده

يجلس خلف الكرسى و لكنه ظاهر لجمهور المسرح.. يدخل شاب فى العشرين من عمره واضعا يده الشمال خلف ظهره و يده اليمنى الى اعلى يحركها يمينا و يسارا كانه يرفض شىء و يهز راسه ايضا كانه يرفض شىء و يلبس ملابس ملك و يدخل خلفه رجل طاعن فى السن يتحرك فى وقار و يلبس ملابس فاخرة و بعده يدخل رجل فى الخمسين من عمره قوى البنية و ملابسه تدل على انه رجل عسكرى يحمل سيف و خنجر على وسطه . يقف الشاب فى منتصف المسرح و العجوز على يمينه و الاخر على شماله و هم الشاب لابس الطرطور و العجوز وزير الحكمة و الرجل العسكرى وزير القوة.

وزير الحكمة : يا مولاى اسمع الكلام و البس الطرطور

الملك : (بطريقة صبيانية يهز كتفيه) لا.. هه مش لابس الطرطور.
وزير القوة : (فى صوت قوى) لازم تلبس الطرطور عشرتيام فاتوا على موت ابوكم لابس الطرطور العظيم و المملكة بدون حاكم يحكمها و طلبك العجيب مستحيل يتحقق .. مستحيل.. اتكلم انت يا وزير الحكمة.. فهمه.

الملك : (فى نفس الحركات الصبيانية) برضه مش لابس الا لما اقابله.

الفرفور من خلف الكرسى و هو جالس القرفصاء خلف الكرسى يهز راسه فى استهزاء و يضرب كفا بكف ووزير الحكمة يشير الى وزير القوة ان يهدا.

وزير الحكمة : اهدا يا وزير القوة .. اهدا (يوجه كلامه للملك) طب انت عاوز تقابله ليه

الملك : عايز اساله سؤال

وزير الحكمة : اسالنى انا يمكن اجابة سؤالك عندى

الملك : (فى غضب صبيانى يضرب رجله بالارض) لا.. هه انا عايزه هو مش انت.. هه

وزير القوة : (فى قوة و عزم صارخا) محصلش و مش حيحصل ان لابس الطرطور العظيم يقابل فرفور و يتكلم معاه. مستحيل.. كل اجدادك العظام لابسى الطراطير ميعرفوش حتى شكل فرفور من الفرافير او اتكلم معاه.

الملك : (فى بعض الجدية) ازاى كانوا بيحكموهم من غير ما يعرفوهم

وزير الحكمة : ايوة.. هو ده السؤال اجاوبك انا بقى عليه(يشير وزير الحكمة ناحية الكرسى بيده فيتحرك الملك و يقف وجهه للكرسى و بجانبه وزير الحكمة و وزير القوة من الجهة الاخرى و يشير وزير الحكمة ناحية المثلث) جدك لابس الطرطور الاعظم بحكمته و بعد بصيرته رسم لكم انتم احفاده لابسى الطراطير العظام الطريق و حفر على ظهر الكرسى زى ما انت شايف كده خلاصة حكمته.

وزير الحكمة : (يشير باصبعه ناحية اعلى المثلث) هنا قاعد لابس الطرطور العظيم (ينزل باصبعه) و على يمينك وزير الحكمة و على شمالك وزير القوة

الملك : و مين دول

وزير القوة : دول الامراء و عائلة مولانا لابس الطرطور

الملك : و اللى تحتهم

وزير الحكمة : دول بقه الاغنياء و التجار و النصابين و الحرامية و دول احنا بنختارهم ع الفرازة لان دول اللى بيلموا الغلة من الفرافير و تحطها ف خزاين مولانا

الملك : ومين اللى تحتهم دول
وزير الحكمة : دول بقه ميزان المملكة كان جدك الكبير مسميهم الطبقة المتوسطة و شوية يسموهم الكادحة او الكالحة مش فاكر.

الملك : (يشير بذراعيه الاثنين) و مين دول كلهم.. ياااااه دول كتير قوى

وزير القوة : (باستهزاء) ما همة دول الفرافير اللى عايز تقابل و تكلم واحد منهم

الملك : كل دول فرافير… و دول شغلتهم ايه فى المملكة

وزير القوة : (و هو يشير ناحية الكرسى) دود الارض .. اتخلقوا علشان خدمة كل اللى فوقهم… جهلة اغبيا كل همهم ياكلوا و يشربوا و يخلفوا و ينامو . زى البهايم

وزير الحكمة : علشان كده خطر عليك تقابل واحد منهم حتشوف حيوان اعجم جاهل ما يعرفش يجاوبك على اى سؤال حتساله مقابلته مش حتغيرك

الفرفور : (مازال يهز راسه و هو يضحك و يضرب كفيه فى بعضهما) المعزة طارت ده عبيط و اهبل يابا

الملك : (يعود الى حركاته الصبيانية) برضه لازم اقابله و اتاكد من كلامكم هه.. و مش لابس الطرطور الا لما اقابله و اساله هه

الفرفور : (يهز راسه ضاحكا) بقه العيل ده انا جايله من آخر الدنيا علشان يرجع لى المعزة (يلطم خديه) يبقة المعزة طارت … طارت يابا طارت

وزير القوة : (فى صوت غاضب) تساله عن ايه بس

الملك : اساله ليه الفرافير بيكرهوا لابس الطرطور(وفى رقة تميل الى الانوثة) انا يا جماعة ما احبش حد يكرهنى خالص خالص

يضحك الجميع

وزير القوة : (يقلده فى استهزاء) بس عايز تقابله علشان كده علشان ما تحبش حد يكرهك خالص خالص

وزير الحكمة : (فى هدوء) يابنى فى اى مكان و اى زمان الفرافير دايما و لازم يكرهوا لابس الطرطور مش باقولك جهلة و بهايم

الملك : (يصرخ فى صبيانية) ماليش دعوة انا عايز فرفور هاتولى فرفور حالا (فى توعد) و الا مش لابس الطرطور و حاخليكوا كده لا تحكموا و لا تؤمروا

الفرفور : (يقف خلف الكرسى و هو يضع يده على جانب راسه فى تفكير) هيه دى

فجاة يقفز وسطهم و يفزع الجميع و يحدث هرج و مرج و يخرج وزير القوة سيفه فى خوف و فزع يقف الفرفور بينهم و هو ينظر حوله فى تعجب

الفرفور : انا فين وايه اللى جابنى هنا

وزير القوة : (يمسكه من قفاه رافعا سيفه) انت مين .. و دخلت هنا ازاى انطق والا حاطير رقبتك فى الحال

الفرفور : (يشير ناحية الملك) استنى يابا تطير رقبة مين ده مولاى اللى بعتلى

الملك : (يرجع الى الوراء متاففا فى ذعر) بعتلك انا بعتلك انت مين.. و لابس كده ليه و شكلك عامل كده ليه

الفرفور : سيبك دلوقتى من شكلى و لبسى دى فيها قطع رقبة يابا الملك قولهم ان انت اللى بعتلى
الملك : بعتلك انا بعتلك انت مين و بعتلك ليه

يرفع الفرفور يد وزير القوة من على قفاه و يتحرك ناحية الملك فيتحرك الملك مبتعدا عنه فى تافف و يضع يده على انفه

الملك : خليك عندك اتكلم من بعيد

الفرفور : انا الفرفور يا مولاى . افتكر بس .. افتكرت

الملك : الفرفور .. انت بقه الفرفور..

وزير القوة : ارجوك يا مولاى خليك بعيد عنه.. ده خطر..

الملك : (يوافق بهزة من راسه) جيت هنا ازاى يا فرفور..

الفرفور : احكيلك يا مولاى (يقترب ناحية الملك فيمسكه وزير القوة من قفاه) سيب يابا انا حاحكيله بس..

وزير القوة : من بعيد..

الملك : (يشير الى الفرفور ان يبتعد) احكى .. بس من بعيد .. و انت عندك .

الفرفور : (يتحرك و هو يحكى) بقه انا كنت قاعد قاعدة انس مع مدامتى.. كلنا و شربنا.. الفرفورة مدامتى قالتلى تعالى. عايزة ايه يا فرفورة.. قالتلى بعد ما ناكل و نشرب بنعمل ايه.. قلتلها بنعمل ايه.. قالتلى يا حمار حسب الجدول بنخلف. قلتلها معلش يا مدامتى انا بهيم. المهم لسه حنبتدى الخلفة .. الا و سمعت هاتف بيناديلى و يقولى يا واد يا فرفور مولاك لابس الطرطور . عايزك تحضر حالا فى التو و اللحظة.. وقفت الخلفة فى نصها الهاتف قاللى ارفع ايدك لفوق و غمض عينك (ينحنى امام الملك) و هوب.. لقيتنى قدام مولاى .. و على الله اعرف اخلف تانى .
الملك : (يتحرك حول الفرفور يتفحصه فى دائرة كبيرة بحذر شديد و يقترب منه) افتح بقك و خرج لسانك (يفتح الفرفور فمه و يخرج لسانه) قول ورايا .. انا فرفور ابن فرفور

الفرفور : انت فرفور... ابن فرفور.

وزير القوة : (يصرخ فى غضب و يحاول ضرب الفرفور) اتادب يا ابن الكلب و انت بتتكلم مع مولاك .

وزير الحكمة : صدقتنى يا مولاى .. بهايم و جهلة ..

تدخل امراة شابة من جانب المسرح ينحنى لها الجميع ما عدا الملك و الفرفور

وزير القوة : مولاتى الملكة

وزير الحكمة : مولاتى الملكة

تقف الملكة بجانب الملك ثم ترى الفرفور فتفزع و تحتمى بالملك

الملكة : ايه الشىء الغريب ده

الملك : ده الفرفور

الملكة : ياى كان نفسى موت اشوفه. هو ليه وسخ قوى كده (توجه كلامها للفرفور) انت ما بتعملش ساونا .

الفرفور : هه.. (ينظر الى وزير القوة فى ذهول) ايه يابا الحج اللى بتقول عليه الولية دى.. اكل.

وزير القوة : طشت و كوز وليفة

الفرفور : (يكلم الملكة) ما احنا كنا ناويين نستحمى لكن سيدنا الولى دعانى فبل ما نكمل يااه ده كل حاجة كانت جاهزة الطشت و الكوز والليفة لكن نعمل ايه مولانا دعانا و لبينا بركاتك........ يا مولانا ..

الملكة : (توجه كلامها للملك وللفرفور) جسمه سمباتيك خالص .. انت بتعمل الجيمنازيوم . بتاعك فين و ايه نظام الريجيم اللى انت ماشى عليه ..

الفرفور : (ينظر الفرفور الى وزير القوة) هه ايه ده راخر يابا الحج جرجرنزم و البتاع التانى ده

الملكة : (موجهة كلامها للملك)و لا النيو لوك اللى لابسه يااى.. (توجه كلامها للفرفور) دى موضة جديدة يااى ترى ترى شيك. اعرف بيفصل الموضة الشيك دى فين واعمل واحد زيه. انت بتفصل فين

الفرفور : هه
الملكة : يااى.. ولا ريحته (تمسك انفها بابهامها و سبابتها) فظيعة فظيعة.. انت نوع البرفان اللى بتحطه ايه

الفرفور : هه

الملكة : لازم تغيره

الفرفور : اغيره

الملكة : بص انا حاعملك لستة بنوع البرفانات اللى بيحطها مولاك الملك و هو مشوار صغنن لغاية بارى (باريس)

الفرفور : نروح

الملكة : حتلاقيهم غاليين شوية .. بس مش مهم

الفرفور : لالالا.. مش مهم خالص

الملك : (يشير للملكة ان تصمت) استنى شوية انا عايز اساله سؤال صعب و اتاكد من كلامهم انه جاهل و بهيم

الملكة : (فى رجاء) لالا انا حاساله.. حاساله سؤال صعب خالص انت فرفور انت.. واحد وواحد يبقوا كام . جاوب

وزير القوة : (يقترب وزير القوة من الفرفور من ناحية جنبه و يخرج الخنجر و يضعه فى جنبه و يهمس له فى وعيد) لو جاوبت يا كلب يا ابن الكلب حاغرز الخنجر ده فى جنبك

يهز الفرفور وسطه فى حركات راقصة كمن يدغدغه احد و يهز كتفيه ولا يجيب بكلمة و الملك يشجعه

الملك : جاوب . حاول تفكر. شغل مخك. واحد وواحد يبقوا كام

وهو مازال يحرك وسطه و الخنجر فى جنبه و يهز كتفيه ولا يجيب

الملك : واحد وواحد يبقوا كام

يزغده وزير القوة بالخنجر

الفرفور : آى حاسب يا عم بالراحة.. حجاوب حاضر.. واحد وواحد يبقوا كام .. يبقوا كام يا واد يا فرفور (يصرخ) اه يبقوا عشر غرز. فى جنبى. (ينظر لوزير القوة) صح كده.. صح يابا الحاج .. عشر غرز صح

يرفع وزير القوة خنجره و يعيده فى مكانه و يتجه وزير الحكمة للملك
وزير الحكمة : صدقنى يا مولاى.. بهايم جهلة ياكلو و يشربوا و يخلفوا و ينامو

الفرفور : (فى سخرية) ما خلاص بقه حناكل ونشرب وننام بس. انسى حكاية الخلفة دى

ينظر الملك بياس للفرفور و يبدا يتحرك ببطء باديا على وجهه الياس و الحزن ناحية الكرسى و يقف امامه صامتا و الجميع ينظر اليه بتركيز و يمد يده و يرفع الطرطور و يلبسه و يجلس على الكرسى فى عظمة يتحرك وزير الحكمة و يقف على يمينه ثم يتحرك وزير القوة و يقف على يساره و يقف امامهم الفرفور و ينحنى لهم ثم يلتفت ناحية الجمهور و يوجه كلامه اليهم

الفرفور : انتوا طبعا شايفين و فاهمين و حتعذرونى فى اللى حاعمله (يلتفت اليهم ناظرا فى عزم و اصرار و يشير) كده بقه المعزة طارت وبدال المعزة طارت ( يلتفت ناحية حامل الطرطور و يصرخ) واحد وواحد يبقوا اتنين

ويظل يردد واحد وواحد يبقوا اتنين وبدلا من ان يغادر الفرفور المسرح يذهب جيئة و ذهابا و هو يردد واحد وواحد يبقوا اتنين.. واحد وواحد يبقوا اتنين (فيقف الملك وهو يشير ناحية الفرفور)

الملك : هوه جاوب.. جاوب ايوة جاوب

يحاول وزير الحكمة و وزير القوة ان يلهوا الملك و يعترضوا باجسامهم حتى لا يرى الفرفور

وزير الحكمة : لا يا مولاى. ده بيهتف لمولانا لابس الطرطور العظيم

وزير القوة : ايوة يا مولاى ده بيهتف بحياة مولانا

مازال الفرفور يهتف و هو يتحرك الى يمين المسرح و يعود الى يساره يلتفت اليه وزير القوة و يضع يده على خنجره فيقف الفرفور و يهتف فى صمت و هو مازال رافعا يديه لاعلى و هو يتحرك الى اليمين و اليسار و هو شفتيه بالهتاف الصامت دون ان ينطق و يعود كلا من وزير الحكمة و وزير القوة يتكلمون الى الملك و يتحركوا يمينا و يسارا حتى لا يرى الملك الفرفور و يتحرك الملك يمينا و يسارا محاولا ان يرى الفرفور . يتجه الفرفور ناحيتهم و مازال يهتف هتافا صامتا و يقف خلف وزير الحكمة و وزير القوة و يشير للملك بحركات كوميدية باصبعه فيما معناه واحد وواحد ثم يضع قرنين باصابعه لوزير الحكمة بيده اليمين و قرنين لوزير القوة بيده اليسرى بمعنى اثنين . يشير الملك ضاحكا اليهم وهو يرى القرنين فوق رؤوسهم و ينطلق فى ضحك عالى هستيرى و هو يشير الى رؤوسهم فيلتفتوا خلفهم فينزل الفرفور يديه و يرقص و يلف حول نفسه فى حركات كوميدية و عندما يلتفتوا ناحية الملك يعود و يضع القرنين فوق رؤوسهم و يزداد ضحك الملك و هو يردد فى ميوعة

الملك : الفرفور ده دمه خفيف خالص خالص.. انا حبيته خالص خالص

يعود الملك و يجلس على الكرسى

الملك : (فى جدية) مرسوم طرطورى رقم 1 . قررنا نحن لابس الطرطور العظيم تعيين الفرفور ده (يشير ناحية الفرفور) مهرج الملك الخاص

يتحرك وزير الحكمة الى يمين المسرح ووزير القوة الى يسار المسرح و قد بدا عليهم الامتعاض و عدم الموافقة

الفرفور : (ينظر الفرفور ناحية وزير القوة ) ايه يابا ده كمان .. مهرج الملك الخاص

وزير القوة : (فى غضب) اراجوز. حتكون ايه يعنى اراجوز..

الفرفور : (فى خبث) و دى وظيفة محترمة يعنى. على درجة يعنى ولا زهورات . يعنى شغلتى ايه ..

وزير الحكمة : (فى خبث يضع يديه على كتف الفرفور) كل شغلتك انك تضحك الملك و بس .. متتدخلش فى اى حاجة. متسمعش اى حاجة . يعنى مبتسمعش .. مبتشفش .. مبتتكلمش . هى دى وظيفتك. زى ما فهمك وزير القوة . اراجوز..

الفرفور : (فى عصبية و بصوت عالى) لا . لا والف لا. انا مش ممكن اقبل. اقتلونى اسجنونى ادبحونى انا مش ممكن اقبل ابدا

تظهر علامات الارتياح على وزير الحكمة و وزير القوة

الفرفور : (فى خبث) انا مش ممكن اقبل . الا بشرط

وزير القوة : (فى غضب) شرط . انت بتتشرط على مولاك يا صعلوك . انت عارف عقاب اللى يرفض ينفذ مرسوم طرطورى .. ايه

الفرفور : (فى استهزاء) حيكون ايه يعنى .

وزير القوة : (يشير باصبعه الى رقبته) رقبته ..

يمسك الفرفور رقبته

الفرفور : (فى استكانة) هوة يعنى مش شرط قوى كده ..

يضحك الملك

الملك : قول يا فرفور .. انا سامعك .. ايه شرطك ..

الفرفور : البس طرطور زى طرطورك .. و نبقى احنا الاتنين طراطير ..

ينطلق الملك فى ضحك عالى و يظهر الغضب و الاستياء على وزير الحكمة و القوة

وزير القوة : مستحيل … ده لازم يموت فورا … انت عايز يا صعلوك تشبه نفسك بالملوك .. مولاى ده لازم تطير رقبته فورا ..
الفرفور : يابا الحج اهدى . هية رقبتى عجباك قوى كده . (فى استاذية يشير على الملك) ده طرطور ملوكى (ثم يشير على نفسه) و ده طرطور صعلوكى . (فى مرارة) و تعمل ايه يا صعلوك بين الملوك ..

الملك : (فى ضحك متواصل) لا .. لا .. ده دمه خفيف خا لص.. خا لص...

يعتدل الملك فى جدية على الكرسى

الملك : مرسوم طرطورى رقم 2 . يسمح للفرفور بلبس الطرطور

ينظر الفرفور ناحية الجمهور

الفرفور : (فى لهجة تهكمية) و بكدة بقينا طرطورين فى المملكة......




( تسدل الستار )

https://www.youtube.com/user/9876543210499?feature=mhee
فيديو المشهد الأول من مسرحية الفرفور والطرطور..

المشهد الثانى
فى واجهة المسرح للخلف يجلس الملك و الملكة على كرسيين. على يمين المسرح يجلس وزير الحكمة و وزير القوة على شلت و امامهم الطعام و الشراب و الراقصات يرقصون و هم فى ملابس الجوارى و يرقص معهم الفرفور امام الملك و الملكة و هو يلبس ملابس مهرج الملك و يرتدى طرطور على راسه و الملك يشير و هو يضحك الى الفرفور و تظهر علامات الاستياء و الغضب على الملكة و يشير ان يرضيها و لكنها تشيح براسها بدلال ثم تنظر اليه فى استياء و دلال
الملكة : لا.. انا زعلانة منك .. خالص .. خالص . متكلمنيش .. انا مخاصماك .. خالص .. خالص
الملك : ليه يا حبيبتى .. بس .. فهمينى .. انتى زعلانة منى ليه (فى ميوعة) .. خالص .. خالص
الملكة : يعنى مش عارف يا وحش خالص .. خالص
الملك : انا مش ممكن ازعل مولاتى و حبيبة قلبى و روحى خالص .. خالص
الملكة : كداب خالص .. خالص و مش بتحبنى خالص .. خالص
الملك : انا مبحبكيش اخص عليكى خالص .. خالص . ده انت بنت عمى و حبيبتى و مراتى و ام عيالى اللى جايين..
تقاطعه
الملكة : كداب خالص .. خالص
الفرفور : (يحدث نفسه) مش باين عليه حيجيب عيال .. (فى ميوعة) خالص .. خالص
الملك : افهم ..بس.. يا حبيبتى ايه اللى مزعلك منى كده .. خالص .. خالص
الملكة : انت عارف .. هه .. خالص .. خالص
الملك : عارف ايه بس .. انا معرفش حاجة .. خالص .. خالص
الملكة : انت عارف انى كان نفسى فى الفرفور .. خالص .. خالص و انت خدته منى
الملك : هأ .. هأ .. هأ .. (ضحك عالى)
الملكة : (فى غضب و دلال) انت طول عمرك كده . و من واحنا عيال كل حاجة احبها و نفسى فيها تجرى و تسرقها منى .. انت وحش خالص .. خالص
الملك : هأ هأ هأ بس كده يا حبيبتى . حجيبلك فرفور مخصوص ليكى
الملكة : (تشير بيدها ناحية الفرفور) لا.. انا كنت عايزة.. ده .. اصل دمه خفيف .. خالص .. خالص
الملك : مينفعش يا حبيبتى .. ده انا اصدرت مرسوم طرطورى و مقدرش ارجع فيه . و كمان انا بافكر اعمله مستشارى الخاص فى امور الفرافير و اعمله مجلس شورى … انتى مش واخدة بالك .. انا لبسته طرطور مخصوص علشان المجلس و بافكر البس المجلس كله طراطير . عايز الشعب الفرافيرى يشاركنى فى امور الحكم . و يبطلوا يكرهوا لابس الطرطور
ترتفع الموسيقى و يرقص الفرفور مع الراقصات بحماس و حركات كوميدية و يقترب من وزيرى الحكمة و القوة و هو يشير الى الطرطور على راسه
الفرفور : معايا طرطور . و انتوا معاكوش
تظهر علامات الغضب على وجه وزير القوة
وزير الحكمة : اهدى . ده بقى من حاشية الملك . و الملك بيحبه و بيستشيره فى كل حاجة . و العافية دلوقتى متنفعش معاه سيبهولى انا .. انا باجهز له الاسفين اللى حيطيره .. و الملك بنفسه اللى حيقطع رقبته .. بس الحاجات دى عايزة تستوى على نار هادية و على مهلها . سيبنى اتكتك له ..
وزير القوة : (فى غيظ مكتوم) و ماله .. سوى على مهلك خالص . و لما تخلص الاعيبك و حيلك (فى توعد) ييجى دورى انا (وهو يشير بيديه على رقبته و كانه يقطعها)
ترتفع الموسيقى و الفرفور يرقص مع الراقصات و تقف الملكة غاضبة و تغادر المسرح و هى تنظر الى الفرفور و تبكى. يقف الملك و ينظر اليهم و يتوقف الرقص و يقف مواجها الفرفور
الملك : وقفت ليه.. ارقص يا فرفور ارقص . ارقص يا فرفور..
يرقص الفرفور و يقلده الملك و هو يضحك
الملك : ارقص .. ارقص يا فرفور (يضع الملك يده على كتف الفرفور) مبسوط يا عزيزى الفرفور .. سعيد
الفرفور : آه .. انا سعيد و مبسوط
الملك : ليه
الفرفور : ليه .. ايه
الملك : ليه انت سعيد و مبسوط ..
الفرفور : علشان … انا عندى طرطور .. زى طرطورك
الملك : و ده يسعدك
الفرفور : آه
الملك : ليه
الفرفور : (ينظر الى وزير القوة) اجاوب ..
يهز وزير القوة راسه بالموافقة
الفرفور : علشان انا كان نفسى احقق امنية كل الفرافير فى المملكة
الملك : (فى جدية) امنية كل الفرافير . و ايه هية بقه امنية كل الفرافير
يواجه الفرفور جمهور المسرح و يشير الى الجمهور
الفرفور : (فى مرارة) ان واحد من الفرافير يلبس الطرطور و لو مرة .. مرة واحدة
يضحك الملك و يضحك معه وزيرى الحكمة و القوة
الملك : واديك حققت امنية كل الفرافير و لبست الطرطور و بقيت لابس طرطور زيى . يعنى انت طرطور و انا طرطور (يضحك الملك بصوت عالى و هو يعدل الطرطور على راس الفرفور) و بقى الفرفور و الطرطور حتة واحدة . ارقص يا فرفور ارقص .. ارقص يا فرفور ارقص (وهو يغادر المسرح) راجع لك تانى . ارقص يا فرفور ارقص راجع لك تانى
يقف وزير القوة فى غضب و يتوقف الرقص باشارة من يده و يقف وزير الحكمة و تتوقف الموسيقى ويظل الفرفور يرقص بدون موسيقى و قد ظهرت عليه علامات الخوف و الوزيرين يلتفوا حوله و يحاصروه
الفرفور : ايه فيه ايه .. لا .. انا زيى زيكم . و احسن منكوا كمان (فى كبرياء و قلاطة و هو يعدل الطرطور على راسه) حد منكوا لابس طرطور زيى . انت عندك طرطور … و لا انت
يصرخ وزير القوة فى غضب و يمسكه من قفاه بعنف
وزير القوة : طرطور ايه . يا ابو طرطور انت .. انت صدقت نفسك يا حيوان . انت اراجوز مجرد اراجوز .. و كل اراجوز لازم يلبس طرطور . فهمت يا حيوان
الفرفور يحاول التخلص من يديه
الفرفور : باقولك ايه .. انا دلوقتى موظف على درجة . زيى زيك
وزير القوة : زي زيك.. يا حيوان ..
يحاول وزير الحكمة ان يخلصه من يديه و فى خبث يشير لوزير القوة ان يهدا
وزير الحكمة : (فى خبث) طبعا . زيه زيك و احسن كمان .. ده لابس طرطور يعنى زيه زى مولانا لابس الطرطور العظيم
الفرفور : انا مباخفش الا منك .. و سهتنتك دى . و كلامك الناعم ده
وزير الحكمة : لا .. لا . متخفش خالص .. انا عايزك تطمن خالص .. خالص
الفرفور : انا مبخفش الا من خالص .. خالص .. دى
وزير الحكمة : (فى ابتسامة خبيثة وهو ينظر الى وزير القوة و يشير له ان يهدا) هوة بس مش قادر يستوعب وضعك الجديد
الفرفور : وضعى الجديد
وزير الحكمة : طبعا وضعك الجديد العظيم . انت اصبحت من لابسى الطراطير العظام
الفرفور : (فى استغراب و هو يتحسس الطرطور على راسه) انا
وزير الحكمة : طبعا انت .. عارف انت ممكن كمان تطلع مرسوم طرطورى
الفرفور : انا
وزير الحكمة : طبعا انت . قولى بأه . ايه اول مرسوم طرطورى حتطلعه..
الفرفور : (يضع يده على ذقنه و يفكر و يتحرك و هو يفكر) ايه يا واد يا فرفور … ايه يا واد يا ابو الفرافير. ايه اول مرسوم طرطورى (يقف فجاة و هو يصرخ) ايوة .. اول مرسوم طرطورى .. حطلعه بالاعدام...
وزير الحكمة : بالاعدام .. اعدام مين
ينظر الفرفور ناحية وزير القوة بتركيز و هو يهز راسه
الفرفور : (فى قوة) ايوة بالاعدام ..
يتحرك وزير القوة ناحية الفرفور وهو يضع يده على خنجره و فى توعد
وزير القوة : اعدام مين يا روح امك ..
الفرفور : (فى خوف و هلع) الفرفورة .. اعدام الفرفورة يابا الحج ..
يضحك كل من وزير الحكمة و وزير القوة معا
وزير الحكمة : وعايز تعدمها ليه
الفرفور : قرفتنى فى عيشتى .. تبقى عارفة الحالة ضنك .. و تفضل تقولك .. هات .. هات .. هات (فى قوة و عزم) فى مرة.. من المرات شخطت فيها ..
وزير الحكمة : مرة
الفرفور : اه ما هية مرة واحدة بس اللى شخطت فيها.. ووقفتها قدامى زنهار .. و هية بترتعش
وزير الحكمة : و بعدين عملت ايه
الفرفور : عملت ايه ده انا عملت عمايل . قلتلها انتى يا بت يا فرفورة
وزير الحكمة : قلتلها كده . انتى يا بت يا فرفورة
الفرفور : مش مصدق انت . لا انت متعرفنيش لما بازعل .. ببقى حاجة تانية خالص
وزير القوة : بتبقى ايه . حيوان طبعا
الفرفور : (فى قوة صارخا) ايوة بابقى حيوان هايج . اسد . غضنفر . سبع السباع
وزير الحكمة : يا ولد .. و بعدين هية عملت ايه
الفرفور : هية … كانت واقفة بترتعش قدامى و انا باشخط و ازأر زى الاسد . هوة كله هات .. هات .. هات .. مفيش خد ..
وزير الحكمة : هية بقى ردت عليك قالتلك ايه
الفرفور : (فى صوت متخاذل وهو يقلد الفرفورة) قالت لى ..بس كدة.. خد الواد فرفر غير له الكافولة بتاعته ..
يضحك وزيرى الحكمة و القوة و يدخل الملك و الملكة و ينحنى الجميع الى ان يجلسوا
الملك : ايه يا فرفور بطلت رقص ليه . ارقص يا فرفور .. ارقص
موسيقى و تعاود الراقصات و الفرفور الرقص امام الملك و الملكة مازالت غاضبة … يظهر وراء الملك و الملكة شعر اشعث منكوش ثم وجه امراة متسخ . يراها الفرفور فيقف مذهولا يدعك عينيه بيديه غير مصدق . تنزل المراة و تختفى خلف الملك و الملكة و يشمشم الملك كانه شم رائحة فى الجو
الملك : الريحة دى مش غريبة علية ..
تشم الملكة
الملكة : ايوة.. دى ريحة الفرفور.. بس الفرفور الجوارى حموه و عطروه..
الملك : (ينظر ناحية الفرفور) معقول كل العطور و الروايح دى و ريحته زى ما هية
الفرفور : (يكلم نفسه) لا يبقى انا مبحلمش و لا اتهيالى . بدال شموا الريحة تبقى هية ايوة هية
الملك : (يمسك انفه و الملكة متاففة) ابقوا انقعوه يومين تلاتة كمان.. لما الريحة تروح منة..
يشير الملك لوزير الحكمة ان يقترب .. يقف وزير الحكمة امام الملك و الملكة
وزير الحكمة : امرك يا مولاى
الملك : يا وزير الحكمة مولاتك الملكة حزينة .. خالص .. خالص
وزير الحكمة : ليه يا مولاتى بعد الشر
الملك : المشكلة ان كان نفسها فى الفرفور .. و انت عارف قوانين المملكة . منقدرش نغير المرسوم الطرطورى بعد صدوره
الملكة : (فى دلال و غضب) انا ماليش دعوة . هه
وزير الحكمة : ايه المشكلة بس يا مولاتى و انا احلهالك على طول
الملك : المشكلة انها نفسها فى الفرفور . احاول افهمها انه صعب خالص .. خالص.. اغير مرسوم طرطورى صدر..
وزير الحكمة : بس كده يا مولاى حلها سهل خالص . خالص
ينظر وزير الحكمة ناحية وزير القوة و يغمز له
الملك : قول حلها ايه ..
وزير الحكمة : واحد بس اللى ممكن يحلهالك يا مولاى
الملك : و مين الواحد ده . ده انا اكافئه مكافئة عظيمة خالص .. خالص . ابعتوا هاتوه حالا
وزير الحكمة : ده من رجالة مولانا.. و حاشيته ..
الملك : من الحاشية ..ودة يبأة مين..
وزير الحكمة : (يشير ناحية الفرفور) مستشار مولانا و مهرجه الفرفور
الملك : الفرفور ممكن يحلها
وزير الحكمة : طبعا يا مولاى . ده مستشارك الشخصى و دى شغلته
الملك : ايوة .. فعلا ده مستشارى و مهرجى … يا فرفور قرب تعالى ..
الفرفور : انا سمعت كل حاجة قالها . ( وهو ينظر الى وزير الحكمة) انا مش باقولك انا مش خايف الا منك ..ومن مهاميزك..
الملك : يعنى سمعت و عرفت ..
الفرفور : سمعت و عرفت و طلب مولاتى الملكة عندى . بس مع تغيير بسيط ..
يتهلل وجه الملكة فرحا
الملكة : يعنى حتجيب لى فرفور امور زيك كده
الفرفور : فرفورة
الملك : فرفورة
الملكة : فرفورة
الفرفور : طبعا . مولاى الملك راجل يبقى عنده فرفور . مولاتى الملكة ست يبقى عندها فرفورة .. صح
يفكر الملك و الملكة و ينظرون لبعضهم
الملك : صح .. خالص .. خالص
الملكة : صح .. خالص .. خالص . انا ست يبقى عندى فرفورة . ياللا هات لى الفرفورة بس بشرط ..
الفرفور : شرط .. شرط ايه بأة..
الملكة : تكون زيك .. مخ ابيض مفيش .. ريحتها زى ريحتك ..
الفرفور : لا اطمنى . ريحتها .. اسانس .. اصلى .. لو مية نار. متأثرش فيها . بس فيه مشكلة صغيرة ..
الملكة : مفيش اى مشكلة . اى طلب تطلبه حينفذ حالا ..
الملك : اطلب اى طلب … بس هات الفرفورة لمولاتك لاحسن منكدة علية عيشتى خالص .. خالص . وانت السبب . هه لازم تحلها ياللا ..
الفرفور : (يتكلم فى خبث ) ايوة يا مولاى . انا علشان احضرها محتاج اتنين يساعدونى فى عملية التحضير..
الملك : (ينادى) يا كبير الحرس احضر اتنين من الحراس فورا ..
الفرفور : (و هو ينظر ناحية وزير القوة و وزير الحكمة ) لا مش اى اتنين .. دول اتنين و مش اى اتنين ..
الملكة : اى اتنين حتشاور عليهم حيبقوا تحت امرك فورا ..
يتحرك الفرفور على المسرح و هو يمسك ذقنه و يتجه ناحية وزير القوة و يقف امامه ثم يقف امام وزير الحكمة
الفرفور : لازم يكونوا كبار قوى فى المقام علشان جلسة التحضير تتم و الفرفورة تحضر
الملكة : لو عايز مولاك الملك خده ..
الفرفور : العفو يا مولاتى . تحت هبابة ..
الملكة : تحت هبابة. تقصد. وزير الحكمة.. و وزير القوة . خدهم (تنظر ناحية الملك فى شدة و عزم ) اامرهم يبقوا تحت امر الفرفور فورا ..
الملك : امر طرطورى فورى على كلا من وزير الحكمة و وزير القوة اطاعة الفرفور فى كل ما يطلبه ..
وزير الحكمة : مولاى.. ارجوك .
وزير القوة : مولاى .
الملكة : خلاص صدر الامر.. و لا عايزين تكسروا امر مولاكوا ..
الفرفور : (فى شماتة) هيه .. عايزين تكسروا امر مولاكوا ..
وزير الحكمة : (فى استكانة) لا طبعا . امر مولانا ع العين و الراس . اامر يا فرفور يا امير يا طيب ..
وزير القوة : (فى غيظ وهو يكز على أسنانة) طبعا منقدرش نكسر .. امر مولانا .. طلباتك ..
الفرفور : (فى شماتة) طلباتى .. اة طلباتى ..
(يمسك الفرفور ذقنه و يتحرك حولهم و هو ينظر اليهم ثم يذهب لمنتصف المسرح )
الفرفور : تعالوا هنا (يتحركوا الى منتصف المسرح) و لا اقولكم روحوا هناك ( يتحركوا الى ناحية جانب المسرح) خلاص خلاص تعالوا هنا . اقفوا وشكوا لبعض . ايوة كدة . انزلوا على ركبكوا بأه ..
وزير الحكمة : (ينظر للملكة) مولاتى ..
الملكة : اخص عليك يا حوحو .. انزل ..
الفرفور : حوحو .. حوحو .. آه وزير الحكمة يبأة .. حوحو.. اه صح كدة (يشير لوزير القوة ) ياللا انت كمان انزل على ركبك ..
وزير القوة : مولاتى ارجوكى ..
الفرفور : (مقلدا الملكة) اخص عليك يا قوقو .. انزل ..
(ينزل وزير الحكمة بحركات بطيئة و بصعوبة و ينزل وزير القوة بغضب و يواجه كل منهما الاخر )
الفرفور : انا عايز كله يقطع النفس . مش عايز اسمع صوت . اى صوت الفرفورة حتزرجن و مش حتحضر ..
(يظهر وجه الفرفورة خلف الملك و الملكة و هى تشير للفرفور . يمسك الملك و الملكة انوفهم علامة وجود رائحة )
الفرفور : كله يغمض عينيه و انت يا مولاتى غمضى عنيكى . غمض يا مولاى مفيناش من خم و الا حيبوظ كل حاجة . كله يغمض اوعى حد يفتح ..
(يتجه خلف الكرسى ثم يظهر وجهه و وجه الفرفورة و هو يشير لها اشارات و كانه يشرح لها ماذا ستفعل ثم يعود الى وسط المسرح )
الفرفور : افتحوا عنيكوا . (يشير للوزيرين) و انتوا اصحوا معايا.. قوموا (يقفوا) ولا اقولكوا .. اقعدوا اقعدوا ..
(يحاولون الجلوس و فى منتصف جلستهم )
الفرفور : لا .. لا .. اقفوا .. اصحوا معايا . اصحى معايا يا حوحو و انت يا قوقو يا حبيبى انت . زى ما اعمل تعملوا . زى ما اقول تقولوا و الا حيبوظ كل حاجة . ياللا نبتدى
(يقلد حركات القرد و يقلدوه . يلف حول نفسه . يقلدوه )
الفرفور : شطار . قولوا ورايا (و فى صوت هتاف حماسى ) الراجل المتوحش بالحمارة جاى دلوقتى ..
(فى صوت خافت يرددوا وراءه )
وزير القوة و وزير الحكمة : الراجل المتوحش بالحمارة جاى دلوقتى ..
الفرفور : (يصرخ فى قوة ) ثابت كما كنت . ايه يا شباب .. ايه يا حوحو ايه يا قوقو انتوا عايزين تبوظوا.. الجلسة..
(و هو يرفع صوته )
الفرفور : انتوا بتخالفوا امر مولانا العظيم لابس الطرطور العظيم و مستشاره العظيم لابس الطرطور العظيم
وزير الحكمة : (فى خوف و رعشة ) لا طبعا . قول و حنقول وراك . قول يا قوقو قول ده طلع ابن جنية و خبيث . قول يا خويا قول ..
الفرفور : اصحوا معايا . انا عايز صوتكوا يهز القصر ده . ياللا ورايا .. الراجل المتوحش بالحمارة جاى دلوقتى ..
الوزيرين : الراجل المتوحش بالحمارة جاى دلوقتى
(الفرفور يلف على المسرح و هو يهتف و هم يرددون وراءه )
الفرفور : الست مرات الراجل المتوحش بالحمارة جاية دلوقتى ..
الوزيرين : الست مرات الراجل المتوحش بالحمارة جاية دلوقتى ..
(يلف على المسرح و هم وراءه يقلدونه فى هز وسطه و فى كل حركاته وهو يواصل الهتاف
الفرفور : الواد ابن الست مرات الراجل المتوحش بالحمارة جاى دلوقتى
الوزيرين :الواد ابن الست مرات الراجل المتوحش بالحمارة جاى دلوقتى ..
الفرفور : (يقف و هو ينظر اليهم فى شماتة) خدوا دى بقة . البت اخت الواد ابن الست مرات الراجل المتوحش بالحمارة جاى دلوقتى .
(تحدث لخبطة فى الهتاف بين الوزيرين و لا يتمكنوا من اكمال الهتاف )
الفرفور : (ينظر اليهم فى يأس) لا. لا . كل حاجة باظت . لازم نعيد من الاول ..
(وزير الحكمة و قد بدت تظهر عليه علامات التعب و الارهاق )
وزير الحكمة : ابوس ايدك يا فرفور يابنى.. كفاية كده انا نفسى أتقطع..
وزير القوة : (فى لغة تحدى وهو يضع يديه على خنجره) لا .. سيبه و حنشوف مين فينا اللى حيتعب الاول.. انا ..و لا هوة..
الفرفور : انا باقول كفاية كدة قوى و انتوا عملتوا اللى عليكوا و اكمل انا التحضير
(ينظر الفرفور لوزير القوة )
الفرفور : حلو كده يا با . راضى عنى ..
(يعود وزير الحكمة مستندا على ذراع وزير القوة و علامات الانهاك بادية على حركاتهم و يجلسوا فى اماكنهم ثم يقف الفرفور فى وسط المسرح صارخا )
الفرفور : فرفورة يا فرفورة . احضرى حالا .. مولاتك الملكة طلباكى تحضرى حالا فى التو و اللحظة . اظهرى و بانى لحسن الملكة تزعل منك خالص .. خالص ..
(تخرج الفرفورة من خلف الملك و الملكة و هى تفرد ذراعيها امامها و مغمضة العينين و هى قوية البنيان و طويلة . تلبس ملابس مهلهلة بها رقع بالوان مختلفة و متباينة . تسير الى منتصف المسرح و تواجه الفرفور و تفتح عينيها و فى صوت قوى به وقاحة .)
الفرفورة : ايه ده انا فين و ايه اللى جابنى هنا (ترى الفرفور) مين .. المنيل على عينه .. ايه اللى جابك هنا يا موكوس ..
الفرفور : اتأدبى يا ولية.. انت فى حضرة الملوك ..
الفرفورة : ملوك .. هما فين الملوك دول ..يا ختى بلا وكسة ..
(تقف الملكة مذهولة و هى فرحة و تلف حولها و تشم رائحتها )
الملكة : ياى.. ياى . دى اوسخ كتير من الفرفور ..
(يقف الملك و يلف حولها مع الملكة )
الملك : و لا ريحتها ..
الملكة : انتن ميت مرة م الفرفور بتاعك ..
الملك : تبادلينى
الملكة : بعينك ..
الفرفور : ضاع الفرفور .. مضيعانى فى البيت و مضيعة هيبتى و جاية هنا تكمل علية
(الملكة تحاول ان تمسكها باطراف اصابعها من ملابسها )
الفرفورة : (تصرخ فيها بطريقة همجية) ايه يا ولية . عايزة منى ايه ..
الملكة : ولية . انا ولية ياى.. ياى . و كمان .. بيئة خالص .. خالص
(يعود الملك و الملكة للجلوس على الكراسى و هو يستعطفها )
الملك : نبادل و اتنازل لك عن نص المملكة .
الملكة : لو اتنازلت عن مملكتك كلها ..
(الفرفورة تسحب الفرفور من يده الى ركن المسرح )
الفرفورة : انت فين يا منيل.. غطسان فين المدة دى كلها ..
الفرفور : (يكلمها فى تافف و تعالى) وقرينى يا ولية و احترمينى . انا بقيت من الحكام (ويضع يده على الطرطور) انتى مش شايفة الطرطور اللى انا لابسه ده ..
الفرفورة : طرطور الندامة يا مصدى يا جعان . ده عملك زى الاراجوز . انت يا راجل مش كنت جاى ترجع المعزة و ترجع على طول ..
الفرفور : معزة ايه يا مخلولة انتى .. انا اسيب العز و الجاه و الطرطور و ارجع لفقركوا و قرفكوا ..
الفرفورة : يعنى مجبتش المعزة و ناوى تقعد هنا .. طيب يا فرفورالكلب ان ما علمتك الادب . ان ما خليتك تبوس جزمتك. يووه ده حافى ما عندهوش جزمة ..اللة دة أنت لابس جزمة من امتى.يا حافى..طب أستنى علية..
الفرفورة : (تتجه الى الملكة و هى تبتسم ) مولاتى الملكة . مولاى الملك .. خدامتكم الفرفورة تحت امركم .
الملك : (يشم ) يااه ريحتها تجنن اخص عليكى اخص . انا زعلان منك خالص .. خالص (فى رجاء و استعطاف) تبادلينى
الملكة : ده مرسوم طرطورى . و متقدرش تغيرة هه (فى حزم) ياللا طلع مرسوم طرطورى للفرفورة بتعيينها .. مهرجة الملكة . و مستشارتها لشئون الل..
(تصمت الملكة و تفكر )
الفرفورة : النسوان
الملكة : ايه النسوان دى
الفرفورة : النسوان .. اللى زيى و زيك
الملكة : آه الهوانم..
الفرفورة : عليكى نور . لشئون الهوانم عندكوا . وشئون النسوان للفرافير عندنا..
الملكة : ياللالا اصدر مرسومك الطرطورى ..
الفرفورة :و عايزة طرطور.. زى اللى لابسه الفرفور ..
الملكة : لبسها طرطور.. زى اللى لابسه الفرفور..
الملك : لاخر مرة .. تبادلينى
الملكة : بعينك
يعتدل الملك
الملك : مرسوم طرطورى رقم تلاتة . يتم تعيين الفرفورة وصيفة للملكة و مستشارتها لامور الهوانم و النسوان.. و يسمح لها بلبس طرطور.. زى اللى لابسه الفرفور..
(تخرج الفرفورة لسانها للفرفور لتغيظه )
(تشير الملكة لوزيرالقوة ليقترب منها .. يقف وزير القوة و يتجه ناحية الملكة )
وزير القوة : مولاتى ..
(تهمس الملكة لوزير القوة و هى تشير ناحية الفرفورة و الفرفور . وتظهر علامات الخوف و الرعب على الفرفور )
الفرفور : آه . بدال فيها قوقو يبقى فى مصيبة جاية .. يا ليكى .. يا ليكى ..
الفرفورة : (فى خوف) حيعملوا فينا ايه ..
(يعتدل وزير القوة و يتجه ناحية الفرفور و الفرفورة و هو ينظر اليهم نظرات مركزة و يلف حولهم و هو يحدق بهم و الفرفور ترتعش اوصاله و اقدامه تصطك ببعضها و الفرفورة تحتمى به فى خوف و فجاة يقف وزير القوة و ينادى صارخا باعلى صوته )
وزير القوة : يا حراس.. احضروا... الغضنفر ..
الفرفور : (فى رعب و خوف).. الغضنفر ..
الفرفورة : (فى صوت مرتعش و هى تحتمى به و تمسكه).. مين الغضنفر ده..
الفرفور : اكيد دة.. السياف اللى بيطير الرقاب ..
الفرفورة : و حيطير رقبة مين يا خويا ..
الفرفور : حتكون رقبة مين يا ختى .. رقبتى .. و رقبتك
الفرفورة : طب رقبتى انا ليه . انا عملت ايه ..
الفرفور : عايزة طرطور زى اللى لابسه الفرفور . اديكى مش حتلاقى راس تحطى عليها الطرطور ..
الفرفورة : مش عايزة طرطور ياخويا .. مش عايزة ..
(صوت جهورى من الخارج بصوت عالى )
الصوت : الغضنفر
(يدخل شاب .ممتلئ الجسم فى أستدارة..أبيض البشرة. يتحرك بميوعة النساء . يتمايل كالنساء و يضع مكياج على وجهه كالنساء . ملابسه قريبة من ملابس الجوارى و صوته قريب من صوت النساء .. يمسك منديل ابيض فى يده . يتحرك على المسرح و يرى وزير القوة فيتجه ناحيته بدلال و يحك كتفه فى كتف وزير القوة فيقوم وزير القوة باعطاءه ظهره فيضربه بالمنديل بميوعة )
الغضنفر : اخص عليك يا وحش .. يا مفترى خالص .. خالص
يلف حوله الفرفور و الفرفورة فى تعجب و هم يتعجبون و يبتسمون .. و يوجه الفرفور كلامه للفرفورة
الفرفور : هوة ده بأة الغضنفر .. كدة ضمنا رقابينا ..
يتجه الغضنفر ناحية الملك و ينحنى له ..وفى ميوعة..
الغضنفر : مولاى.. و تاج راسى.. لابس الطرطور العظيم
ثم يتجه الى الملكة بدلال و دلع
الغضنفر : ابلتى . و روح قلبى .. و مهجة فؤادى .. اامرينى ..
الملكة : (تشير ناحية الفرفورة ) شايف الهانم.. اللى واقفة هناك دى .
الغضنفر : دى هانم .. مش ممكن يا ابلتى الشىء الفظيع دة يبقى هانم . انا مش مقتنع خالص
الفرفورة : (فى صوت عالى و وقح) نعم يا روح ابلتك . اتلم يا روح امك و اتكلم كويس (ثم تلف حول نفسها فى دلال مفتعل) ده انا هانم وست الهوانم كمان.. حتى اسالوا الواد الفرفور
فى لغة تهديد توجه كلامها الى الفرفور
الفرفورة : انا هانم و لا لأ
الفرفور : (فى سرعة و خوف) هانم طبعا و ست الهوانم كمان (ثم يكلم نفسه) روحى جاتك داهية تشيلك و تخلصنى منك . الهانم قاعدة على الكرسى قدامك . محسوبة ع الستات غلط
الفرفورة : بتقول حاجة
الفرفور : بقول هانم طبعا هانم..
الفرفورة : اه . انا باحسب..
تهمس الملكة فى اذن الغضنفر و هو يشير لها بالرفض
الغضنفر : يا ابلتى اللى بتطلبيه ده مهمة مستحيلة . دى سوفاج خالص .. خالص
الفرفورة : سوراج
تتجه ناحية وزير القوة
الفرفورة : ايه يابا الحج ده ..اللى بيقول علية ..
وزير القوة : تانى .. هوة انا اخلص من الفرفور تطلعلى الفرفورة . سوفاج .. سوفاج
الفرفورة : ايوة البتاع ده
وزير القوة : يعنى ست الهوانم ست الستات ..
الفرفورة : (تعود الى الغضنفر) ايوة اتعدل فى كلامك . ناس متجيش الا بالعين الحمرا
تضحك الملكة و الملك
الغضنفر : (فى دلال) ابلتى مش ممكن .. انا اتهنت خالص ..خالص..
الملكة : ياللا ياللا خدها حميها وانقعها فى تنر. فى جاز . فى مية نار وبعدين ..
يصرخ الفرفور و هو يسحب الفرفورة من يدها
الفرفور : يحمى مين يا مولاتى
تضحك الملكة
الملكة : متخافش ع الفرفورة من الغضنفر يا فرفور .. ده اغا ..
الفرفور : أنا مش خايف ..ع ..الفرفورة ..
( يلطم على خدية ..وهو يصرخ)
أنا خايف ع الغضنففففففر..

( تسدل الستار)

المشهد الثالث

(غرفة الحكم و نفس ديكور المشهد الاول و كرسى العرش ووزير القوة يتحرك بعصبية الى يمين و شمال المسرح ووزير الحكمة واقف ينظر اليه )
وزير الحكمة : اهدى .. و فكر بعقل .. اللى انت عايزه حيتم ..
وزير القوة : امتى .. لما يركب على كتافنا و يدلدل رجليه . ده خلانا نرقص زى القرود . و قال ايه … الراجل المتوحش بالحمار جاى دلوقتى ..
وزير الحكمة : بالحمارة
وزير القوة : بالحمار .. بالحمارة .. انا لازم اخلص عليه . و دلوقتى..
وزير الحكمة : مينفعش . تهورك ده ممكن يخسرنا كل حاجة .. الملك بيحبه و مبيستغناش عنه و بيستشيره فى كل حاجة ..
وزير القوة : و العمل .. حنسيبه كده..لما يسحب البساط من تحت رجلينا ..
وزير الحكمة : (فى خبث) مين قال حنسيبه . الليلة دى فى الحفلة المعمولة على شرف الملك و الملكة بمناسبة لبسه الطرطور و جلوسه على كرسى الحكم حيكون الأسفين الكبير اللى حيخللى الملك نفسه يحكم باعدامه او بالقليلة سجنه . بس انت لازم تهدى و تصبر و انا حسلمهولك مستوى و جاهز على طبق من فضة و انت بعد كده اعمل فيه اللى انت عايزه . و بموافقة الملك كمان ..
وزير القوة : ازاى.. ازاى بس ..
وزير الحكمة : اصبر .. و حتعرف . و دلوقتى خلينا نعامله كويس و متخليهوش يشعر باى حاجة . انت عارف ان مناديب الممالك حضروا يقدموا التهانى و التبريكات للملك و بالليل الحفلة اللى حتكون … نهاية الفرفور ..
تسمع اصوات قادمة فى الخارج
وزير الحكمة : قفل على الموضوع ده . و قولى انت جهزت مندوب المختارين الجدد
وزير القوة : جاهز و حدخله بعد مناديب الممالك ..
(يدخل الملك مرتديا الطرطور و الفرفور يلف حوله فى حركات مرحة و الملك ينظر اليه و يبتسم . الفرفور يتجه ناحية وزيرى القوة و الحكمة و يلف حولهم فى مرح و يبتسموا له فى مودة . يجلس الملك على كرسى الحكم و ينحنى له الوزيرين )
وزير القوة و وزير الحكمة : مولاى .. لابس الطرطور العظيم ..
يتجهوا ناحية الملك ليقفوا على يمينه و يساره . يشير لهم الملك ان يتوقفوا و يشير للفرفور ان يجلس بجانبه . يغيظهم الفرفور باخراج لسانه و يديه و يجلس تحت قدمى الملك و على يمينه و يضع الملك يده على راس الفرفور و يداعبه
الملك : (ينظر الى وزير الحكمة ) ايه نظام المقابلات
وزير الحكمة : مندوب الخاقان الاعظم و ملك ملوك الارض.. يريد مقابلة مولانا لابس الطرطور العظيم
ينتفض الملك واقفا و يتحرك فى قلق
الملك : و ده جاى يعمل ايه .. احنا زعلناه فى حاجة . حاكم ده زعله وحش خالص .. خالص
وزير الحكمة : متقلقش يا مولاى ده جاى يهنى . و معاه شوية تعليمات م الخاقان الاعظم
يعود الملك الى الجلوس على الكرسى
الملك : دخلوه ..فورا..
الفرفور : مين ده يا مولاى الزهقان الاعظم ده . و هوة فيه ملك غيرك ..
الملك : انت تسكت خالص و متفتحش بقك خالص .. خالص ..
يضع الفرفور يده على فمه
الفرفور : اهوة.. اتكتمت ..
وزير القوة : (بصوت عالى جهورى) مندوب الخاقان الاعظم و ملك ملوك الارض
( تبدأ موسيقى أغنية ..شى واوا الأمريكانى)
(تدخل امراة قوية البنية طويلة مرتدية ملابس الكاوبوى الامريكى و برنيطة امريكانى على رأسها و مسدسين على جانبيها . تتحرك بعظمة و تنظر الى الموجودين بتعالى و تقف فى منتصف المسرح و تواجه الملك و تمد يدها اليمنى امامها . ينتفض الملك و يجرى ناحيتها و يركع على ركبتيه و يقبل يدها و يعود و يجلس على الكرسى . تلف ناحية وزير الحكمة و تمد يدها . يتحرك وزير الحكمة ببطء و يركع على ركبتيه ببطء و يقبل يدها و ينهض ثم توجه يدها لوزير القوة فيتحرك بنشاط و سرعة و يركع على ركبتيه و يقبل يدها . تلف يدها ناحية الفرفور و الفرفور جالس القرفصاء تحت قدمى الملك و يهز راسه )
الفرفور : ايه . فيه ايه . الولية دى عايزة ايه ..
الوزيرين فى خوف
وزير الحكمة : بوسها .. بوسها
وزير القوة : بوسها .. بوسها . متوديناش فى داهية
الفرفور : ابوسها
وزيرى الحكمة و القوة : ايوة بوسها .. بوسها
الفرفور : (ينظر للملك) ابوسها يا مولاى ..
الملك : (فى خوف) ابوس ايدك .. بوسها ..
الفرفور : (يشمر يديه) ابوسها .. بدال انتوا عايزينى ابوسها .. ابوسها . مع انى قايم م النوم ماليش نفس ابوس مش عارف ليه . بس ياللا نبوس و خلاص ..
الملك : بوسها.. و خلصنا ..
وزيرى القوة و الحكمة : بوسها..
الفرفور : على مهلكوا علية شوية . حبوسها بس بشرط .. محدش يقول للفرفورة ..
الملك : (يصرخ) بوسها و خلص ..
الفرفور : خلاص يا عم حنبوس ..
(يشمر ساعديه و يقترب منها و مازالت مادة يديها و يحاول ان يحضنها و يقبلها فى فمها فتبتعد عنه و تدفعه و تعود تمد يدها )
الملك : مش كده
الفرفور: امال ازاى . انا طول عمرى ببوس كده ..
(ويقوم بتقليد صوت الفرفورة الاجش و يغمض عينيه و يمد شفتيه)
الفرفور : الفرفورة تقولى بوسنى . وتعمل كده . اروح انا حاطط حنكى على حنكها .. و عينك ما تشوف الا النور . و انت عارف الباقى بأة ..
الملك : لا.لا.. بوس ايدها ..
الفرفور : (فى حزم و شدة) ايدها لا . انا ما ابوسش.. الا ايد الفرفورة.. بس ..
المراة : (فى غضب) مين المتخلف ده ..
وزير القوة : (فى تشفى) ده الفرفور ..
المراة : (تبتسم) الفرفور . انت بأة الفرفور . انا فهمت دلوقتى.. م التقارير المكتوبة عنك للخاقان الاعظم انك متخلف. و همجى. و جاهل . بس متقلقش انا جايبة لك اخبار كويسة م الخاقان الاعظم . ده بيحبك خالص .. خالص .
الفرفور : انت كمان ليكى فى خالص .. خالص
المراة : ده احنا يابنى اللى بدعناها . الخاقان مهتم بيك خالص و عايزك تتمدن و تتحضر و عملك موقع ع النت هايل فيه حاجات تشيب (و هى تشير لجسدها)
الفرفور: التت . ايه . ايه يا ولية.. الخم ده ..
المراة : ايه يا فرفور يا حبيبى.. فيه ايه ..
الفرفور : (فى قلاطة) قولى للزهقان بتاعكوا ده.. ان احنا اللى بدعنا التت و مش مستنيين الزهقان بتاعكوا يعلمهولنا . و حاوريكى التت الاصلى علشان تصدقى . ياللا اديها تت .
(موسيقى التت و يحزم الفرفور وسطه و يرقص على موسيقى التت و بعد ان ينتهى من الرقص)
الفرفور : مش هوة ده التت . ابقى قولى للزهقان بتاعكوا ان الفرفور عارف كل حاجة مش جاهل.. و متخلف.. زى ما فهموه ..
(تضع المراة يدها على كتف الفرفور فى ود )
المراة : لا يا عزيزى . النت حاجة تانية خالص . الموقع اللى منزله الخاقان الاعظم يشيب حتنسى فيه كل مشاكلك مش حتفكر فى حاجة خالص . حينسيك الفقر و البؤس اللى انت عايشه و حتعيش سعيد بحياتك و بفقرك و راضى بيهم و مش حيبقى فيه وقت عندك تشتكى و لا تفكر
الفرفور : معقولة
المراة : ايوة . انت بس خش عليه . و عيش يا عم.. و ادعى للخاقان الاعظم ..
الفرفور : (يرفع يده بالدعاء) ربنا يزود زهقه .كمان. و كمان ..
(تلتفت المراة ناحية الملك)
المراة : اما انت يا ملك . الخاقان باعتلك هدية عظيمة ..
(يعتدل الملك و يبتسم و يعود الفرفور و يجلس القرفصاء تحت قدميه و تصفق المراة بيديها فيدخل رجل رافعا طرطور بيديه الاثنين مرسوم عليه العلم الامريكى . يضحك الفرفور و يضرب كفا بكف )
الفرفور : طرطور تانى ..
المراة : مولانا الخاقان الاعظم و ملك ملوك الارض عرف انك لابس طرطور لونه احمر .. و الموضة دى بطلت خلاص .. فقرر يبعتلك طرطور ع الموضة و فصلهولك بنفسه
الفرفور : بنفسه
المراة : بنفسه
الفرفور : قلة ترزية عندكوا يعنى..
(يقف الفرفور و يتجه ناحية الطرطور و ياخذه من الرجل و يتجه ناحية المراة )
الفرفور : سيدنا الزهقان بتاعكوا.. لابس طرطور برضه ..
المراة : (تضحك) الخاقان الاعظم.. ملبس كل ملوك الارض الطراطير و محدش يقدر يلبسه طرطور..
الفرفور : يا حرام (يضع يده على طرطوره) يعنى معندهوش طرطور زيى ده غلبان قوى و ليه حق يبقى زهقان ..
(تلتفت المراة الى الملك )
المراة : ياللا يا ملك اقلع الاحمر.. و البس الابيض ..
(يقف الملك و يخلع طرطوره الاحمر و يتقدم الفرفور و يلبسه الابيض ثم يعود الملك و يجلس على كرسيه و الفرفور يلف حوله و ينظر اليه )
المراة : و فيه هدية عظيمة.. لشعب مملكتك..
الفرفور : و انا
المراة : انت اول واحد
الفرفور : (يمد يده) فين هية . حاجة تتاكل لاحسن احنا الجوع قتلنا و الفقر داسنا برجليه
المراة : الهدية اعظم.. و اهم.. م الاكل و الفقر و الحرمان ..
الفرفور : مفيش حاجة اهم م الاكل و الفقر و الحرمان
المراة : لأ . فيه
الفرفور : ايه هية
المراة : (بصوت عالى) الفريدم (freedom)
الفرفور : الايه ياختى (ينظر لوزير القوة ) ايه يابا الحج اللى بتقول عليه الولية ده
المراة : الحرية . الحرية . الفريدم
الفرفور : و حياة امك
المراة : ايوة يا عزيزى الحرية.. اهم م الاكل ..
الفرفور : هوة فيه جعان حر. و لا محروم حر. و لا حد منداسة كرامته حر. . افهم ..
المراة : افهمك . انت كنت تقدر تشتم الملك و لا وزير القوة و لا وزير الحكمة
الفرفور : لا طبعا.. دول كانوا شنقونى.. انا و عيالى.. و اهلى كلهم ..
المراة : فى زمن الحرية تقدر تشتم اى حد .. اى حد ..
الفرفور : اى حد .. اى حد . يعنى مثلا انا مثلا اقدر اشتم الزهقان بتاعكوا ده
المراة : طبعا .. دى تعليماته هوه . الخاقان الاعظم له فلسفة عظيمة فى الحتة دى
(تضع يدها على كتف الفرفور )
المراة : فلسفته العظيمة ..تتلخص فى كلمتين ..
الفرفور : كلمتين بس . و هما ايه بأة الكلمتين دول ..
المراة : هية الشتيمة بتلزق ..
الفرفور : ايوة عارف . بس هما فين الكلمتين ..
المراة : هما دول . هية الشتيمة بتلزق ..
الفرفور : (يضحك و يضرب كفا بكف) اما الزهقان بتاعكوا ده حمار ..
(تضربه المراة على قفاه فيقع على الارض )
المراة : شفت .. اديك شتمت الخاقان الاعظم . الشتيمة لزقت ..
الفرفور : (وهو يضع يده على قفاه) لا .. قفايا ..اللى .أتلزق..
المراة : هوة ده العصر الجديد.. عصر الحريات. كله يتكلم. كله يقول. كله يشتم . كله يعبر عن رأيه بصراحة و حرية. و ابقوا قابلونى لو حد سمع كلمة م اللى بتقولوها و لا عمل بيها .. ماهو الخاقان العظيم و ملك ملوك الارض و ملبس الملوك الطراطير قالها (و هى تهز راسها) حكمة .. هية الشتيمة بتلزق ..
(تخرج المراة من المسرح و هى تتراقص على موسيقى شاكيرا او اى موسيقى امريكية )
الملك : (ينظر ناحية وزير الحكمة) انت فهمت حاجة من حكاية هية الشتيمة بتلزق دى و الحرية و كله يتكلم ..
وزير الحكمة : الخاقان الاعظم يا مولاى كان بعت لنا مذكرة تفسيرية لفلسفته العظيمة فى نظرية... هية الشتيمة بتلزق ..
الملك : و ايه هية فلسفته دى ..
الفرفور : آه .. ايه هية فلأسته دى ..
وزير الحكمة : لما الفرفور يتكلم و يشتم و يطلع اللى جواه و يفرغ كل الغضب فى الشتيمة و الكلام من اللى بيشوفه م الفقر و الضنك و البؤس و الاسعار المولعة و قلة حيلته قدام كل ده يقوم يرتاح ويهدا و بدال ما يكتم فى نفسه و ينفجر زى البركان .. لا .. يقول و يقول و يشتم لغاية ما ينهد و احنا نسمع من هنا و نفوت من هنا و لا كاننا سمعنا حاجة .. ما يشتم.. هية الشتيمة بتلزق ..
الملك : (يفكر مليا ) فعلا فلسفة عظيمة.. حرية الكلام .. كله يتكلم. كله يقول. كله يشتم
وزير القوة : واحنا.. ودن من طين.. و ودن من عجين .. و الكل يرتاح ..
الفرفور : (ينظر للملك) يعنى انا ممكن اتكلم و اقول.. و اشتم ..
الملك : قول و اتكلم و اشتم يا فرفورى العزيز . عايزك تعيش الحرية.. و تبقى سعيد (يعتدل الملك) مين تانى برة طالب مقابلتنا ..
وزير الحكمة : برة يا مولاى.. مناديب المملكة الجداد. جايين يهنوا مولاى. و يتباركوا برضاك عليهم ..
الملك : عملتوا ايه فى المناديب القدام ..
وزير الحكمة : شوية منهم سمحنالهم يهربوا لمملكة الخاقان الاعظم.. و معاهم كام مليون يأمن لهم حياتهم مكافأة على أخلاصهم ووفائهم فى خدمة المملكة.. زى ما تقول عظمتك كده معاش تقاعد ..
الملك : و الباقيين ..
وزير القوة : الباقيين. قبضنا عليهم و جرسناهم و رميناهم فى السجون و حيطبق عليهم القانون و دول اللى مالهمش قيمة. و بكدة محدش يقدر يتهمنا ان احنا بنتهاون مع اى فاسد او اى حد يتاجر فى قوت شعب المملكة (صارخا).. و مافيش حد فوق القانون..
الملك : تمام . تمام .. انا عايز حكمى.. يبدا بضرب الفساد و الرشوة و المتاجرة فى قوت الشعب .. ياللا دخلوا المناديب ..
وزير الحكمة : تحب.. عظمتكم نبتدى بمين ..
الملك : هما كام مندوب ..
وزير الحكمة : الاول و الاهم المندوب السرى . و ده يبقى واسطة الخير بينا و بين طبقة النصابين و الحرامية و المرتشين و المتاجرين فى اقوات الشعب ..
الملك : و ده شغلته ايه ..
وزير الحكمة : ده بيوصلنا طلباتهم و بيوصلهم تعليماتنا. و يلموا هما الغلة و هوة يوصلها لنا واحنا بعيد عن العين ..
الملك : وده يبقى تبع اى طبقة ..
وزير الحكمة : جدكم العظيم.. اعتبره من طبقة الحكام..
الملك : و ده له اسم ..
وزير الحكمة : طبعا يا مولاى له اسم حركى ..
الملك : هوة ايه ..
وزير الحكمة : راقصة المملكة الاولى . و بيتم عندها كل الصفقات المشبوهة من تجارة مخدرات لقروض البنوك لاستيراد و تصدير كل ما هو فاسد و ده كله بعيد عننا بس طبعا بموافقتنا.. و اللى يتكشف منهم.. نسلخه على بوابة المملكة ..
الملك : مين تانى برة ..
وزير الحكمة : فيه مندوب طبقة النصابين و الحرامية ..
الملك : مين تانى ..
وزير الحكمة : الحكيم زقلاط.. و ده بيمثل الطبقة الكالحة و الناس دول اللى بعيد عنك بيفكروا
الملك : لا . لا ..دة خليه آخر واحد . دخلنا المندوبة.. خلى القعدة تطرى شوية ..
وزير القوة : (صارخا).. راقصة المملكة الاولى ..
(تدخل امراة تلبس بدلة رقص شرقى تنحنى امام الملك و تبدا موسيقى رقص شرقى ترقص عليها و يرقص معها الفرفور و يهتز الملك معها ثم تنتهى من الرقص و تتجه ناحية الملك و تنحنى )
الملك : روحى ياختى ربنا يديكى الصحة عيناكى راقصة المملكة الاولى . روحى يا بهادورة و ليكى مباركتنا فى كل خطواتك على واحدة و نص فى خدمة الملك و المملكة ..
الفرفور : (يقف ) روحى يا طاهرة . روحى يا شريفة . روحى يا عفيفة (يردد على نقرة طبلة و هو يرقص) يا مصلية الصبح و الضهر و العصر و المغرب و العشا لأ .. العشا لأ.. العشا لأ.
الملك : و العشا لأ ليه.. يا فرفور ..
الفرفور : كان عندها.. فرح مش فاضية ..
(تخرج الراقصة و هى ترقص على انغام الموسيقى )
وزير القوة : (صارخا) مندوب المستثمرين و التجار و …
يقاطعه الفرفور
الفرفور : ايه يابا الحج انتوا لسه قايلين مندوب الحرامية و النصابين ..
وزير القوة : اخرس خالص . ده بينا و بين بعض .. قدام الناس دول ناس شرفا ووطنيين و بيخدموا الملك و الشعب ..
(يدخل رجل وسيم ملابسه غالية مهندم مبتسم . يدخل مهرولا يمينا و يسارا . يبتسم كلا من وزير القوة و وزير الحكمة و فى سعادة يركع امام الملك )
المندوب : مولاى لابس الطرطور العظيم.. و درة مملكتنا.. و حاميها ..
(يبتسم الملك و يجلس بعظمة )
المندوب : انا يا مولاى مش لاقى كلام اعبر بيه عن سعادتى بالشرف الكبير . معقولة انا واقف قدام مولاى . لا .. لا .. انا اكيد بحلم .. ايوة بحلم ..
الفرفور : يا وله .. صحيح حلنجى و نصاب ..
المندوب : لو سمح لى مولاى و تاج راسى انا محضر خطبة للحظة الجليلة دى ..
(يشير الملك بيده بالموافقة و يخرج المندوب ورقة طويلة و يفردها )
الفرفور : كل دة.. كوسة.. و قرع ..
المندوب : (فى لغة خطابية وهو يقرا من الورقة) انت الشمس و غيرك نجوم .. انت المهيب الركن ..
الفرفور : بلاش الركن دى و حياة ابوك.. لاحسن يشنقوه ..
المندوب : انت حامى حما مملكتنا . انت الاسد و غيرك.ز معيز . (يصرخ باعلى صوته) انت الغضنفر وغيرك...
(يرتمى الفرفور على الارض و يظل يحرك قدميه عاليا و هو يضحك عاليا .. و يتحرك الملك فى احراج على كرسى الحكم )
الفرفور : الغضنفر . انت عارف ..الغضنفر..
المندوب : عارف ايه ..
الفرفور : انه غضنفر ..
وزير الحكمة : بلاش الغضنفر دى.. اشطبها .. اشطبها خالص ..
الفرفور : اه اشطبها خالص .. خالص.. و الا رقبتك تطير فيها ..خالص
(يمسك المندوب رقبته و يخرج قلم و يشطب على الورقة و يواصل القراءة )
المندوب : انت سبب سعدنا .. بل .. انت السعادة ذاتها . و انت سبب رخاؤنا ..
الفرفور : (يمسك انفه بيده) روح الله يقرفك . حد يقول كدة..
المندوب : فيها ايه دى كمان..
الفرفور : حد يقول انت سبب خراؤنا ..دة كلام ..
المندوب : انا قلت كده ..
الفرفور : ايوة حتى الريحة ضربت . شامم ..
المندوب : (يواصل القراءة) انت سبب سعدنا .. و خراؤنا …
(يرتمى الفرفور على الارض ضاحكا و يحرك قدميه )
وزير الحكمة : عديها دى . قول اللى بعدها …
الملك : كفاية كده . اذهب لك بركتنا و موافقتنا ..
(ينظر المندوب بغيظ للفرفور و هو ينحنى للملك و يغادر المسرح وهو ينحنى)
الملك : مين تانى ..
وزير الحكمة : الحكيم زقلاط يا مولاى ..
الملك : ييه… كلامه كتير .. حيفضل يقول الحرية و البتاع التانية دى … ايه (يضرب راسه بيده) ايه فيه حاجة تانية دايما يقولها فكرنى يا وزير … الحرية و ايه
وزير الحكمة : الديموقراطية.. يا مولاى
الملك : ايوة هية دى .. الحرية ..و الديموقراطية ..
وزير الحكمة : (فى همس للملك) احب اذكر مولاى بتعليمات الخاقان الاعظم .. الحرية .. و طبعا كلنا حنقول انها اسس حكمك .. الحرية و الديموقراطية .. و انك اللى سمحت بالحرية و ان نظرية هية الشتيمة بتلزق . نظرية مولانا لابس الطرطور و الحكيم زقلاط لازم يفهم كده
الملك : مفهوم . مفهوم . دخلوه خلينا نخلص منه ..
وزير القوة : (صارخا) الحكيم زقلاط ..
(يدخل رجل يتحرك فى وقار مهندم الملابس فى الأربعين من عمرة.. ينحنى بوقار للملك ثم ينظر للفرفور و يبتسم فى ود و ينحنى للفرفور . يرد الفرفور بانحناءة )
زقلاط : مولاى ..
الملك : مرحبا بالحكيم زقلاط.. المفكر.. و المعلم ..
زقلاط : جئتك مولاى مهنئا . و راجيا ان يلهمك الله.. و ينير بصيرتك لترفع الظلم عن المطحونين و الكادحين ..
الملك : اطمن يا زقلاط.. انا عندى ليك اخبار.. حتفرحك.. خالص .. خالص ..
زقلاط : خير يا مولاى ..
الملك : انا نويت ابدا حكمى على اساسين (يشير بيده اليمنى) الديموقراطية (يشير بيده اليسرى) و الحرية ..
الفرفور : (ينفخ بفمه و ينفخ) قول . هه . هه ..
(ينظر الملك اليه باستغراب )
الفرفور : ايوة يا مولاى قول.. هه .. زى الفرفورة
الملك : الفرفورة
الفرفور : ايوة يا مولاى . الفرفورة كانت تعمل زيك كده بالظبط (يشير بيده اليمنى ) آدى الملوخية (يشير بيده اليسرى ).. وآدى التقلية . و تحط الملوخية ع التقلية و تقول .. هه هه . علشان نفسها يطلع فى الاكل . فانت لما تحط الديموقراطية ع الحرية لازم تقول .. هه هه . علشان نفسك يطلع فيها (ينظر الى الحكيم زقلاط) .. صح ..
زقلاط : (يبتسم للفرفور) حكيم يا فرفور. ربنا اداك الحكمة.. فى صورة ضحكة.. او نكتة ..
الملك : و الخبر السعيد انك تاخد حريتك فى الكلام ع الاخر .. اتكلم . قول . اشتم .. عهدى حيقوم ع الحرية .. الحرية ..
زقلاط : (صارخا).. و العدل ..يا مولاى
(تظهر علامات الارتباك و الخوف على الملك )
الملك : العدل .. محدش قالى عليه ده.. و لا جاب سيرته ..
زقلاط : محدش قالك ان العدل.. اساس الملك ..
الملك : هما قالولى الديموقراطية و الحرية . محدش جاب لى سيرة العدل ده خالص .. خالص (يقف و يتحرك و هو يفكر مليا) العدل .. العدل .و ايه هوة العدل ..
(يضع الملك يده على كتف الحكيم زقلاط)
الملك : يا زقلاط افهمنى . انا اذا حكمت بالعدل الناس اياهم حتكرهنى و اذا ظلمت ربنا حيكرهنى . يعنى انا كده مكروه و كده مكروه … حل لى المشكلة دى . علشان انا محبش حد يكرهنى خالص .. خالص.. قلى اعمل ايه ..
الفرفور : اقلبها ..
الملك : ا اقلبها . ازاى ..
الفرفور : (يقف الفرفور على راسه).. كده ..
زقلاط : (يضحك).. حلهالك.. الحكيم فرفور ..
الملك : ازاى ..
الفرفور : (فى استاذية و هو ينظر الى الوزيرين بقلاطة و تعالى) فاهمين حاجة . صعبة عليكوا دى . افهمك يا مولاى . انت اذا حكمت بالعدل ربنا حيحبك . . صح
الملك : صح
الفرفور : و اذا ظلمت .. الناس اياهم حتحبك ..
الملك : صح ..
الفرفور : يبقى انت كده محبوب.. و كده محبوب .. صح ..
الملك : صح . صح . خالص .. خالص . طب افهم ايه هوة العدل .. قولى يا فرفور ازاى احكم بالعدل ..
الفرفور : المعزة يا مولاى ..
الملك : معزة ايه يا جاهل صحيح بهيم ايه اللى جاب المعزة للعدل . اسكت خالص قلى انت يا وزير الحكمة ازاى اكون عادل ..
وزير الحكمة : شوية دعاية على كام اشاعة ان الملك عادل .. كل الناس تصدق انك عادل و تبقى عادل ..
الملك : و انت يا وزير القوة.. ازاى اكون عادل ..
وزير القوة : العدل يا مولاى . هوة عدل القوة . . عدل من غير قوة عدل ضعيف و يطمع فينا كل الممالك . مش مهم يتظلم فرفور و لا اتنين و لا الف المهم سلامة و امن المملكة . العدل هوة القوة و البطش بكل من تسول له نفسه ان يهز كرسى ملككم (فى قوة و عزم) علشان كده اتخلق قانون الطوارىء لتطبيق العدل السريع القوى . اللى ميعرفش امه ..
الملك : و انت يا حكيم زقلاط يعنى ايه عدل . و ازاى اكون عادل
زقلاط : (فى صوت قوى هادىء رزين) علشان تكون عادل.. لازم تقوم بعمل الحاكم العادل
الملك : و ايه هوة ..
زقلاط : متسيبش.. الغنى يبقى غنى قوى ولا الفقير يزيد فقره ..
(يقف الفرفور و يواجه الجمهور )
الفرفور : صدقونى انا ..العدل فى المعزة ..معزة الفرفور..
(يقاطعه الجميع و هم يصرخون )
الجميع : المعزة .. تانى




( تسدل الستار )

المشهد الرابع

(راقصات ترقص بلبس الجوارى على موسيقى اندلسية . يظهر وجه الفرفور و هو ينظر يمينا و يسارا و يدخل و كانه يبحث عن احد و يسال احدى الراقصات )
الفرفور : مشفتيش الفرفورة (و يسال راقصة اخرى) طب انتى مشفتيهاش . من ساعة ما خدها الغضنفر الولية مبنتش . يا ترى رحتى فين يا فرفورتى . . وحشتينى يا مراتى يا ام العيال
يصرخ عاليا
الفرفور : انتى فين يا فرفورة . رحتى فين . عملوا فيكى ايه الملاعين دول
(تدخل الفرفورة متابطة ذراع الغضنفر و قد تغيرت تماما . تلبس ملابس الجاريات و تمشى بدلال . تنظر بتافف و قرف الى الفرفور .. يتجه الفرفور الى الغضنفر )
الفرفور : يا غضنفر ياخويا .. لا متنفعش ياخويا دى . يا غضنفر ياختى مشفتيش اختك الفرفورة
الغضنفر : (فى ميوعة نسائية).. اوعى كده انا مخاصمك ..
(ينظر الفرفور ناحية الفرفورة بانبهار و اعجاب )
الفرفور : ايه يا عم الموزة القمر دية .. اللى عطاك يعطينا..
الغضنفر : عجباك.. روحلها ياخويا خليها تنفعك يا وحش . سم كده ..
(الفرفورة تبسبس للفرفور )
الفرفورة : بسبس … انت يا بتاع انت ..
الفرفور : (يتلفت حوله).. انا ..
الفرفورة : (فى تكبر ) ايوة . انت .. تعالى ..
الفرفور : (يعدل الطرطور على راسه) الطرطور اشتغل يا ابو الفرافير (يجرى ناحيتها) اامرينى يا مولاتى
الفرفورة : ابعد .. ريحتك فظيعة .. فظيعة
الفرفور : (يشم بانفه فى الهواء) الريحة دى.. مش غريبة علية ..
الفرفور : (يرجع و يشم) هية . بقة عملالى هانم يا فرفورة الكلب . انا حاعرف اكشفك ازاى (يقترب من الراقصة و هو ينظر بخبث للفرفورة) ارقص يا قمر يا حارق قلب و مهجة الفرفور
(تظهر علامات الغضب على الفرفورة و فى صوت اجش جهورى)
الفرفورة : قلب و مهجة مين.. يا موكوس على عينك ..أنت..
(ثم تمسكه من قفاه كما كان يمسكه وزير القوة و تهزه بقوة و هو يهتز بين يديها )
الفرفورة : هوة.. ان غاب القط.. العب يا فار ..
الفرفور : ايوة كده.. ارجعى لأصلك..
(تتركه الفرفورة و تحرك رأسها بقلاطة و تعود تتكلم برقى مصطنع )
الفرفورة : سونفاج .. خالص .. خالص ..
(يقترب منها الغضنفر و يهمس لها )
الغضنفر : سوفاج .. ميت مرة يا أبلتى اكررهالك .. سوفاج . سوفاج . تعبتينى خالص .. خالص
الفرفور : (يقترب منها فى ود و حب) سونفاج . سوراج . منفاخ. اللى تقولى عليه يا حبى و مهجة قلبى .. وحشتينى ..
الفرفورة : (تضحك و تلف حول نفسها) ايه رايك فيه .انفع هانم ..
الفرفور : و ست الهوانم كمان . بصراحة بعد ما شالوا الجلخ و الطين من على جتتك بقيتى ست الهوانم ..
الغضنفر : بصراحة يا فرفور ياخويا تعبتنى خالص .. خالص . ولا تنر نافع ولا بنزين نافع ولا جاز محوأ فى جتتها..
الفرفور : عملت ايه ..
الغضنفر : مية النار .. منفعش معاها غير.. مية النار ..
(يدخل الملك و الملكة و يجرى الفرفور ناحية الملك و الفرفورة ناحية الملكة )
الملك : ارقص يا فرفور . ارقص ..
الملكة : ارقصى يا فرفورة . ارقصى ..
(يلف الفرفور حول الملك و الفرفورة حول الملكة فى مرح و سعادة يتجه الملك الى الكرسى و تجلس بجانبه الملكة و يجلس الفرفور تحت قدمى الملك و الفرفورة تحت قدمى الملكة و يضع الملك يده على خد الفرفور و يداعبه و الملكة تداعب شعر الفرفورة كانهم يداعبون كلاب . ينظر الفرفور للملك و فى رجاء )
الفرفور : مولاى لابس الطرطور العظيم ..
الملك : ايه يا عزيزى الفرفور .. نفسك فى حاجة .. قول على طول ..
الفرفور : المعزة يا مولاى ..
الملك : تانى المعزة . ميبقاش دمك تقيل .. قولى نكتة ضحكنى . انا عايز اغيظ بيك الملكة . اصلها فاكرة ان الفرفورة بتاعتها احسن م الفرفور بتاعى . عايزك النهاردة تغلب الفرفورة
الفرفور : (فى استكانة و رجاء) انا مستعد أعملك كلب . قرد . حمار . بس اسمع حكاية المعزة
الملك : (فى غضب) بعدين حتزعلنى ليه خلى حكاية المعزة دى بعدين بعد ما تغلب فرفورة الملكة و تبهدلها ..
الفرفور : يعنى لو بهدلتلك الفرفورة.. حتسمعنى.. و تسمع حكاية المعزة ..
الملك : حاعملك كل حاجة فى نفسك.. ياللا ورينى ..
الملكة : (تكلم الفرفورة) سيبك دلوقتى من حكاية معزة الفرفور . اناعايزاكى تبهدليلى فرفور الملك . عايزة اغيظ الملك و اعرفه ان فرفورتى حبيبتى... احلى م الفرفور بتاعه..
الفرفورة : طب و المعزة يا مولاتى ..
الملكة : بعدين .. بعدين ..
(يدخل وزير الحكمة و وزير القوة و ينحنوا للملك و الملكة)
وزيرى القوة و الحكمة : مولاى .. مولاتى ..
الملك : و ادى الشهود اللى حيشهدوا.. و يحكموا . تقبلى حكمهم يا مولاتى
وزير الحكمة : على ايه يا مولاى
الملكة : اقبل حكمهم ..
الملك : انا عايزكم تقولوا الحق .. فرفورى احلى و اخف.. ولا فرفورة الملكة ..
الملكة : فرفورتى طبعا ..
وزير الحكمة : نسمع.. و نشوف.. و نحكم ..
(يقف الفرفور فى منتصف المسرح و تواجهه الفرفورة و هى تضع يديها فى جنبها فى تحدى)
الفرفورة : كنتى فين يا لأ .. لما قلت .. آه
الفرفور : (يدندن) ان كنت ناسى افكرك . نسيتى لما مشيتى فى البلد ناكشة شعرك و مقطعة هدومك و انت بتزعقى و تقولى (وهو يقلدها و يمشى على المسرح و هو يصرخ مقلدا صوت الفرفورة)
الفرفور : بحبه ياااابة.. يردوا عليكى اهلك.. يا بنت الكلب ..
بموت فيه يااابة.. يا بنت الكلب..
جوزهولى يابة.. يا بنت الكلب..
(يتجه اليها فى تحدى و يضع راسه على راسها )
الفرفور : نسيتى ..
الفرفورة : لا منستش .. انت اللى نسيت تكمل (تنظر ناحية الملكة) انا مشيت صحيح ناكشة شعرى و الحب كان عامينى و انا باصرخ
بحبه ياابة .. يردوا علية يا بنت الكلب
بموت فيه ياابة ..هوة مين .. يا بنت الكلب ..
الفرفور ياابة .. كل البلد ترد علية فى نفس واحد .. حتى عيالها .. حتى بهايمها و كلابها
الملكة : ترد تقول ايه ..
الفرفورة : (تصرخ و هى تشوح بيديها).. طب استنضفى يا بنت الكلب ..
(ينفجر الجميع فى ضحك متواصل عدا الملك و الفرفور يرتبك و يلف حول نفسه )
الملكة : و بعدين حصل ايه ..
الفرفورة : قالولى ذنبك على جنبك . و اتجوزته ..
الملكة : جبتوا مين م الفنانين.. غنا و رقص.. فى فرحكوا ..
(تنظر الفرفورة فى هيام الى الفرفور و تمد يدها اليه و يمسك يدها فى حب )
الفرفورة : فاكر الاغنية اللى غنيناها فى فرحنا ..
الفرفور : فاكر ..
الفرفورة : تغنيها معايا ..
الفرفور : أغنيها معاكى..
(موسيقى و يرقصوا و يغنوا سويا … خدوها. و لبسوها . وركبوها العربية
ويقف الملك و يتجه ناحية الفرفور و هو يصفق و يغنى معهم و الملكة تقف ناحية الفرفورة و تصفق و تغنى معهم و يدخل الغضنفر معهم و يحزم وسطه و يرقص كالنساء فى وسطهم . و وزير القوة على يمين المسرح يصفق و وزير الحكمة على يسار المسرح يصفق و الجميع يرددون مع الفرفور و الفرفورة )
خدوها.. و لبسوها.. و ركبوها العربية ..
الفرفور : (يغنى وحده) قالولى كتبوا كتابك ..
الجميع : (يردوا).. هيه..
الفرفور : قلتلهم على مين..
الجميع : هيه ..
الفرفور : قالولى ع الفرفورة .. قلت لة افرح يا قلبى.. بست الحسن دية (يشير للفرفورة)
الجميع : خدوها. و لبسوها. وركبوها العربية ..
الفرفورة : (وحدها) قالولى كتبوا كتابك .
الجميع : هيه .
الفرفورة : قلتلهم على مين .
الجميع : هيه .
الفرفورة : قالولى ع الفرفور .. قلت لة.. افرح يا قلبى.. بعيونه الحلوة دية (يبربش الفرفور بعينيه)
الجميع : خدوها. ولبسوها. و ركبوها العربية .
الفرفور : (وحده) قالولى كتبوا كتابك .
الجميع : هيه .
الفرفور : قلتلهم على مين .
الجميع : هيه .
الفرفور : قالولى ع الفرفورة .. قلت لة.. افرح يا قلبى بلسانها الزفر دوة (يخرج لسانه لها و يظهر عليها الغيظ و تضع يدها على ذقنها )
الجميع : خدوها و لبسوها و ركبوها العربية
الفرفورة : (وحدها) قالولى كتبوا كتابك .
الجميع : هيه ز
الفرفورة : قلتلهم على مين .
الجميع : هيه .
الفرفورة : قالولى ع الفرفور .. قلت له افرح يا قلبى.. بعريسى الغضنفر دوة (وهى تشير ناحية الغضنفر )
(يرتبك الفرفور و يضحك الجميع و يغتاظ الفرفور و يشير اليها بالتهديد و يعود الملك و يجلس على الكرسى هو و الملكة و هم فى ضحك متواصل . و يقوم وزير القوة بسحب وزير الحكمة الى منتصف المسرح )
وزير القوة : انا شايف الاحوال بينهم سمن على عسل . امال فين الاسفين الكبير اللى حيفرق بينهم..
وزير الحكمة : الاسفين متجهز و حتشوف بعينيك نهاية الفرفور و بأيد لابس الطرطور بس انت اصبر و اتفرج و جهز نفسك تستلمه. و تفش غلك فيه زى ما انت عايز. و بأمر من الملك كمان ..
وزير القوة : اما نشوف ..
(يلتفت الفرفور ناحيتهم و يتجه اليهم )
الفرفور : بيركبنى الرعب لما.. اشوفكوا بتتوشوشو.. و تبصولى ..
(يبتعد وزير القوة فيتبعه الفرفور )
الفرفور : كنت عايز اكلمك فى موضوع ..
وزير القوة : (يصرخ فيه) موضوع ايه . انطق اتكلم ..
(يبتعد عنه بسرعة فيرتطم بوزير الحكمة )
الفرفور : لا. لا. ما فيش موضوع. ولا حاجة .
(وزير الحكمة يضع يده على كتف الفرفور)
وزير الحكمة : موضوع ايه يا عزيزى الفرفور . قول متخافش..
الفرفور : انا يعنى.. كنت عايز اوسطك ..عند مولانا الملك ..
وزير الحكمة : خير ..
الفرفور : اصل المعزة لما ..
(يقاطعه وزير الحكمة )
وزير الحكمة : بعدين .. بعدين حنشوف موضوع المعزة ده . انا عايزك تضحك و تفرفش و اتمتع بحياتك ..
الفرفور : (يترك الوزير و يتحرك ناحية الملك) اضحك و افرفش .. طيب .. اضحك يا فرفور . ارقص يا فرفور .. ارقص يا فرفور ..
(يتجه الفرفور ناحية الملك ويجلس تحت قدميه )
وزير الحكمة : فليسمح مولاى الملك.. بدخول المناديب.. و بدأ مراسم الحفل .
الملك : مندوب الخاقان الاعظم جه ..
وزير الحكمة : لا يا مولاى.. أعتذر و قال ان دى شئون داخلية للمملكة و متروكة لعظمتكم
الملك : فليدخل المناديب ..
وزير الحكمة : فليدخل المناديب ..
(يدخل مندوب النصابين و معه الراقصة متأبطة ذراعه و ينحنوا للملك . ثم يدخل زقلاط و ينحنى للملك و يبتعد و يقف الفرفور و يتجه ناحية زقلاط )
زقلاط : اهلا. اهلا. بفرفورنا العزيز ..
الفرفور : اهلا.. بمفكر المملكة اللى بيدافع.. عن الفرافير..
زقلاط : سمعت آخر قصيدة كتبتها فيك ..
الفرفور : فيه انا ..
زقلاط : طبعا انا ورايا غيرك . و غير بؤسك.. و فقرك.. اكتب عنه ..
الفرفور : يا سلام قد كده انا مهم ..
زقلاط : طبعا ..
الفرفور : (فى رجاء و استكانة) يعنى ممكن تتوسطلى عند مولانا و باسلوبك الحلو
زقلاط : طبعا . اتوسطلك فى ايه بقى ..
الفرفور : اصل المعزة لما …
زقلاط : معزة ايه و اكل ايه يا عزيزى . ليس بالاكل وحده يحيا الفرفور ..
الفرفور : يا سلام .. امال بايه ..
زقلاط : (فى هيام) بالفن .. بالموسيقى .. بالشعر .. بالأدب..
الفرفور : و قلة الادب ..
زقلاط : افهمنى يا عزيزى .. لما الجوع يقرصك اسمع سيمفونية لموتزار . لمل يقرصك قوى اسمع السيمفونية السابعة لبيتهوفن ..
الفرفور : بيت مين ..
زقلاط : بيت هوفن ..
الفرفور : طب و البيت اللى حيقع ع العيال ده ..
زقلاط : بيت ايه يا جاهل يا متخلف . اكلمك فى غذاء الروح .. فى الموسيقى .. لالا مفيش فايدة فيك خالص . تخلفك من النوع المستعصى . ع العموم انا حاولت و ريحت ضميرى ..
وزير الحكمة : هل يسمح لى مولاى ببدا مراسم الحفلة و دخول الطعام ..
الملك : اسمحلك..أبدأ..
(يتم اظلام المسرح بالكامل لمدة وينير فنرى ترابيزة طعام على شكل مربع ناقص ضلع فى صدر المسرح يجلس الملك فى المنتصف و على يمينه الملكة و بجانبها الراقصة و على يساره يجلس وزير الحكمة ثم وزير القوة فى الضلع الايسر و زقلاط فى الضلع الايمن و امامهم الفرفور و الفرفورة يتمايلون رقصا فى اماكنهم و قد بدت عليهم علامات التعب و كل منهما يمسك بطنه بيده . ثم يدخل اثنان من الخدم و هم يحملون معزة مذبوحة و مطهاة و توضع امام الملك و يقترب الفرفور و الفرفورة و يشموها فى سعادة غامرة و يعودوا للرقص)
وزير الحكمة : اتفضل يا مولاى ..
(يمد الملك يده و يقطع ورك و يعطيه للملكة و الورك الثانى لوزير الحكمة و الورك الثالث لوزير القوة و الورك الرابع للراقصة و مندوب الحرامية و يشير لهم ان هذا نصيبهم معا ثم يسلخ سلخة بالعظم صغيرة و يناولها لزقلاط الذى ياخذها فرحا و هو ينحنى للملك ثم يبدا الملك فى اكل باقى المعزة و هو يكلم الفرفور و الملكة تكلم الفرفورة و هم ياكلون )
الملك : ارقص يا فرفور ..
الملكة : ارقصى يا فرفورة ..
(يمسك الفرفور و الفرفورة بطونهم بأيديهم و يرقصون .. ثم يقف وزير الحكمة و هو ممسك بالورك فى يده و ينظر اليه وزير القوة )
وزير القوة : على فين ..
وزير الحكمة : ع الاسفين الكبير . جهز نفسك ..
(يتجه وزير الحكمة ناحية الفرفور و الفرفورة و هو يقضم فى الورك فى يده ينظر اليه الفرفور فى رجاء و هو يمسك بطنه ..وشير الية برجاء أن يعطية قطعة)
الفرفور : حته .. ادينى حتة ..
وزير الحكمة : خطر على صحتك يا عزيزى . انت متعرفش ان اللحمة بتجيب كولستيرول
الفرفور : هه ..
زير الحكمة : ايوة كولستيرول . ده زى ما تقول كده داء بييجى للملوك ..
الفرفور : و ده من ايه ..
وزير الحكمة : من اكل اللحمة الكتير ..
الفرفور : يا سلام .. (فى كبرياء و تعالى) ما احنا كمان عندنا داء الفرفور ..
وزير الحكمة : داء الفرفور .. وده أية.دة...
الفرفور : الفلس … ترول ..
وزير الحكمة : (وهو يضحك) الفلس .. ترول ..حلوة ..حلوة ..يا فرفور ..الفلس ترول..
الفرفور : طب.. هات حتة للفرفورة الغلبانة.. لأحسن حتموت م الجوع ..
وزير الحكمة : خطر عليها كمان. انت مش خايف عليها من الكلس .. ترول . اللحمة مضرة بصحة الفرفور و الفرفورة وخصوصا اللحمة دى (وهو يشير للورك فى يده) ..
الفرفور : ليه فيها ايه اللحمة دى هه.. هية كمان مجنونة ..
وزير الحكمة : مجنونة ..
الفرفور : اه.. ما انتوا شوية تقولولنا اللحمة مجنونة.. ماتكلوهاش و شوية الفراخ واخدة دور انفلونزا و برد متكلوهاش.. و شوية السمك فيه سلمون حيموتكم .. طب ناكل ايه بس ..
وزير الحكمة : انت ما تعرفش.. المثل اللى بيقول.. جوعوا تصحوا ..
الفرفور : قال جوعوا.. مش موتوا م الجوع . ما تجيب هبرة صغيرة للفرفورة.. مش لية ..
(يقرب الوزير الورك منه فيمد الفرفور و الفرفورة يدهم بلهفة و يرجعها مرة اخرى )
وزير الحكمة : انا خايف عليكوا م اللحمة دى بالذات ..
الفرفور : ليه . اللحمة دى فيها ايه ..
وزير الحكمة : (و هو يضحك باستهزاء) دى لحمة المعزة بتاعتك.. يا فرفور ..هههههههه.
(موسيقى حزينة ويثبت جميع الممثلين على المسرح على اوضاعهم بدون حركة ما عدا الفرفور و الفرفورة . و يتحرك الفرفور ببطء و فى حزن واضح و تحاول الفرفورة ان تضع يدها عليه لمواساته فيبعد يدها و هو يلف حول نفسه فى ارتباك و حيرة و هو ينظر للارض و فجاة يصرخ باعلى صوته و ينزع الطرطور من على راسه و يلقيه على الارض و يدوسه بقدميه فى قوة و اكثر من مرة )
الفرفور : لأأأأأأأأأأأأأأأأأأأأأأأأأأأ..
(و ينزل على ركبتيه فى نهايةالصرخة و تنزل الفرفورة و تمسح رأسه لتخفف عنه . يقف فى بطء و حزن و يكلم نفسه و هو يتحرك يمينا و يسارا فى حزن شديد )
الفرفور : قالوا .. ارقص يا فرفور .. رقص الفرفور .. اعمل قرد يا فرفور.. الفرفور رقص الليل الليل يا ميمون . وقلدت العازب فى نومته . طلبوا فرفورة .. الفرفور جاب لهم الفرفورة .. سيبنا العيال انا و الفرفورة جعانين . عريانين . بردانين . ده كله عشان ايه .. عشان ايه قوليلى يا فرفورة يا ام العيال عشان ايه . عشان المعزة اللى مقوتانا و مقوتة العيال . صدقينى يا فرفورة لو قالولى اقطع من لحمك حتة حتة و حنرجعلك المعزة كنت قطعت لحمى حتة حتة عشان العيال يعيشوا و يتقوتوا و يلاقوا اللقمة حتى لو كانت اللقمة متشبعهمش بس يعيشوا .. وبعد ده كله كان عند الفرفور امل يرجع لعياله و معاه المعزة . ارجع لهم اقولهم ايه .. دبحوها ووزعوها على بعضهم و مسبلكوش حتى العضم تمصمصوه . لأ و الف لأ الفرفور م النهارده مش حيلبسك (و هو يدوس الطرطور بقدميه ) و مش حيرقص تانى و مش حيعمل قرد
الفرفورة : حتعمل ايه ياخويا ..
الفرفور : (يمسك يدها فى حب و ود) مش عارف انا حاسس انى عاجز و قليل الحيلة . واصعب حاجة على اى راجل انه يشعر انه قليل الحيلة و عاجز قدام مراته و ام عياله ..
الفرفورة : ياخويا انا سترك و غطاك ..
الفرفور : (وهو يمسح دموعه) روحى انتى للعيال.. و سيبينى انا اخلص حكايتى معاهم .. حكاية الفرفور و الطرطور ..
الفرفورة : (وهى تخرج) خد بالك من نفسك . عيالك محتاجينك ياخويا ..
الفرفور : (ينظر اليها) طب اقلعى الطرطور . حتروحى للعيال كده لابسة اللبس المسخرة ده و كمان لابسة طرطور . انتى عايزة نسوان البلد تجرسك ..
الفرفورة : ما تسيبهولى.. أغيظ بيه نسوان البلد و أكيدهم و انا لابسة كده الطرطور و غندورة
الفرفور : صحيح النسوان ناقصات عقل و دين . يا ولية عمال اعملك دراما و انتى اللى همك الطرطور . ياللا روحى و ابقى احكى لعيالى و عيال عيالى حكاية الفرفور و الطرطور
(تخرج الفرفورة و هى تشير له و يشير لها .. و بعد ان تخرج يلتفت ناحية الجميع )
الفرفور : تعالوا بأة يا ولاد ال…
(يتم اظلام المسرح و يسمع هرج و مرج و صوت وزير القوة وهو يصرخ )
وزير القوة : انقلاب .. انقلاب ..
وزير الحكمة : مين قائد الانقلاب ..
وزير القوة : الفرفور.. . و انا خلاص قبضت عليه ..
(يظل المسرح مظلما و تهدأ الاصوات ثم ينير المسرح على غرفة الحكم و الملك يجلس على كرسى الحكم و ترص الترابيزات بصورة محكمة و الملك يهمس لوزير الحكمة و وزير القوة يقف على يسار المسرح امام ترابيزة و زقلاط على يسار المسرح يقف امام ترابيزة و الفرفور يقف فى المنتصف و قد ارتدى الشوال كما فى المشهد الاول و قد ظهرت عليه علامات التعذيب و الحبل ملفوف حول رقبته كالمشنقة . يهز وزير الحكمة راسه و يتجه الى الترابيزة فى منتصف المسرح )
وزير الحكمة : حكمت المحكمة على الفرفور.. بالموت.. مخوزقا ..بالجلوس ع الخازوق..
الفرفور: هريتونا ..خوازيق فى عيشتنا..وفى موتتنا كمان خوازيق ..أنتوا بتجيبوا الخوازيق . دى كلها ..منين..
(يهز الفرفور راسه باستهزاء و زقلاط يوجه كلامه لوزير الحكمة )
زقلاط : اولا أنت مقلتش فتحت الجلسة . ثانيا هوه فيه حكم فى اول الجلسة .. كل القضايا بيبقى الحكم فيها آخر الجلسة . او بعد..المرافعة..و المداولة ..وال
وزير الحكمة : يا عزيزى زقلاط كل دى شكليات . و التهمة ثابتة ..
زقلاط : بصفتى بأمثل الدفاع عن المتهم.. أقدر أعرف.. ايه هية التهمة..الموجهه للفرفور..
وزير الحكمة : التهمة واضحة و هى القيام بانقلاب على حكم الملك . و الفرفور قائد الانقلاب
زقلاط : و ايه اثباتك.. ان الفرفور قائد الانقلاب ..
وزير الحكمة : مش قلب الترابيزات على الملك . يبقى انقلاب على الحكم ولا لأ .. رد يبقى انقلاب و لا لأ .. افحمتك يا زقلاط ..صح..
زقلاط : (فى تردد) هوة .. انقلاب.. بس برضه لازم العدالة تاخد مجراها.. و المتهم يدافع عن نفسه ..
وزير الحكمة : طبعا يا عزيزى .. و بحرية كاملة .. انت عارف طبعا ان زمن مولانا لابس الطرطور العظيم هوة زمن الحريات .. كله يتكلم . كله يشتم . مبدأنا واضح . قول . اتكلم . اشتم ..هية الشتيمة بتلزق...
(معا فى صوت واحد كل من الملك و وزير القوة و وزير الحكمة )
الجميع :أشتم... هية الشتيمة بتلزق ..
زقلاط : و انا سعيد انى شفت اليوم ده و عشته و كل المفكرين فى المملكة بيشكروا مولانا على انه بدأ حكمه بالديموقراطية و الحرية ..
الفرفور : (ينفخ بفمه) هه
(ينظر الجميع اليه فى غيظ )
الفرفور : عشان النفس ..
(يتجه وزير القوة بغيظ ناحية الفرفور و يمسكه من قفاه بقوة )
وزير القوة : انت لسة فيك نفس ..
زقلاط : ارجوك يا مولاى . اى متهم محكوم عليه بالموت من حقه يقول كلمة أخيرة و انا أرجو من مولانا ان يفسح صدره و نسمع آخر كلام للفرفور قبل.. خوزقتة...
الملك : سمعنا كلامك يا فرفور . سيبه ياوزير القوة . سمعنا حتقول ايه ..
(يتركه وزير القوة و يتحرك الفرفور ببطء الى منتصف المسرح و يواجه الجمهور و يوجه كلامه الى جمهور المسرح )
الفرفور : (فى جدية) انا كلامى مش لملك او وزير او اى سلطة . انا كلامى (وهو يشير للجمهور) ليكوا .. لكل فرفور .. قالوا علينا بهايم جهلة متخلفين مبنفهمش . عايزين وصاية علينا . عايزين حد يخطط لنا حياتنا و يحكمنا و يورينا الصح فين و الغلط فين . من منبرنا ده عايزين نوصلهم رسالة ان الفرفور اذا اتنازل عشان لقمة العيش ليه و لولاده او اتلزق على قفاه (يضع يده على قفاه) و فوتها بمزاجه عشان يربى عياله ..
الفرفور : (فى عزم و قوة) لكن أجارك الله يوم ما تتاخد منه المعزة بتاعته قدام عنيه و تتوزع على اللى مش محتاجينها .. يوم حيكون يوم القيامة ليهم كلهم . و زى ما قال زقلاط (يلتفت ناحية الممثلين) عدل الحاكم انه ميخليش الغنى غنى قوى و راسه تطول السما و الفقير فقير قوى و ينداس بالجزم..)كل واحد من دول فرفور زيه زيكم ( وهو يشير للممثلين)
(يخلع الممثلين ملابس التمثيل و يخلع الملك الطرطور و يلتفوا فى دائرة وراء الفرفور )
الفرفور : و عشان الرسالة توصل.. كلكوا حتقولوا ورايا .. ايه خايفين تقولوا . متخافوش (ثم يقول باعلى صوته وفى صورة هتاف)
الفرفور : واحد
زقلاط : وواحد
جميع الممثلين : يبقوا اتنين
(يحاول الفرفور اثارة جمهور المسرح )
الفرفور : ايه برضه خايفين . متخافوش و قولوا معانا و طلعوا كل اللى جواكوا معانا .. احنا فى عصر الحرية ..أشتم
الجميع : هية الشتيمة بتلزق
كل الممثلين و الجمهور و الفرفور يرددوا معا … واحد وواحد يبقوا اتنين .. واحد وواحد يبقوا اتنين
(تنزل الستار ببطء مع ترديد الهتاف المتواصل ال ان تسدل الستار )






( تسدل الستار )