سلامات استاذنا عبد المنعم سيد احمد

لزم الفراش الابيض بتورنتو الكنديه الاستاذ عبد المنعم سيد احمد اثر وعكه صحيه المت به
دعواتكم جميعا للاستاذ عبد المنعم بالشفاء وانشاء الله اجر وعافية

كفارة وسلامتك عبد المنعم
الناس مستمتعة بالصيف الكندي المنعش وانت تسلم نفسك لنزلته البايخة؟؟
اجر وعافية
وزي ما بقولوا اهلنا الروس:
ما تمرض!!

سلامات .. يا ولدنا
ياخى بعد الشر عليك

الف سلامه استاذعبدالمنعم واجروعافيةانشاالله

سلامات يازول يارائع
سلامتك الف سلامة اخى منعم وانشاء الله ما تشوف شر

الف لا بأس عليك منعم،، إنشاء الله ماتشوف شر
وأجر وعافية إنشاء الله

كفارة وسلامتك
وربنا يديك الصحة والعافية
بلا شك ستظل قلوبنا معك

.. كفارة ليك استاذنا عبدالمنعم .. ماتشوف شر
منتظرين نصبح بوردة حالمة ...

عليك بي شربة الكوارع
لو ناس كندا ماعندهم كوارع حانرسل ليك من هنا
قالوا انها علاج ناجع لنزلة البرد

نحن قبل ثلاثة سنة ولدنا لينا طفلة
والجماعة قالوا عاوزين بيض
وقالوا البنية الصغيرة لازم تاكل { صفار البيض }
والأم عشان في طور الرضاعة لازم تاكل بياض البيض
وعمك ابوحراز ياكل { قشرة } البيض !!!
عشان قلنا عندنا وجع في الركبتين
وقالوا القشرة مليانة كالسيوم للطيش
ربنا يكتب سلامتك ياخي

كفارة ،،

ألف سلامة يا أستاذ ،،

:- ركابـــــــــــــي :-

سلامتك يامنعم .. ولا بأس عليك .

أجر وعافيه
ما تشوف شر

سلامتك يا زول. و سيبك من الكلام دا كلو... اخونا ابو ذر قال كوارع. انا ح أديك كيلو برتقال دفعة واحدة تعال بعد كدا قول عندك نزلة يا عبد المنعم. و الا أقول ليك بصراحة... هات ادنك جاي... زبيب معتق و كفي. او شاي حار بليمون. تسلم

الاخ منعم .. اجر وعافيه ..عاجل الشفاء ياحبيب..
كن والاسره بخير

كفاره ليك يازول اجروعافية واعمل حسابك من وصية ابوحراز......... بس عليك بالقرض وكان ماعندكم ابشرك بان تماضر حبيبالله غادرتنا قبل اربعه وعشرين ساعة متجه الى كندى وهى تحمل الكثير من القرض.....................

شكرا ودسيد احمد
لاتصالك الانيق
ولدعواتك الصادقة لنا بالشفاء
فقد كنا عند الموعد تماما بلوغا للصحة والعافية.
الا من بعض المتاعب.
عزيزى ود وراق الحسن
هذه الايام بدا الصيف بخضرته وجماله الا محدود
قمنا توا...بتجهيز عدة الشواء..سوا من الشرفات
او خارجا..عبر الحدائق المفتوحة..حيث
الخضرة والماء والوجه الحسن..فالبحيرات تمتد حد البصر
فكانما هى دولة قائمة واعمدتها داخل المياه.
نسبة لوصولى للبر الكندى..شتاء العام 99
فقد اكتسب الجسم مناعته تماما...ضد هذه النزلات المهلكة
حتى وان كانت من التى توكل لحومها.

ولدنا الجميل مبارك
ياصديق المساءات الجميلة..كان لدعواتك الصادقة لنا..معين
ودافع معنوى...لنتقوى بها لاستعادة الصحة والعافية
تسلم

شكرا عزيزى محمد كمال
لدعواتك لنا بالشفاء..تواصلكم الراقى ابهجنا
لك الود والتقدير
ولدنا على سركيس
شكرا بقدر هذا الحب..والدعوة لنا بعاجل الشفاء
استجاب الله لخالص دعواتكم الصادقة..ومن علينا شفاءا
الجميل بابكر الكونى
يسعدنى دائما وجودك الراقى..وهذه الدعوة الصادقة
لنا بالشفاء..لك دوام الصحة والعافية

قريبى العريس وليد العشى
كيفك والعروسة عساكم فى امن وامان
شكرا بقدر هذا التواصل والدعوات الصادقة
فقد من الله علينا بالصحة والعافية

العزيز راشد
دائما ما اجدك فى المقدمة ..ما اسعدنى بهذا التواصل
عزيزى..كانت وعكة المت بنا فبحمده ودعواتكم عدنا اليكم

الجميل ابوحراز
اضحكتنا..فزالت الالام..ويالوصفاتك السحرية
ان كنت اعلم بها وبفاعليتها لراسلتك فى حينها
فقد كانت القاضية عزيزى ..خلطة سودانية سحرية
جربناها مرارا وتكرارا..ولكن يظهر ان معدتنا تكيفت على غيرها
(حلو مر مع كركدى)
فكانت حالة اقرب الى التسمم
اكيد كانت لك وصفات سحرية علاجا ناجعا
فهنا لايفيد ..الكالسيوم..او هذه الكبسولة العجيبة
التى تهدينا لها هذه الدجاجة الاعجب.
شكرا لحروفك البلسم

ولدنا امين
تاتينا دائما وحروفك النيرة زادا لتواصل انيق
شكرا بقدر هذا الجمال

العزيز عاطف
الانسان المتفرد جمالا وادبا..لا زلت اذكر لقاءنا الاخير
قد لاتذكره الان..شكرا بقدر هذا الحب ياعزيزى
ستجد ذكرانا هناك..قم بزيارة..لوادى النيل..
وزهرة البستان..ستجدنا وسط مجموعة رائعة..كانت
ميلادا لسودان جديد..كانت الحياة بكل قسوتها..ففى العام 92
كان الجميع يتلمس الطريق
فكان طريق الخير والعزة للسودان..كان التجمع والعمالية
ودار الاتحادى..كانت حقوق الانسان..وضحايا التعذيب
وهنا يطول الحدبث...ستجد ذكرى الجميل الصديق على العوض
وصحبه الكرام...لك باقة من ورد..تهديها لاصدقاءنا بالزهرة
اعتقد بافتتاح ريش..ستاخذ كثيرا من بهاءها..ولكنها ستظل مقهى
ومسكن امل دنقل.
ويا لطلعت حرب ..ومدبولى..وامتدادها عبر الشارع
فالتحمت بالانسان البسيط..زادا للمعرفة
شكرا عزيزى..فقد هيجت اشجاننا ببديع النغم

الراقى ديسكو
لك التحايا والتقدير بقدر هذا التواصل الحميم
فلدعواتكم الصادقة..فعل السحر لعودتنا سريع للمنتدى العامر بوجودكم
شكرا عزيزى

شاعرنا الجميل خالد
شكرا عزيزى لدعواتك الصادقة لنا بالشفاء
ستظل وصفاتك السحرية..فى الحفظ والصون..فباكثارنا من الشاى
سيكون الليمون بالقرب حالما كان الاحتياج
فقد كانت لنا شجرة مثمرة بالمنزل..وعلى مدار السنة..كلما فتشت بين الاغصان
وجدت هذه الثمار الخضراء مختبئة بين الغصون ليحين قطافها
لنسعد بالارتواء

الريس بكرى شكرا عزيزى فقد من الله علينا بالشفاء
بدعواتكم الصادقة..:كن والاسرة بخير وعافية

العزيز حسن
اسعدتنا بالمشاركة الاصيلة داعيا لنا بالشفاء..فعدنا
سريعا لنواصل معكم هذه المسيرة
لك التحايا والتقدير

سلامات استاذنا اجر وعافية انشاء الله واسفين علي التأخير وربنا يواليك بعافية

شكرا عزيزى محمد على
على المرور والسؤال عن الصحة
فبعد الوعكة الصحية هانحن نستعيد الصحة رويدا رويدا

» مرحب عبد المنعم سيد احمد
» والدة عبدا لمنعم سيد احمد – في ذمة الله
» من باسقات نزف التهانى لعبد المنعم سيد احمد
» غادرتنا اسرة الزميل..عبد المنعم سيد احمد..الى تورنتو..كمية من الصور
» اسره عبد المنعم سيد احمد الرائع جدا في الخرطوم عايزين نعمل ليهم زياره