وليام وكيت !! دا الطلاق "وحيد القرن"

مجموعة من المواقع الالكترونية نشرت الخبر
وقال ايه طلاق وليام من كيت ميدلتون
العرس الداكي الليلة ؟؟
العرس الغطيناهو من قولة خير لي حان الزفاف
معقول بس يا جماعة ؟
مش كفاية علينا أخبار الضرب والقتل
كمان دائرين تكتلونا في رقبتنا ؟
بصراحة أصبت بي حالة من الدوار
طبعاً من هول المفاجأة
ويوم 29 أبريل ياداب شهر وكم يوم
وليام دا مجنون ولا شنو ؟؟
عرس خسر فيهو خسارة قدر دي يقوم يطلق البنية !!
"كيف الكلام دا والله مجلس الأمن ما يحلنا منك"
والله دي حقارة ساي كمان بنات الناس لعبة ؟؟
تعرسوا وتكتلوا وتطلقوا هي فوضى ؟؟
والله نفقة بس ننجضك خلي العُدة
دا في "سري" وأنا أفتش لتأكيد أو نفي الخبر
ياربي يكون السبب شنو ؟؟
براي قلت أكيد إختلفوا في العادات والعوائد !!
النقه كانت في قولة خير والموضوع إتحسم تاني في شنو ؟
إمكن فطور العريس الملكة نقنقت قالت شوية ؟؟
لا لا مش معقول
لكن قلت أكيد دي موية رمضان الباقي ليهو شهرين ؟؟
وحسب ما عرفت فمسز ميدلتون جهزتا بي تبروقتا
اللحم المفروم "التقلية"
الويكة البهارات الشمارات
العِدة طليص تليص وصحن صحن
كبابي الشُب الفناجين
الأباري
الأحمر
والأبيض والرُقاق
مش معقول يا وليام !!
ياربي إمكن في الرحول ؟؟
هل هي ما دائرة تسكن مع نسابتا ؟؟
القصر كبير يشيل ناس حلتا كلهم
بس النفوس تتطايب
إمكن في فرز العيشه ؟؟
تكون قالت دائرة تتستت في بيت منفصل ؟؟
طيب ما تكملي شهر العسل والعيشه من الله
عليكم النبي دي حال شنو دي ؟؟
عرس سهرو من عيونا ما راح يتفركش؟
والله انا عرفتها
كان في داعي لحكاية سايز زيرو دي ؟
من يوم نزلت من العربية
مسولبة واقفه عود قلت الله يستر
حتى سألت واحد شمشار من البريطانيين
لأني بصراحة شكلها ما عجبني
أها الراجل قال لي العروس بي عافية !!
بالله ؟؟
وسألتو وليام عارف ؟؟
قال لي ما هو "عارف قدمو المفارق"
وما طيب !!
والله الكلام دا كلو دار في راسي
وأنا أدور أفتش للخبر
ولحدي الآن ما لقيت خبر
الصحف البريطانية ولا في بالها
دا أكيد واحد من عندنا
الناس اللابعجبـهم العجب
ولا بشجعوا مهند الطاهر
يا عالم ما تخلوا الناس في حالهم
عرس إتصرفت فيهو ملايين اليوروهات
بس يروح كدا شمار في مرقه ؟؟
أكيد ديل الغنى ليهم أبو اللمين
ياحاسدين غرامنا
ياقاصدين طلاقنا
شوفو غيري
وغير حبيبي
حبيبي
حبيبـــــــــــــــــي
حبيبي

كيت تكون طالبا الطلاق كيتاً في وليم
ياخ بروتوكول في المشية وفي الجية وفي الأكل
وفي النوم وفي اللوم
وفي اللبس وفي الصداقات
تكون كيت أفتقدت التلقائية
زي ما نسيبتا الست أم وليم كانت مفتقداها
وبعدين كيت دخلت تأريخ الأعراس الكينج سايز
والبيدخل التأريخ ده ما بيطلع منو
وكده السي في بتاعة كيت مليانة
وبكرة تعرس كيت كيتو

خبر السواد الجبتوا لينا
الكلام ده موكد ولا شمارات ناس ساى




خبر السواد الجيبتو لينا يالمحبوب
الخبر ده موكد ولا شمارات ساى من الحاسدين....

خبر السواد الجيبتو لينا يالمحبوب
الخبر ده موكد ولا شمارات ساى من الحاسدين....

والله خبر السواد لو صحى
كيت تكون لقت الحال مايل
قروش العرس دا كلوا من مرابحة من البنك ولقت السداد مدى الحياة.
وله تكون لقت ناس العريس فى نقة فى الغداء وناس السيرة اهلك ماستقبلونة كويس (يصرصرو فى وشهنة ويعوجن فى خشمن).