أبداً كراعنا ما غالية عليهن لكن مالقينا فرصة ساي نمشي عاصمة الدباب
مشاغل الدنيا الأبت تكمل دي ولولا الظروف كنا حضرنا معاهن "الوجع"
لكن بعد ما وصلنا "العِتاب" الحمد لله مشينا أنا والمدام ومرقنا رقبتنا من اللوم
كانت أيام جميلة خلاص والدباب مالي البلد وزي ما قالو "تتكل فيهو السيخ"
باقي وليام كان ماش الشغل لاقى جماعة من أهلنا جمب بيت السودان "الباعو"
وكان زعلان قاليهن " المابجي يبارك لينا البنية دي تاني البموت أبو ما بنصلو "
وقال "شدة" كيت ما تعبت لمن شالوا ليها الدم دايرين يولدوها بي فتح بطن !!
وقال البنية قربت تسل روح "أمها" تلحقا نسيبتا ديانا الله يرحما ويغفر ليها
"أفو" كيف يعني ؟؟ ونحن ما باركناها في صبحيتا بالهاشتاغ في حسابن في التويتر
داكي الليلة وليام ما بارك لينا عُمرة جدي الطيب بالواتسب تاني اللوم في شنو ؟؟
أها قلنا مافي داعي وعشان خاتر المرحومة "ديانا" النمش تبقى صُلحة وسُترة
ماشاء الله السماية كان فضل فيها الراس ولحيمات خاتنهن لينا "عارفننا بنجي"
وليام طلع رجل نجيض حلف ما ننزل مع قرايبنا في إدجور رود في ويستمنستر
نزلونا في قصر باكنجهام تحلف تقول بنوهو البارح مع إنو مبني في القرن تلتاشر
دخلنا عليهن العِصير كدي طوالي دخلوا المرا علي النسوان وانا ودوني الديوان
في وليد كدي جاب لي جلابية وسفنجة وقال لي هديك اللدبخانة "بدون مواخذة"
دخلت استحميت نضفت الطين واللندرين والله لمن السرميك بقي "بُني"
الوليد مشى وجا جاب لي الابريق والمصلاية صليت وأخدت لي إنبطاحة
جا وليام شلتا معاهو العناقريب مرقناهن برا في الهنبريب "قادر الله علي الهوا"
بعد ما اتغدينا وصلينا المغرب قلت لي وليام كدي النقوم أتحمدل السلامة لي كيت
دخلت جوة لبست جلابتي والطاقية واتريحت ريفدور لندن كلها تشمشم
دخل وليام قدامي وأنا وراهو أصفق زي ناس بادي "سلام هوي آآناس البيت"
ولمن دخلت لقيت كيت ترضع في الشافعة وزولتي نائمة تشخر "تعب السفر"
وفي العنقريب الوراني منبطحة اليزابيث جادعة فوقا هِدم بين صاحية ونائمة
ومن شافني الاتنين صنقرن علي حيلن وكيت ضارت سدُرا بي طرف توبا
إتحمدلت ليهن السلامة واليزابيث "ترت" لي قعدت حداها في طرف العنقريب
يا حليلا والله تسأل من الناس نفر نفر "نان مي عُشرة عُمُر" ما بتهون علينا
بعداك مرقنا قعدنا في حوش الديوان حوش واسع وسمح بس ريحة الاسطبلات
جا داخل علينا خواجة مِرطِب وماش يا الله ويامين عرفت بانو ملك النرويج
جايي يتحمدل السلامة كان متحسس شوية عندو ملاريا قالوا الراجمات ما نفعنها
وقعدنا نتونس جا داخل علينا الأمير تشارلز "كِبِر تب والشعر بقى أبيااااااااض"
الونسة جرت ماخلينا حاجة وجابوا لينا قهوة "بي تمر شيفيلد" حلت الونسة
نضموا في السياسة غايتو جنس نضم كلام كلو كبار كبار أنا قعدت أعاين ساي
غايتو كان سمعوهن ناس الأمن كان لحقوهن طلاب دارفور المملكة المتحدة
الحيرني نبيشتن لي حكومتنا التقول قاعدين معانا أي حاجة عندهن بالتفصيل
قضية الاقطان وبيع المؤسسات وسرقات مكتب الوالي وشراهة أخوان الصفا
لي وليدات المسئولين البقو سفراء ورؤساء شركات تصدير الفارات عابرة القارات
لي القعدات والحاويات والفارهات المظللات الحايمات أنصاص الليالي يطاقشن
صفقات ناس غندرا وحسبو وأحمد الطاهر وأدرجوا العباس والسفرو كدباس
والامير شارلز ممغوس بلحيل علي ضياع المشروع التقول عندو فيهو حواشة
تصوروا قام قال لي ملك النرويج "خليني من ديل دورن ميت حاكماتنهن النسوان"
نان خليتو يتمها ما طوالي شبيت ليهو في حلقو "دا كلام شنو البتقول فيهو دا ؟"
إتنفخت وبقيت قدر الأصم وقلت ليهو "علي بالطلاق في الرجال زايدين فراسة "
"نحن آآزول جدودنا زمان وصونا علي الوطن جدودنا السكوكن بالحِراب تذكرن ؟"
وكان ما راعيت للعشرة وجلال المناسبة كنت نكت ليهو قصة الفايد خاف قايلننا طُرُش ؟؟
لمن شافني زعلت إعتذر وقال لي أنا علي الحرام ما قصدت المعنى الفهمتو دا
قلت ليهو "نان قاصد شنو ؟؟ والنسوان مالن ؟؟ نسيتو مارقريت تاتشر الله يرحما ؟؟"
قال لي "بقصد إنجازات حكامكن غير الكريمات وتياب الربط ما شايف ليهن صناعة"
"وتاتشر كان معاها جيش من الوزراء والمستشارين ليهن شُنُبة شوف إنجازاتن "
"وعلي الطلاق لي يوم الليلة ما عندنا مرا جات البرلمان محننة نقش ومدخنة بوخا يلاوي"
"شغل الرجال المصانع والطرق والتعدين والمشاريع الزراعية والمستشفيات والمدارس"
"تبيعو في الطيارات خُردة والبواخر خُردة وخط هيثرو هيثرو هيثرو تتشو تبيعو ؟؟ "
"وتاني تقول لي كريمات وكرمبلين ومترو غالي والزول السادة الكان سبب انشغالي ؟؟"
ولمن النقش سخن ودخن قام ملك النرويج بتهديئة اللعب وهو يتكشم زي نار القصب
قال لي "يا كافي البلا تجو لي عند لندن بالله كان غشيتونا في بروكسل مالكن ؟؟"
ونواصل
موضوع: أيام في قصر باكنجهام !! نبارك بنية وليام وكيت "كيتاً عليكن" 
الإثنين 18 مايو 2015 - 7:30
