سوسو هانم ..هية الحل ..كوميدي ساخر ..

مسرحية
سوسو هانم … هية الحل
تأليف/ رضا الهجرسى

( يفتح الستار)

صالون فيلا ويظهر باب الفيلا الرئيسى على جانب المسرح مفتوح . يظهر رجل فوق الخمسين وقور وهو يمسك بيد يحاول ان يشد صاحبها للداخل . يظهر شاب فوق العشرين يلبس ملابس الشباب الكاجوال وسلسلة على رقبته وشعره رافعه لأعلى نحيف فى صحة . بادية عليه علامات التردد والخوف يشده الرجل ويتجهوا لمنتصف المسرح والشاب يرتعش وينتفض وينظر بخوف فى جميع الاتجاهات
( الرجل الكبير عزت بيه والشاب سامح )
عزت : خش .. يابنى .. تعبتنى
( يضع يديه حول كتفه والشاب مازال يرتعد ودائم التلفت حوله فى خوف وفزع )
عزت : صدقنى يا سامح يابنى .. سوسو هانم هية الحل
سامح : (فى ميوعة) بس .. انا خايف قوى يا اونكل
عزت : خايف من ايه بس يابنى . اثبت كده وخليك راجل وصدقنى ..
سوسو هانم هية الحل .. الوحيد .. والسريع علشان متخشش السجن
سامح : (فى رعب) السجن
عزت : طبعا السجن .. ودى شيكات بدون رصيد يابنى .. يعنى لو اتسجنت
فى كل شيك سنة (يحسب على اصابعه) يطلعوا كده .. حوالى ..
تقريبا .. خمسين سنة مع الرأفة
سامح : (فى فزع) خمسين سنة .. وكمان مع الرأفة . ده انا ضعت
عزت : امال انا بافهمك ايه م الصبح .. انقاذ حياتك فى ايد سوسو هانم
وحظك حلو الاعلان لسه نازل فى الجرايد
سامح : (فى هبل) اعلان وظيفة
عزت : وظيفة ايه بس يابنى . ولا اقولك .. هية .. حاجة كدة زى الوظيفة .
جواز
سامح : جواز . سوسو هانم بملايينها دى كلها حتقبل تتجوزنى وانا مش
لاقى آكل .. ايه يا عمى

عزت : اهدا .. بس وان حافهمك . سوسو هانم كانت بتعبد جوزها عبادة
وكانت مهنياه ومدلعاه وطلباته اوامر. كانت شيلاه على كفوف
الراحة شيل . صاحبتها وصديقتها اللدودة .. لولو هانم .. رسمت
عليه لحد ما خدته منها
سامح : لولو هانم .. مين
عزت : دى صديقة عمرها . طول عمرهم كانو يعملوا مقالب فى بعض .
هوة الاول كان خطيب لولو هانم سرقته منها سوسو هانم …
رجعت لولو هانم سرقته منها ولما لولو هانم …
سامح : (يهز راسه) انا اتلخبطت . انا دلوقتى حاتجوز مين … سوسو
هانم .. ولا لولو هانم
عزت : يابنى ركز معايا .. ومتضيعش الفرصة من ايدك .. (فى تهديد)
والا هيه .. السجن مستنيك
سامح : لا لا انا مركز اهه .. بس على مهلك علية
عزت : لما لولو هانم سرقت جوز سوسو هانم .. سوسو هانم جت لها عقدة
م الرجالة كلهم ففكرت ازاى تنتقم من جوزها فى الرجالة كلهم …
بقت تنزل اعلان الجواز فى الجرايد وتختار العريس وتتجوزه تلت
تشهر.. وتلت تشهر العدة يبقوا كام
سامح : آه يبقوا كام
عزت : يابنى ركز .. يبقوا ست اشهر . فبقت تتجوز واحد كل ست تشهر
وشرطها العصمة فى ايدها وتعمل مؤخر الصداق خمسة مليون
علشان ميقدرش يطلقها . مركز معايا
سامح : آه مركز
عزت : اللى بيقع عليه الاختيار .. يا هناه .. ويا سعده .. نص مليون عند
التوقيع .. ده غير العز والعيشة الابهة اللى انت شايفها دى .
ومتخفش هية مبتزودش عن تلت تشهر . وبكده تحل كل مشاكلك
وتسدد شيكاتك وترجع للعز اللى ضيعته بايديك . (فى استغراب)
انا مش عارف بس الملايين اللى سبهالك ابوك ضيعتها فين . ياما
قلت له علم ابنك واديله خبرتك فى الدنيا .. اهو دلعك وآدى آخرة
دلعه . ضيعت ثروته وحتخش السجن ومعلمكش قيمة الشغل كنت
حافظت على مالك ومال ابوك

تدخل فتاه فى الثلاثين من باب فى جانب المسرح المواجه لباب الفيلا تحمل ملف تضعه على صدرها ترتدى نظارة ( سكرتيرة سوسو هانم .. آنسة
"أحلام" )
احلام : اهلا .. اهلا عزت بيه
عزت : اهلا آنسة احلام . انا جبتلك الشاب الوسيم سامح (وهو يشير ناحية
سامح ) اللى كلمتك عليه فى التليفون
تنظر ناحيته وتلف حوله
احلام : (صارخة) ده . حرام عليك يا عزت بيه
عزت : لا ميغركيش منظره ده واد مية مية
احلام : (صارخة) ده مية مية
تسحب عزت بيه بعيدا وسامح يحاول ان يسمع
احلام : بصراحة كدة انت عاوز تخلص منه
عزت : اسمعينى بس
احلام : اسمع ايه بس .. دى سوسو هانم يابا . ( تنظر لسامح وتشير
باصبعها ) ده يدوبك تسلك بيه سنانها . لا لا حرام عليك يا عزت بيه
الواد لسه صغير حرام تضيع مستقبله وحياته
عزت : ما تخافيش وعلى مسئوليتى انا
احلام : (فى استسلام) خلاص يا عزت بيه .. انت عارف انا مقدرش
ااخرلك طلب . (صارخة) بس عايز تفهمنى ان ده مية .. مية . على
العموم انا لازم ارضى ضميرى. انت عارف العريس الاخير كان
ماشاء الله .. طول بعرض بعضلات صحته تهد جبل . يوقع الحيطة
بايده . عارف حصله ايه
عزت : ايه
احلام : مكملش شهر . وجاله بعيد عنك شلل رعاش وبيزحف على رجله
واهوه فى المستشفى جنب اخواته اللى سبقوه . انت عارف ان فيه
جناح كامل فى المستشفى مسمينه جناح ضحايا سوسو هانم
وازواجها السابقين ( صارخة ) وانت عايز تفهمنى ان ده مية مية
يحاول سامح ان يتسلل من خلفهم ليهرب من باب الفيلا فيعترض طريقه
عزت ويحاوره يمينا ويسارا
عزت : يابنى رايح فين
سامح : لا يا عم السجن ارحم
يمسكه ويجلسه على كرسى جانبى وهو يهدأه
عزت : (يتجه لأحلام) على العموم احنا نعمل اللى علينا والباقى على الله
يرجع لسامح ويوقفه ويحتضنه وهو يبكى بصوت عالى
عزت : ربنا ينجيك يابنى ويقويك .. كل كويس وخللى بالك من صحتك ..
محدش يعرف امتى الوجوه حتتلاقى تانى
سامح : (يبكى) متسبنيش يا عمى . متسبنيش
يخرج عزت وهو يمسح دموعه من باب الفيلا ويعود سامح ويجلس على الكرسى الجانبى وينكمش فى مكانه وينظر للأرض .. تنظر اليه احلام وتهز راسها فى استخفاف
احلام : ده .. مية مية حنعمل ايه الواسطة اللى مضيعانا . (صارخة) بس
ده
نسمع صوت ضجيج فى الخارج . تتجه احلام ناحية باب الفيلا وتصرخ
احلام : ارجوكوا . ارجوكوا يا جماعة الهدوء علشان تسمعونى .. اهدوا
شوية . انا دلوقتى حوزع الاستمارات عليكوا .. تملوها بخط واضح
وترفقوا معاها شهادة الميلاد واداء الخدمة العسكرية والشهادات
الطبية بتاريخ حديث وصحيفة الحالة الجنائية وشهادة حسن سير
وسلوك موقعة من اتنين موظفين ومختومة بختم النسر .. وارجوكم
اللى ورقه ناقص ييجى الاعلان اللى جاى. انا حاراجع الورق
وادخل اللى عليه الدور
تخرج احلام من باب الفيلا وصوتها من الخارج
احلام : خش انت
تظهر امرأة فى لثلاثين تلبس ملابس عادية وهى تشد يد . يظهر رجل فى
الاربعين يلبس ملابس غير متناسقة . جاكت بدلة واسع , كرافتة طويلة,
قميص احمر, بنطلون قصير يظهر الشراب , الجزمة مثل التى يلبسها عساكر الجيش , يفرق شعره من النص والزيت على شعره لمعته واضحة
" شفيقة وزوجها سيد كهربا " .. واضحة عليه علامات التخلف ويثأثأ فى كلامه … يرتعش سيد وشفيقة تمسكه وسامح يرتعش وهو جالس على الكرسى
شفيقة : (بلغة فظة) خش يا آخرة صبرى
سيد : (فى عبط) ثبرك . يا . ثلام يا ختى .. انتى كنتى لاقية حد يتجوزك
شفيقة : طيب يا ابو نص لسان انت . انا عايزاك تصحى كده وتفتح لى
مخك
سيد : (يمسك راسه) لا يا اختى .. انتى عايزانى اموت يا بت الكلب .
عايزة تفتحى راسى
شفيقة : يا ربى الصبر .. آخرة صبرى اتجوز واحد عبيط .. يا سيد
سيد : لا مش حافتح
شفيقة : طيب ما تفتحش مخك . (تمسكه من جاكتته فى غيظ) ولا بقك ..
مش عايزة اسمعلك صوت . تكتم ساكت
سيد : (فى استكانة وخوف) طيب . طيب .. انا عايز اعرف انا جاى هنا
اعمل ايه
شفيقة : تتجوز
سيد : (يضحك عاليا ويضرب كفا بكف) يا ثفيقة يا عبيطة ما انا متجوزك..
اتجوز تانى (يضع اصبعه على راسه) آآآه … علشان كده عمالة
تحمينى فى اليوم عشر مرات (يضع يده على راسه)وتحطيلى ثامبو
وزيت على شعرى .. يا هبلة يا عبيطة انتى نسيتى ان انا جوزك
شفيقة : (فى حزن ونبرة حزن فى صوتها) لا يا سيد منسيتش .. لكن اعمل
ايه بس . اتجوزت راجل قليل الحيلة فى كل حاجة .. الا فى حاجة
واحدة… والحاجة دى طلباها سوسو هانم . يعنى حل مشاكلنا كلها
فى سوسو هانم . فهمت
سيد : (يهز راسه) آآه .. فهمت طبعا . ثوثو هانم .. هية الحل (يضع اصبعه
على جانب راسه) بث مش فاهم .. حل لايه
شفيقة : (فى نبرة حزن) لكل حاجة .. لكل حاجة . لفقرنا .. لجوعنا
وحرماننا من كل حاجة حلوة فى الدنيا .. لعيالنا اللى ضاعوا
وخرجوا فى الشوارع يشحتوا اللقمة . فهمت ولا اقول كمان .
عرفت ليه انا بابيعك .. بابيع جوزى لواحدة تانية . علشان
اشترى بيك عيالى (تمسح دموعها بيديها)
تسحبه من يده وتجلسه بجانب سامح وتخرج من باب الفيلا .. ينظر كل منهما الى الاخر وهم يرتعشون
سيد : ثوثو هانم . هية الحل
سامح : آه فعلا سوسو هانم .. هية الحل
يظهر شاب فى الثلاثين من عمره يشد يد امرأة وهو وسيم الوجه, ممشوق القوام فى رجولة ووسامة … وتدخل فتاه جميلة ( الشاب حسام والفتاه وسام وهم مخطوبين)
حسام : صدقينى يا وسام .. سوسو هانم هية الحل لمشكلتنا
وسام : انا مش ممكن اوافقك ع اللى حتعمله ده
حسام : فكرى بعقلك .. مش عواطفك .. تلت تشهر .. وبعدها ممكن نتجوز
ونعيش حياتنا وتتحل كل مشاكلنا
وسام : حسام راجع نفسك … انت بتلعب بالنار .. وبعلاقتنا
حسام : يا حبيبتى افتكرى احنا بقالنا قد ايه مخطوبين .. خمس سنين . ده
غير اربع سنين حب فى الجامعة .. يعنى تسع سنين . ومفيش اى
امل قدامنا . اتولدنا فقرا .. اهلنا طفحوا الدم علشان يعلمونا . ويوم
ما خدنا الشهادة فرحوا .. وزغردوا . حسوا ان خلاص ولادهم
حيخرجوهم من فقرهم . ما احنا معانا شهادات عالية بقة تسمحى
تفهمينى عملنالهم ايه .. ولا حاجة . لسه عالة عليهم .. حتى الشغل
اللى اشتغلناه ايه .. مندوب مبيعات .. نلف ع الشقق . ده يقفل الباب
فى وشك .. وده يبص لك بقرف . وفى الآخر بنقبض ايه .. ملاليم..
ملاليم صدقينى . اقتنعتى ان حل مشكلتنا هية سوسو هانم
وسام : (فى قوة) بس ده نوع من انواع الدعارة
حسام : (فى غيظ) بلاش بقة الكلام الكبير اللى كنا بنقوله فى الجامعة
ومصدقينه .. سقراط قال .. افلاطون بيقول .. طز فى سقراط وطز
فى افلاطون . ولتحيا سوسو هانم
وسام : (فى يأس) يعنى ده قرارك النهائى
حسام : ومفيش قدامى غير . سوسو هانم .. هية الحل
فى حزن تخلع الدبلة من يدها وتناوله اياها
وسام : انا مقدرش اعيش معاك وشبح سوسو هانم معشش فى بيتى طول
العمر (تخرج وهى تمسح دموعها من باب الفيلا الرئيسى )
حسام : (يمسك الدبلة وينظر اليها) مش مهم .. بكرة ترجع لما تعرف انى
بقيت غنى ومعايا فلوس
ثم يتجه حسام ناحية سامح وسيد ويجلس بجانب سيد وينظر اليهم ويسلم عليهم واحد واحد
حسام : سوسو هانم .. هية الحل
سيد : (وهو يرتعش) ثوثو هانم .. هية الحل
سامح : (وهو يرتعش) سوسو هانم .. هية الحل
تدخل احلام من باب الفيلا وتغلق الباب وراءها وتتجه ناحية الباب الآخر على الجانب الآخر من المسرح
احلام : اتفضلى يا هانم .. المرشحين جاهزين
تدخل امرأة طويلة قوية البنيان تعدت الاربعين قوية الملامح والشخصية تنظر ناحية الثلاثة وتزداد رعشة سامح وسيد يضع يده على شعره وهو يرتعش وينظر اليها حسام وهو يضع يده على قلبه . تسحب سوسو احلام من يدها الى الجهة الأخرى من المسرح
سوسو : قوليلى يا احلام
احلام : اامرى يا هانم
سوسو : مين الواد الروش ده
تشير احلام ناحية حسام
احلام : ده
سوسو : لا
احلام : اللى جنبه
سوسو : لا
احلام : (تشير لسامح) ما هو مش معقولة قصدك على ده
سوسو : ايوة .. هوة ده
احلام : (صارخة) ده
سوسو : (فى هيام وهى تنظر اليه) ده امور خالص .. انا مجربتش الصنف
الروش ده جنان .. جنان
احلام : ده . ده مينفعكيش خالص يا هانم .. ده واد خرع وميستحملش ..
(فى فزع) ده يفيص فى ايدك من اول يوم
سوسو : (فى هيام وهى تنظر لسامح وتزداد رعشة سامح) بس .. دخل
قلبى خالص اول ما شفته .. بصى بيترعش ازاى . ذى الكتكوت
البردان. يجنن يجنن ولا النيولوك اللى عامله فى شعره .. خلاص
هوة ده.. اصرفى الباقى
احلام : يا هانم راجعى نفسك .. دى روح بنى آدم برضه وممكن نقع فى
مسئولية جنائية وسين وجيم
سوسو : (فى حزم) خلاص الموضوع انتهى
تتجه سوسو هانم ناحية سامح وتمد يديها اليه فيقف وتزداد رعشته ويحاول الهروب فتحلق عليه وتمسكه وتسحبه من يده وتخرج من الباب الداخلى
احلام : (صارخة) ده .. ربنا يستر ع الواد . ده لسة صغير (تنظر ناحية
حسام وسيد) اتفضلوا خلاص الهانم اختارت
حسام وسيد : (الاثنين فى صوت واحد) ده
يظلم المسرح تماما ثم يضىء.. ويظهر سامح جالس على الفوتيه وبجانبه سوسو هانم ماسكة يديه فى هيام
سامح : سوسو يا حبيبتى .. تلت سنين عدوا .. امال حتطلقينى امتى
سوسو : (فى هيام) قريب يا حبيبى .. قريب

يظلم المسرح مرة اخرى ويضىء ويدخل سامح وقد انحنى ظهره ويستند على عصاية ويمشى ببطء .. تدخل وراءه سوسو وقد انحنى ظهرها ومستندة على عصاية . يتجه سامح ويجلس بصعوبة على الفوتيه ويرتمى عليه فى اعياء شديد .. تتجه اليه سوسو وتجلس بجانبه بصعوبة شديدة وتمسك يديه . يرفع نظره لها ويتكلم بصعوبة كانه يحتضر (ويلبس الجميع نظارات سميكة)
سامح : شوشو يا حبيبتى .. عدت خمشين شنة على جوازنا .. امال حتطلقينى امتى (تسقط راسه على رقبته علامة الموت)
سوسو : (وهى تغطى وجهه) لما نتقابل فى الآخرة يا حبيبى (ثم تنادى بصوت امرأة عجوز) احلام .. يا احلام
تدخل احلام منحنية الظهر مستندة على عصاية وتتحرك بصعوبة
احلام : اامرينى يا هانم
سوسو: بكرة تنزلى الاعلان
احلام : (تهز راسها ناحيته) هوة فيص
سوسو : (تهز راسها ببطء) فيص
تضحك الاثنان ضحكات العواجيز

(تسدل الستار)

النهاية

» سوسو هانم ..هية الحل ..كاملة المشاهد ..
» وقلبت بجد ..كوميدي ساخر ..
» طباخ الخلع ..كوميدي ساخر ..
» حل ازمة الهلا فى حل المجلس( الحل فى الحل)
» لمسة وفاء ...((( الاستاذه/هانم حمزة احمد))).