ياسلام عليك ياسلام .. يا حلو السكوت مرات كلام وعدم الملام كمان ملام

الكلام هلاوي
واللحن يوسف السماني
والأغنية للراحل مصطفى
ومشاركة الاداء نزار الماحي سليمان



https://www.youtube.com/watch?v=P6YGm7NDej0

المحبوب يا حبيب ...

كل سنة وانت طيب .. يا أخوي انت كل ما تنزل السودان بترجع بمحاسيس رهيبة انت قاعد تسوي شنو هناك ( وصف لينا )
حمداً لله على سلامة الوصول وليك وحشة ...

منعم كيفك ياخي
وكل سنة والناس كلها طيبة
تدمير شنو يامنعم ؟؟
السودان دا "عصي" على التدمير
ما تسمع "الكضب" البلد دا غريب وإنسانو أغرب
السودان يا منعم كشف حال المشاريع خاصة مشروع سندس القالو زراعي
الناس ديل يامنعم بواجهو في الأمر بصلابة لا تعرف اللين ولا المهادنة
وما يتراءى "لنا" ما هو إلا "وهن" مخاض حمل جنين يتخلف في أحشاء البلد
فأما الزبد فيذهب جفاء وأما ما ينفع الناس فيمكث في الأرض
فهون عليك اخي منعم والصبر سمح وأضرب الهم بالفرح

ويورائد ليك وحشة وطولنا منك لعل الداعي خير وكل عام وأنت والأسرة بألف خير
طبعاً لازم أرجع بزخيرة تعيني وتفرج عني كرب الغربة
تخيل زول جائي من همبريب ومجدعين ليهو العناقريب في الصقائع
وناس "حكايين" وجبنة زي الزيت شغالة 24 ساعة تفتكر لمن أجي هنا بسكت ؟؟
أها حا أدور كدة لحدي ما تقرب الإجازة الجاية دا لو ما مشيت في الضحية
واليوم داك أجيكم في الموقع دا وشربوتي يقول واغربتي رايك شنو
وأوعة تتأخر كل ما تلقى فرصة أمش بس أعمل حساب الكرونة

المحبوب ..............

والله قصت العناقريب والهمبريب دي فاقدنها كثير ... انا بمشي كثير السودان ولكن للأسف ما حصل مشت قعدت لي 15 يوم كلها ابو سريعة لكن عيد الضحية دا كان الله حيانا محضرين تب ...
الخروف البقول باع ،،، والمرارة ام اتي ،،، والشطة المخمورة بالجرد ،،، والشربوت الغتايته بتنطط ،،، والشية ام بصل الكترابتها بتجيب الضهبان ، والهقوة اللبانه ضكر ،،، ومسالمة الاهل والحبان .....

والله بلدنا زي القمر ...............

ياالمحبوب يا رائع رجعتنا لاحلى واجمل سنين العمر و قلوبنا الغضة تستمع الى الاستاذ/ مصطفى سيد أحمد فى منتصف التسعينات و.......


[لمحــــــــــــــــــتك قلت بر آمــــــــــــن بديت احلم )

حمد الله على السلامه اخ محبوب وكل سنه وانت طيب واسرتك بالف خير...
دائما بنحبث عن البوست بتاعك لانو كشكول لامى كل شى السياسه والاغانى المنتقاه وونسه الحبوبات .فهو ملاذنا
متعك الله بالصحه اخ محبوب....

شكرا يا مليان بالكلام المليان ..
نحن سمعنا مصطفى ولسع بنسمع بقلوب غضه .. دة ما كان فى التسعينات لكن هسع يا رحمة!!

تحية وتمام تقدير للأحبة دكتور بكري ورحمة واميمة وكل عام وأنتم بخير
اميمة انا زعلان منك ياخي مس كول صغيرة والتواصل أسمح منو مافي
الدكتور الماحي سليمان موسيقي معروف وأهو رفدنا بمغنيين من الدرجة الأولى
أتاري الأغنية دي وراها قصص مع أغنية تانية غناها الراحل مصطفى "شقى الأيام"
وبالبحث في قوقل لقيت الكلام التالي:

((عندما بدا المبدع مصطفى سيد احمد الغناء فى نهاية السبعينات كليا يعتمد كلياً على الحان الاخرين امثال محمد سراج الدين ويوسف السمانى وعبد التواب عبد الله وفتحى المك وسليمان ابوداوود واخرين ولم يكن يلحن لنفسه مطلقاً .

وعندما غنى اغنية (شقى الايام ) من كلمات عبد الرحمن مكاوى والحان يوسف السمانى غنى مصطفى شقى الايام لمدة عامين متتاليين بعدها جاءه يوسف السمانى وقال لهبالحرف الواحد :- (حمد الريح بيدفع فى الاغنية دى 500 جنيه انت بتدفع كم؟؟ فى العام الثنانينات كانت تساوى كثيراً. يقول مصطفى :-
قلت له شكراً اخ يوسف واشكرك على الفترة التى غنيت فيها هذه الاغنية واعتقد ان المسالة لم تصل لحد الابتزال ده ؟ وانك قد جرفك السوق حتى تصبح للاغنية بطاقة تسعيرة معلقة على رقبتها عندها قام منتدى الحلفاية الذى كان يضم الشعراء عبد الرحمن مكاوى والتجانى حاج موسى وعبد الوهاب هلاوى والصادق الياس واخرين بسحب اغانيهم من مصطفى وهى جمعنا قدر والله ايام يا زمان والملام على التوالى فكف مصطفى عن ترديدها والملاحظ انه فى كل شرائط مصطفى لم يرددها مصطفى ثانية المهم بعد ان ذهبت شقى الايام الى حمد الريح كما ارد ملحنها يقول مصطفى :-

بدات ابحث جادا عن صيغة بديلة وخضت تجربة التلحين واكتشفت اننى قادرا على ذلك وكان اول نص يقوم مصطفى هو المسافة ويا لها من روعة وياله من لحن ومنها انطلق مصطفىوترك كل الشعراء السابقين واغنياتهم الى غير رجعة وتعامل مع شعراء جدد لم يكن احد ان يسمع بهم مثل يحى فضل الله وقاسم ابو زيد والقدال وعبد العال السيد وغيرهم والمؤكد ان مصطفى بعد تلك الحادثة وحتى وفاته كانت كل اعماله الغنائية من الحانهماعدا عملين هما للشاعر محمد مريخة ( كيف انساك وصابرين على الزمن ) وهما من الحان الملحن بدر الدين عجاج فى ليبيا مطلع التسعينات لانه اعجب جدا بالكلمات وكانت مكتملة اللحن. شقى الايام ويوسف السانى و500 جنيه كانت سبب اتجاه مصطفى للتلحين لنفسه ، والان وبعد ان رحل مصطفى وفى اى لقاء مع التجانى حاج موسى او عبد الوهاب هلاوى عن اجمل كلماته بدون تردد تجدهم يرددون والله ايام يازمان و الملام وتناسو حادثة منتدى الحلفاية.)).
ودا المصدر
http://www.sudaneseonline.com/cgi-bin/sdb/2bb.cgi?seq=msg&board=11&msg=1072376012&func=previous

(( جزء كبير من النص السابق اخذ من حوار مع مصطفى عليه رحمة الله
فى جريدة الاسبوع بتاريخ 13 اغسطس 1988 اجرى الحوار ابوزر الغفارى هذا ما لزم التنويه عنه ))

المصدر نفسه

بكرى عثمان حمد كتب:

شكرا يا مليان بالكلام المليان ..
نحن سمعنا مصطفى ولسع بنسمع بقلوب غضه .. دة ما كان فى التسعينات لكن هسع يا رحمة!!

ياBOSS ما تبالغ عاوز تقنعنى انو انت لسه قلبك غض ( يااااااااااااااااااخى صدقناكم ) خالص الود