كان يا ماكان زمان في الحصاحيصا .... ( بوست مفتوح لمشاركة الجميع )

البوست رائع روعتك ياورقه
شكراً لك وانت تزيد يوماً بعد يوم ارتباطنا ومعرفتنا بمدينتنا الحبيبه
شكراً لك وانت تكشف دوماً الستار عن اشياء يجب ان تدرس لكل عاشق لهذه المدينه الجميله
شكراً لك وانت تربطنا بالحصاحيصا ماضي وحاضر ومستقبل
ارجو الا ينضب نهرك الدفاق وان تتحفنا يوماً بعد يوم بخبايا الحصاحيصا التأريخيه

شكرا لما يخطه بنانك من كلام سمح بالحيل ....
ارجو ان لا يكون قد فات عليك ان تذكر ابن حلتنا المايقوما ... الاستاذ ... الفنان ... الرسام .. الكاتب ... الكوميدى ... الانسان المتعدد المواهب بدر الدين مصطفى صالح الذى عمل فاحسن الاداء .. غنى فاطرب الجميع ... حكى النكات فاضحك الجميع .. رسم فادهش القراء ...دّرس الفنون فأفاد الجميع ..وثق لتاريخ الحصاحيصا ... ذهب فابكى الجميع ... له الرحمه ...
هلا غطست ومرقت لنا بدرر هذا الانسان الذى استعجله الرحيل...
تحياتى

يا ورقة "كفاك" جماعتك عاملين فيـها ما عاصروا الحقب البتتكلم عنـها دي
وكمان بطالبوك تغطس وتتطلع مزيد من الدرر !!
والله انا خايفك تغطس ما تقلع !!
ليه يعني الحكي دا علي زول واحد بس زي ما قال الجراد ؟؟
الدنيا مغرب جاء زهجان
سأل "الابريق حقي دا الشالو منو ؟؟ "
جري جبنا تلاتة أباريق نظام "إتفضل ياحاج ولدرء الثورات بتوفير الأباريق المقيلات في إطراق "
توضأ وصلى المغرب ومع السلام عليكم
وقفت "ياسمين" أمامه شايلا "كرت التموين في إيدا" وقالت ليهو
"يابا سكر التموين قالو جابو في دكان السماني أديني النمش أجيبو"
رد عليـها بطريقة "إياك أعني وأسمعوا يا عنقالة"
"يابتي ما تخليني النرتاح شوية ....
وآآكل لي لقمة كسر ة شايلا كرتك زي منديل أم كلثوم"
وإغتاظ أكثر لمن سمع ضحكتنا "الكتامية" وقال
"إتوا تعالو البيت دا حكايتو شنو ؟؟ البصرف واحد والبصلي واحد !!"

أحكي يا ورقة "ربنا يعافيك" ويشهد الله رجعت ليك ناس 20 سنة للأمام
وعلى كل حال .. قصصك جميل سردك بديع زي بصمتك

شكرا ياعروستنا ايمان شايف اخوك مصعب عمل فيها من خريجين روضة سعاد سلام !!

يا بكري
المبدع بدر الدين سقط سهوا لاني بكتب مباشرة من الذاكرة الي الكي بورد وعشان كدا فيكم الخير كدي حك راسك شوية وارجع للزمن مرة واذكر حكايتي معاك .. اذكر المطربين القدام باقي انت من دفعة ادفريني فنان الانادي وانت من رواد عطان.

يا المحبوب جماعتك والله كلهم ناموا في الخط
والعجب حسن كيشو من مؤسسي الجبهة المعادية للاستعمار وكان عازف ايقاع مع الفنان عبدالمنعم حسيب وكورس مع احمد الطيب
والله يا محبوب ضحكتني جنس ضحك مع حكاية الجراد الله يرحمو ويديك العافية
تحياتي للجماعة .. العيد كيف

يا المحبوب هسع من كلام الناس ديل كله ما خفت على حسن الا من مناشدتى ليهو بالغطس ... هو نان غطس كم مرة وجاء نابل ... الله يديك العافيه .. والرحمه والمغفره للوالد الجراد ...
بس يا حسن حكاية الغطس دى .. وبدون حكة راس ... ذكرتنى قعادك انت وقرض وصلاح عثمان ونصر الدين عوض الله وحامد عثمان وود الشاويش لمن كنت بجى من حنتوب والقاكم قاعدين فى "بنابر" "انداية" "مكه" "وحدادية" ومغطسنها فى طرف البحر ... عليلك الله يا حسن وراق اغطس تانى واكتب لينا عن مدرسة الاندايه فى ذلك الزمن الجميل لمن كانت "الاندايه" مدرسة اجتماعيه وملتقى للابداع والترويح وليست فقط مكان للسكر والعربده ... وكانت هؤلاء الفضليات "مكه" وحدادية" جيراننا فى السكن فى حى المايقوما وشاركوا فى تربيتنا فاحسنن فى ذلك ... لهم الرحمه والمغفرة ... اكتب يا حسن عن كل ذلك ولا تتوقف ... وكان غطست وما جيت بنخلى المحبوب يحصلك..
كن انت والمحبوب بخير

[img]

كان يا ماكان زمان في الحصاحيصا .... ( بوست مفتوح لمشاركة الجميع ) - صفحة 2 30391159

[/img]
الاستاذ / مصطفي الطيب احمد الامين

www.alhasahisa.com
التاريخ المنسي للحصاحيصا !!
]u]يتذكره ويرويه للحصاحيصا دوت كوم الاستاذ مصطفي الطيب ( شقيق احمد قرج ) ومن اوائل طلاب المدرسة الوسطي التي افتتحت عام 1954 في الحصاحيصا في المحكمة الشعبية وكان مديرها ( الناظر ) الاستاذ الجليل محمود احيمر والداخلية بمنزل الوداعة وزامله في تلك الفترة الاساتذة بابكر سنهوري ، جعفر عثمان نقد ، المرحوم فاروق وراق والمرحوم عبدالله محمد الحسن ( ترنة ) وأبشر عثمان أبشر وحسن سلمان ، القمر التوم وكان مصطفي الطيب من اميز لاعبي كرة القدم في الحصاحيصا ابان عهدها الذهبي حيث لعب في الهلال والمريخ وفي 1960 تم اختياره مع حارس مرمي المريخ رفعت عندما كانا طلابا في الاحفاد الثانوية لتمثيل السودان في منتخب القارة الافريقية في منافسات شباب العالم المقامة في موسكو بالاتحاد السوفيتي الا أن حكومة عبود جمدت كل الانشطة اليسارية في ذلك الوقت . لعب مصطفي الطيب لفريق الهلال العاصمي واول مبارة لعبها كانت ضد الاهلي الخرطوم لتكريم لاعب الهلال زكي صالح والمباراة الثانية ضد القوات المصرية والثالثة ضد نيل العاصمة وكان المدرب هاشم ضيف الله ومعه البناء وجرت محاولة من قبل مهدي الفكي لتسجيله في المريخ ووافق وتدخل اهلي مدني ايضا الا انه التحق بالعمل محاسبا في ادارة مشروع الجزيرة .[/u]
التاريخ يعود الي عام 1946 اذكر جيدا عام الفيضان والوقت خريفي والحصاحيصا تكسوها الخضرة من كل جوانبها وتكسبها الجمال والبهجة وكانت الحصاحيصا في ذلك الوقت تتكون من الحلة التحت ( الحي الشرقي او الديم ) والحلة الفوق ( الاوسط ) بالاضافة الي حي كريمة الذي يبدأ من مربوع الحاج كرم الله الي مربوع حاج محمد صالح الذي يشمل بيت الوداعة عثمان . كان اهل الحلة الفوق والحلة التحت مزارعين واهل بهائم في المشروع او في المطري ومنهم الحاج سالم وقلباي وخالد وعمنا الضو والحسين والصديق ود العوض وعبدالله ود الجزيل وعبدالله ود الحسين وتاج الدين ود المقدم والهادي أحمد الامين وقرشي يوسف ويوسف أحمد الامين وحاج ابكر والد حاج حمد والبشير ابراهيم هاجي وعبدالله الفكي وحاجة مكة وحليمة بت ضو وحاج عطا المولي وهاجي وكان الفيضان عصيبا علي الحلة التحت لا يمر الليل الا ونسمع صيحات اهل الحي بعد ان يهجم عليهم الفيضان ويسرع السكان من اهالي الحي الاوسط وكريمة لنجدة اهل الحلة التحت واذكر وقتها ان السيل قام بهدم المدرسة الاولية التي كانت في مكان دار الرعاية ومكاتب الصحة حاليا ولم يترك سوي الشفخانة الوحيدة التي اقيم عليها الان التامين الصحي وبعد نزول البحر كان هذا المكان بدداية مدرسة الدرديري الاهلية وتم ترحيلها عام 1947 الي منازل عبدالقادر وزيري واخوانه حسن وحسين وسكينة وزيري . اصبح هذا المربع يعرف بدار الكشافة الذي يديره الاستاذ حسن عبيد من اهالي رفاعة وفي ذلك الوقت كانت الروح الوطنية عالية وومتلئة بحب الاناشيد الوطنية وبعد رحول المفتش الانجليزي الي مقره الجديد الذي اعد له بالسرايا الجديدة مكان المستشفي الحالي بالقرب من مقابر الفكي الزوين حاليا وبالقرب منالمنتزه الذي اندثر حاليا ورحلت المدرسة الاولية الي منزل المفتش الاانجليزي .

بيان سيدي الحسن والواقع علي ضفة النيل الغربية في الحصاحيصا جنوب الحلة الجديدة مكان منتزه الشهيد حاليا وهو علي ارض ناس الباقر ويحرسه الطيب المقدم وزوجته بت عجبنا وكان مليئا بشجر السدر ( النبق ) وتزرع ارضه بعد نزول البحر ونسجابة الي كبري القطر بالقرب من نادي المريخ حاليا ويتم زراعته الجروف بالعجور والتبش والبطيخ.
من اشهر معالم الحلة الفوق منزل العمدة عبدالمجيد علي طه ( منزل ابونورة حاليا ) والذي كانت اسواره محاطة بالبربندي لربط الدواب وحمير مشايخ الحلال وهم يحضرون حاملين معهم رسائل احوال الحلال لتسليمها للعمدة عبدالمجيد علي طه والعمدة احمد الامين احيمر وهم في انتظار المفتش الانجليزي اثناء مروره يوم السبت المقرر للنظافة العامة وهو يمر علي صهوة جواده .
بعد منزل العمدة عبدالمجيد كان خط سيرنا ونحن بعد اطفال نمضي الي حيث جمع ثمار اللالوب ( الهجليج ) في منطقة شجرة ابوكلاب التي كان يسشكنها الرجل السائح حسن ابوكلاب وكانت مليئة باللالوب ومنها ننطلق الي حتي المنطقة الصناعية القديمة والتي كانت تقع بين الصيدلية الشعبيية الحالية وطلمبة شل وهي كانت عبارة عن عشش للسمكرجية وحوش مبارك والطاهر حسن مليئ بالخرد وفي شرق طلمبة شل كان يقع دكان محمود سيداحمد وبلة ( والد حمدي ) واخيه عبدالقادر الشين لبيع اسبيرات العربات ومن المعالم البارزة في ذلك الوقت مطعم الفوالي محمد سليمان والصائغ عامر وعكود وكرم الله وحداد والد السر وعبدالقادر احيمر والد نيشو وامامهم دكان وراق حسن والنوش والخليفة حسب الرسول وعباس حسن والد عثمان وصالح اليماني ومحسن ومصلح ومن خلفهم يقع دكان ودعبدالرحيم الحلاوي والوداعة عثمان وقهوة حسن سيري وفي الجزارة القديمة تجد الزين الحلاوي وهو يصيح اوقة اللحم بعشرة قروش بالاضافة الي عباس حمد والحاج فضل الله وابراهيم الصديق والكردس والاحيمر وامامهم وكالة عبدالكريم علي موسي وجنوبها مربع حمدنا الله عثمان ويوسف حسن وبابكر محمد طه ( القيافة ) وشرقهم الغربال علي السكة الحديد ويديره عثمان حضرة ونائبه الضو حامد والمساحة الخالية حتي الملجة الحالية مليئة بالعيوش وكان عليها الحاج مدثر حسب النبي ومن خلفها عشش الخضار والتوابل ومربوع محمد احمد عبداللطيف ودالجعيلي وعبدالسلام عائد ومحمد علي الشايقي ومطعم عثمان فضل السيد وافران العيش والتي كانت من اشهرها فرن وزيري وعبدالقادر خرومي والفكي احمد والد عمر وخليل اسي جد خليل كحيل لامه وخواجة كوستي وفي الفضاء الواقع بين المايقوما والسوق كانت توجد زريبة الهوامل التي تحبس فيها البهائم السائبة ووكالة لمبيت بعض الناس وكان يديرها ود الحسين وعطا الصديق بقنبوره المتدلي علي راسه ومن ثم آلت ادارتها للحاج سيد تركماني .
نادي الصبيان في الحصاحيصا كان يقع بين المحكمة الشعبية ومنزل الوداعة عثمان وكان يعرف ببيت الثقافة ومحو الامية وكان يعرض فيه التمثيليات واشهر تمثيلية كانت تمثيلية سعاد وتمثيلية الناقة ام درع التي كان يقوم بالدور الرئيسي فيها عبدالرحمن محمد حامد ومن بعده بابكر الخضر وبالقرب من الحلة التحت كان يقع الدونكي وهو محطة لتزويد القطارات بالمياه وكانت المعدية امام منزل حمدنا الله عثمان اما الكبري الفاصل بين الحلة التحت وفريق الموظفين كان عبارة عن حوض لتعلم السباحة لابناء الحلة الفوق والكريمة والحلة التحت خاصة في فصل الفيضان.
نواصل

بالجد ابدااع يا ورقة سرد فيهو اشباع وامتاع يعنى مش حشو بطن تزوق وهضم للمادة المسرودة حلوة مسرودة دى مش .
لحفظ حقوق النساء العاملات وتصحيح الخلط كانت الاستاذة فايزة بيترو ماركو من عملت فى صيدلية ابونورة وليس الاستاذة هانم بيترو (هانم فى تلك الفترة كانت بلية بضفائرها) لهن تحياتى وسلامى .
تخريمة:
العتوت كان بكم الزمن داااك ولا نسأل ود الجراد

يا بدريتو
تسلم علي مرورك الذي انتظرته وانت احد اركان ذاكرة المدينة التي استدعيناها مرارا وثقتنا في ما تحفظه اكثر وثوقا من ذاكرة اخونا الباشمهندس طارق ( ما تكلمو) والعجب الدكتور التقول ولدوه في النمسا تاريخو بدا في المدرسة الثانوية ما بذكر حاجة عن الحصاحيصا ..كشكش لينا خالك عثمان عندو درر وذكريات
شكرا ع الاضافة والتصحيح
العتود الزمن داك كان بي ريال يعني عشرة قروش وكنا نشتريهو بالفرن محشي من فترينات الخرطوم بي طرادة يعني خمسة وعشرين قرش معاه المزات والمخلللات والعيش ما عدا القزاز يا ابو الجاز
تسلم لينا يا اميقو

حسن وراق كتب:
لعتود الزمن داك كان بي ريال يعني عشرة قروش وكنا نشتريهو بالفرن محشي من فترينات الخرطوم بي طرادة يعني خمسة وعشرين قرش معاه المزات والمخلللات والعيش ما عدا القزاز يا ابو الجاز
لقد اكد هذه المعلومة المخضرم خالد ورقة وقال الفترينة كانت فى سوق نمرة2 وصاحبها اسمو أحمد وقال بالظبط كدة مكان بقالة عمك سعيد .
ابو عفان داير تجيب اله تسجيل معاك ونسجل ليهو حكاوى محجوب شيتا و حيدر بكرى وابو على والنوش وتسلم

[b]

[img]

كان يا ماكان زمان في الحصاحيصا .... ( بوست مفتوح لمشاركة الجميع ) - صفحة 2 31708300

[/img]
مصطفي الطيب يواصل في الحلقة الاخيرة عن:

تاريخ الاندية الرياضية بالحصاحيصا

دار الجبهة المعادية للاستعمار (الحزب الشيوعي فيما بعد )
لايمكن الحديث عن الاندية الرياضية في الحصاحيصا دون ذكر لدار الجبهة المعادية للاستعمار ( الحزب الشيوعي لاحقا ) وهي الدار الذي سبقت جميع الدور والاندية وحتي سينما الحصاحيصا وكانت عبارة عن منتدي ثقافي وسياسي واجتماعي لتجمع الشباب في منتصف الاربعينات وكانت عضويته مكونة شباب الحصاحيصا الشيوعيين ومنهم احمد المصطفي حسين والسر محمد احمد عبدالخالق وحسن قسم السيد وعلي الحلاوي وجعفر الحسن وبابكر رملي وعامر محمد طه والاستاذ التوم عبدالرحيم وعمر ابوعاقلة من شباب امدرمان وكان استاذ في مدرسة الدرديري و ومن هذه الدار انطلقت الحركة الثقافية واللرياضية .
قلب الجزيرة
[color=blue]من داخل دار الجبهة المعادية للاستعمار تكون اول نادي رياضي واسمه قلب الجزيرة غير نادي القلب الحالي وكان قوامه الموظفين والشباب امثال عثمان الرضي وحسن عطا المولي ومصطفي الجاك وحسن خليل والتاج مصطفي والاستاذ أحمد الرضي وعدلان اسماعيل ومن الاداريين أحمد حسين علوب ( الزعيم علوب ) والذي كان منزله محور تجمع الرياضيين بالحصاحيصا حيث كان ينظم المنافسات بين الحصاحيصا وعصمة وكمال الكاملين والنصر ابي عشر والمسلمية .n]color]فرق صغيرة :
الحلة الفوق شمال
هنالك فرق لكرة القدم صغيرة منها اثنين في الحلة الفوق ( الحي الاوسط ) الفريق الاول في شمال الحلة الفوق بزعامة رحمة الله النميري واحمد الطيب قرج ومهدي الطيب والضقالي وقسم السيد آدم وعبيد ابوعوس ومصطفي الطيب ومحمد صالح كدمبسة وعبدالسلام محمد فور
الحلة الفوق جنوب
بزعامة مبارك الماحي وعثمان النوش والسر محمد عاشميق وعبدالرحيم ود النائب وتوفيق عثمان حضرة
فريق الحلة التحت
كان ضعيفا نسبيا بزعامة الشاذلي علي وعثمان احمد فضل وباب الخير وقسم الله الخضر وبابكر الخضر و مبشر عوض الله وجعفر عبدالله ودالصول
فريق الاتحاد :
ظهور تجمع شباب الحلة الفوق اثنا قيادة قلب الجزيرة للحركة الرياضية بالحصاحيصا ومن اؤلئك الشباب كان محمد الرضي وحنان اسماعيل وعلي الطيب ومبارك عبدالوهاب وحسن النيل و محمد عبدالمجيد علي طه وابراهيم خليل وانضم اليهم من السكة حديد الطيب الماحي ومعه زملاءه شواطين السكة الحديد ومحي الدين وحجازي وانضم اليهم لاعب الاتحاد مدني سليمان ريحان بعد نقله الي سكة حديد الجزيرة وكان هو سبب تسمية هذه المجموعة بالاتحاد ليصبح الفريق الثاني مع قلب الجزيرة الذي تدهور مستواه بسبب نقل الموظفين ويتلاشي نهائيا واصبح الطيب الماحي رئيسا لفريق الاتحاد ومحمود الطيب سكرتيرا .
النادي الاهلي :
بعد مبارة بين فريق الاتحاد وفريق حنتوب نظمها مبارك عبدالوهاب وادارها هاشم ضيف الله زار اتحاد الحصاحيصا نادي اتحاد مدني ولكنهم لم يجدوا استقبال وترحاب ليقوموا بواسطة حنان اسماعيل لزيارة الاهلي مدني والذي كان يترأسه امين عبدالله الفكي الذي استقبلهم بكل الود والترحاب الي درجة ان اهداهم كؤوس وهدايا واجمع الكل علي تغيير اسم الاتحاد الي الاهلي في سنة 1953 وبهذه المناسبة اقيمت حفل ساهر احياه الفنان الكاشف وابوداؤود والراقصة امنة الجمل

فريق الهلال
من داخل دار الجبهة المعادية للاستعمار كانت مجموعة تعرف بفريق المقص معظمهم من ابناء التجار والترزية وكان يترأسهم الطريفي من المسلمية وبشير عثمان سيداحمد وابوعاقلة موظف بالبوستة وعبدالله عطا المنان واحمد الطيب قرج وانضم اليهم السر عاشميق وعثمان النوش ومن الاهلي محمد عباس فارس وجعفر طه ضابط التعاون ومحمد خوجلي نائبه ومبارك عبدالوهاب وسميت هذه المجموعة بالهلال واصبح الفريق الثاني مع الاهلي وانضم اليهم في ما بعد مصطفي الطيب ومهدي الطيب وهجو حاج الصديق والزبير عاشميق وخالد خضر وعوض رفاي واصبح فريق منافس للاهلي .
فريق المريخ:
من داخل دار الجبهة المعادية للاستعمار وفي سنة 1956 ظهرت مجموعة الحلة التحت ومعظمهم لا يجيدون اللعب امثال الطيب حسن وعطا الله الشيخ ومصطفي الحاج وعثمان الشايقي وعبدو الجنة والامين جلي وعمر عطا المنان ( فانوس ) وعلي ميرغني الزوين وابراهيم حسن واحمد حداد والشيخ محمد رحمة الله وبابكر محمد زين ( ابو النوق) وانضم اليهم فاروق احمد سالم وعلي عاشميق ومحمد علي رجلة وابراهيم عكود والزبير شاني واحمد الهادي و رمضان ومحمد امان وعبدالله عطا واخيرا دفع الله عوض الله بعد ان كاد ان ينضم الي الهلال وسميت هذه المجموعة بالمريخ وكان اول رئيس لهم الزبير شاني وسكرتيره الطيب حسن ونائبه علي ميرغني واصبح الفريق الثالث في الحصاحيصا وفي سنة 1957 انتقل دار المريخ الي القرب من منزل ابوالكيلك وما زال رئيسه الزبير شاني وسكرتيره المرحوم محمود احمد الامين ويعاونه احمد حداد والحاج علي جلي امين للخزينة ويعاونه محمد محمود سيداحمد ( والد ياسر ومعتز النوش ) وبعد ذلك انضمللنادي عبدالقادر تاج الدين ( ابو رجيلة ) وابراهيم محمد نور وعبدالرحيم عباس عثمان ( الدامر ) واسماعيل عيسي وبمناسبة رحول النادي القي مصطفي الطيب كلمة الاعبين باسم المريخ .
اتحاد الكرة بالحصاحيصا :
في بداية الحركة الرياضية بالحصاحيصا كان فريق الاتحاد ( الاهلي في ما بعد ) يلعب في مباريات تنافسية مع ابي عشر والكاملين وكان للزعيم علوب دورا بارزا في تلك المنافسا والتي تدار بلجنة منظمة برئاسة الدكتور ابوعكر ومحجوب قوليب ومجموعة من الممرضين بابي عشر وهذه اللجنة سميت في ما بعد بالاتحاد المحلي لشمال الجزيرة . قبل قيام اتحاد الكرة كان الحاج فضل الله حمد والد عمر وحسن يدير النشاط الرياضي في الحصاحيصا ويعاونه عثمان عباس حسن . تم تكوين الاتحاد المحلي لكرة القدم بالحصاحيصا في 1969 وكان اول رئيس له السر محمد احمد عبدالخالق ونائبه عبدالبديع محمد سليمان والسكرتير الطيب الحاج وامين المال محمد الجاك ابوشمة والتاج مصطفي نائب له وعثمان يس كان نائب السكرتير وفي عهدهم تم بناء دار الرياضة واصبح اتحاد منطقة .[/b]

وراق
الله يكرمك ياخي
فقد أكرمت الأموات
والأحياء
والأشياء
وكتابة مُبصِرة ومُبصرة بالتشديد
وعلى كل حال
قصصك جميل سردك بديع زي بصمتك

....
....

تخريمة : زول بقدر "يجك" معاك مافي
فشيل شيلتك بديت من الاربعينات أو كما قال القدال ..

شيل شيلتك بقيت لى النص
....
....

انبليتا انبليتا
اختة الرملة ما تقع المكان الهش
هى الممطوره ما بتبالى من الرش

» تقري خطير عن اندية الحصاحيصا (( مفتوح للنقاش )) توجد صور
» نداء الي جميع ابناء الحصاحيصا في الداخل و الخارج ؟؟مدرسة الحصاحيصا الوسطي تنادي الجميع( توجد صور مؤلمة )
» لتبقى الحصاحيصا فوق الجميع
» رمضان زمان في الحصاحيصا
» هذه الاسماء التي قابلت البروفيسور الامين دفع الله لا تمثل الحصاحيصا !! يمثلون ذاتهم فقط