المعاناة
[السلام عليكم
اصبح العلاج اليوم زي الاكل والشراب واللبس والكهربا والموية ,ممكن تاكل بي جنيه بس وتصبر. وممكن تشرب بي نص جنيه وتروي لكن ازا مرضت شيل شيلتك ممكن تتعالج في المركز البسيط دا وممكن اودوك المستشفي وتتعالج وكمان ممكن اودوك بالاسعاف وحالتك خطرة شديد وترقد شهر وتتعالج لكن هل انت قادر, هل انت اسي حاليا مستعد لظرف طارئ اسعاف بليل وتمشي الخرطوم وتضرب تلفون ياجماعة الحقونا بي قروش نحنا في مستشفي القلب. الدكاترة قالو الحالة خطرة ونقلونا العناية المكثفة ومحتاجين قروش ولحافات وسيرمس شاي وعشا لانو جينا مخلوعين ,,الو الو الو : اي نحنا في المستشفي في العناية :الزول كيف:الحمدلله: رسلنا ليكم قروش بكرة بتصلكم وبعداك,,,,,,,, مامعروف البحصل شنو ونسمع القصة دي (الحاجة قالو مشت المركز ولقت عندها ملاريا فحص وكشف وعلاج قريب ال 50 جنيه ورقدت, بكرة الولد مشي المدرسة وفطر هناك وجا البيت فجاة وجع بطن اسهال .....يلا ارحكاكم المركز والدكتور قال عندو دسنتاريا هاكم العلاج دا والولد تاني ما ياكل في المدرسة (وتاني علاج بي 30 جنيه) الحاج يجي بعدين من السوق يدوه فاتورة العلاج والله كلفت 30 جنيه,,,,,,الابو: لاحول الله . اه الولد كيف اسي ,,,,,,,الام : احسن كتير..... البركة في العافية.
بعد بكرة الشافع الصغير ...اسهال وطراش وحمي شديدة الام تحتار تديهو كركدي , حلبة ,,,عرديب والحال في حالو تمشي لجارتها توصف ليها كمون وقرض كدي سويهن لحد بكرة وماتكلمي الراجل ..خلاص كويس,,,,,,وصاحبنا بليل الحمي تزيد ويشنج ويجرو بيهو المستشفي (الدكتور: الشافع دا مفروض يرقد معانا لانو عندو ملاريا ونزلة معوية حادة داير دربات وعلاجات ...هاكم الروشتة؟ وتاني قروش بالشي الفلاني والمرة دي جابت ليها رقاد مستشفي الراجل المسكين علي باب الله فاتح ليو طربيزة خضار في السوق وحق اليوم باليوم ,,يقول للمرة خلاص خشي بيهو العنبر كدي بيتي الليلة والصباح رباح ,,المراة خشت العنبر والراجل في اليل داك يفتش لي حتة ابيت فيها ,فتشك فتشك فتشك حتن لقي ليو فرشة انوم فيها لحد الصباح رقد نام وقال يارب العباد تفرجا وفي جيبو خمسة جنيه بس.
زولنا الصباح صلي الصبح وقال يارب تهون القاسي ومشي السوق طوالي اكان يلقي ليو قروش للشافع العيان دا,, غشا حاج الامين بتاع المغلق وقال ليو والله معليش ظروفنا صعبة كدي مر علينا بكرة,,,,,,,,,,مشي بعداك ل حاج الصديق الجزار : قال ليو قروش والله ماعندي لكن اكان عايز ليك لحمة شيلا,,,رد ليو: ياحاج انا ولدي عيان ماجعان ,,,,المهم زولنا ما لقي ليو زول اديو جنيه واحد عشان ما لابس جلابية نضيفة ,عشان ماعندو غير طربيزتو دي الفيا عجور وشطة خدرا
عشان اكان عزموه لعرس مابقدر اخت في الكشف غير 5جنيه, عشان بساطتو, وعشان القسمة ماادتو, وعشان علي باب الله ,وعشان بياكل وجبة واحدة في اليوم, وعشان بقعد في الشمس يلقط رزقه الحلال
(هزه القصة سردها لي الحاج المكلوم والمغلوب علي امرو صادفتو صدفة في المستشفي ,,تصدقوا الزول دا ما طلب مني مساعدة ولا شحدة ولا قال لي ساعدني , قال لي يادكتور ولدي العيان دا اكان مات دا امر الله ما منو مفر, بس امو دي عندها ضغط ماتروح هي كمان معاو)
الحمدلله قدرنا مع التعاون مع بعض الخيرين ان نوفر ليهو كل العلاجات والدربات ما يقارب 180 جنيه والحمدلله الشافع بقي كويس ورجع انطط من تاني(ولله الحمد والمنة)
السؤال مرة اخري هل انت مستعد لائي ظرف طارئ
والي من نشكو ...............
نواصل ان كان في العمر بقية...[/color][/b]
موضوع: اسعاااااااااف .......حالة خطرة (الو الو الو: في العناية المكثفة) 
الأربعاء 7 ديسمبر 2011 - 23:22
