كلامات دكتور كمال عبدالقادر

لاعب كورة معروف بأنه جراي وشوات ولكن معظم هجماته كانت تنتهي بالتسلل او التهديف في الاوت. في احدى المرات طالبه احد اللعيبة المستجدين بأن يعكس له الكرة فقال له "يا ولد بطل قلة الادب انا قدر عمرك دا عديتو "اوف سايد""

يبدو ان المؤتمر الوطني سمع بقصة المسطول الذي اخذ زوجته الى ناظرة مدرسة البنات وقال لها "ممكن القى عندكم فكة؟" ولهذا قرر الوطني ياحد ليهو وزيرين تلاتة ويجيب بدلهم فكة

على الوزراء والوزيرات من صغار السن التزام الحذر حتى لا يطلع لهم احد الكباتن قائلا "نحن قدر عمركم دا عديناهو في حالة "تسلل""
-----------------------------------------------------------------------------------------------------------
موظف صغير في زمان سابق كان يحضر إلى المنزل ومعه مرتب الشهر فيقعد في العنقريب بحضور المدام ويوزع المرتب على صاحب البقالة والجزار والخضرجي وغيرهم وفي كل مرة يتبقى من المرتب ثلاثين قرشاً فكان يشتري بها "نص عرقي" ويكون خلص المرتب..
في مرة وزع مرتبه ولكن لاحظ أن الباقي تسعين قرشاً فكرر التوزيع ثلاث مرات بحضور المدام فتأكد أن الباقي تسعين قرشاً. اشترى الرجل زجاجة بيرة لزوم الشرشحة وعندما صب المشروب على الثلج ظهرت الرغوة فصاحت زوجته في جزع "سجمي نسينا ست اللبن"..
بعد أن وزع المؤتمر الوطني أكوام الوزارات على الشركاء وأعلن التشكيل سمع صوتاً يقول سجمنا نسينا الأسود الكاسرة جناح العدالة ومازالت التعيينات مستمرة في حكومة "ست اللبن" ..
حكومة جات بالكوم في سنتر الخرطوم أكلت قروش كلتوم ست اللبن.

-----------------------------------------------------------------------------------------------------------------
قالت الزوجة لزوجها "تفتكر لو انا مت انت ممكن تتزوج واحدة تاني وكمان تديها هدومي وغويشاتي ديل؟" فقال الزوج دون ان يفكر "لا ابدا لأنو حاجاتك دي ما قدر مقاسا" فقالت الزوجة "حرام عليك يعني حتتزوج بعدي؟" فقال الزوج "لو انتي حصلت ليك حاجة انا حا أجن عديل كدا" فقالت "يعني ما حتعرس تاني؟" فقال الزوج "طبعا المجنون دة ما معروف بعمل شنو"

الحكومة تقول للشعب "طبعا انتو ما حتغيرونا زي شعوب الربيع العربي الذين ثاروا وماتوا وفي النهاية انتخبوا اسلاميين زينا وكدة" فيقول الشعب "مافي مشكلة" فتقول الحكومة "طبعا حتزيد ليكم البنزين" فيرد الشعب "والله لو زدتو البنزين نحن حانجن عديل كدا والمجنون ما معروف بسوي شنو بعد داك

--------------------------------------------------------------------------------------------------------------------------"
في شارع السجانة مجنون اسمه جيب الله يرقد على الظلط ويعيق المواصلات. يصيح ركاب البص فيه لفتح الطريق فيقول جيب الله بصوت عالي "يا جيب الله الناس ديل ما قالوا ليك زح" ثم ينزل الناس ويجدعوه بعيدا عن الظلط فيقول بصوت عالي "يا جيب الله ما كان اخير ليك تزح براك بدل يجدعوك" وبعد مرور البص يقول "يا جيب الله هسي البص دة كان هرس عضامك" ثم يمشي ويرقد في الظلط بنفس الطريقة الاولى"

عندما اعتصم المناصير قالت ال...حكومة "والله المناصير ديل عندهم حق ظاهر بقرار رئاسي" وبعدما طال الاعتصام قالت الحكومة "اسع في داعي لي شيل الحال دة في الاعلام العالمي الناس ديل حقهم ما واضح" وعندما بدأ استغلال المسألة عالميا قالت الحكومة "الناس ديل حقو ياخدو حقهم بدل ما يجو ناس من برة

يقلعوه ليهم وتبقى زي حكاية دارفور"

تقول الحكومة كل هذا وهي ما زالت "راقدة في الظلط"

جيب الله بتاع السجانة معزور لأنو عندو شهادة من التجاني الماحي فما عذر الحكومة؟

اما بقية الشعب يقول "يا جيب الله ما عذبتنا"جلس المسطول على الشاطئ وهو ينظر الى الموج وفجأة شاهد الموج يسير في الاتجاه العكسي فقال لنفسه "اسع نتكلم يقولوا علينا مسطول ولو سكتنا تقوم مدني تغرق"..
في قضية مستشار العدل شاهد الإعلام الموج وهو ماشي عكس وتوكل على الله وقام بالنشر. ناس العدل عملوا حركة وحظروا النشر. الإعلام لم تعجبه "حركة العدل والمكاواة" فنشر حظر النشر. ثم كسر حظر النشر وهو يقول للعدل "أقول ليك بي أمانة عمليتك ما ظريفة وحركتك جبانة"..
تضامن بقية الإعلام وقام بنشر كسر حظر النشر. شعب السودان الفضل يغني:
عجبوني رجال الإعلام ملصوا البدل والقمصان وكسروا الحظر بالأقلام وعجبوني الليلة جو
ناس الإعلام يا مسرة كسروا الحظر ووقفوا برة وعجبوني الليلة جو.

------------------------------------------------------------------------------------------------------------------
اشترى صديقي عربة وهو يعلم أن مكنتها منتهية وأخذها إلى المكنيكي لعمل عمرة للمكنة. المكنيكي نصحه بأن من الأرخص أن يشتري مكنة من مكان تشليح العربات، وعندما تم تركيب المكنة قال المكنيكي "والله المكنة دي قوية والبودي بتاع العربية دي ما بستحملها" فرجعنا إلى حوش التشليح واشترينا بودي وعدنا به إلى المكنيكي الذي حول فيه المكنة وقبل أن نحتفل بالمسألة وجدت صديقي يقول "طيب لما غيرنا المكنة والبودي يعني أنا زم...ان اشتريت شنو؟".
قلبت الإنقاذ حكومة السيدين ويبدو أن جسم السودان لم يحتمل مكنة حكومة الإنقاذ فخرجت منه "قرمة" كبيرة هي الجنوب. وبعد أن تغير شكل بودي السودان ها هي تغير مكنة الحكومة بعودة أولاد السيدين.
طيب لو نحن غيرنا مكنة السودان والبودي بتاعو تكون الإنقاذ دي زمان قلبت شنو؟
دي بلد عايزة ليها مكنيكي!!!

---------------------------------------------------------------------------------------------------------------

.في فترة سابقة ذهب اخي الاصغر لشراء خروف من السوق وعاد معه الضباح الذي بدأ يمارس عمله في ذبح وسلخ الخروف. لاحظنا ان الرجل فشل في تعليق الخروف في الشجرة واكتشفنا انه قطع العصب الذي يستخدم في تعليق الخروف ثم انه احدث عدة اخرام وقطوعات في الجلد اثناء السلخ. الحاضرون بدأوا في لوم اخي لأنه جاب ليهو ضباح ماسورة فقال لهم "يا جماعة انا لقيت الزول دا في سوق البهايم وعندو سكين وفرار وشوال وقال هو ضباح. عاوزني اطلب منو سيرة ذاتية وشهادة خبرة؟"

المؤتمر الوطني قال ان الاحزاب الني تشاركه في هذه الحكومة خمسطاشر حزب. طبعا مؤهل الحزب انو يكون عندو اسم ومكرفون ورئيس. لا مانع ان يحكمنا كل هذا العدد لكن عليكم الله اتأكدوا الجماعة ديل ما يقطعوا لينا عرقوبنا وما يقدوا الجلد وقت السلخ


------------------------------------------------------------------------------------------------------------------
جاءت عجوز إلى طبيب العيون لإجراء كشف النظر فسألها "يا حاجة الدائرة دي فاتحة على وين؟، فقالت "الدائرة وينا يا ولدي؟"، فقال "الدائرة المرسومة في اللوحة دي"، فقالت "اللوحة وينا يا ولدي؟"، فقال الطبيب "اللوحة المعلقة في الحيطة دي"، فقالت العجوز "والحيطة وينا يا ولدي؟".
سألت عجوزاً عن رأيه في تعيين وزير في إحدى الوزارات، فقال "وزارة شنو يا ولدي؟"، قلت "وزارة في الحكومة الجديدة العريضة"، فقال "الحكومة وينا يا ولدي؟"، قلت "حكومة كل السودان"، فقال "هو السودان ذاتو وينو يا ولدي؟".
قلت يا حاج بالعربي رأيك في الحكومة شنو؟" فقال "يا ولدي نحن لمن نشوف رأس الحصان ما بننتظر لمن نشوف الضنب والضلوف عشان نعرفو وإنتو وروكم رأس الحكومة قبل أسبوع، منتظرين لمن تشوفوا الضلوف؟".


---------------------------------------------------------------------------------------------------------------------------
قالت المرأة لزوجها: والله جارنا دا راجل رومانسي وظريف. تصور يشتري لزوجته هدية كل شهر ويقبلها كل يوم وهو خارج للشغل وأيضاً عندما يعود من العمل وأنا عايزاك تعمل زيو. هنا قال الزوج: والله موضوع هدية كل شهر دي ممكن نباصرا ليها لكن حكاية أبوس جارتنا مرتين في اليوم دي إنتي ما بتزعلي منها؟.
المعارضة تحرض الشعب السوداني للخروج والتظاهر ضد الحكومة وأن ينضم للربيع العربي بالقول: (شايفين الشعب السوري دا شجاع كيف؟ مستمر في التظاهر ضد الحكومة ونحن عايزنكم تعملوا زيهم..
الشعب السوداني استجاب لنداء المعارضة وخرج في مظاهرة تطالب بسقوط (النظام السوري).

صديقي قال إن أمه أخبرته أنها كانت تريد إجهاضه حين كان في بطنها بأن تبلع حبوب الملاريا "الكينا" ولكنها عدلت عن رأيها. صديقي استغل الموقف فكل ما أراد شيئا ذكرها بالحكاية فتستجيب له وهي تبكي. الإمام الصادق خشي أن يوصف ولده بالحنكشة فقال إنه فارس وإنه زرع الألغام في كل الخرطوم وكان عاوز يفجرها لو لا تدخل الإمام لإقناعه. طبعا ما مهم يموت كم زول فهذا شأن عائلي بين الإمام وولده والبلد بلدهم وكدة.. نقترح ...أن يستعمل أهل الخرطوم مع مساعد الرئيس الفارس نفس أسلوب صديقي مع أمه بأن يقول: أنا من ناس الخرطوم الكنتو دايرين تنسفوهم ثم يطلب ما يريد عسى ولعل!.. الإنقاذ لم تعد تحتكر إنقاذ الناس فقد أنقذ الصادق تلت الشعب بكلمة لي ولده. لسان حاله يقول أنقذت تلت الشعب مين ينقذ التلتين؟ شيء عجيب في غرامك.. من قال إن الإمام ليس له إنجاز، من زمان قالوا ليكم ده دخري الحوبة.

-----------------------------------------------------------------------------------------------------------------------------

في إحدى احتفالات مايو كانت البلابل تغني "تسلم يا يا أب عاج أخوي" في حضور النميري وبعض ضيوفه من الرؤساء الأفارقة "من الناطقين بغير العربية" أشار النميري لمسؤول المراسم قائلاً "قول للجماعة ديل أب عاج ده أنا". نشرت في كلامات في صحيفة (الأسبوع) في العام ستة وثمانين من القرن الفائت أن مجموعة من السودانيين ناموا لفترة طويلة وعندما صحوا من النوم اشتروا جريدة فوجدوا عنوانها يقول المهدي والميرغني يضعان الل...مسات الأخيرة للحكومة الإئتلافية فقالوا لبعضهم "والله ما نمنا كتير" ولكن عندما قرأوا تفاصيل الخبر وجدوه يقول اتفق السيد عبدالرحمن الصديق عبدالرحمن الصادق المهدي مع السيد سر الختم عثمان محمد الميرغني على وضع اللمسات الأخيرة للحكومة الائتلافية وعندما نظروا لتاريخ الجريدة وجدوا أنهم ناموا ثلاثمائة وعشر سنوات. بعد تعيين أبناء السيدين في القصر قرأت عدة مقالات تستشهد بهذه القصة بدون معرفة المصدر. مناسبة الإعادة عاوزين نقول للإخوة عاصم البلال وأحمد البلال الطيب شكراً على تذكير الجماعة كلهم بأن النبؤة ماشة كويس وأن صاحب الرواية "ده أنا"


-------------------------------------------------------------------------------------------------------------------------

رأس الدولة في بريطانيا يسمى الملكة وفي امريكا يسمى الرئيس وفي قطر يسمى الأمير وفي اليابان يسمى الامبراطور وفي النمسا يسمى المستشار. في السودان يسمى المواليد على اقربائهم الذين ماتوا حديثا. بعد أن فقد السودان جنوبه كنت اود اقتراح أن نتمسك برمزية الوحدة ونسمي رئاسة الدولة بإحدى مدن الجنوب وجات في رأسي مدينة "ياي" المشكلة الوحيدة انو المساعدين الذين تم تعيينهم سوف يصبح اسمهم "مساعد ياي". ضم كشف المساعدين ود المرغني وود المهدي، وكنا دايرين ود سلفاب وود بهاي وود الفادني وود الترابي "القرية وليس الشيخ". بعد هذه التشكيلة إذا حدث خلاف في مؤسسة الرئاسة نقترح على الرئيس أن يطلب من كل مساعد "يجيب ولي أمرو"!. ·


------------------------------------------------------------------------------------------------------------------------

مغترب سوداني توفى بالمهجر فقام افراد اسرته بأبلاغ بغية الاهل بالخبر عند منتصف الليل ولكن الاهل بالسودان قرروا ان يؤجلوا فتح البكاء الي اليوم التالي تفاديا لأرهاق الناس بالليل لكن تلفونات المغتربين اشتغلت مع السودان وعرف كل اهل الحي بالخبر وظلت كل امرأة مصنقرة وتوبا جمبها في انتظار سماع البكاء. وعندما جاء وقت صلاة الصبح ذهبت احدى الجارات وطرقت الباب قائلة لأهل البكاء "يا نسوان افتحن البكاء دة خلونا نبكي معاكن ونمشي نشوف لينا شغلة" انشغلت الساحة الاعلامية والسياسية لاربعة اشهر بتكهنات التشكيل الوزاري ويبدو ان القيادة اثرت التمهل حتى الان لحكمة تراها رجاء: اعلنوا الحكومة خلو الناس دي تبكي وتمشي تشوف ليها شغلة



-------------------------------------------------------------------------------------------------------------------------


اكل الرجل في المطعم مالذ وطاب له ثم نادى صاحب المطعم وقال له "تتذكر انا اكلت في المطعم دا قبل كدا ولم ادفع الفاتورة فناديت انت على الحراس فضربوني ورموني خارج المطعم" هنا اعتذر له صاحب المطعم عن هذا السلوك فقال الرجل لا داعي للاعتذار لأنو اسع برضو ما عندي قروش الوطني يقول للشعب تتذكر الحكومة الفاتت التي فصلت الجنوب ورفعت الاسعار وقال فيها المراجع العام كلام بايخ وانتو با ناس اتهمتوها بالفساد وقلتو عايزين تمرقوا الشارع تسقطوها وهنا يقول الشعب والله كانت زهجة وحراق روح نعتذر عنه فيقول الوطني لا داعي للاعتذار لأنو الجماعة ديل جاينكم تاني في الحكومة )


----------------------------------------------------------------------------------------------------------------------

في علوم الطب يتم أخذ التاريخ المرضي، ثم الكشف على المريض، ثم الفحص ثم العلاج إلا في حالة حبس البول إذ يبدأ الموضوع بتفريغ البول أولاً. شكا رجل لصديقه البيطري من حبس في البول فقام البيطري بتركيب حلابة اللبن لشفط البول بنجاح وعندما حاول فكها لم يستطع وعندما قرأ التعليمات وجد أنها مبرمجة آلياً للفكاك بعد شفط مائة لتر. بالأمس أعلنت الحكومة قفل أنبوب النفط في وجه التصدير لبترول الجنوب مع السماح بمرور بترول الشركات. أرجو أن يكون المسؤولون قد قرأوا جيداً تعليمات تشغيل الخط حتى لا ننتهي بالجنوب حابس بترول ونحن حابسين بول. أحد المرضى كان يرقد بالمستشفى في حالة متأخرة وكل ما كتب الدكتور له دواء رفض أهله إحضاره قائلين للدكتور: أديهو جلكوز. وعندما تكررت مطالبات الأهل رضخ الطبيب قائلا: أنا بديهو الجلكوز لكن لازم انتو بعد داك تجيبو الدواء. ومع أول نقاط درب الجلكوز توفي المريض ولكن أهله لم يحزنوا، وقالوا للطبيب: "والله زولنا دا كان داير ليهو حبة جلكوز تديهو مروة يدفر بيها الروح لي برة". كثير من أحزاب المعارضة تعتقد أن نظام الإنقاذ يحتضر ولذلك ترفض أن تقدم له دواء المشاركة ولكن يبدو أن حزب الأمة يؤمن بنظرية الجلكوز؛ لذلك قرر أن يشارك بي حبة مستشار عشان يدي النظام شوية مروة يدفر بيها الروح لي برة.

-------------------------------------------------------------------------------------------------------------------------



كلنا نعرف قصة حارس مخزن السكر الذي زاره المراجعون فوجدوا المخزن فارغاً ولما سألوه اين ذهب السكر؟ قال إن "الجان" كانوا طول الليل طالعين نازلين ينقلوا في السكر حتى فرغوا المخزن. تقرير المراجع العام رصد اكثر من سبعة مليارات خرجت من بنك السودان ولم تدخل حسابات المالية ومليارات مثلها في هيئة الحج والعمرة واخرى في الزكاة . المراجع المسكين يفتري على الحكومة ويسمى هذه تجاوزات وهو معزور لأنه يراجع المعاملات البشرية وما عارف انو "الجان المسلم" ممكن يعمل جسر جوي في اي لحظة وعليه لمن نجمع حسابات البشر والجان يطلع "حساب مظبوط". في الحكومة العريضة يسهل اقتسام مقاعد الظاهر مثل الوزراء والمستشارين والمساعدين لكن يبدو أن كل حزب عاوز يدخل ليه "شوية شواطين" في مناصب "لم تروها


---------------------------------------------------------------------------------------------------------------------

.طلق رجل زوجته بعد خلافات وملاسنات ورفضت هي العودة اليه لو بقى اخر راجل في الدنيا. وفي احدى الامسيات بعد ان صلى الرجل العشاء اخد يدعو قائلا "يا سيدي الحسن تجيب لي مرا تسوي لي العشاء اليلة دي". المطلقة التي كانت تمر قرب المنزل دفرت الباب ودخلت على الراجل وهي تقول "يا سيدي الحسن بتدفر فيني مالك" صحف الاسابيع الفائتة حافلة يرفض قادة الاتحادي للمشاركة في الحكومة "مهما كان الثمن" ويبدو ان الوطني بعد ما يئس من التفاوض قال "يا سيدي الحسن تجيب لي حزب يشاركني في الحكومة" ويبدو ان سيدي الحسن دفر ليهو ثلاثة وزراء اتحاديين واثنين وزراء دولة. سيدي الرئيس نحن ندعو سيدي الحسن ان يدفر ليهو وزيرين تاني لأن الاتحادي يستحق اكثر مما هو معروض يجوا عايدين انشاءالله مدفورين يا الله



------------------------------------------------------------------------------------------------------------------

احد العزابه كان عندو نص كيلو لحمه و عندما ذهب للشغل اكل زملاؤه اللحمه و لما عاد ليسأل عنها قالوا ليهو اكلا الكديس. قبض العزابي علي الكديس و وزنه فوجد انه يساوي نص كيلو فقال باستغراب طيب دي اللحمه الكديس وينو؟ طالبنا منذ فترة بوزن المسؤلين يوم التعيين و يوم الاعفاء علي ان يتزامن ذلك مع اقرار بالثروة يوم التعيين و الاعفاء شرط ان يدفع المسؤل فرق الوزن لخزينة الدولة و توقعت في جلسة الوزراء الاخيرة ان يحدد الرئيس سعر كيلو الوزير و كيلو وزير الدولة و الوكيل و كيلو الوالي و كيلو العجالي عند وزن بعض الوزراء و حساب فرق الثروة نخشى ان نجد الحسابات تقول اها دي قروشنا طيب الوزير وينو؟




-----------------------------------------------------------------------------------------------------------------------------
في اواخر عهد مايو طلعت موضة مشاورة فئات الشعب في الاتحاد الاشتراكي وفي واحد من الاجتماعات جمعو ا سائقي عربات الكارو في قاعة انيقة وخاطبهم قادة مايو بحديث لم يفهموه ثم طلبوا منهم ابداء ارائهم. بعد صمت طويل تحدث احد سائقي الكارو قائلا "والله حكومة كايسة الراي عند العربجية الترابة دي في خشما. اذا كانت الانتخابات الاخيرة حرة ونزيهة فقد نال المؤتمر الوطني تفويضا كاسحا لحكم السودان الفضل دون ان يحتاج لاي تحالف. ان سعي الوطني لاشراك احزاب اخرى يدل ان المؤتمر الوطني يشك في نفسو او في الانتخابات واذا كان اشراك الوطني لهذه الاحزاب طلبا للراي عندها يكون الترابة دي في خشمو



-------------------------------------------------------------------------------------------------------------------------

في سوق الناقة وقندهار يأكل الناس كل اصناف الطعام حتى اذا اصيب الواحد بالتخمة يقول ان بطنه كتمت فيلجأ الى خلطة مشروب مكون من الزبادي وشامبيون وسفن اب. ويقال ان هذا المشروب يهضم الاكل او يسبب الاسهال فينظف البطن. وقد اصطلح الناس بتسمية هذه الخلطة السحرية "كتمت" في الشهور الاخيرة حدث احتقال شديد في المستوى السياسي لدرجة ان الحكاية كتمت ولذلك لجأ المؤتمر الوطني لتوليفة وخلطة من مجموع من الاحزاب ليتناولها فأما ساعدته على هضم ما اكل او عملت ليه "نظافة" في بطنو الحكومة الجديدة هي حكومة "كتمت" ولأن الوقاية خير من العلاج فأننا نوصي "بترشيد الاكل"


------------------------------------------------------------------------------------------------------------------------

دخل رجل الى الكافتيريا وطلب كوب العصير, فقال صاحب المحل ان كباية العصير تكلف اربعة جنيهات اذا كان عاوز يشربها في المحل وهو جالس علي تربيزة وكراسي ولكن التكلفة تنخفض الى اثنين جنيه اذا كان يريد ان يشرب واقفا امام الكاونتر. هنا رد الرجل قائلا "هاك جنيه واحد وحا اشربها وانا واقف بي كراع واحدة" ارتفعت اسعار كل السلع والعملات الصعبة وتوقع المواطن ان تقوم الحكومة بزيادة الاجور لمقابلة الزيادة او ان تدعم بعض السلع الضرورية للفقراء. الحكومة لم تفعل هذا ولا ذاك مما يجعلني اعتقد ان الحكومة دايرة توقف البلد كلها على "كراع واحدة"


--------------------------------------------------------------------------------------------------------------------------

المرأة التي تتأخر في الولادة تدعو الله ثم تدعو الشيخ ان يديها "الجنا" وفي حالة تمكنها من الولادة يسمى المولود "جنا نديهة" وعند حلاقة شعره تترك حزمة من الوسط تسمى "قنبور" ويكون الطفل تحت العناية والرعاية من الابوين حتى ان احد هولاء الاطفال حاول ان يضرب اخته لكنها زاغت منه فنهرها الاب قائلا "يا بت ما تزوغي من الولد "تملخي ليهو يدو"" ولدنا اوباما له سجل خالي من اي نجاح ولذلك تبنى انفصال السودان كواحد من انجازاته واصبح الجيش الشعبي عنده مثل "جنا النديهة" واعتقد ضمن آخرين ان هناك قنبور تحت الكسكته الشهيرة. تحركات الامريكان الاخيرة تريد من السودان الشمالي ان "يقيف ساي" للجيش الشعبي وينضرب ومzا يزوغ منو عشان "ما يملخ ايدو"



------------------------------------------------------------------------------------------------------------------

سألت المرأة صديقتها عن طقم الذهب الجديد الذي تلبسه قائلة "الطقم الجمبل دة كلفك كم؟" فردت الاخرى كلفني قبلة من زوجي. فقالت المرأة والله راجلك دا ظريف يشتري ليك ذهب ويقبلك فردت الاخرى كلامك صح لكن القبلة كانت مع السكرتيرة بتاعتو. عند غزو العراق للكويت فسر موقف الانقاذ بأنه مناصر للعراق ودفعت الانقاذ ثمنا عاليا حتى يرضى عنها المحيط الاقليمي وقبل اسابيع كان اقتصاد السودان يحتاج لدعم من دول غنية لكن الحكومة آثرت ان تستقبل احمدي نجاد مما اثار حفيظة الداعمين المتوقعين. اشواق الانقاذ مع دول الممانعة ورفض الهيمنة ولكن مصالحها مع اخرين ولذلك فهي تدفع الثمن غاليا. واذا ارادت الانقاذ دعم الجماعة فعليها ان تتوقف عن "بوس" السكرتيرات حتى لا تزعل "اهل البيت"


---------------------------------------------------------------------------------------------------------------------------

عاد ياسر الصغير من المدرسة واخبر والده بأن المدرس قد جلده اليوم رغم انه لم يرتكب اي خطأ. غضب الوالد واعلن انه سيذهم الى المدرسة غدا ليشتكي الاستاذ ثم سأله "انت جلدوك كم جلدة؟" فقال ياسر في براءة "يا ابوي انا ابكي والله اعد؟" عندما بدأ ارتفاع الاسعار هذه المرة كان كل شخص يحدثك عن الفرق في اسعار السلع وكيف انها في تصاعد مستمر لكن في الايام الاخيرة توقف الناس عن حساب الاسعار والمقارنات. عليه اما ان تكون الاسعار اصبحت مقبولة وفي متناول الجميع او ان شعب السودان زي ياسر ما عارف "يبكي والله يعد"

ياجماعة كمال الشين دة مش كان وكيل وزارة الحة فى عهد الانقاذ والمؤتمرجية ........والا دة واحد تانى ؟؟؟؟؟

نعم فهو الدكتور الانسان الرائع المثقف كمال عبدالقادر النزيه والذى كان فى فترته يحلم بانجازات للصحة بالسودان والحصاحيصا خصوصا وقد تحققت بعض انجازاته الملموسة بالحصاحيصا فاهى المراكز الصحية تقف شامخة واكاديمية العلوم الصحية ومركز غسيل الكلى وووووووو فلهو التحية والتكريم

ود جبارة كتب:

نعم فهو الدكتور الانسان الرائع المثقف كمال عبدالقادر النزيه والذى كان فى فترته يحلم بانجازات للصحة بالسودان والحصاحيصا خصوصا وقد تحققت بعض انجازاته الملموسة بالحصاحيصا فاهى المراكز الصحية تقف شامخة واكاديمية العلوم الصحية ومركز غسيل الكلى وووووووو فلهو التحية والتكريم

مشكور ود جباره علي الحديث الطيب عن قامه من قامات الحصاحيصا وكنت اريد ان ارد علي الاخت ام راما ولكن سبقتني ولك الشكر مره اخري

واريد ان اؤكد لها بان هذا المنصب تنفيذى وليس سياسى اى بحكم مهنته وليس لطائقة او حزب او جهوية فخير لهذا الرائع التنحى والبعد عن الوزارة حتى يستفيد الوطن من مهنته خاصة وانه من اميز الاخصائين فى السودان لان العمل فى وزارة مثل الصحة تاخذ منه كل وقته وازكر مرة ونحن داخل مستشفى الحصاحيصا ليلا اذ ارى الدكتور ورغم قلة الزمن الذى يقضيه مع اسرته يتفقد احوال المرضى والمستشفى فهذا لا يعمله الا الرائعون

ام راما كتب:

ياجماعة كمال الشين دة مش كان وكيل وزارة الحة فى عهد الانقاذ والمؤتمرجية ........والا دة واحد تانى ؟؟؟؟؟

صدقي ياهو زاتو دكتور كمال عبد الفادر احمد بابكر السكن الحي الشرقي
القب الشين
اخصائي نساء وولاده من نحنا اطفال واسس اول مركز لاطفال الانابيب في السودان علي تفقته الخاصه واجري كتير من العمليات لي ناس في الحصاحيصا مجانا وانا اعرفهم شخصيا وفي واحده في الحي الشرقي عملت اطفال انابيب تاتي يومبا الي حاجه السنه والدت كمال دي والحاجات دي كانت فبل ما
كان وكيل وزارة الصحه في عهد الموتمرجيه
بعدين دكتور كمال دي كان بكتب كلامات ايام زمن الصحافه الحره في صحيفة الايام يعني قبل الانفاذ
وانسان بكتب بي هذه الطريقه وهو حر الان اكيد انه انسان محترم عكس الوين يتخبون خلف القطبان
وانه عنده راي في الحاصل الان
وبعدين هو لو كان غير هذه الاخلاق لاصبح وزير للصحه
لان استقامته هي التي جعلت ناس الانقاذ ياتو اليه
وهو الزي في عهده شيدت لاول مره اجنحه خاصه في المستشفيات الحكوميه ووجود الاخصائيين في اي مستشفي في قريه
ولك الشكر علي امل ان يكون ياهو دي دكتور كمال.

يا مهدى ناس الحصاحيصا بيعرفو ناس الشين كلهم ما شاء الله نعم الاخلاق

احمد ترب كتب:

يا مهدى ناس الحصاحيصا بيعرفو ناس الشين كلهم ما شاء الله نعم الاخلاق

اديك العافيه يا كابتن احمد وياحليل زمن الانديه والكوره الحلوه
والله كل مافي الموضوع انه الناس بتخلط مابين الصالح والطالح والمشكله انه الواحد عارف دي منو وبرضوا بحاول اعمل فيها ماعارف وهوعارف قولتيه يا كابتن
جزاك الله عن اسرتنا كل خير.

الاخ مهدي لك التحيه
طبعا الدكتور علم بارز من اعلام السودان لا الحصاحيصا فحسب ونعلم تمام العلم بنزاهته ومعدنه الاصيل الذي لم ولن يتدنس
اما عن مواقفة في الحصاحيصا فهو اولي من غيره بها وربنا يعينه عليها.........
واجل ما نشكره عليه هو الاكاديمية الا اننا نرجو منه التدخل لحل مشكلة الرسوم الدراسية التي اصبحت معضله امام الطلاب .................
وهو اهل لذلك
فله ولك التحية
ويا ام راما هو لانو ما بشبهم شالو او شال نفسو ما فارقة المهم انو فارقهم

الدكتور كمال عيد القادر لة التحية والتقدير 0 هذة روحة الطيبة الجميلة مما عرفناة ولا يحتاج لتعريف من اهلنا صغيرااو كبيروهذاهو كمال عبدالقادر الرجل الذى لا يشبة الاخرين لة التحية والتقدير

يا جماعة شنو عملتو من الحبة قبة ...انا سالت مجرد سؤال دة ود الشين والا الاسم مطابق ؟؟...عملتو منها هيلمانة وقصة ونسيتو البوست وكلامو؟؟؟؟انا يا اخ مهدى بت حاج التوم من اهالى ومواطنى الحصاحيصا ...يعنى مانزلنى قطر ولا جابتنى المصالح ...اعى تماما من هو اى فرد فى الحصاحيصا ؟؟؟اقصد ابناء المدينة ....
يعنى مااسأت لزول ولا اتكلمت عن احد بسؤ .واتخيل لى مافى زول دخل جوة قلبى وعرف الحاصل عندى ...وكمان المتداخلييين احتمال كبير مابعرفونى انا منو ناهيك عن العقلية البفكر بيها....
ولو عايزين ارد عليكم بمثل ما رديتوة ممكن ....بس سيبو الانصرافية وخليكم ناس لحظة .....
ولى عودة

ام راما كتب:

يا جماعة شنو عملتو من الحبة قبة ...انا سالت مجرد سؤال دة ود الشين والا الاسم مطابق ؟؟...عملتو منها هيلمانة وقصة ونسيتو البوست وكلامو؟؟؟؟انا يا اخ مهدى بت حاج التوم من اهالى ومواطنى الحصاحيصا ...يعنى مانزلنى قطر ولا جابتنى المصالح ...اعى تماما من هو اى فرد فى الحصاحيصا ؟؟؟اقصد ابناء المدينة ....
يعنى مااسأت لزول ولا اتكلمت عن احد بسؤ .واتخيل لى مافى زول دخل جوة قلبى وعرف الحاصل عندى ...وكمان المتداخلييين احتمال كبير مابعرفونى انا منو ناهيك عن العقلية البفكر بيها....
ولو عايزين ارد عليكم بمثل ما رديتوة ممكن ....بس سيبو الانصرافية وخليكم ناس لحظة .....
ولى عودة

لكي العتبي حتي ترضي واسفين انه عملنا من الحبه قبه فانت مننا وعلينا ولكي منا كل التحايا الطيبه
والله ارحم عزيزنا الغالي المحترم دوما اخونا استاذ الحاج سالم وتحياتي لكل الاسره بدون فرز.