وإنت من وين آآللخو في الحصاحيصا ؟؟ شفتو جنس المحن دي ؟؟

في أيام التسجيل للكلية "مافي داعي لذكر الأعوام"
الولد "مشنط" وسط مجموعة من الطلبة والطالبات الجدد
وكان يطلق عليـهم في ذلك المضمار الأكاديمي "البرالمة"
التسجيل "في كلية القانون" ذاتو كان قصة طويلة وجميلة
المهم الحمد لله أتممنا عملية التسجيل على أحسن ما يكون
ولما كان هناك متسع من الوقت إقترحت إحداهن نشرب شاي
وبالفعل ذهبنا للكافتيريا "الزير هاوس" نظام مختلط وكدة
بصراحة كنت حذر جداً في الكلام بحكم المكون "الكلامي الساي"
وكنت حينـها "مأزوم" بسبب مغادرتي للأجواء الكانت عندنا
وبـهمنا بشكل خاص "أجواء دار الرياضة" ومناوشات ناس التانية
فقد كانت لدي خصومة شديدة مع ناس العامل على وجه التحديد
وإمكن دا بسبب العلاقة الوطيدة البتجمعنا بناس الكمبو "المحالج"
لدرجة إني كنت أناوش "أبكوع" حتى لو الماتش بين النجمة والاتحاد
وقد كان "أبكوع" لا يقبل كلمة واحدة في حق العامل وبرد الصاع إتنين
ولم أتخيل أن يتبعني ناس العامل حتى الكلية وأمام الطالبات والطلبة
وقفنا مجموعة كبيرة في "الزير هاوس" في إنتظار الشاي "المدنكل"
وقبل ما يجي الشاي "شب" واحد من الطلاب "مدني" وقال نتعارف
يلا كلو زول بقى يقدم نفسو بالاسم والموطن الجائي منو "شفتو كيف؟"
جا دوري وقلت الاسم وألحقتو بأنني من الحصاحيصا "دي فيـها حاجة؟؟
ومن وسط المجموعة "شب" لي زول وسألني سؤال وهو يتبسم يعاين لي
"من وين إنت آآلخو في الحصاحيصا ؟؟؟؟؟ "
وكانت إجابتي "من قرية قريبة من الحصاحيصا"
وقبل أن يسهب في الأسئلة توجهت إليه وبالأحضان
إنه صديقي وزميلي "اللدود" النابه محمد عبد الله خيري
ومن الربكة سألتو عن سبب حضوره إلى "هنا"
أجابني "رسلني أبكوع قال لي أمش وراهو"
"شوفو بقول للطلبة جائي من وين !!"

شكيت محنك علي الله
يا المحبوب تحمد ربك خشيت الجامعة بعد تغيير اسم القرية الي الصداقة
اسي كان كنت من زمن الاسم القديم داك ،، قدام ( الجكسي ) كنت قلت من ابوفروع
واصل ياحبو

ياورقة دا ما السبب الخلاني أربعة سنوات أشجع في العامل "في الاجازات غصباً عني"
والسبب لاعب العامل الذي يعمل الآن مستشاراً قانونياً بالرياض
والتحية لصديقي محمد عبد الله خيري ولأشقائه وشقيقاته في الحصاحيصا والحاج يوسف والسعودية

ونواصل ونشوف قصة اللوري ولكشر السفن اي ام

الساعة السابعة صباحاً من كل سبت هو زمن بداية المحاضرات
ولأن المسافة ما "طالت" شديد فالغلبة كانت لقوانين العقود
سمعت بخبر زواج أحد أقربائي في نـهاية اسبوع "خميس وجمعة"
عقدت العزم على حضور العقد والعزومة دون التضحية بالعقود
يوم الخميس كنت في "الحلة" على أمل أن أغادر عصر الجمعة
سيف الرضي الملعون أقنعني بضرورة حضور حفلة الجمعة الهامة
قلت ليهو ياسيف "أنا بعدا بدسمسوني وإنت بتكون السبب"
قال لي "يدسمسوك ولا يسمموك لو فاتتك تكون جيتك خسارة" وأضاف
"دي الحفلة البتكون محضورة والناس كلـها بتجي تشوف وقفة العروس"
وافقت "بس مش على مضض" وقررت أن أغادر بعد نـهاية الحفلة
وبالفعل حضرت الحفلة وعند الثالثة صباحاً توجهت لشارع "الظلط"
والبصات لا حس لا خبر وفي النـهاية أشرت للوري "شحنة موز"
والسواق طلع زول ظريف وأهو في النـهاية وقف اللوري
عشان ألحقو وما أفوت الفرصة جريت قربت لأبوفروع "محل اللوري وقف"
وجلست بين السواق والمساعد الذي كان برفقة السواق حينـها
وكل ما نمشي مسافة السواق يصحيني إتقاء همس الشخير "سهر تلاتة أيام"
في المسيد أخدنا "سندة" وقال لي "أول مرة أشوف لي زول بشخر علي حيلو"
وأضاف قال لي " بي شخيرك دا كان تقرأ طب أهو تنفع وتستنفع"
تحملت "سخريته" وقلت بي قلبي "لو مشيت أرد ليهو ياهو الحايخلص مني"
وبيني وبينكم قلت أحسن أوفر حق المشوار خليهو يقول العايزو ما أتلامض معاهو ساي
والراجل طلع "وناس" ومن ظرفاء سنجة وكان معلم ثانوي عالي
ولمن بقينا على مشارف الخرطوم "جهة بتري" على ما أذكر لقينا "تفتيش"
والسواق إستغرب لأنو التفتيش الرسمي في او بالقرب من سوبا !!
نزل السواق وشال معاهو ورق كتير وإيصالات "معفصة" والرخصة و"الملكية"
دار نقاش وناس التفتيش أصروا يحجزوا اللوري وما كان في سبب
السواق قال ليـهم "مافي أي مشكلة وأعلى ما في خيلكم تركبوهو"
وأنا راكب قدام ومرة مرة أتاوق أشوف الحاصل شنو المحاضرات قربت
جا السواق ومرق اللوري بعيد من الشارع وقال لي بزهجو بفكونا
وكلمة من دا وكلمة من هنا روحت في نومة عميقة صحيت منـها تمانية ونص
قلت للسواق مالك ما صحيتني ياخي بالغت فوتا علي المحاضرات
قال لي " أنا بالغت وإنت شخرت ......
...........والله لو لحقتـك ليها كان نمت في المحاضرة وياهن الرافدنك"
وكلو من سيف الرضي خرب علاقتي بناس العامل "كسروا كراعو في مباراة بين ناصر والعامل "
وفوت علي المحاضرات ولمن وصلت "البركس" كانت الساعة واحدة بتوقيت "السفرة"

إتغديت في السفرة وراحت السكرة وجات الفكرة
وشنطة غياراتي "قابعة" في لوري الموز نسياً منسيا
أتاري لمن قنعت من خيراً في اللوري "ترجلت"
ووقفت في الشارع تاني أأشر للعربيات المتجهة شمالاً
"قدام معاك يابن العم .........الخرطوم الخرطوم ..الخرطوووووو .." وبدون فائدة
وللإستعجل وإنشغال السواق بفك أسر اللوري وقفت لي عربية وركبت
وخليت شنطتي في محلها في اللوري المحجوز في جهة بتري ولا الباقير ما عارف
وحمدت الله كثيراً بأن "السويتر" "الشدة" كنت لابسو
وإلا أحمد شرف الدين ابن عطبرة البار "صاحب السويتر" كان كشف حالي
الساعة الرابعة عصراً إنطلقنا في فوج البحث عن اللوري لإسترداد الشنطة

كدي يا المحبوب قبال تفتش الشنطة احكي لينا عن الحفلة وجكس الصداقة وشكل الغناء والفنان منو وصحي البنات كانوا قاعدات في السياتة ومدينكم عرض اكتافهن؟؟ وخير السيد فنان ابوعشر البجي يغني لابس بالطو السواري بتاع السقط كان محتكرنوا في حفلات الصداقة ( بتذكروا كان بغني و ببصق ) التقول متوحم علي ( رمضان) ..طبعا مافي زول بجي الحفلة لابس بنطلون الحفلة كلها جلابيب ومتكمكمين بالشالات والعمم بدون طواقي والواحد شايل معاهو عكاز وبسطونة لزوم العرضة والمسافة بين الحصاحيصا والخرطوم بص النجدة بقطعا في 45 دقيقة وجوز الحمام 3 فرد والويست كوتشينتو من البوسنايت
والله شنو يا حبو ؟؟

اجازي محنك ياحبة والله قطعت مصاريني من الضحك وما عارف
نفسي قاعد اضحك ولا ابكي ... يا خي رجعتنا لي ايام حلوة
شديد....
سؤال برئ جدا
تحن الحفلة دي ما كان فيها ناس من ( التميد ) ؟؟

ياورقة ياخي إنت قائل الكلام في عشرينات القرن الماضي ولا شنو ؟؟
ياخي خير السيد دا كان على لسان الكبار والصغار والبعرس وما بجيب خير السيد بيعتبر مقصر
وما كان بنضوق للدنيا متعة وأي فنان غيرو "نملو" ياخي لمن يغني "السكر نقع" ولا "البعبدا" تلقى الدنيا فارت وإتدفقت طربا
والبداية دائماً "اف اف اف تيست ون تيست ون "
وطوالي يخش ليك في أغنية البداية الثابتة

"فريع البان اليسوح نديان منو ياسلام
بالسمح والزين زولي فائت النِد
مقدمك راجيك من تمانين جِد
لون جليدا حرير دا الفصل ما بِهِد
والعجب سبعين كان تفك الحد

منو ياسلام

قلت أشرب راح عل قلبي إرتاح
لا طبيب جراح
لاجاب شفا لا راح
منو ياسلام "نسمعا بصوت محدثين"

صديق الرضي مالك دائر تجيب لينا "الهوا" ؟؟
الأيام ديك كانت حلوة والكلام عنها يطول خاصة واحد وسبعين
وربما لا يتسع "المجال" وخليها في سرك عشان البوست ينتهي على خير

» فتح ملفات السرقات الرئاسية وجمال مبارك لقوه ناس نيويورك تايمز منشر في لندن وقبرص وسويسرا والقاهرة شفتو جنس المحن دي ؟؟
» أنا مديون ! أها وإنت ؟ أنا الفيلا الفي الستين أدتني ليها فتحية بت أم الحسن هدية ..
» معركة بالأحذية والكراسي داخل الاستديو وعلى الهواء مباشرة "شفتو كيف ؟؟"
» بالله شفتو يوم امس ده كان كيف ؟
» جانا العيد وإنت بعيد