قطر كريمي .. الملان لاعينو ديمي

تَعَوَد الوالد والوالدة في إجازة المدارس أن نسافر معهم إلى الشمالية " نندلى البلد"، كما يحلوا لهم أن يسموا هذه الرحلة، والتي يعتبرونها نوع من التواصل وربط الأبناء بأرض الأجداد وذلك باعتبار أنهم في غربة كون أنهم غادروا مسقط راسهم قنتي واستقروا في الحصاحيصا .
تبدأ الرحلة من الحصاحيصا وبالتحديد من محطة السكة حديد ، وتكون تكلفة السفر كلها على مشروع الجزيرة حيث كان يعمل الوالد، ورغم أنه كان يعمل في وظيفة عامل وليس موظف كبير في مشروع الجزيرة ، إلا أن إدارة مشروع الجزيرة كانت تتكفل بتكلفة السفر ذهاب وعودة إلى موطنه الأصلي.
نركب قطار المحلي من محطة الحصاحيصا مساء يوم السبت ، ونصل محطة سكة حديد الخرطوم عموم " موقف جاكسون " مساء السبت ونبيت ليلتنا في نفس محطة، حيث يوجد عنبر كبير مخصص للركاب ليفترشوا الأرض فيه حتى الصبح.
وفي صبيحة يوم الأحد يتحرك قطر كريمة من محطة الخرطوم عموم في تمام الساعة الثامنة صباحاً بالضبط دون تأخير أو تقديم، ويتدافع الركاب نحو عربات القطار والتي تتكون من درجات مختلفة تبدأ من درجة النوم ثم الأولى والثانية والثالثة وأخيراً الدرجة الرابعة، وحسب التصاريح الممنوحة للوالد فقد تم الحجز لنا في الدرجة الثالثة وهذه الدرجة آخر الدرجات التي تتكون من غرف منفصلة، ونصعد القطار ونبحث عن الغرفة المحجوزة لنا باسم الوالد، ونبدأ في نقل العفش الذي يخصنا ونبأ في الاستقرار داخل الغرفة الخاصة بنا، ويتحرك القطار كما ذكرت في تمام الساعة الثامنة صباحاً من يوم الأحد حتى نصل إلى شندي حيث الفراد ومنها إلى عطبرة وتمتاز هذه المحطة بالجمال والنظام والترتيب الرائع وعلى ما أذكر نصلها قبل المغرب وفي هذه المحطة يتم تغيير رأس القطار من الديزل إلى قاطرة البخار ونصل إلى أبو حمد عند آذان الصبح في اليوم التالي ويمتاز سوق أبو حمد بأنه يقع في منطقة منخفضة ومحطة القطار تكاد تكون في ربوة عالية، وينحدر القطار نحو كريمي ونمر بالكاسنجر ومن بعدها تبدأ معالم كريمة في الظهور وأولها جبل البركل الذي يظهر من مسافة بعيدة ونصل إلى محطة كريمة في منتصف نهار يوم الإثنين، ونتجول في سوق المدينة وتمتاز كريمة في ذلك الزمن بوجود مصنع تعليب البلح حيث كانوا يتفننون في إنتاج أنواع البلح حيث كانت هنالك أنواع محشوة بالفستق والبعض الآخر مغطي بجوز الهند ومغلف بطريقة رائعة تضاهي أحدث مصانع تعليب التمور حالياً في الخليج.
ننتظر في كريمة حتى مساء الإثنين لنستغل الباخرة " بابور البحر " كما يحلوا لأهلنا في الشمال من تسميتها، وأيضاً نجد نفس الحجز في الباخرة باسم الوالد كما حدث في القطار، وبابور البحر هذه اسمها الجلاء ولكن الناس هناك يسموها الجلا، وهناك من بوابير البحر التي تعمل في نقل الركاب بين كريمة ودنقلا بالإضافة إلى الجلا توجد كربكان والزهرة ولكن من أكثر بوابير البحر ورد اسمها في شعر شعراء الشايقية هي الجلا لأنها تأخذ محبوبات الشعراء بعيد عنهم إلى الصعيد.
تتحرك الجلا مساء الاثنين من مرفأ كريمة لتبيت في مرفأ مروي في الضفة الغربية للنيل وعند فجر الثلاثاء تتحرك الجلا لتمخر النيل المحاط بأشجار النخيل وإنه منظر جميل لايمكن للعين أن تغفل جماله، إلى أن نصل إلى وجهتنا قنتي عند منتصف نهار يوم الثلاثاء لتبدأ قصص أخرى.
والحكاية القادمة سوف تكون بعنوان
" ترتورة وعزالدين الكملوا البنزين "

يا ابوالتر
دا بوست حصري للكوامر
مافي زول من البورداب ديل ركب قطار والله اقول ليك مافي زول شافوا
طبعا السرد مبالغة وكاني الان راكب في القطر والزوادة من القراصي الممررة ورائحى شمارها تجيب الطاش والعجب اللحمة المحمرة والبيض ( المح ) والجالون الصغيحة المخيش لزوم تبريد الموية وبعضهم كان يشد القربة .. الركوب يبدأ بالشكل والضرب وينتهي بالحنين والونسة والدموع والحليفة في اكل الزوادة كانت محطة الجيلي تفوح منها رائحة الجوافة وفي شندي الطعمية الشهيرة وفي عطبرة شاي اللبن وباسطة عمك عبدالفتاح اما في بربر من دغش بدري اللقيمات مع الشاي ابو بوخ لاوي وقالوا نسوان بربر ببيعن حاجة بلدية معبية في قزاز اخضر ( والعهدة علي الراوي بكري عثمان حمد ) اما نحن كنا صغارا نكتفي بان ( يبردوا لينا الشاي في الكوز بعد ان يرسم زيت اللقيمات خريطة حول الفم) كنا نشعر بالجفاف في محطة الكاب وام رهو والعجب كان السيل شال السكة حديد مثلما حدث لي وانا مسافر لوحدي مقطوع 3 ايام ولا توجد موية والشراب ( اسكوب ) في كبابي الشوب في سناتور القطر
ويديك العافية

يا خوي ياورقة أنا قصدت الرقشات يعرفوا شي عن القطر وكتر خيرك في المعلومات الدقيقة التي ذكرتها والتي كملت الموضوع وجعلت له رونق آخر، ونتمنى من الدكتور بكري يكمل البوست بمعلومات أكثر والله يظهر إنو عامل نفسوا من جيل العولمة

قصيدة للرائع كدكي عن الغربة الداخلية
حاج حمد إحمد فى العمل .. زولا بضربو بو المثل
من الله خلقو وقام معا سلوكتو ... ما ضاق السفر
طول عمرو فى البرود يزح ويقعد يداير فى البقر
وزمن السقط يعملهن كر من فلق ورف الشجر
لكين وليدو الكان زمان تعبان عليهو
ويقرى فيهو واديتو ليهو بلا المطر
دقس المدينى واشتغل دى اربع سنين فوقن شهر
راقد قفا وقاطع الخبر ومن عندو قلالة آب تصل
وخل أمو قالبى اشللة ملى تسوى
زول ورهيف دحين داير القفر
مرات يقولها ياولية اصبرى ما خاب من صبر
ومرات يقولها يبقى راقد موجعو شى
كان وردى ولا وجع ظهر
ومرات يقولها يبقى راح بارا الهواميق والسهر
بس غايتو قلبى على جناى وقلب جناى علي حجر
ومن ميسو دبا على كريمى وخش توووووف ركب القطر
لابسلو مركوبا نصيييييح وحاقبلو شنطة الت طفيح
لملم هدومو من الحبل شكاها فيها كسر كسر
وسداها بى كسرة جريدتا ناشفى عارضا زى كشر
وقالك كدى اتحكر قعد حكيرة جد
وجر من حرفو المتمر زين كمان قلم فطر
وقطارو ... توت توت توووووت كو نتل
دفق المى تب ما خلا جر
واتفكى ماشى مشى الرماد بقى فى القضيب يشكى العجل
وصوت السلك دا يسوى ززززن والدغفلى وقلبى انقطع
حاج حمد احمد قضى يومين فوق الحطب مانام شخر
ينوم بى وين ؟؟ دا قطر كريمي .. المي ملان لا عينو ديمي
وكتين يجى التمر ؟؟ مكمود كمد
والمنقة وكتين تستوى تلقاها للوكاي زرد
كترة كلف قايل شنو
وابا ما يشيلنا ود منو
عفشا جبال والدنيي حر جرا حمد احمد عرقو تر
وكتين يجى الكمسارى مار تلقاهو بالنطيت فتر
وتلقى الشكل ... لكين قبل يصل الكجر
الناس تعود للقرقراب وتلقى اللكل سوا والشراب
غايتو كدى وكدى فى القطر
حاج حمداحمد قضا يومين خير وشر
ولمالو فى ولدا بيعرف ولدو فى حقو انستر
وراهو درسو معا بعض
والليلى جيرى جوار بعض
ويوم التلاتا من الصباح
اتفكو من قطر المرض
وداهو لى بيت ولدو داك البي هناك بلاخبر
وخلاهو روح جاى ينوم .. فعلا غمد
وتلاتا دقت بى هناك انكان وقف حيلو انسند
وناس المكاتب لى ورا .. تب مافى زولا انكرم
وكان ولدو عاد من جملتن
للسوق غشا وشال الرزم .. ودافس ركب باصن يئن لامن وصل
شايلو اكياسا غلاد توستا وعنب باسطة وعسل
شيتن كتير بالحيل يأكل كم نفر
ويقدل عليك يالله كو للباب دفر
ولقى ابوهو قدامو اتهجم
وقبال يسالمو وقف سعل
إي ؟؟ ابوي ؟؟؟؟
ياب ما معقول الجابك شنو ؟؟؟
ياولد تنقطع ريحتك
يعنى مستغرب اكنو بلاخبر جيت
وفتحتك للباب لقيتنى انا جوا فى البيت
ما دام ياب ضراع كم اجازى قضيت شن بسوى
ترانى قمت معاك طبيت
وقمت ساكت لى الله سهلى الطريق وفى القطر لمانى ولدا ليك رفيق
اقيف اسمعني روق .. قالى قارى معاك كلية الحقوق وبيتو منك جبدا ساكن قبلي فوق
عندى قلبا عليك كيفن حنين ومااااااااااااب تعرفو بلا تسويلك بطينين
تبكى امك زاتا كانت جاي لكين
بيتنا ماب يتفات وخيانك صغيرين
وماشفتا غناها ليك البى الجرانين
الشى نضما كلو يهرد فى المصارين
مرة بيهو تنونى ومرة تحصنك زين
وتقرى ايت الكرسى ومرة معاها يس
ياولد ... اتقونن شوى اوعك من الدين
هسع الخميتو جبتو دا كلو من وين
لاتبقى خدمتك فى الدلاقين المهم فى البنك وفرلك ملالين
جيت اسوقك للعرس لاتقولى ملحوق باقى امك ديك هناك مقلى قلى بالشوق
لابتين تقعد هنى وراسك دا مطلوق
المحل بندر كمان عيشتك من السوق

[img]

قطر كريمي .. الملان لاعينو ديمي Imagescatfptze

[/img]

جبت الفورة يا ترتورة وقبل ما افتح لبقة جديدة خليني اقول للركشات الفورة دي بيقولوها للزول البيفوز في اللعب لو كان لعبة الكمبلة او لعبة شدت او اي نوع من انواع اللعب بتاع زمان طبعا ام اللبقة بخلي ترتورة يشرحها ليكم
نرجع للقطر ومحطاتو وطبعا انا بحكم ان الوالد (متعه الله بالصحة والعافية وامد الله في ايامه )كان بيشتغل في السكة حديد وبحكم انو نحن اتربينا وسط جو السكة حديد وعلى صوت القطر داخل المحطة وتبدا الاستعدات لدخول القطر للمحطة من فتح المحلوجي للسيمافور ويسبقها تلقي اتصال من المحطة السابقة وطلب تزكرة للدخول و لاننسي دور ناظر المحطة في التنسيق لمرور القطر علما بان هنالك نوعين من القطارات احدهما ركاب لنقل الناس وقد تم شرحه ونوع عرباته من قبل ترتورة والاخر بضاعه وهو يتكون من عربات لنقل البضاعه
الشق التاني من موظفي السكة حديد هو عمال الدريسة الذين يهتمون بالخط الحديدي الذي يمر عليه القطار بعربتهم اليدوية المشهورة (الترولي) التي يستغلونها للتنقل بين حدود المحطة شمالاً وجنوباً والوالد كان مفتش دريسة اي رئيس هذا القسم وهنالك شرطة في المحطات الكبيرة لمراقبة وحفظ الامن بين المحطات والقطارات
ما لا تعرفه اخي ترتورة ان هنالك لغة تخاطب تستعمل فيها الاكواد بين الاقسام المختلفة في السكة حديد فمثلا ناظر المحطة يقال عنه ركاب ومامور النظار كنترول ومامور الدريسة بلنجة وشرطة السكة حديد قضايا وهكذا
كما ان الخطوط الحديدية داخل المحطة لها اسماء فالخط الداخل يسمى الطوالي النازل والخط الخارج بسمى النفادي الطالع
ولايفوتني ان احكي لكم عن رصيف المحطة الذي تنزل عليه البضائع ونقضي الليل نتسامر عليه
اخي ترتورة
احتفظت انت بزكريات رحلة قطر كريمي وكم من زكريات لعدة قطارات ومحطات ظللت احتفظ بها انا!!!؟؟؟

اما مايخص الشق الثاني من الموضوع ورحلة النزول للبلد فانا لازلت اتزكر تفاصيل نزولنا للبلد زمان (مسقط الراس قرية ارقي شرق الدبة) تبدا الرحلة من موقف اللواري السفرية بامدرمان وبعدما تتم شحن البضاعه نركب اللوري ويتحرك شاقا طريقه وسط الرمال واول مكان كان يوحل فيه اللوري منطقة ابوضلوع تقريبا على بعد ساعتين من ام درمان الآن ويبدا مساعدية اللوري بوضع الصاجات تحت لساتك اللوري وازاحة الرمال من تحتها الى ان يتم اخراج اللوري لتتواصل الرحلة والى ان نصل الى اول محطة قهوة ام الحسن (الآن تسمى التمتام ) ويتم تناول العشاء وشرب الشاي والقهوة والالتقاء باللواري القادمة من الدبة وايضا مصادفة بعض اللواري النازلة الى الدبة وبعد هذه الاستراحة تتواصل الرحلة لتكون محطة التبريد(قشابي) هي المحطة التالية للاستراحة حيث تتم اداء صلاة الفجر وتناول شاي الصباح ويتحرك اللوري ويقف هذه المرة في محطة الدبة التي تظهر ملامحها من دبة الفقراء والحامية ونتوجه بعد نزولنا مغبرين وفترانين الى البنطون ونغسل وجوهنا بالماء قبل ان نعدي الى البلد ارقي
اخي ترتورة
تغنى مطرب الطنبور صديق احمد (بالمناسبة هو بلدياتي من ارقي) باغنية اسمها جروح قلبي لهذه الرحلة الرائعه ساهديها لك ولك محبي دوت كوم..

ياترتورة يارائع ناس كريمه بقو شوايقة جزيره أكثر من الرقشات وبعدين البركه في الجماعة ديل لحقو قطر كريمه قطر نيالا إنت عارف كيف ؟؟؟؟؟؟؟؟؟؟؟؟؟؟؟؟؟؟
رتب الاتي ~ خساره ......الوطن .........الناس .......علي ..........ديل
ده فهم ........ رأيك شنو Laughing

عاطف عمر كتب:: جبت الفورة يا ترتورة وقبل ما افتح لبقة جديدة خليني اقول للركشات الفورة دي بيقولوها للزول البيفوز في اللعب لو كان لعبة الكمبلة او لعبة شدت او اي نوع من انواع اللعب بتاع زمان طبعا ام اللبقة بخلي ترتورة يشرحها ليكم
نرجع للقطر ومحطاتو وطبعا انا بحكم ان الوالد (متعه الله بالصحة والعافية وامد الله في ايامه )كان بيشتغل في السكة حديد وبحكم انو نحن اتربينا وسط جو السكة حديد وعلى صوت القطر داخل المحطة وتبدا الاستعدات لدخول القطر للمحطة من فتح المحلوجي للسيمافور ويسبقها تلقي اتصال من المحطة السابقة وطلب تزكرة للدخول و لاننسي دور ناظر المحطة في التنسيق لمرور القطر علما بان هنالك نوعين من القطارات احدهما ركاب لنقل الناس وقد تم شرحه ونوع عرباته من قبل ترتورة والاخر بضاعه وهو يتكون من عربات لنقل البضاعه
الشق التاني من موظفي السكة حديد هو عمال الدريسة الذين يهتمون بالخط الحديدي الذي يمر عليه القطار بعربتهم اليدوية المشهورة (الترولي) التي يستغلونها للتنقل بين حدود المحطة شمالاً وجنوباً والوالد كان مفتش دريسة اي رئيس هذا القسم وهنالك شرطة في المحطات الكبيرة لمراقبة وحفظ الامن بين المحطات والقطارات
ما لا تعرفه اخي ترتورة ان هنالك لغة تخاطب تستعمل فيها الاكواد بين الاقسام المختلفة في السكة حديد فمثلا ناظر المحطة يقال عنه ركاب ومامور النظار كنترول ومامور الدريسة بلنجة وشرطة السكة حديد قضايا وهكذا
كما ان الخطوط الحديدية داخل المحطة لها اسماء فالخط الداخل يسمى الطوالي النازل والخط الخارج بسمى النفادي الطالع
ولايفوتني ان احكي لكم عن رصيف المحطة الذي تنزل عليه البضائع ونقضي الليل نتسامر عليه
اخي ترتورة
احتفظت انت بزكريات رحلة قطر كريمي وكم من زكريات لعدة قطارات ومحطات ظللت احتفظ بها انا!!!؟؟؟

الأخ عاطف لك التحية
معناها إنك عندك ذكريات كتيرة عن قطر الهم ومحطات قطر الهم، لكن موضوع اللبقة دا أنا قالوليك كت تربال ولا تربال، وبعدين لمن أجي أشرح معنى الكلمة سوف أقعد اشرح كل كلمة ترد في الشرح من جدول لي قران لي حوض ويضيع المتابع

الأخ عاطف لك التحية
معناها إنك عندك ذكريات كتيرة عن قطر الهم ومحطات قطر الهم، لكن موضوع اللبقة دا أنا قالوليك كت تربال ولا تربال، وبعدين لمن أجي أشرح معنى الكلمة سوف أقعد اشرح كل كلمة ترد في الشرح من جدول لي قران لي حوض ويضيع المتابع
[/quote]

يعني يا ترتورة لما اندليت البلد ما نزلت التحتانية وحشيت البرسيم وعدلت موية حيضان المريق وزرعت المكادة ؟؟؟
احكي لينا عن الحاجات دي واشرح لينا شنو العشميق والارتيق والكتقة ؟؟؟ وهاك الابيات دي تغني بيها الفنان عثمان اليمني متعه الله بالصحة والعافية فيها الكتير من تلك الكلمات

ابوك يفتل في الحبال ما خلالو شيتا اسمو عشميق
يرسل ليك في المصاريف عشان تقرا تلحقنا وقت الضيق
اتاريك انت في بلد الترك وليداً مطيليق
يا خسارة عيشنا ما اكلو الجراد والحكمة متيق

الأخ / عاطف لك التحية
ياما إندليت للبلد ياما نزلت للتحتانية وحملت الجوز لسقي الشتل عندما لا تنتظم موية الحكومة في الوصول عبر الجدول الرئيسي لمشروع الكلد، وكانت الذكريات كثيرة ولكن الذي أذكره و لا أنساه هو النمتي، والدفيق، والذكريات الجميلة كثيرة ولاتنسى

مرحب بسرد ذكريات اخوانا وتاريخهم ( الهيئة الدبلوماسية ) اقصد الشايقية هيا بنا افيضوا علينا بكل قديم وجميل ونحن فى انتظاركم ياترتورة والاخ عاطف عمر

منعم يا ترتورة
عاطف يا عمر
والله متعتونا بالذكريات والحكاوى الجميلة
نزلت البلد مرة واحدة وكنت صغيرا انذاك
وكل ما اذكره اننى كنت مستمتع بالطلوع والنزول من القوز

نزولاً لرغبة الاخوان عوض الريح والعشي نحكي ليكم شوية عن (الهيئة الدبلوماسية) كما سماها اخونا عوض الريح وارجو ان لا يفسر الغير ان هذا الكلام الغرض منه التعصب والانتماء الضيق للقبيلة ولكن اعتقد انو من حقنا شوية ان نضري عيشنا طالما لقينا الهمبريب في دوت كوم والحقيقية ان الشوايقة متميزين في كل شي (ونجيضين ) والتاريخ يشهد بذلك كل قناطر مشروع الجزيرة كان يعمل بها الشوايقة بل ان هنالك قناطر سميت باسمائهم ومشروع الجزيرة نفسه قام على اكتاف الشوايقة (مع كامل الاحترام والتقدير لبقية القبائل السودانية) وتاريخ السودان الحديث يشهد بان اسماعيل باشا عندما قدم لفتح السودان ابان الفتح التركي المصري اعجب ايما اعجاب برجولة الشوايقة عندما حاربوه بالسلاح الابيض ومنها اشتهارهم بالجندية (ان نجح للعسكرية وان خرب للطورية) ويقال انهم اي الشوايقة سبب لاستمرار الحكم التركي المصري طويلا لان اسماعيل باشا استعان بهم بعد ذلك في كثير من المواقع
كمان النصيحة لله الشوايقة ناس شغل ومافيهم (راجل خملة) اي زول رقاد ونوم وايضا الشايقى بطبيعته محب للرئاسة لانو زول خدوم فتجد ان المصلحة ماشة تمام التمام لما يكون رئيسها المباشر شايقي
اكرر اسفي لكل محبي واعضاء دوت كوم لكن اعتقد انو من حق الواحد ان يفخر بي قبيلته شوية ولاشنو ؟؟؟ وللحديث بقية عن البلد وقيزانها

الليلة با عاطف فتحت ليك طاقة مابتنسد وعايز تجيب الكلام للشوايقة من خصماهم الحكام الحاليين الجعليين أولاد أعم الدينكا كما يقولون، ودحين يا عاطف لو تذكر زمان لمن قرونا التاريخ وقصة حملة إسماعيل باشا لفتح السودان سنة 1881 قالينا استاذ التاريخ في ذلك الوقت أنو الشوايقة فتحوا كبري للجيش الغازي وسمحوا له بالتقدم نحو منطقة الجعليين، وأنا ماقصدي حاجة ولا محتاجة بس قلت يمكن بطول الزمن نسيت فعلت أهلك الشايقية " بالمناسبة أنا بديري دهمشي " ما لي اي علاقة بالشوايقة، إلا أن حبوبتي أم أمي شايقية من نوري، وزي ما بقولوا أهلنا هناك يعني علاقتنا بالشايقية " لحمة مره" يعني نسب عن طريق إمرأة، وبرضوا ما تفهموني غلط أنا من أنصار المرأة وتمتع المرأة بجميع حقوقها المدنية ، يعني أنا جبت الكلام دا على لسان أهلنا الكبار ودمتم سالمين

ترتورة يا خوي انت زولاً حكاي زي كده مربياك حبوبتك ولا شنو ؟؟؟

اول حاجة ياخينا (طبعا كلمة يا خينا دي ماركة مسجلة للشوايقة لكن بس بيقولوها للزول البيعجبهم ) صحح معلوماتك الشوايقة ما فتحوا الدرب لاسماعيل باشا وين معركة كورتي ؟؟؟ ووين غناء مهيرة؟؟؟ واظنك ما سمعت بي قصة حريم الشوايقة الرمن نفسن في البحر عشان ما يتم اغتصابن من قبل جنود اسماعيل باشا استاذ التاريخ بتاعكم ده اكيد بيكون مديرو شايقي !!!
بعدين بالمناسبة انا ايضا بديري دهمشي من ارقي والبديرية معروفين موجودين في ارقي وقنتي وقشابي وتنقسي ومنصوركتي والعفاض والكرد والجابرية وكرمكول وجرا ..الخ والشوايقة موجودين في نوري وكورتي وكريمة وبروس والبركل ...الخ وممكن الكوامر الكبار ناس حسن وراق يفيدونا في الحتة دي
لكن يا ترتورة لايوجد فرق كبير بين الشوايقة والبديريه في كثير من الطباع الا الشلوخ الشوايقة تلاتة شلوخ راقدة والبديرية تلاته شيوخ واقفة غير ان البديرية طباعهم لينة بعض الشي عشان ما تزعل
بالمناسبة البديرية الدهمشية لهم فرع اخر في كردفان منهم الفنان عبد الرحمن عبد الله لكن فرع كردفان اختلط بعض الشي بالقبائل الكردفانية اما بديرية الشمال فكانوا محتفظين بي اصلوهم حتى قبل مجي الانقاذ بقليل وقبل عرس الكورة...

يعنى يااخونا ترتورة طلعت ( بلوشى شايقى ) بالخليجى. مبروك برضو يمنحوك الجنسية الشايقية ويابختك سوف تشبع تمر وتمباك وابيض ضميرك .

اخونا عاطف عمر فعلا كلامك صحيح بدون شك لانى اتذكر قديما كان والدى الله يرحمه يقول ان هناك شخص اسمه ابو صابونة كان يبيع التمباك وبعد كل زبون كان يغسل يديه ولذلك سمى ( ابوصابونة ) وطبعا كان شايقى يعنى اول شخص بدا ببيع التمباك معلومة طريفة مش كده ياعاطف. والله نكن كل الاحترام لكل قبائل السودان وخاصة الشايقية والله احبهم جدا لكن عندى سواءل ماسبب العداوة بين الشايقية والجعليين ارجو الاجابة بصراحة وبصورة فكاهية طريفة .

اخونا عوض الريح التحية لك مجدداً ولكل من يمر على هذا البوست

قبل ما نرد ليك عن عداوة الجعلين والشايقية فعلا الشوايقة اشتهروا باشياء كتيرة منها سف التمباك رجال ونساء على السواء وانا لازلت اتزكر جيدا احدي حبوباتي وهي تسف الصعود ولديهم وجباتهم الخاصة (الملوحة) وعند البعض (التركين) اما الكلام عن احساسهم المرهف فقد بينت اغنية الطنبور هذا الشي ولعل حب وعشق اغلب القبائل السودانية لاغنية الطنبور اكبر دليل على ذلك كما ان لهم لهجتهم الخاصة فتجدالمراة الشايقية في لندن تقول (وا شريري) ومن اشهر ما يميزهم اكلهم للقراصة (14 بوصة) وللوفت القريب جدا لم يكن الشوايقة بالشمالية يعرفون شيئا عن (الكسرة)
اما قصة عدواتهم للجعلين فذلك يرجع (والعهدة على الراوي) ان الشوايقة يعتبروا الجعلين غير ماصلين وليس لديهم نسب رئيسي يرجع اليهم فيه فمثلا لو سالت اي واحد شايقي انت من وين بيوريك اهله وبلده ويمكنك ان تتعرف عليه لكن لو سالت اي واحد جعلي انت من وين ؟؟؟ من الصعوبة ان يحدد اصل وانحدار جدوده السابقين والحاليين !!!
وكدي هسع بالمناسبة دي يا عوض بتعرف شنو عن بلد الجعليين غير كبوشية وشندي والمتمة ؟؟؟!!!
التحية لكل الجعليين انا من خلال عملي بالغربة افضل من قابلت وعاشرت والحق يقال بعد الدناقله هم الجعليين فلهم مني ولكل القبائل السودانية عاطر الشكر والتقدير ...

الأخوين عاطف وعوض لكم التحية
أنا أعرف معركة كورتي وسبب ملاقاة الشايقية لجيش اسماعيل هو القصائد الحماسية التي كانت تلقيها مهيرة في الجيش بعد فكروا في عدم ملاقاة جيش اسماعيل، وتقابل الجيشان وكانت الهزيمة للشايقية لعدم التكافؤ فتفوق العدو بالسلاح الناري، وفي كل معركة تقع بين صاحب الأرض والغازي نجد أن الغازي يطلب الجزية ولكن الشايقية زادوا على ذلك بأن تبرعوا بالإنخراط مع حملة إسماعيل باشا وهذا هو السبب الذي جعلي أقول لك بانهم فتحوا كبري، وزي مابقولوا المصريين عايز أجيك من الآخر
وياود الريح أنا بلوشي ولكن في بعض الأحيان البلوشي أخير من البدون،
واظنكم نسيتوا مع التمباك العرقي، والشعر الرصين" أخير نجمل الموضوع لأنو في مجموعة من الشايقية مابرضوا جنس الكلام دا "

صدقنى لم تجب على السواءل ياعاطف كان المفروض تستعين بصديق او الجمهور انا عاوز اجابة اكيدة ومقنعة عاوزين نعرف السبب عشان نحل المشكلة ونبدد الكراهية والعداوة بينهم ( اى الشايقية والجعليين ) لذلك ارجو من الجمهور اقصد اعضاء المنتدى من يعرف اجابة ماهو سبب العداوة بين الجعليين والشايقية ارجو اجابة سريعة وسليمة لكى نجمع الشمل بينهم ونزيل الشحناء والبغضاء .

أنا أقول ليك سبب العداوة هي قبل وصول جيش إسماعيل باشا إلى ديار الشيايقية طلب ملوك الشايقية العون من مختلف القبائل السودانية للقتال معهم وأول تلك القبائل الجعليين الذين رفضوا مشاركتهم القتال ضد الغزاه، وعندما إنهزم الشايقية في معركة كورتي سار جنود الشايقية مع الجبش الغازي إلى ديار الجعليين وحاربوا مع جيش إسماعيل باشا ضد الجعليين ومن هنا جاءت العداوة، ولعلمك بأن العداوه بين الجعليين والشايقية ليست بالعداوه التي تصل حد الخصام والكراهية، إنما نوع من الدعابة يتبادلها الطرفين فيما بينهم وعمت جميع السودانيين لخلق نوع من الدعابة في المجالس، والمحبة بين الجعليين والشايقية وصلت مرحلة المصاهرة " والنسابة عين شمش"

والله ياترتورة ظريفة جدا وضحكنا فيها كتير عاوزين واحدة ثانى يديك العافية

جميل جدا ياترتورة واصل نحن متابعين بالمناسبة وين اخونا عاطف شايفه جف قلمه ولا خلاص رفع الراية البيضاء ولا بصنع فى سلاح نووى اعمل حسابك ياترتورة الزول ده مابتقدر عليه .

والله حواركم حوار جميل بس عاوزين حقائق تاريخية موثقة هيا بنا نحن فى الانتظار