قطر كريمي .. الملان لاعينو ديمي

عوض الريح كتب:: بالمناسبة وين اخونا عاطف شايفه جف قلمه ولا خلاص رفع الراية البيضاء ولا بصنع فى سلاح نووى اعمل حسابك ياترتورة الزول ده مابتقدر عليه .

يسال منك الخير يا عوض انا قاعد اتاوق بالرقراق لكن الحق صاحبك ترتورة نزل من القطر من دون ما يقول لينا قولة عوافي ومشي ساقوا الحمام وداهو لا بحري لكن ابشرك لحقتوا هناك برضو ابقى مارق انت وحصلنا بي هناك (سوقني معاك يا الحمام )

حصري للركشات على قولة ترتورة لا بحري ولاقبلي و لافوق ولاتحت الاتجاهات المستخدمة عند الشوايقة فبقولون للشمال لابحري وللجنوب لاقبلي وللشرق لافوق وللغرب لاتحت .

يبدو ان اخونا ترتورة نفذت ذخيرته ياعاطف او انه فى هدنة او الهدوء الذى يسبق العاصفة جهز نفسك وحصنها جيدا لان ترتورة رجل خطير حتى التذاكر فى السينما كان يتاجر فيها زمن خليفة بتاع باب السينما وحسن عباس خرباش الله يرحمهم

الأخ / ود الريح يعني الواحد ما يريح جتته شويه والله يقعد يصاقر اللابتوب صباح ومسى، وانا قلت إنت رقشة أتاريك طلعت ديناصور من زمن خرباش، ومعنى كدي أظنك واعي من قبل ما تكون السنما حقت علي دنقلا، وبالمناسبة أنا بحضر لي باقي الرحلة من كريمة إلى قنتي عن طريق بابور البحر ودا طلب من عاطف وقول ليه حدنا قنتي بس الدبة نوصل ليها بالبكاسي من قنتي، وقد إنتقلنا مؤقتاً إلى سوق ني معاك يالحمام لمن كمساري قطر كريمي يشلخ لينا ابن عفيف شلوخ شايقية ويبقى من شوايقة الجزيرة

الرحلة في قطر كريمي أنا وقفتها عند كريمي وطبعاً الرحلة عندها تكملة بواسطة بابور البحر وهذا من أجمل الأجزاء في هذه الرحلة نسبة للمناظر الطبيعية التي تسر الناظرين على ضفاف النيل وبالأحرى الضفة الغربية للنيل كما يحلوا لأهلنا في الشمال من تسميتها بهذا الاسم بالرغم من أنها تمثل اتجاه الجنوب من الناحية الجغرافية، أما الضفة الشرقية في معظمها صحراء قاحلة تتخللها بعض الشجيرات بالقرب من النيل.
كما ذكرت في الجزء الأول من الرحلة قد وصلنا إلى كريمة بعد منتصف نهار يوم الاثنين، وبعد النزول من القطر نقوم بركوب كارو لكي نصل إلى مرسى البواخر هناك والجميع مجهز البطاطين والملايات ويبدأ الجري والسباق نحو مرسى الباخرة " الجلاء " والكل يسابق لأن يحجز موقع استراتيجي قرب جوانب الباخرة لكي يستمتع بالمناظر الجميلة وخاصة في الصندل الأيسر لكونه يواجه الضفة الغربية للنيل حيث العمار" وبالمناسبة بابور البحر مكونة من ثلاثة صنادل، الصندل الرئيسي الذي فيه القَمَرات، والدرجة الأولي والثانية وكابينة القيادة وماكينة البابور، وملحق به صندلين آخرين واحد بيساره والثاني على يمينه، المهم في الأمر نحجز لنا موقع في الصندل الأيسر وذلك بفرش البطاطين والملايات على أرضية الصندل ونظل على هذا الحال في كريمة حتى حوالي الساعة الثامنة مساء وتبدأ الباخرة في التحرك لتعبر إلى الضفة الغربية وأول محطة هي مروي وهنا تبيت الباخرة حتى الصبح وتبدأ المسير صباح يوم الثلاثاء، ومنها إلى تنقاسي، ثم القرير، وبعدها المقل، حتى نصل مساوي "مكان مولد السيد علي الميرغني " " سيدي علي"، ثم محطة أسلي، وبعدها نصل إلى أكبر محطة في هذا الخط حتى الآن وهي محطة كورتي، ومنها إلى أمبكول، وبعدها نصل جلاس، ومنها إلى موره وهي بلد "ود المبارك" كما قال الشاعر ود المبارك شيخ الظهر شوفني جنيت ولا دَسْتَر" ومنها إلى الحتاني، ثم منصوركتي وأخيراً قنتي ونكون قد وصلنا إلى محطتي الأخيرة
وعشان ما يزحل أخونا عاطف سوف نصل معه الدبة حيث بعد قنتي نصل محطة العفاض ومنها إلى قشابي، ثم جرا ونصل الدبة محطة الأخ عاطف.
وبذلك أتمنى أن تكونوا قد استمتعتم بهذه الرحلة الحقيقية وللبعض تكون رحلة خيالية لأنه لا وجود لها في الواقع الحالي، وأرجو أن لا أكون قد نسيت بعض المحطات في هذه الرحلة لطول المدة وبعض الخراب الذي أصاب الذاكرة، ونلتقي إن شاء الله في رحلتي القادمة والتي كانت إلى مدينة الفاشر بالقطر إلى نيالا ومنها بالباصات إلى الفاشر وذلك لزيارة شقيقي د. الباقرعثمان الذي عمل هناك بعد تخرجه من كلية الطب وكان ذلك في خريف 1977 "ودمتم سالمين"

الاخ / ترتورة لك التحية كما عودتنا دوماً

حقيقة رحلة ممتعة عشناها بكامل فصولها ونشكرك على السرد الجميل لتسلل الاحداث لكنني كنت اتمنى لو زكرت بعض الذين تختزنهم الذاكرة مثل شخصيات رئيس البابور والعمال المشهورين وكذلك مشاهد استقبال ووداع بابور البحر لدى كل محطة .
سننتظرك في رحلة قطر نيالا خاصة ان للقطر معي محطات مهمة وزكريات لا تنسى

اخونا ود الريح زولك ركب القطر اقطع تساريحك وحصلنا انا زول سكة حديد راكب مع السواقين في المنامة ...

الأخ / عاطف لك التحية
حكاية الاستقبال والوداع في المحطات دا خليتوا ليك عشان تكمل الناقصة وإنت أدها وأدود، دحين ود الريح مالو غاب كدي، وأوع يكون زوغ علي بيت العزابة في العزابة دوت نت والليلة كمان الخميس، عايز يلحق على الأبيض والأسود والأحمر، وابن عفيف شكلوا ركب القطر من غير تذكرة ومحجوز في حراسة القطر، وعازين واحد يضمنوا، فهل من متبرع

الاخ / ترتورة لك التحية مجددا كما عودتنا على ذلك

انت عارف الشوايقة حنينين شديد عشان كده عاوز نسمع الكلام من خشم سيدو وياخي نطلب منك طلب جديد زود الرحلة شوية حبتين ما تنهيها لينا بسرعة كده وتستعجل على قطر نيالا ود الريح شكلو لابد لو فوق راي لكن خلينا نقص دربو لا عند بيت العزابة وذي ما قلت بيوت العزابة الليلة الخميس كلها او اغلبها بتكون مدورة كشاتين وود عفيف بكلملوا الكمساري واحد بلديات لينا بفكوا من الحراسة بس قول ليهو لو سالك الكمساري انت شايقى خلو يقولو اييي .

ترتورة نحن فى انتظار الرحلة فى كل محطة معاك جيب معاك التمر وكثر من التمباك والابيض تركناه الحمدلله . لكن ياابوعبدا انت قلت ماشايقى ماية فى الماية يعنى بلوشى شايقىوالبلوش دائما مابكونوا عارفين كثير عن القبيلة الحاضنة لهم بما انك بلوشى شايقى من اين لك هذا ساورتنى الشكوك حول جنسيتك وهل صحيح ان اى واحد ( بدون) جنسية بقول انا بديرى دهمشى . بعد الاجابة على هذا السواءل ارجو توضيح قبيلتك بالرجوع للجذور بكل امانة .

الله كريم نلقا زي دا، إنت ما عارف يا ود الريح من عاشر قوماً صار مثلهم، وبعدين الشوايقة مالن عيبون لي، وشوف صاحبك عاطف عايز ينط من المهمة الموكلة له، وقال حايتوسط ويطلع إبن عفيف من قبضة سجن الكمساري الشايقي ولا أسع نعاين والبحر صافي، وانا بختف رجلي للعزابة دوت كوم عشان الحكومة مدياني إذن لمدة ساعتين نمشي نعبي راسنا ونجي