زواج هناي و هناية

يدخل العريس هناي... وهو سايق العروس هناية.. وسط زغاريت اهل هناي واهل هناية...ودخاخين.... ملت الصالة ما معروف جات من وين...؟.... وهناية العروس تقعد تعطس عشان عندها حساسية من الدخاخين....والعريس هناي..يعاين لها ويقول لها بكل حنان(يرحمك الله).. وخالة العروس هناية وراها ساعة العطسة وتقول لها(كُر..كُر.. يايمة كُر).... تقعد هناية وهناي في الكوشة... ويعتلي منصة المسرح هناي صاحب العريس ..ويعتذر للجمهور (كان مفروض يكون معانا الفنان هناي الهناي دااااااك.... لكن مشينا ليهو البيت نجيبو لقيناهو مسطول وراقد لا ايد لا كراع.. ولحسن حظ العريس هناي)..ايووووووووا تزغرد قريبات العريس... (والعروس هناية)..ايوووووووويا....تزغرد قريبات العروس (ولحسن حظ برنامج افراح افراح) ايووووووووويا ... تزغرد المذيعة ومعاها كل الهنايات القاعدات في الصالة.... ويستمر هناي صاحب العريس( لحسن الحظ ان الفنانة هناية الهناية..المركبة رموش في عيونا كل فردة من بلد ديك... سمعت بغياب الفنان هناي .. وجات بدلو..... وتشك اللجنة العليا لاهل العروس هناية واهل العريس هناي..ان الفنانة هناية دي.... عندها ايد في سطلة الفنان هناي....عشان تجي تغني هي بدلو.... نسبة لانها ليها حول ما فتحت خشمها دا في حفلة.... لكن ما مشكلة المهم الطرب والرقيص)...... تظهر الفنانة هناية الهناية من وسط الصالة..... و تمشي علي المسرح تخت ايديها الاتنين في المسرح دايرة تطلع ويغلبها... تكورك للزول البيدق البنقز وتقول لو( الرسول يا هناي اديني ايدك)....يمد ايدو ليها ويجرها فوق المسرح وتترتع الفنانة هناية وقربت تقع لولا لطف الله...ثم تعتلي المسرح وتمسك المكرفون واول غنية:-
هناي يا الشتت ليك سنة
انا عارفاك ماشي لهناية
و داير تدقسني انا
..ثم تضج الصالة بالزغاريت والكواريك ..والهيصة....ويتضح ان كل هناي وهناية في الصالة هم من شهداء الدقيّس...وتستمر المطربة في اغنية الدقسيبة:-
اديتك قلبي ومعاهو الهناي
جرحت القلب ونمتّ بالهناي
القلب يبرا.... والهناي الله كريم علي
......ثم زغاريت وكواريك مرة تانية.... وفي ركن بعيد من الصالة نسوان كبار يقطعن كل واحدة تكورك للتانية في اضانها عشان الميكرفون عالي...(لا... انتي اصبري يا هناية.... هناية عمة العريس مالا ما جات؟)....تجاوبها المرا التانية(بري يا هناية.... قالت الرطوبة قايمة عليها....لكن كضابة وحات الله....قبيل شايفاها ساكة شافع بنتها هناية في الشارع زي الحصان ... تكون حردانة دايرة العريس دا لي بنتها هناية الما تتقابل ديك).... ثم يلتفتن الي المطربة والمطربة ما زلت في غنية الدقسيبة:-
قلت ليك تعال بالعندك
ابوي بي يسندك
وانت جيتنا اباطك والنجم
ونسيت الهناي عندنا
وتاني تشوفو لمحة
و تشمو قدحة
وتاني تشوفو لمحة
و تشمو قدحة
....وتكرر المطربة هناية مقطع(وتاني تشوفو لمحة)....الحضور يردد وراها (وتشمو قدحة).....ساعة كاملة.. والمطربة(تاني تشوفو لمحة)..والحضور نسوان علي رجال علي شفع يرددو( تشمو قدحة)... وتجي فرقة من بوليص مكافحة الشغب.... ويفرتقو عرس هناي وهناية بالبمبان....

مبروك ياهنايه لي هناي وهنايه
وعقبال الهناهين كلهم
بس تعالي النسألك ياهنايه دحين ده ماهناي الدقس هنايه وعرس هنايه؟

بالغتو لكن يا ناس هناي وهناية

ياهنايين وهنايات أصبحتو كيف السماية متين

تعرف يا محمد هناية دي شمشـــــــــــــــــــارة بس الحق على هناي الخلى هناية تقول كدا ... لكن اقول ليك بلا هناي بلا هناية خليهم في الهناية بتاعم دا

هناية هووووي ..
هنايك ده خلا هناينا يجي جاري مع هناي وهناية وناس هناي الساكنين جيران ناس هناية الخاطبه هناي ود ناس عمك هناي المرتو هناية الأبوها هناي ود هناي ..
هنهنتينا وقعدتي ..
شوفي الهنهنة الما زي هنهنتك وخمى وصري بقى وأفرزي ليا ناس هناي الأخيرين ديل منو ؟؟ ..

ماكنت قايلاك بتاعة شمارات ياهنايه

هناي دا خل الناس تجي جارية

عشان تشوف الهناي دا منو

اها عرفتو ليك هناي المرتو هناية

بوريك بعدين عشان ناس هناي ديل

مايعرفو هناي دا منو

تخريمة
(وبعدين هناية اتصلت على هناى .... وهناى عايز يعمل فيها تقيل لحدى هناية ماطارت)