هناية ولِدت .. جنا 20 .. ما ربعنت قامت تعضعض !!

حامل ليـها عشرين
أتعبتنا تعب السنين
وضوقتنا الأمرين
إتوحمت وحم شين
تتشهى مرة تونا ومرة ساردين
مرة عنب ومرات تين
فرطت في الطين
حلايب للمصريين
والفشقا للأثيوبيين
ومثلث ايليمي للكينيين
قالت جات حامية للدين
الخدمة المدنية عدمتا الصالحين
المشاريع الاقتصادية لحقتا الزينين
النهب حير المراجعين
سخرت مؤسسات الدولة للتمكين
الاذاعات وفيات ومديح بغنا الفنانين
الفضائيات ناس تنضم كُتر وناس مدججين
الجرائد مراقبين قبليين
دارفور مراقبيين دوليين
الجنوب بقى لقمة في خشم الانفصاليين
والكلام كتير كلكم عارفين
باختصار ولدت ماتمت الاربعين
قامت تعضعض في المساكين
بدت بالترابي والشعبيين
وقبلت على الصحافة والصحفيين
وكلكم شفتو تعذيب أبوذر علي الأمين
جا الدور علي نواب الاخصائيين
الابوابي ما معروف وين
الهادي بخيت لا مع الحيين ولا مع الميتين
غايتو الحاضرين يحدثوا الغائبين
هنايتنا دي نفسا وما تمت الاربعين
البتعضي ما يقول عضاني مرفعين
لا دي هنايتنا برانة هناية التمكين

هناية مرة عضت ليها واحد
مشى الدكتور الدكتور قال ليهو أرجع شوفا
لو لقيتا حية ما حا نديك حقن السعر
وكان لقيتا ميته تعال دربك عديل اخد الحقن
يا حليلو مشى بي كلام الدكتور ورجع ناس هناية يشوفا
أنقرو ما لقاها حية وعضتو تاني

أخت هناية مرة عضت ليها واحد عسكري
قام طاخ رشاها بالبندقية جاب خبرا
مرقت عليهو هناية قالت ليهو حرام عليك مالا عملت ليك شنو ؟؟
قال ليها عضتني
قالت ليهو عضتك ما كان تضربا بالدبشق
تقوم تكتلا ؟
قال ليها هي مالا كان عضتني بي ضنبا ؟

يخونا البوست دا مخصص للعضعيض
عضة نملة عضة سماية عضة كرامة دا كلو ما معانا

عضاني بكى
وسبقني إشتكى

عضيتوا ما عضاني
إذكرتوا قام نساني
ليه أنا مالي

يا محبوب :
العض عايز أسنان والأسنان عايزة كالسيوم والكالسيوم عايز حليب والحليب في ضرع البقرة والبقرة عايزة مرعي والمرعي عايز مطر والمطر عايز سحاب والسحاب عايز شعوب أنفها لفوق مهما الزمن عضَاها بتفوق يا مستبد فُوق .

يا المحبوب
العض ده ماخشم بيوت.

عضة كلب
عضة باب
عضة انامل
وعضت علي العناب بالبرد

وعض يعض عضا

العض ذاتو عندو اسس وأصول واي حاجة فيهو بنظام ‏،‏ يعني عضة الكلب ماذي عضة القرد ‏،‏ وعضة الراجل بتختلف من عضة النسوان،،‏ وعضة السماية ماذي عضة العرس ‏،‏ اي عضه واثرها براهو

قالو الكلب بعضي اي زول الا تب مابعضي يد صاحبو وجيرانو لكن هنايه النفسانه عضت يد صاحبا الترابي واقرانو وحيرانو

الشكر موصول لكم أحبتي الأعزاء على المرور الثر
ونواصل ما بدأناهو بالامس ...

صلى المغرب ..
ومشى زيارة لبيت عمنا عبد الباسط
بعد السلام والتحية والترحيب
قعدوهو في العنقريب
جابو ليهو شاي الحليب المقنن
ريحو تبُق ولا حبة موية ما فيهو
حليب صافي كتحوا فيهو الشاي الصفق
ووزعوا بالكبابة الماخمج
شرب ليهو كباية وحلفوا عليهو يشرب نص
كرطعوا زي السلام عليكم
اللبن ما راقد والحلابين ساي تمانية
والزرائب تقنت من البهائم عينا باردة
ناس توزع في العالوق
وناس تحلب
وناس تصرر
وناس تلملم في البهم
أخد ونستو ونفض صلبوا قام على أهلو
وعمنا عبد الباسط قدموا لي نص المسافة
دخل البيت ومرتو منبطحة قدام البيت ترضع في بنيتا
يدها اليمين ساندا بيـها راسا
واليسار ماسكة بيهو الشطر في خشيم البنية
منتظراهو يجي يجيب اللبن للشاي
وحلة اللبن متكية حِداها
صاح فيـها يا خجيجة .. خجيجااا ... خجيجة ... خجيجاااا
يامرا طرشتي أريتك بي طرش أهلي ديلك
هبت فيهو ياراجل مالك بتداعي في شنو ؟
قال ليـها الكلبة دي عشيتيها ؟
قالت بي صوت مسموع يعلم الله إياهو عمارك مع الرجال
قال ليـها وهو انت وشك دا وش سعاية ؟؟

فلانة النفسانة زعلانة
ربعنت في العشرين وجعانة
علي الدكاترة قامت سعرانة
تعضعض فيهم بإستكانة
والبقول ليها هوي تجيهو جبخانة

قامت بدينة وتريانة
تكرطع في شوربة الضان بالقرفة والهبهان
والعجب الأكل
تلاتة وجبات في اليوم تتخللها فواصل من النشا
بالدخن
وبالحلبة
مش كدة وبس مرات بتخش المدايد والقراريص
بالتمر والعجوة المخلوطة بالموز
طبعاً خلاف مستحضرات دقيق الفينو لزوم اللقيمات والقراصة بالسكر والسمن البلدي
دا كلو عشان إستدرار الحليب للشافع المسمسم دا
بي يديك الاتنين ما بتقِلوا
وشدة الحليب ما كتير بقو يقسمو فيهو على شفع دول الجوار
زي ضل الدليب العمرو ما خت قريب

» هناية النسايه
» زواج هناي و هناية
» قامت اسره دوت كوم بزيارة اسره المزيعه البوردابيه اسراء بابكر لتقديم العزاء