llBreaking Newsمحمد الحسن سالم حميد في رحاب الله

توفي الي رحمة مولاه في حادث حركة مشئوم بصينية الملتقي بالقرب من قنتي
المغفور له باذن الله تعالي الشاعر المبدع الانسان /
محمد الحسن سالم حميد
وبرحيلةيفتقد الشعب السوداني والانسانية شاعرا ضخما وعملاقا جسد في كلماته كل معاناة الشعب السوداني وطموحاته
ولا نقول الا ما يرضي الله
انا لله وانا اليه راجعون

انا لله وانا اليه راجعون.....بفقد محمد الحسن سالم
أختلت اليوم { الدوزنة } الدارجية وفقدت الانسانية
مناضلا عظيما .كان شعره سهلا ممتعا {صعب المعاني والمقاصد}
اللهم أغفر له وارحمه واسكنه فسيح جناتك

اللهم أرحم الشاعر الكبير محمد الحسن سالم حميد بقدر ما قدم لهذا الشعب السوداني من قصائد رائعة ظلت في ذاكرة جميع الشعب السوداني، وصارت مثل الأمثال الشعبية يتداولها الكل، اللهم أرحمة رحمة واسعة، واجعل الجنة مثواه يارب ياكريم

نعم فقد السودان شاعر عظيم له الرحمة والمغفرة

الينجا من كيد البحر .. ما ينجي من إيد المطر
والينجا من إيد المطر .. ما ينجى من كيد الرياح
والينجا من كيد الرياح .. ما ينجي من كيد الفقر
يي دي القدر.. يي ده القدر
يادي القدر ياحميد -
انا لله وانا اليه راجعون

له الرحمة والمغفرة ولا نقول الا مايرضي الله
لاحول ولاقوة الا بالله
انا لله وانا اليه راجعون

و كان بشيل في الموت ذرف دمعات أسى وحرقة وأسف
أو بالـ على الحال نعترف .. كان عند رسول الله وقف

انكسرت جسور الدمعة واندلقت منابع احزانـــه
الله لقلوب مكلومة يوم خبر السواد الجانـــــا
ادمنت العيون الدمعة متوالى الجفون مليانــــه
اغرقت الخدود بى سيله طبعت فى الوجوه اشجانـه
الله من مرارة الفرقه وآه أنا من جحيم احزانـــه
سدت فى الحلوق العبرة لامن بالنويح شرقانـــه
القدر اللعين فاجعنا لفح الفرحه مــــــن تالانا
خلى صبرنا عاضى الجمرة تأكل فى الهشيم جـوانا
الحزن الدخل اعماقنا باقى الى الازل فى حشــانا
لا نوحنا وبكانا يزيلو لابتغسل دموعوا اســــانا
تقودنا خطانا نحو اجلنا مو معروف محل مرســانا
يبرانا الممات وين نمشى شقيش ما نسوقه خطــانا
الدنيا العبوس ملعونه اوعك من تنوم فى امانــــه
ترميلك ضليل خداعه ضامرى وراء مقيلو خيانــه
تتفتح زهور فى روضه تجزب للفراش بالونـــه
من قبل الثمار تتحت قبال ما تجف اغصانــــه
أه أنا من نضارة ورده حين طل المحل بستانـــه
ما إتمهلت تفوح طيبه تبرز للزمان الوانـــــه
وأه أنا من سكيل الوالده وكتين ترثي اعز بطانـه
تفتش فى الخلق كايسالو بيناتن بلا الضهبانــــه
حميد جاك شهيد يا الله .. فارس من أعز شهدائنا
أغسلو بمياه الثلج .. من دنس الدنا وادرانا
خلدو في جنان الخلد و احفظو بين عبادك أمانا
جرتقو من حواري الجنه و اكسي من الحلى وتيجانا

إلى جنات الخلد (محمد الحسن سالم حميد)
إنــا لله وإنا إليه راجعون

الليلة مات اخر شعاع من نور الأمل ...

الى جنات النعيم يا حميد

لا ادري من اعزي فيك يا حميد هل اعزي نفسي ام اعزيكم ام اعزي الوطن المثخن بالجراحات
والفقد اكبر من ان يحتمل ونقولها كما قلتها انت من قبل وانت ترثي رفيق دربك مصطفي سيد احمد ...

زي التكنو قبل دا
ما فارقنا زول بعد الرسول
واللاّ التقول أول قلوب في الدنيا
يغشاها القدر بعدن تضيع منّو الدروب
تنطمبج الساحات حريق
يدغي الطريق المحتمل
كل الفريق سوقر وراك
يا جرحنا الكيف يندمل ,,[

مالهم يترجلون فارسا تلو الاخر
ساحه الابداع في بلادي
من لها؟؟؟؟؟؟؟؟؟؟؟؟؟؟؟؟؟؟؟؟
اللهم اغفر وارحم حميد ومن سبقه من مبدعي بلادي

يعني كان لازم تفوت وتخلي اوتارك سكوت،،يعني كان لازم تفوت وتخلي الحزن مشرور في البيوت،لك الرحمه بقدر ما اعطيت.للوطن...الانسانية...الحرية

نورة ٠٠مطر عز الحرق ٠٠رسايل ست الدار ٠٠طيبة ٠٠شعب اليقان ٠٠عروس الطين ٠٠عم عبدالرحيم ٠٠تفاصيل ماحدث ٠٠كتمة ومطر ٠٠جية الشليل ٠٠اه ياغبش ٠٠سوقني معاك ياحمام ٠٠البحث عن ذاكرة لوطن مفقود ٠٠كرويات الصبر البيضاء ٠٠نادوس ٠٠ياجمة حشي المغبون ٠٠السرة بت عوض الكريم ٠٠ست الدار ٠٠صباحات الله بي خيرا ٠٠مطر الشوارع ٠٠عيوشة ٠٠بنيات الجرف ٠٠عمنا الحاج ود عجبنا ٠٠ انا لله وانا اليه راحعون

إنا لله وإنا إليه راجعون
ولا نقول إلا مايرضي الله
ويرضيك فأنت القائل
ماشكيت شح الليالي
وما بكيت "نُح" شلت حالي
رحمة وسلام عليك في جنات الخلد
مع الصديقين والشهداء وحسن أولئك رفيقا
ووداعاً يا هُدى الناس الحيارى
يا ندى الفجر الببلِّل نور عِوينات الفقارى
وربنا يصبر ناسك الكنت مهموم بيهم
شفع العرب الفتارى
البفنو الشايلا ايدم
ويجرو كايسين القطاره
ناسك الساكنين بى الإيجار .. لا طين .. لا تمُر
وهؤلاء البى الإيجار .. ما لاقين جُحُر
سِلعـتُمْ الضُراع .. والعرق اليخُر
عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
الفِطن الفُرُن
الشغلانتو نار
والجو كيف سُخُن

الى جنات الخلد شاعر الحب والجمال والحريه والسلام محمد سالم حميد

الناس الصابرة .. سنين بالحال .. الما دغرية
القابضة الجمرة في إيدا .. والجمرة تلهلب حية
لا قادرة الجمرة تقيدا .. لا قادرة تولع هيّ
... يا قلبي بلاش نستعجل .. يا قلبي شوية شوية
علمني الشوق نترجل.. نستحمل وجع الجية
... واصلين الما بتأجل .. اليوم الشمشو قوية
لا القش بيهاب المنجل .. لا الطية .. النار .. الكيه
يا صقر الآه يا ريح .. لا تنفض عش قمرية
من حقو يغني صريح .. ذرية ورا ذرية
من حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عرق لا آه نتقادم .. سكتنا بياض النية
مش كلنا جينا من آدم .. ومش آدم ابو البشرية
السجن إذاً يترايم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية

حيكومات تجى.. وحيكومات تغور
تكم بالحِجِى .. بالدجل الكِجُور
مرّة العسكرى.. كسـّار الجِبُور
ويوم بإسم النبى .. تحكمك القبور
هِم يا الفنجرى .. يا الجرف الصبور
كل السمتو مات.. باقى على التِمور
وأرضك راقدِى بور
لا تيراب وصل.. لا بابور يدور

ونقرط للحمار
نقريط الحمار .. لاتنسى النِعال
الطِرقِى الخدار
اللِّبِس الجديد
تسريح السفر .. للماشى الصّعيد
ماشى الدّيش .. نَفَر
والبال إشتغَل
بى الأبى ما يعِيد .. الحول ما أشتغل
الغُبُن الشديد .. السابا ورحَل
الضيق .. المحَل
والفرج القريب
الجا .. وما وصَل
زى الحال ده يوم ..
لا كان .. لا حصَل
والبال إشتعَل
السكة الحديد .. يا عمو القَطَر
يا عبدالرحيم قِدّامك قطر

وسال الدم .. مطر
وطارت دمعتين .. وإنشايح وتر

يا طاحن الخبر
ما بين القضا .. ومَرْحاكة القدر
الشِّهدوا الدموم .. والدمع الهَدَر
إيدُمْ فى التُراب .. والعين فى القطر
عارفين الحصل
عارفين فى حذر
الخبر اليقين .. بوّخ .. وإنتشر
أطفال القرى .. وعمال الحضَر
أدوهو الطيور .. ودَّنوا البحر
إنصاعت سحاب
وإنْدافَقْ مطر
عم عبد الرحيم .. فى الشارع عَصر
لى تال اليسار
متفادى الكَجر .. دورية الكجر
جفّلت الحُمار .. وطلوَح زى حجر
وعم عبد الرحيم .. إتلافا القطر
فتاح يا عليم .. سال الدم مطر
جرتق للتُراب
منشور بى كتاب
روشتّة .. وجواب
ماهية شهر
مفتاح الضراب .. أورنيكين سَهَر
جنب لِبدة حُمار
مقطوعين ضَهر

عم عبد الرحيم ..يا كمِّين بشر
صحِّى الموت سلام
ما يغشاك شر
صحِّى الموت سلام
ما يغشاك شر

(( اليوم غيَّب الموت الشاعر الضخم محمد الحسن سالم حميد الذي لقى مصرعه في طريق شريان الشمال الذي هو عبارة عن شريط ضيق من الاشرطة الاسفلتية التي تحصد الارواح ويسمونها في بلادي طرق سريعة بينما يتهكم من بؤسها مهندسو الطرق وحتى عابرو السبيل.

كان حميد أحد صناع انتفاضة مارس ابريل- عام 85 بشعره مع شعر صنوه القدال والدوش ومحجوب شريف وآخرين ذلك الوهج الشعري الذي كان حادياً لقوافل الذين خرجوا للشوارع وهم يعلنون العصيان المدني ويذهبون بالديكتاتورية الثانية إلى مزبلة التاريخ. حميد احد صناع تلك الانتفاضة المجيدة وقد فرخ اتجاهه الشعري الباذح المئات من الشعراء الجدد حداة الثورة المقبلة التي لا شك في قدومها ونحن نشهد ارهاصاتها حتى في شكل تشييع عظمائنا وهذا الخروج العظيم.ماتم حميد مبذولة مفارشه في كل بقعة في السودان وفي الخارج كما كان الحال في ماتم وردي.وعدد من قادة الفكر والراي والفن.

شعر حميد سيبقى ما بقي هدير موج بسليل الفراديس ، كما بقي شعر خليل فرح والتجاني والمجذوب وغيرهما من شعراء السودان المجيدين. لقد فجر حميد اللغة.بعده أصبحت لغة نوري وما جاورها منتشرة في السودان كله.وجاء حميد بالصور الشعرية الجديدة البديعة مما لم تعهده العامية السودانية من قبل إلا على ألسنة ومخيلات عدد قليل ممن هم صنوه من الشعراء.

والأهم كان قلب حميد قريباً من قلوب المواطنين البسطاء في مختلف شرائحهم وسحناتهم وأعمارهم.هذا فقد جلل يا سودان.فقد جلل.عاش حميد بسيطاً وكابد الأهوال.وكل من وقف في وجه هذه العبقرية الضخمة من أنظمة شمولية ظالمة لن تلقى من محبيه إلا الإزدراء.وداعاً ايها الشاعر العملة النادرة . ألا فليرحمك الله.)) بشرى الفاضل/الراكوبة

ست الدار تتوهدبي ليه كل الناس راحلين الآخرةحدثي نورة وكل نخيلة فاضت روح النفس الطاهرةالتومات فرحن بي جيتو فرشن بساط في الجنة الماهلةاصطفوا ملائكة شالو روح الوطن الفاتت راحلة

بت العسكر
تمشي وتسكر
بت النوبة
تغني طروبة
من الحنِّية
مع عرُّوبَه
تقلب الهوبة
في الراكوبة
على اللالوبة
تشر لي توبة
ترسِّي الغربة
تنسِّي التربة
مآسى حروبة
تكسر الحربة
بعود الحربة
تدق النوبة "
ربُّوا .. يا سودنة ...
بقَّروا الطير رجع
والبلد كع كرَع
ركَّ في الميضنة
دكَّ للميضنة
الهِي ما مئذنة
كانت الميضنة
الهِي ما مئذنة
ضاربة في نصنا
حقنة لي مصَّنا
مدخنة حربنا
مدمنة سبَّنا
وإحنا ما ذنبنا
بي طريق ربنا
جينا لي ها البلد
وإنولد حبنا
ليها لي شعبنا
والله عالم بنا
وعارف الميضنة
الهي ما ميضنة
ساسه مما إنبنى
ماها لي ربنا
ميضنة بشتنة
والرسول كجنة
ميضنة كشتنة
والله قد لجَّنا
من مياضن الدمار
الله هوي نجَّنا
وأبني فينا الوقار

من حميد الي مصطفي ياترا من يرثيكم معاً

كيمان حزن .. لهفي علي اصدقائه ، حبايبه ، قبيلته من الشعراء ، اناديهم جميعا للحزن ،
انا لله وانا ليه لراجعون
اللهم تغمده بواسع رحمتك

معقوله صح هذا الكلام
يا ناس هو حميد ادفن !!
والناس كمان رفعوا الفراش!!
مين البقول ياشعب حي علي الوطن
ومين يلفي عم عبدالرحيم ينجيهو من جور الزمن

انا لله وانا الية راجعون

سعدية احمد حاج التوم كتب:: معقوله صح هذا الكلام
يا ناس هو حميد ادفن !!
والناس كمان رفعوا الفراش!!
مين البقول ياشعب حي علي الوطن
ومين يلفي عم عبدالرحيم ينجيهو من جور الزمن

انا لله وانا الية راجعون

مات اخر الرجال المحترمين ....لك الرحمه والمغفره يا حميد...فجيعتنا اننا لا نعرف قدر الرجال ..ارقد بسلام فقد اعطيت ما استبقيت شئياً ...النخله عندما تموت تظل جذورها ثابته لتحكى قصة عشقها للارض

» الجماعات الباطنية إحتلت السودان وتتربص السعودية والخليج ومصر بقلم سالم احمد سالم
» في ذكرى محمد الحسن سالم حميد
» سوقني معاك يالحمام : محمد الحسن سالم حميد
» حميد السودان فى رحاب ربه
» أنطفات شمعة جسده .... وباق لنا ضوءها ... سالم احمد سالم