رسالة الي امي الحبيبة

رسالة الي أمي الحبيبة
الوالدة الغالية.....الحاجة....
النعمة بت الهادي وداحمد ودالامين الفوراوي.....
أمي الله يسلمك .................
يمة مني ليك...الف ....الف ...تحية وسلام... ازيك ياغالية يا الكل الناس مابتشبهك .....ازيك يارائعة ياحنونة......يا يمة
قالوا الليلة عيد الأم.....وخصصوا ليك يوم واحد في السنة؟؟؟؟وانا من هنا بقول ليك : أنتي عيدي في كل ثانية و في
كل دقيقة وكل ساعة بعيشها ....وأنتي عيدي في بسمتك .....وفي ضحكتك....وفي كلامك ,,,وفي سلامك.............
أمي ربنا لينا يحفظك وفي يوم ما يألمك...أمي يانبع الحنان ....ربنا لينا يسلمك.............. أمي ياحنونة المافي يوم زعلتينا
ولا غضبتينا.....وبكل حنانك غمرتينا...ومافي يوم سمعناك قلتي زهجتوني او عذبتوني..وما في يوم من طلباتنا كليتي....
ولا في يوم مننا شفناك مليتي...أمي بسأل الله لينا يحفظك ..ويغطيك ...ويسترك....أمي يارائعة ياحنونة الليلة بشكيلك
وبقول ليك يا يمة : الغربة صعبة وحارة شديد .....هدت حيلي ...وكبرتني فبل يومي ....والله يا يمة مشتاق ليك كتير...
ويا يمة بذكرك وبذكر قعدتك في الصباح لمن أجي واصنقر معاك في البنبر وانتي بتبردي لي في شاي اللبن المقنن..
واقول ليك يا يمة اتا اليوم مسافر أنشاء الله...... تعايني لي وتقولي بكل حنية :أمشي يا عشاي..ربنا معاك ..يغطيك ويسترك
ومن عين الحسود ينجيك يا ضناي.....امشى يا ولدي سافر والله يجعل ليك في كل خطوة سلامة ..وأنشاء الله ترجع لينا
يا المبروك غانم وسالم.....وفي اللحظة ديك يا يمة اقوم واقلدك....واحضنك شديد ....وفي حضنك بحس بكل الحنان و
التحنان ..وانا في حضنك بشوفك بتضاري الدمعة في عيونك..اقول في نفسي ربنا ما يحرمني من حضنك وضمتك........
وانا ماشي واغالب في دموعي اتلفت عليك واقول يا يمة ماتنسيني من دعواتك ....تبتسمي وتقولي لي امشى ياولدي
قلي وربي رضيانين عنك لي يوم الدين.........والليلة في عيد الام يا بمة طالب رضاك وعفوك ينجيني من جور الزمان
وكل ثانية وكل دقيقة وكل ساعة وكل يوم وكل شهر وكل سنة وانتي طيبة وكل الامهات ...وربنا برحم الاموات.......
وفي ختام رسالتي يا يمة بقول ليك سلام ولوالدنا محمد علي الماجدي (رحمه الله )..........................
( الله ينور قبرك ويوسع مدخلك )
( ويجعل الجنة دارك ومستقرك )
(ونسأله تعالي ان يجمعنا بك في الفردوس الأعلي في سرر متقابلة مع الصديقين والشهداء وحسن اولائك رفيقا )
و قبل أن اقول لي ك وداعا يايمة اقول ليك ....يا منتهي الريد ومبتدأو .[b]

تحياتي يا سامي وربنا اخلي ليك الوالده واديها الصحه والعافيه

سامى الماجدى بركة بالشوفة
وربنا يخلى ليك الحاجة

ألأخ الحبيب وليد العشي
لك التحايا والود ..........
وشكرا علي المرور .....وفعلا طالت الغيبة لظروف قاهرة وغصب عني ......
ورغم عن هذا .....لم اكن غائب عن المنتدي .....تقريبا بدخل كم مرة في
الاسبوع بس متاوقة كدي وبطلع ....بس انشاء نواصل .تحياتي وسلامى
لك .....وللحاجة نورة وربنا يحفظها ويديها طولة العمر ....مع مودتي....

أخي وصديقي ابو الفن مهدي بكش
شكرا ياغالي
وتحياتي للحاجة صفية والعم مصطفي
والاخوان الاعزاء والاخوات وكل الاهل .

سامى ياحبيب مشتاقين كتير والله
كيفك والاولاد
ربنا يخلى الخالة العزيزة الحاجة النعمة ويديها العافية
والف رحمةونور للوالد محمد على الماجدى رحمه الله
تحياتى لك والاسرة وتحية خاصة للخالة النعمة بت الهادى
اشواقى

سلام الأخ الغالي سامي مشتاقين كتير و كيف حالك والأسرة
ربنا يخلي الوالدة ويعطيها العافية والصحة

الاخ الحبيب
والصديق العزيز النزير
لك مودتي ومحبتي .....وشكرا علي المرور..
وتقبل سلام الوالدة وسلام كل الاسرة الكببيرة بالحصاحيصا....
وسلام خاص من الاسرة الصغيرة بالرياض....وتحياتى واشواقى
للحاجة سعاد والاخوان وتحية خاصة للاولاد باستراليا .......
مشتاقييييييييييييييييييييييييييييييييييييييييييييييييييين

ابو الفن الاصيل
الاخ علاء الدين
ليك وحشة والله والشوق بحر.....تحياتي .....سلامي
ليك ولجميع افراد الاسرة الكريمة ..................

الاخ العزيز الفاضل سامي الماجدي يازول يارائع

لك التحيه والتقدير وربنا يديك الصحه والعافيه يارب ويجعل البركة في اسرتك

وسلام للوالده وربنا يطول عمرها وينعم عليها بتمام الصحه والعافيه ...

كلماتك جميلة ومعبره وهي بالتاكيد لن توفي مكاته الام وحقها علينا ..

ولكل ام فارقت الحياه نسال الله لهم المغفره وحسن الثواب وان يجعل الجنه

مثواهم وينزلهم مع الصديقين والشهداء ....

وكل عام وكل ثانيه كل الامهات بخير وصحه وعافيه يارب

الأخ الحبيب جعفر قوليب..
لك والاسرة الكريمة حبي ومودتي......
طبعا أخي جعفر مهما تكلمنا وكتبنا عن الام ...لم ولن ..نوفيها حقها..
ولاكن هو بعض من رد للجميل تجاه والداتنا ...حفظ الله الحيات منهم
واطال في اعمارهم...ورحم الله الاموات منهم وجعلهم من اصحاب الجنان ..
وختاما سلامي للمنقة ولك ودي.....

شكرا اخي الحبيب الاستاذ الرائع
الرشيد حبيب الله ......فهذا الشبل من
ذاك الاسد...ومن شابه اباه فما ظلم ...
تحياتي لك وللاسرة الكريمة..........

لك التحيه والود والسلام وربنا يحفظ الغاليه امك وكل اعضاء المنتدى نتمى الصحة والعافية لامهاتهم بالرغم من الغيبة الطويله الا ان الواحد فينا يتمنى ان يلاقى كل ابناء الحصاحيصا وخصوصا ابناء الحلة الجديدة ولكن عزانا الوحيد المنتدى الحبيب ربطنا رغم بعد المسافات وان طال الزمن وبعد المكان يظل ابناء الحصاحيصا قمة الاحترام والاخوة فلك سلامنا ياسامى الماجدى وربنا يجمعك بامك فى اجمل لحظات السعادة

اخي وصديقي سامي لك وللوالده الحنون كل
التحايا والحب0 وربنا يديم ليك الوالده ويعطيها
الصحة والعافية ويطول لينا في ايامها0
وحبي لكل الامهات
ودمت ولا عدمناك

يا سامي الماجدي نسال الله ان يحفظ امكم وامنا الحاجة النعمة ... وان يمدها بالصحة والعافية ... وان تحضر زواج ذرياتكم جميعاً ...

لكن فتحت على انا بذات بنفس العبارات الكتبتها نار رهيبة نفس هذه العبارات كنت أسمعها من الوالدة رحمة الله عليها .
واخر يوم في حياتها كنت مسافر الي الخرطوم قدمتني الي الباب واعطتني مصاريف السفر وقالت لي ما تتاخر وعندما عدت تاني يوم وجدتها رحلت عن الدنيا ودفنت .
تحكي لي اختي بانها في مساء نفس اليوم بدات تتسال عمر اتأخر مالو وبدات تدعو لي ان أرجع بالسلامة وتسال في الله أن يحفظني من كل شر .

إلهي ومولاي وحبيبي
سلمنا قلوبنا وحياتنا لك لتكون ملكا لك وحدك
فأخذت أغلى مالدينا لجوارك
اللهم إني أسألك
أن ترحمها وتغفر لها وتنجيها من عذابك يوم تبعث عبادك
اللهم اجعل أمي سيدة من سيدات أهل الجنة
سلمنا قلوبنا وحياتنا لك لتكون ملكا لك وحدك
فأخذت أغلى مالدينا لجوارك
اللهم إني أسألك ان ترحمها وتغفر لها
وتنجيها من عذابك يوم تبعث عبادك
اللهم اجعل أمي سيده من سيدات أهل الجنة
واجعل الحوض موردا لها والرسول شافعا لها
واجعل ظلك ظلالا لها والولدان المخلدون خدمالها
والسندس والاستبرق لباسا لها والقصور سكنا لها
اللهم إني أسالك الفردوس الأعلى نزلا لها
بجوار الأنبياء والصديقين والشهداء
وأن تجمعنابها في جنات النعيم يا أكرم الأكرمين
ربي ارحم أمي كما ربتني صغيراً واحتوتني كبيرً
رب اغفر لوالديّ وارحمهما كما ربياني صغيرا
ياأرحم الراحمين يارب العالمين
اللهم آمين .