محطات صغيرة

يلا اتحننوا
عثمان عابدين
osmanabdeen2000@hotmail.com
هل من الممكن اخضاع عدد كبير من السياسيين فى بلدنا الى اطباء نفسانيين لكى تتم دراسة حالاتهم المتاخرة فى التعامل مع الشعب ؟بناء على مردودات سياساتهم الخاطئة والعرجاء التى ودتنا فى 60 داهية؟ ثم هل من الممكن تتبع سيرتهم منذ طفولتهم وكيف بداو السرقة والنهب؟ وهل كانو يلطشون الحلوى من صاحب الدكان وهو مشغول مع زبون ؟ ان ينهبون فلوس العميان ؟ وتطورت العمليات لديهم حتى دخلوا سوق الاوانطة عبر بوابة السياسة ؟
وقناعتى تقول ان لكل مرحلة حرامية .. يقلون ويكثرون بمدى تساهل او مشاركة السلطة الزمنية القائمة معهم وتامرها على الشعب للسرقة وترهل القوانين وعيوبها الكثيرة التى تتيح لمن يسرق ولاية ..النفاد بجلده بينما تجلد من سرق نعلات لانه حفيان ...
اعتقد ان الانكسار الاخلاقى فى اى مجتمع لن ينصلح بخطب فى الجامع اذا كان المسجد فى حد ذاته مسروق من اموال الناس الغلابى ولن يصدق احد الامام فى اى خطبة وهو يداهن ويتملق الساسة الحرامية المادين كروشهم المليئة باموال الناس بدون وجه حق ومتحكرين فى اول الصف يتعوذون لن يصدقه العامة لانه مشارك ووالغ وبطران من ذات الاموال وقاسم معاهم الحتة بالحتة .
وقناعتى تقول ان انتشار الفساد لا يمر بسهولة الا اذا كانت السلطات المعينة تتيح له ذلك وتغض الطرف عنه لان كبراءها هم من ينتجون ذلك الفساد
وحتى يفرح الفاسدون ويتمون ابتهاجهم بالغنائم هم مدعوون لحفل كبير يقام على شرفهم ويجب ان يتخضبوا بالحناء وممكن الواحد يعرس 2 تلاتة اربعة كده " ما القروش راقدة بجميع العملات والرزق واسع والقادر يسوا " وزيادة فى القرضمة والبوبار يحننوا اولادهم المتخرجين وبناتهم المتخرجات فى فللهم الواسعة وستحضر جميع قنوات " ال ت ف ا ه "هذا المحفل .. لكن خوفى ان يستهدفوا وهم فى نشوتهم الغامرة يرقصون " الجيرك" " ما قدام" .. بزلزال بس يقع فى حتتهم دى او انهيار ارضى يخسف بهم الارض زى قارون او تاتيهم الصيحة او تنزل عليهم 10 صاقعات تنسفهم وكلو جايز عند ربك وقبل ما يتمو حنتهم يكونوا اتلحسوا ولحقوا امات طه .
قال لى العجب ود السرة صديقى من ملجة الخضار .. ان الامانى فى كتاب ابو الفرج الاصفهانى ذكرت ذلك وطبعا هوما عارف التكتح " لان الكتاب اسمه الاغانى لابى الفرج الاصفهانى "والسقافة دى طرورة فيها وراسو فاضية لكنه يتنبر دائما " انو نضيف وما سرق اى حاجة مما الله خلفو وانو كتير جدا بات القوى ... "يا زول ها الدنيا دى فيها شنو .. تاكل حق الناس هسى ويبين بعدين .. والزول بلقا جزاو دنيا واخرى " قلت ليه يا العجب ما " تمشى تتحنن مع السياسيين واولادهم الطلبة البتحننو الان لمن يتخرجو بمعرفة ابائهم وامهاتهم .. وهو موسم بغنوا فيهو اغنية" جناى البريدو" رفض العجب ود السرة وقال لى بالنص" انا عايز امشى لى اسرة المرحوم الزعيم الازهرى وتمشى معاى انت للحاجة مريم عقيلة الازهرى ربنا يديها الصحة والعافية .. وبتها جلاء عشان يدونا تفاصيل السيرة العطرة للرئيس وماذا ترك لهم من حاجات وكيف كان سلوكه مع اى حرامى فى السلطة .. نكتب الكتاب دا ونوزعوا مجانا ونضمنو الدستور " حتى تكتمل الصورة" .. عجبتنى الفكرة وحننفذها و" انتو اتحننوا ونحن بنكتب الكتاب "