الصداقة بالنص

( الصداقة بالنص )

صداقة بالنص .. صداقة بالنص .. صداقة بالنص .. لا يهدأ الكمسنجي في النداء على الركاب من صباح الرحمن وحتى مغيب الشمس وهي تودع السوق بحزن قديم يبين في دموعها التي تحاكي الدم من فرط الوداع .
سأل الكمسنجي احدهم :
- الصداقة بالنص ؟
اجابه الرجل بالنفي .. فأشار له على احدي الحافلات ..
- اركب هناك ديك الصداقة زلط .. وواصل نداءه وهو يجول ببصره هنا وهناك في رحلة بحث عن راكب يملأ به المقاعد الشاغرة ويزيل قلق من انحشر في مقعده الضيق وآخر في عجلة من امره لا سيما من ينتظره اطفاله بالفطور .
- عليك الله ختينا الحافلة دي
- ليه ياخ خلينا نركب
- ياخ دي كلها عوارض بورمونا ساي .. ندفع لي منو ونخلي منو
- ياخ ح نركب في الكنبة الاخيرة
- بالله لا اخيرة ولا اولى لوك الصبر خلينا ننتظر الدور الجاي
- والله معاك حق ست الجبنة زاتا فلست بينا خلتنا نضاير من الناس
صداقة بالنص .. صداقة بالنص ..ص
- يا ولدي ما تنزل مني خليني النركب .. حيلي ااتهدَ .. والله اولاد الزمن ده التقول محننين .. بري !!!
- معليش يا والدة اركبي والقفة دي ح ارفعا ليك فوق
- لكن يا ولدي ما بجيها شي ؟ خايفة الهوا الحقا القتس
- ما تخافي عليها ما بتجيها عوجة .
- الله اديك العافية آولدي شاحدة الله الكريم اريحك دنيا وآخرة
وانطلقت الحافلة بعد ان اكتمل العدد وهي تمخر عباب الزلط حتى طرق احدهم للسائق للوقوف في ود الكامل .. وترجل صاحبنا وكاد ان يصيب بعكازته صاحبة القفة التي بادرته قائلة
- هي يا ولدي كان فقعت لي عيني .. انت ساءق ليك كارو .. الله اطولك يا روح .
لتتواصل بعدها الرحلة والصمت يخيم علي من بداخلها كل في همه .. ربما احساسهم بأن السوق قد ضحك عليهم وعادو منه وجيوبهم خاوية الا من كيس صغير به ما لا يسمن ولا يغني من جوع .
- يا ولدي قول ليهو نزلني في دكان فارس .. ما افوتني انا شايلة تقيل . اوقفها السائق عند الدكان مباشرة وانطلقت العربة مخلفة الغبار واحد المارة يلعن السائق ويسب فعلته .... وتحاول الحافلة قطع الخور وتكاد انفاسها تنقطع من عظمته وتئن انينا كأنها تستجدي السائق ان يقف قليلا لتأخذ نفسها وتواصل .
- عليك الله نزاني جمب الجامع لو سمحت .
- ما تخلينا ننزل كلنا مرة واحدة عن دكان حسن امام الدين ...وينزل السائق كل واحد في محطته المفضلة واحدا تلو الآخر لتصل الحافلة القبة وكراسيها تتنفس الصعداء وهي تتمطى وتتقطق ضهرا بعد ان عسمتها الاجسام التي اطالت عليها الجلوس ... لتبدأ رحلة العودة الى السوق

[b]المره الجايه لمن امشي الصداقه في الاجازه حا اركب الحافلات

الصداقة وبس

الأدب اللاتينى من أهم ملامحه إهتمامه بالتفاصيل وبروح الحياة الطبيعية التى يمكن للجميع أن يحسوا بذواتهم كأبطال للقصص أو الروايات بعيداً عن مفهوم (الرجل الخارق ) ، وتمرير الفكرة الأساسية وهى الصراع بين المُستَغَل و المُسْتغِل ، والرمّية دى يا صديق بمناسبة التفاصيل التى تضج بها القصة أعلاه .

مهدي بكش كتب:

[b]المره الجايه لمن امشي الصداقه في الاجازه حا اركب الحافلات

اوعا من الكنبة الورا يا ابو مصطفى

وليد العشي كتب:

الصداقة وبس

والحصاحيصا هي الاصل والفصل

صداح فاروق وراق كتب:

الأدب اللاتينى من أهم ملامحه إهتمامه بالتفاصيل وبروح الحياة الطبيعية التى يمكن للجميع أن يحسوا بذواتهم كأبطال للقصص أو الروايات بعيداً عن مفهوم (الرجل الخارق ) ، وتمرير الفكرة الأساسية وهى الصراع بين المُستَغَل و المُسْتغِل ، والرمّية دى يا صديق بمناسبة التفاصيل التى تضج بها القصة أعلاه .

مشكور اخي صداح على المرور الانيق .. ونتمنى ان نكون على قدر هذه الرمية

المحبوب أحمد الأمين كتب:

صديق الرضي والله سوقتنا من الموقف لمن نزلنا جنب دكان حسن
والله يديك ألف عافية وواصل مش كل مرة تحندكنا يوم وتغيب سنة

( بتقول يومين وتغيب سنة وبلاش تفارق خليك هنا ) و (غيب وتعال تلقانا نحن يانا نحن ) ان شاء الله يا المحبوب

(هبه) بت الحصاحيصا كتب:

أيوااااااااااااااااا

بسسسسسسسس هنا ... نازلين جمب القبه

القبة دي محطة العشي البنزلك هناك شنو يا هبة .. ولا آآآآآآآه ماشة ناس وهبة كان كده خلااااااس

مرحب مرحب ودالرضي وكل الاهل بالصداقة ....

وحاتك كنت قايل نفسي راكب الحافلة دي ؟؟ كلام ممتع وشيق بس

بالله عليك ترجعنا السوق ... وما تنسا انا نازل في النفق قصاد الحلة الجديدة

جعفر قوليب كتب:

مرحب مرحب ودالرضي وكل الاهل بالصداقة ....

وحاتك كنت قايل نفسي راكب الحافلة دي ؟؟ كلام ممتع وشيق بس

بالله عليك ترجعنا السوق ... وما تنسا انا نازل في النفق قصاد الحلة الجديدة

معقولة يا جعفرون ننساك انا زاتي نازل معاك ماشي ناس عمي الطيب معزوم فطور

تفاصيل ممتعة نتمنى ان تواصل فيها - لكن عندما اركب الحافلة اقول للسائق لاتنذل جعفرون قبل النفق بل بعد النفق حتى لاتطول على المسافة

ما في رحله للصداقه ظلط يـ صديق.....

عبداللطيف عوض الله عبدالل كتب:

تفاصيل ممتعة نتمنى ان تواصل فيها - لكن عندما اركب الحافلة اقول للسائق لاتنذل جعفرون قبل النفق بل بعد النفق حتى لاتطول على المسافة

عبد اللطيف يافنان .. شكرا لمرورك ونتمنى ان تمتعنا انت بصورك الجميلة

محمد صلاح صديق صالح كتب:

ما في رحله للصداقه ظلط يـ صديق.....

ولا تزعل يا محمد صلاح وكمان ننزلك في المظلة

الصداقة بالنص وبس