_ تعال هنا يا ولد القروش وينا ؟ انت موش شلت ليك طماطم ودكوة ؟
_ انا ما عندي عنك حساب وقلت ليك المرة الفاتت بنصرف يوم الخميس واديك حسابك كلو !!
_ اجي يا ولدي حسابك ده ليهو شهر اصلو خميسك ده بهل متين ؟ قسمت بي الله المرة الجاية ما تجيب القروش بصلة ما تشيلا .
انطلق وهو يخفي ابتسامة ماكرة كونه نفد بجلده من الحساب هذه المرة ايضا ممنيا نفسه ان يعيد الكرة مرات ومرات .
واخرى تنادي على زبائنها قبل ان تظفر بهم اخرى ....
_ تعالي يا بتي شيلي ليك ورق .. ما ورق السرور .. زارعنو في الطينة .. ولو ما طاعم تاني ما تجينا ..
وبالفعل تعرج عليها صاحبتنا بعد هذا السجع الجميل لتأخذ منها بعض الورق وربطة شمار اخضر .
- بس عليك الله زيديهو لي .. الشوية ديل بعملو ليهم ملاح ؟
_ تستاهلي الزيادة يا بتي .. ما دايرة ليك فجل .. شيلي ليك بصل اخضر لي ابو العيال .. اديك ربطة ولا ربطتين .
وفي داخل الدكان والزباين يشكون الحر من زحمة البرندة الصغيرة والبعض يعطس من رائحة التوابل ..
_ عليك الله مشيني انا واقفة لي ساعة .. والاولاد قربو اطلعو لي فسحة الفطور .. ولسة الملاح ما ختيتو في النار ...
_ حاضر حاضر يا حاجة .. عايزة شنو قلتي لي ؟
_ اديني فحم وبصل وزيت فهد .
_ شيلي ليك ماعون فحم من برة .. وينو ماعون الزيت حقك .. ايوه .. هاك ده البصل .. دقيقة النسجل الحساب .. انتي مالك مستعجلة .
_ والله صاجي لليلة ما ولعتو .. دي قومة من نار الشاي جيت علي الدكان .. اليوم كلو قضيناهو هنا .. الاولاد افطروا متين ؟ تتمتم بكلمات لم يسمعها احد و تنسل خارجة من الزحام.
_ ما تديني انا بصل مكادة وكيس ملح .. وقفتا كتير آولدي والرطوبة بتزيد علي ريحني الله اريحك الله دنيا وآخره .
_ حاضر يا والدة تاني عايزة شنو ؟
_ تسلم يا ولدي بس اديني الباقي ما رحعتو لي .
والساعة تشير الى فسحة الفطور يضج الشارع باولاد المدرسة من الجنسين .. اللبس بالوان مختلفة وغير متناسقة .. هناك من يلبس الجلابية ومنهم من يرتدي البنطلون مع القميص وآخر يلبس فانيلة رياضية حتي شعار ناصر لهو نصيب في هذا العرض المثير .. واحداهن تلبس طرحة ملونة واخري ترتدي الفستان المصنوع من الدمورية البيجية مع بنطلون اسود أظنه لاحد اخوانها و........
وصغار يطاردون بعضهم البعض ويضرب احدهم الآخر بشنطته وآخر يكعبل طريده الذي يقع على الارض وهو يضحك في هستيرياء غير مبال بالتراب الذي عفر ملابسه ... وهم في نشوتهم هذي حتى يفترقون كل لداخل بيته لتناول الفطور .
وتنادي احدى البائعات على زبائنها قائلة ....
_ تعال يا ولد شيل الرغيف الحار ... ما اكمل عليك .. شنو يا بتي الليلة ما دايرين رغيف ؟
_ اديني عشرة عيشات بمشي الدكان واجيك .
_ امشي وتعالي تلقيهو جاهز .. بس حضري الفكة ما تنسي .. وانت داير بي كم ؟ قول لي امك امس ما جبتي حق الرغيفات الشالتهم .. وتنادي على احدهم ...
_ تعال يا ولدي ادي كيس العيش ده لي البت الواقفة في الباب ديك .. واعفي لي آولدي اخرتك من مدرستك .
ويمضي النهار وينحسر ذلك الضل الالفة مودعا يوما حافلا بالحركة والنشاط .. ليعاود الخروج من تحت حائط المرحوم الجراد بعد ان نام مل جفنيه بين العراميس مصبحا علي كل من ينتظره في لهفة وشوق زائدين .
موضوع: دكان عبد الرحمن ( الضل ) 
الإثنين 14 مايو 2012 - 22:57
