صدف في دنيا كل انسان

في دنيا كل فرد توجد صدف غريبه ليس لنا فيها يد
قد تكون صدفه حلوه او العكس
اتمني من الجميع لو امكن ان يكتب لنا عن زكرياته مع الصدف

سوف ابداء لكم بنفسي
وانا طالب بالثانويه العامه بالصف الاول
وكنا في اجازه


اشتغلت ووفرت لي مبلغ وقدره خمسه جنيهات
وكان لي عم في مدينه الرنك
كان لديه مشاريع زراعيه وفي يوم من الايام كان رئس اتحاد مزارعي الرنك
المهم فكرت في زيارته
وعمري ما شفت الرنك ولا اعلم كم تكلف السفريه
وخبرت والدي عليه الرحمه وتوكلت علي الله
من الحصاحيصا الي مدني
ومن مدني الي سنار
ومن سنار الي ربك
ولما وصلت مدينه ربك كان الوقت قبيل المغرب وانا جيعان
ولم يتبقي لي من ميزانيتي الا جنيه ونصف
سالت لما وصلت الموقف وجدت لواري متجهه الي الرنك
سألت كم الراكب
قالوا لي
لو بقدام خمسه جنيهات ولو وري مع البضاعه ثلاثه جنيهات
وبعدين يا ولد ماهو الحل
فكرت ودخلت مطعم وضربت السمك وقلت الحاصل يحصل
وكمان اشتريت علبه سجاير
وقلت الله كريم
حان اذان المغرب
وانا اقول يا ربي انا امش وين
وفكرت ما لي غير المسجد اصلي به وانوم فيه
دا الحل الوحيد
بعد صليت مشيت تاني الموقف ووجدت ثلاثه لواري تخشيبه يعني جديده كرت
وكانت متجهه الي الرنك
فكرت قلت اجرب
قلت لواحد فيهم ماعاوز ليك مساعدي
ضحك وقال لي انت شكلك كدا عامل ليك عمله وهارب من اهلك
لانو دا ما منظر واحد مساعدي
وحاولت اللوري التاني والتالت ونفس المشكله
قالوا لي انت ما زول الشغله دي
قطع شك انت شارد من اهلك واحسن ليك ترجع اهلك وما تتعبهم
المهم زهجت ورجعت المسجد
وانا بباب المسجد
والله اكان اقابل عمي شخصيا
يا ولد مالك بهنا والجابك شنو وكميه من الاسئله
واخبرته اني ماشي الرنك لزيارته
وضحك وقال لي بتعرف الطريق او البيت قلت لا
المهم مشيت معاه دخلتي مطعم وطلب لي اكل
وقال لي انه متجه الي الخرطوم
ومن حسن حظي انا
ان عمي لديه ثلاثه لواري جديده ومتجهه الي الرنك
بعد العشاء ارسل للسائق
وقال ليهو دا ولد اخوي اوصله معاك الي البيت
وناولني عمي مبلغ وقدره خمسين جنيه
قال لي دي خليها معاك مصاريف
وانا راجع الاسبوع القادم
وطبعا اخونا السواق ماقال حاجه امام عمي
ولما ركبت معاه سالني وقال لي من الاول انا قلت انك ما مساعدي
ولما شرحت ليه وضعي
قال لي لو من الاول قلت كنت فهتك