بسبب حوادث بورتسودان وزير الدفاع يلجاً لتقنية "الدفاع الجوي بالنظر"

نظرية جديدة في العلوم العسكرية
نظرية لم تخطر على بال بشر لا من السابقين ولا من اللاحقين
توصل ليها عبد الرحيم حسين بعد دراسات وأبحاث مختبرية ليـها 23 سنة
وسيتم إستخدامها "لحسن الحظ" ضد العدو الاسرائيلي العملنا شغلة يضارب فينا برا سبب !!
مرة سوناتا
ومرة برادو
"ينشِن" علي كيفو ويضرب في العربات وكانو بصطاد عصافير
داك الليلة قام العدو الاسرائيلي بمباغتتنا في زمن صلاة العشا وضرب البرادو خلاها "دقيق"
وكان لابدّ لوزير الدفاع أن يشوف حل لهذه المسخرة
خصوصاً بأننا "صحي" دولة عربية لكن ما عندنا "متاخمة" مع اسرائيل
وبدل تضرب "الماخمين" قامت ضربتنا نحن "المتخمين" ديل
لكن نحن ساهلين ليهم والله أمانة ما يشوفو شوف
فوزير الدفاع من ما سمع الخبر بتاع ضربة البرادو طوالي سافر بورتسودان "كداري"
وعلى فكرة وتماشياً مع الفكرة العبقرية "الدفاع بالنظر" أها أصبح السفر ب"الكُدُر"
وبمجرد وصوله هناك عقد الاجتماعات وخاطب حشود "النفرة"
وأعلن عن أكتشافه لحكاية "الدفاع الجوي بالنظر"
خلاص تاني مافي رادارات وأجهزة الانذار المبكر يبلوها وياكلو "تفالتا"
وسبحان الله الإكتشاف نال إستحسان "المستنفرين" بفتح الفاه وصرة العين
وأبدت الجموع إستعدادها لمصاقرة سواحل البحر الأحمر للمراقبة بالنظر تطبيقاً للإكتشاف
وحسب الشروحات فإنـها دفاعات تعتمد على العين "المجردة"
مجردة من أي غشاوة وتستطيع مراقبة الطيارات والصواريخ من بنجريون إلى أن تصل بورتسودان
ومن المؤكد بأن الفرصة أصبحت مواتية للعيون التي في طرفها حور التي تقتل ولا تحيي قتلاها ياقول جرير
ان العيون التي في طرفها حـور
قتلتنـا ثـم لـم يحيـن قتـلانـا
يصرعن الصاروخ الاسرائيلي حتى لاحراك به
وهن اضعـف خلـق الله اركانـا
بإختصار نظرة واحدة وبردلب تجيب الطيارة ولا الصاروخ أرضاً

طبعاً
أمال أيه ؟؟
"خلي إسرائيلي واحد تاني يجي في المجال الجوي بتاعنا "

كسرة :
تذكرت قصة صديقي اللدود أحمد تُرب عند بداياته في الغربة
وفي ذات مرة سمع بتعينات لخفر السواحل
فرح وجاني ينطط قال "لقد وجدتـها" وكنا عندها مستمتعين بأجواء الكورنيش داخل العاصمة الدوحة
حكى لي التفاصيل وإستعرض متطلبات الوظيفة المتوفرة لديه حينها
قلت ليهو يا أحمد ياخوي القصة دي صعبة وفيها معاناة ومصاقرة للسواحل في المناطق الخلوية
قال لي "عليك الله ما تصعب الحاجات مش ممكن يحرسوني الكورنيش دا" ؟؟
نهايتو غنيت ليهو أغنية الوداع "جياشه واحمد تُرُب نقلو فتاشة"

(( قال وزير الدفاع عبد الرحيم محمد حسين في برنامج ( حتى تكتمل الصورة) في قناة النيل الأزرق رداً على الهجمات الاسرائيلية انه ( نشط الدفاع الجوي بالنظر) .
وكان مقدم البرنامج الطاهر حسن التوم سأله هل أصبحنا سماء مكشوفة ، فاجابه بعد كثير من الهراء و(الكلام المغتغت وفاضي وخمج )، عن اجراءات عسكرية وأمنية وشرطية ، انه نشر رادارات (بدون التركيز عليها لأنها غالباً كذبة ، خلاف عدم جدواها في عصر الحروب الالكترونية) ونشط الدفاع بالنظر ! وقد أثارت تصريحات الوزير سخرية واسعة . ونشر نص الأقوال الأستاذ خالد العبيد بالمنبر العام لسودانيزاونلاين وننشرها أدناه :
(…الطاهر حسن التوم: يعني هل نحنا بعد الإقرار بعدم التوازن بيننا وبين العدو يعني هل نحنا خلاص يعني نقول إننا أصبحنا سماء مكشوفه ؟
وزير الدفاع : لا لا لا ..ما أنا جاييك في الحتة دي … أنا جاييك في الحتة دي بقول ليك أنحنا سوف نتخذ إجراءات وفعلاً أنا مشيت مشيت بورتسودان وأخدنا جملة من الإجراءات ….جملة من الإجراءات العسكرية ….وجملة من الإجراءات التي أوكلناها للشرطة ….و جملة من الإجراءات أوكلناها للأمن وأتخذنا إجراءات عسكرية بحيث إنو نننشط عمليات الدفاع الجوي :بالنظر ! علي طول الساحل والدفاع بالنظر أيضاً الستار . ونشرنا رادارات .
مقدم البرنامج : شنو بالنظر دي ؟
الفريق أول ركن! مهندس !!عبد الرحيم محمد حسين !!- : البي النظر إنو أنِحنا يعني ….مراقبة بالنظر…. للعدو من الساحل !!!
الطاهر : بالعيون يعني ؟
وزير الدفاع:…بالعيون – نشوفوا يعني ….أيوه …)) حريات .

وهو فــــــــــــي شنو ياجماعة ؟؟
"التقسيمة" بقت عالية وجابت ليها "رترته"
الوزارات دي شغالة ب"الجاز"
الدفاع بالنظر والله مبلوعة ومافي مشكلة نرجع لعصر ماقبل الرادارات وأجهزة الإنذار المبكر
ونعاين بعيونا
مع إنو شوف العين ما كتل غزاة
المهم
الولادة بالموبايل دي البقدر يبلعا منو ؟؟
ومن الدفاع نمشي وزارة صحة مامون حميدة الخاصة والخبر أهو :

(( وصل الإهمال قمته حينما ذهبت السيدة مشاعر عبدالدائم التوم شبو إلى الولادة في مستشفى سوبا الجامعي، برفقة زوجها شاكر عمر، الساعة العاشرة مساء السبت الماضي، فانقطع التيار الكهربائي وهي على أعتاب حجرة الولادة، وكان المولد الكهربائي متعطلاً، فطلبت منهم إدارة المستشفى إحضار شموع لاتمام عملية الولادة، إلا أن المولودة الجديدة لم تنتظر وصول الشموع، فهمت بالخروج رغم الظلام والظروف القاهرة، فتم استدعاء حملة أجهزة الموبايل للاستعانة بهم في إضاءة غرفة العمليات، فخرجت المولودة على أنوار الموبايل. وامتعض العديد من المواطنين مما حدث، وطالبوا بضرورة محاسبة مدير المستشفى بسبب أنه عرّض حياة مواطنة للخطر. وناشدوا وزير الصحة الاتحادي أبوقردة ووزير الصحة الولائي مأمون حميدة بضرورة فتح تحقيق في الحادثة. )).

بسبب حوادث بورتسودان وزير الدفاع يلجاً لتقنية "الدفاع الجوي بالنظر" 586751

[b]استاذ المحبوب تحياتي انت تاني ما جاي السودان ولا شنو والله الحقوك بتاع ود مدني

» بعد الدفاع بالنظر جانا الدفاع بـ .......
» بالنظر ... ألقي نظرة بي تلاتة قروش وشيل "كُضمين بالنظر برضو " مجاناً
» استقالة وزير داخلية جورجيا بسبب مقطع مصور تضرب فيه الشرطة مشتبهاً به
» رقص وزير الدفاع في أغنية الليموني "كباشي لو برضى وصلني ودبندة" ومات الأبرياء في استاد سنجة موت الضان
» الضرب وصل لعرين "الأسد" وإنفجار داوي إستهدف مبنى الأمن القومي السوري في العاصمة دمشق ..مما أدى لمقتل وزير الدفاع