رمضان ،،، طرائف وذكريات

اللهم بلغنا رمضان ،،، وأعنا علي صيام نهاره وقيام ليله
وتقبل أعمالنا وأرحمنا وأغفر لنا وأعتقنا فيه من النار

كثيرة هي المواقف والطرائف والحكايات التي عشناها وعايشناها في رمضان
علي مر السنين
وهذه محاولة لإستدعاء بعضها ونحن نستشرف ايامه النضرات

سكنا لفترة طويلة من الزمن ومعي شباب افاضل في بيت عذابه في بري
وكان جارنا الأستاذ / محمد عبد القادر ،،، أستاذ اللغة الإنجليزية ببري يصر علينا
ألا نكلف أنفسنا اي شئ وأن نفطر معهم في الشارع طيلة ايام رمضان
وقد كان استاذ محمد عذب الصوت في قراءة القرآن وكان له حب خاص لسورة الإنسان
وكان يقرأ بها معظم الاوقات في صلاة المغرب
ذات يوم وبعد أن صلي بنا المغرب كالعادة بسورة الإنسان ،، رجع ليجلس معنا
فقلت له ممازحاً : يا أستاذ ،،، نحن اسري ؟ واللا يتامي ؟ واللا مساكين ؟
فقال لي كيف الكلام دا ؟؟؟
قلت ليهو : في صلاة المغرب طوالي بتقرأ : ( ويطعمون الطعام علي حبه مسكينأ ويتيماً واسيراً ) زي البتطاعن فينا
فضحك جداً جداً
ولاقيته بعد زمن فقال لي : تعرف بقيت كلما اقرأ سورة الإنسان اتذكر كلامك وأقعد اضحك

مرة في الحصاحيصا وكان النهار مسخن جداً والعطش شديد
المهم بعد فطرنا قمنا نصلي المغرب
جيت اكبر تكبيرة الإحرام
بدل الله أكبر ،،، قلت الحمد لله
الزول الجمبي ضحك لمن قطع الصلاة
وأطلق علي إسم ( الحمد لله) لزمن طويل

امس يا فضل واحد كان بيحكى لينا
طرائف الغنم فى وقت الفطور : قال مرة بعد قاموا الصلاة
جات معزاية ويبدو أنه هو الوحيد متابعها
قال لامن سمع الصوت شيب شيب قال عرفتها فى الابرى
تانى لمان سمع جب جب قال عرفتها فى البليلة
قال لمان حنكها تقل عرفتها وصلت العصيدة

صلاح كتب:

امس يا فضل واحد كان بيحكى لينا
طرائف الغنم فى وقت الفطور : قال مرة بعد قاموا الصلاة
جات معزاية ويبدو أنه هو الوحيد متابعها
قال لامن سمع الصوت شيب شيب قال عرفتها فى الابرى
تانى لمان سمع جب جب قال عرفتها فى البليلة
قال لمان حنكها تقل عرفتها وصلت العصيدة

جميلة جداً يا صلاح
وطبعاً لو كان سمع المعزاية بتعمل شوب شوب كان قال
( وكمان شربت ليها كباية شاي )

أعجبني زماااااااان كاركتير عن رمضان
بيحكي عن إتنين داخلين في زيرين بتاعين مزيرة لي رقبتهم
وبيتونسوا مع بعض
الأول قال للتاني : رمضان كيف معاك ؟
التاني : كان ما الصبر كان فطرنا زماااااااااااان

رمضان كريم وعلينا وعليكم وعلي الامه الاسلاميه وكل سنه وات طب يافضل

مهدي بكش كتب:

رمضان كريم وعلينا وعليكم وعلي الامه الاسلاميه وكل سنه وات طب يافضل

اللهم بلغنا رمضان وتبقله منا ومنكم يا مهدي
وأسأل الله العلي القدير أن يسبغ عليكم نعمه ظاهرة وباطنه
وأن يعيده علينا وعليكم مرات ومرات عديدات

ويحلو رمضان في الحصاحيصا ومع ناس الحصاحيصا

يا عشي

الاخ الكريم فضل تحية من القلب لك وانت تعد العدة لاستقبال شهر رمضان سائل العلى القدير لك صوما مقبولا واجرا ثابت ....دايرين نكتة الشعيرية عشان منك ليها مذاق خاص

فضل يا رايع
بوست جميل

فضل يا رايع
بوست جميل

رمضان كريم يا سعدية ويعود علينا مرات ومرات

نمشي طوالي لآخر رمضان
زمااااااان كانت زكاة الفطر 1500 جنيه وهي تجب علي كل ذي نفس
المهم
واحد مرتو كانت في الولادة يوم 29 رمضان
جاتو القابلة وقالت ليهو : مبروك جابو ليك تيمان
قال : أمك 3000 جنيه

يحكي عن 2 من اصدقائنا وهم أشقاء
في حي المحالج زمان
إنو أهلم كانو مسافرين في رمضان وهم في البيت براهم
جهزوا السحور وقفلوا الأبواب والشبابيك وناموا علي أمل الإستيقاظ للسحور
شالتهم نومة وواحد فيهم ( م ) صحي وقعد يصحي في التاني ( ق )
قال ليه يا ( ق ) قوم لكني شاكي إنو الوقت إتأخر
( ق ) صحي من النوم وقال ل ( م ) : اسمع ،، ما تفتح الباب ولا شباك ولا تولع النور
خلينا نتسحر أول وبعد داك نشوف الحاصل شنو ؟
وقد كان
ثم فتحو الشباك ،،، يلقوا ليك الدنيا صباح والناس ماشين وجايين