صحو الأشياء

وعز الليل ..
نشوف الويل ..
تدوس صمتك حوافر الخيل ..
يجيك سرّايو متخبئ
ويجيك شليل ..
يولعو في برود حسك
ويقولوا حليل ..
حليل ايامك الزاهيات
أيا جمل الحمل والشيل ..
صحيح هل أنت سوداني
تشد الحيل ؟! ..
صحيح كسّرت يوم سجنك
وعدّلت الغلط والميل ! ..
صحيح قلت البلد بلدك
وما بترضالا ذي ناس ديل ! ..
واذا جبل الظلم يعلو
بيهدو السيل ! ..
وأنك أنت انسان جد
وماك كلبا بهز الذيل ! ..
ويتبع سيدو وين مايروح
ولو جراهو مليون ميل ! ..
صحيح قلت الصحيح واجب
واجبك أنت تبقي شليل ..
ومايغنوك ذي أول
( شليل وينو اكلو الدودو .. شليل وين راح اكلو التمساح ) ...
صحيح هل قلت مابتروح !
ولا برضيك خراج الروح ..
ولا الظلم البزيدنا جروح !
صحيح حتشيل هموم بلدك
ومابترضي البنيتو يروح ! ..
وقلبك فيهو لسع دم
وريحه نخوه منو تفوح ! ..
وحاااار يازول متل أول
ومعناك ما بدرولوا شروح ! ..
بتبقي شرار ونااار وحريق
اذا ما شفت عازه تنوح ! ..
وهسع عازه باكيه وجع
وسألاك أنت هل حتروح ??? ..