قصة ....ليل... شعر / محمد عبد الله برقاوى..

( 1 )
وكت الناس تخت الحيل وفوق ضرعات بعض ترتاح
وتتراقص صور باكر فى ساحات الحلم ... .. تنداح
وترسم عتمة الافاق ظلالا ...... على المسافة وشاح
ويتقسم سكون الهجعة مابين ........ صوت فرح ونواح
************************
تشب عبراتى فى الاحداق ... انا الساكب شقاى اقداح
وبركان الحنين دفاق...........زناد هم ا لفكر قداح
يطير النوم وراء الاشواق....... اسافر بالغيوم سباح
***********************
وحيال كل البكون والكان ... يتمدد خيالى براح
احاول من مدى الازمان. . ألم تذكار صدى الأفراح
يصب دمع الوتر هتان ... واساهر بالشجن صداح
**********************
( 2 )
ومن باب التحدى مشيت احاصر فى الحنايا جراح
غافلت الليالى وجيت .....اباصر باقى حيلى صباح
مع شفق الآمانى جريت اكوس رزقى الحلال ومتاح
على سرج النهار شبيت .طويت ارض الكريم سواح
قلت الاحق الفاتنى واجيب فرق السنين .. .. الراح
**************************
وخايف برضو من هسى. يغيب بصر السنا الوضاح
اتوه وسط الخريف منسى. شموعى تهب عليها رياح
اناجى براى عقاب حسى .. الفى وادى المغارب صاح
وتبدا القصة من اول .الاقى الليل ... طوانى جناح
وواقع حالى ما اتحول ولا...... فجر المباهج لاح
*************************
دولة الامارات العربية المتحدة
30/5/1976 ....... 31/5/2005
ثم المشوار الجديد 1/9/2005 والبقية تاتى ان كان
فى العمر بقية

وكت جيتك لينا ... زاد فرحنا كتير .. وفاح
ونرجو ان لاتسكت عن الكلام المباح
كيف ذاك ونحن بعد لم يدركنا الصباح ....
تسلم يارائع على هذه الدرر ويالا عطر هذه الصفحات بالمزيد ...

الشعر ياراشد يا حبيبى يسرى فينا مسرى الروح فى الجسد .. وهو حقيقة ..وجع الروح الذى نستعذب ..به الحياة.. الى ان تروح هذه الروح باوجاعها .. وتترك الذكرى اثرا على صفحة النسيان .. دمت متذوقا .. وعافاك من كل الاوجاع..

يا عم برقاوي رأيك شنو تعمل ليك بوست مخصوص لاشعارك المكتوبة ولو امكن لروابط الاشعار المغناة كمان.

شكرا الابن /صداح .. وانا مع توسيع الفكرة لتحتوى كل شعراء المنطقة.. وذلك لتعميم الفائدة.. ودمتم..

بالله يا برقاوى ومنعم سيداحمد وركابى وابوحراز .. وكل المبدعين .. كدى اطلعوا لينا بتصور فنى لركن فنى ..محفزا للابداع ... جاذبا للقارئ

وهذا تماما الذى يجول بخاطرى . يا بكرى العزيز. واكيد فى خواطر كثير من الاخوة المهتمين بهذا الجانب .. و حتى يكون التصور ..موسعا وفيه ابتكار.. انا اعتقد فى البداية نبداء بزاوية تخصص للشعراء .. ومن ثم نستقطب عدد من الاعمال ثم يتم تصنيفها.. مع افكار اصحابها لتطوير الفكرة تباعا.. وننتظر مزيد من الاراء والمساهمات..

اسم الله عليك يابرقاوي
لكن بقيتى لنا زي صلاح ادريس
جوكر يعني
مره شمسون الجبار ومرة شاعر
تسلم كتير لكن ما تبقي جافاي وخلي عطاءك غزير قدر ما الله اداك
تسلم

امد الله عمرك الاستاذ برقاوي ...

تحياتى .. المنصورى ..وديسكو.. وتطوير الفكرة .. بتخصيص زاوية للشعر ..واحدة من الهواجس التى نشغلتى ..وننتظر المزيد من المقترحات النيرة .. لتتخمر الفكرة اكثر .. ويدنا على اياديكم سننحز الكثير باذن الله ..وسلمت اياديكم ..

up

ياريت والله لو اتعممت الفكره لتصبح نواه لمنتدي الشعر والادب وماشاء الله المنتدي زاخر بالشعراء والادباء وتخريمه صغيره كده يابرقاوي ونحنا في الغربه القسايه ادونا حاجه صغيره حلوه نلحنها ليكم.

ياأبو مصطفي ،لوعايز نوصلك ببرقاوي ممكن نشوف ليك تلفونو، لانو هو مستقر نهائيا حتي أشعار آخر بالسودان.

يا عم برقاوي ،والله لو عارفين النص ده بجيبك كنا رفعناهو من زمن ،تحياتنا وأشواقنا.

الاخ الغالي صداح مشتاقين ليك شديد ويا حليل ايام مر يخ الحصاحيصا والنهضه وكتر الف خيرك والراجل اتواضع واعطانا تلفونه وان شاء الله نكون قد المقام ونتواصل معه وشكرا الاخ محمد برقاوي الشاعر الاديب.

برقاوي العزيز سلامات، والبركة في منتدى الحصاحيصا الخبرنا (بكانك)، بقت عليك حكاية الزول السمع بي بار جديد في ودمدني من امام الجامع القريب من مكان البار وهو ينتقد افتتاح البار جنب الجامع، وزولك اخد رقدته بعد الغدا وقام ركب عمته وعلى البار الجديد نفر، وهاك يا شكلة مع الاغريقي سيد (الجبنة)، ويا خواجة (ما عيب منك !! خبر البار الجديد نلقاهو عند مولانا امام الجامع) ولا رأيك شنو تحياتي لك والاسرة وكل الاصدقاء، وشكر كبير للاخوة في ادارة المنتدى لكريم استضافتهم ... ولا قدام

لك التحيات / يا باشمهندس..والمشكلة انا ذاتى لحد الأن لا دخلت الجامع ..ولا عرفت خبر البار.. اربعة شهور ..ويا كافى خرمة عدوك.. غايتو لحد الان ..ما نلته ..هو تحديدا.. لقب ..مغترب بالمعاش ..وطبعا من غير راتب .. لك التحيات وللاسرة .. ومتواصلين..