المذيع "عمر الجزلي" إستضاف محمد وراق مدير جامعة الجزيرة
ومحمد عبد الله اسماعيل رئيس الإتحاد العام للطلاب السودانيين !!
ودا كان أمبارح في النشرة المسائية الرئيسية
وما كانت صدفة يقراها عمر الجزلي الليهو زمن شغال برامج "حوارية" بإعتباره من "الحواريين" !!
وطبعاً الأسئلة كانت "خد وهات"
يعني يخشوا بيك بي حمد ويطلعوك بي خوجلي
أو بالأحرى يدخلوك بي بحر حنتوب ويمرقوك بي ترعة النشيشيبة !!
ولو مذيع مبتدي كنا عذرناك وما طالبناك بمهنية ولا بإحترافية "جميل عاذر"
لكن تموت اللعب وترقد قش كأن الموضوع "زيارة البشير للفاو" فدا لا يعقل
رئيس الإتحاد قال السبب في "الإشكال" تنظيمات سياسية إستغلت موضوع طلاب دارفور
وعمر الجزلي ما سألوا عن "الموت" موت ياجزلي وليس شكلة في جريدة حائطية في حرم الجامعة !!
موت ياجزلي لبرالمة الله ساكت وصلهم مدني
وأظنهم لحدي ما ماتو "غرقاً بالرصاص" ما يكونو شافو جزيرة الفيل ولا السوق الصغير في مدني !!
موت ياجزلي وكان تسأل ضيوفك المحترمين هل كان حرق ولا غرق ولا رصاص !!
مش ياعمر تضلل الرأي العام بالشكل الرخيس دا !!
ولو في تنظيمات إستغلت الموضوع طيب الكتل الطلاب ورماهم في الترعة منو ياعمر ؟؟
ما تسألوا مالك ما بتعرف ؟؟
ليك خمسة وتمانين سنة ماسك التلفزيون ياخي ما تخاف الله
الاولاد ديل ما عندهم أهل
أمهات وآباء
إخوة وأخوات
طيب يا عمر لمن جا دور سؤالك لسعادة البروفسير "محمد وراق"
خليت الموضوع خالص وركزت على كلمة "بروف" وشبكتنا
طيب يابروف
طيب يابروف
طيب يابروف
وبالمناسبة "بروف" هي "دلع" لبروفسير !!
يعني تخلي الموضوع الأساسي وتدلع في الراجل يعني هو جابا في شنو ؟؟
ما يا إما في "مرض الموت" ولا "صلاة الجنازة"
عيب عليك يا عمر الجزلي
والله المعبود بالحق عيب
وإنت رجل شائب ناهزت السبعين
وأنجزت أسوأ الكريمات لـ "تغبيش النشرات"
تب الشباب ان بقا كواس
تب الصبى ان قطع المروة خلاص
تب الشايب ان بقى وسواس
تب الاقربين الاتفاتنو الامقاص
موضوع: الجزلي للتوليت والتجميل "كريمات تغبيش النشرة" الكميات محدودة !! بمناسبة إغتيال طلاب دارفور بجامعة الجزيرة 
الإثنين 10 ديسمبر 2012 - 7:45
