كدي شوفو جنس الحكاوي دي
(( إيمانا بقول الرسول صلى الله عليه وسلم "خيركم من تعلم القرآن وعلمه" بدأت مؤخراً فعاليات جائزة الخرطوم الدولية الرابعة للقران الكريم برعاية خادم القرآن المشير عمر حسن أحمد البشير رئيس الجمهورية ...)) سونا
(( جمعية القرآن الكريم إحدى المؤسسات الطوعية السودانية، نشأت في رجب الخير 1409 ، يرعى الجمعية خادم القرءان فخامة رئيس الجمهورية المشير/ عمر حسن أحمد البشير.....)) مواقع
يعني المشير ما كفت
وفخامة ما وفت
دا شنو التِكِلفِت" ؟؟
في داعي لخادم القرآن ؟؟
بصراحة في ناس بسكرها "حد الثمالة" الإطناب
خاصة أولئك "البتمكنوا" من الرقاب
فبكتفوا من غنائم نزواتـهم "المنفلتة" بالألقاب
في حالة ناسنا الدوشوا راسنا
تعاين ليهم تكتشف سر سؤالهم "المتكالب" علي الألقاب
كلو بقى "دكتور"
والماعندو دكتوراة بكون "ملبد" ليهو ماجستير لافحو من "ترعة جامعة النشيشيبة"
وعلى الرغم من غياب أي شرعية لسلطتـهم "الغشيمة"
إلا انه "كان" ممكن تتنزل عليهم الألقاب أمطارا
ومن حيث لا يحتسبون
لو ركزوا في ملامسة هموم خلق الله
لأنـهم غاية الأديان كما يقول أهلنا المتصوفة
وهموم الخلق ذاتا ما شيتاً "كتير"
صحة وتعليم وأكل وشراب
أها ديل قاسيات ؟؟
الحرية ما ضرورية ممكن "فانتا"
والديمقراطية "رجس من عمل الأمريكان"
ولأننا مطعين لأولي أمرنا قمنا إجتنبنا الديمقراطية
لكن ولي الأمر قاموا إتلببوا الأمريكان
وهاموا بعشقهم
وسال سيل اللعاب هطال
وياعازة الجواز بي طال
المهم
لعبوا بكل الكروت العندهم وعند غيرهم
وكان مصير الكروت "النار" كما "الكروش" إن شاء الله
فأي "لحم" نبت من "سُحت" فالنار أولى به
ولا يؤثر في صحة ذلك "بطبيعة الحال"
كونـهم يتمرغون الآن في شركات ذات نفوذ ومال
تاركين لغيرهم سوء "المآل"
والبلد بـ"كلكلـها" إلى زوال
اليومين ديل جاتنا تقليعة زي تسريحة "البوقوجي"
"خادم القرآن المشير" !!
القرآن الكريم بجلالة قدرو يمشي "قدم قدم" مع "المشير" ؟؟
إطرِشنا طرش الرقدو ما سمعنا بيـها !!
القرآن الكريم علاقتو شنو بـ"المشير" ؟؟
ياتو آية من آياتو "أشارت" لجنس الشايفنو دا ؟؟
أهل البلد يلوسو في الصحاري يحرسهم اليوناميد
ياكلو في "لحاء" الأشجار الناشفة
والمركبين "اللحى" مرطبين معطونين في السدر المخضود
والطلح المنضود
والضل الممدود
والماء المسكوب
والفاكهة الكثيرة اللا مقطوعة ولا ممنوعة
والفرش مرفوعة عربا أترابا
ثلة من "الملتحين" وثلة من "المنتفعين"
بالله دا ياتو قرآن البقيتوا تخدموا فيهو دا ؟؟
إلا إذا كنتم قاصدين الترطيبة الفوق دي
في رايي "خادم القرآن المشير" مقلوبة
فمن يخدم من ؟؟
إلا كان محاكاة ساي
وكان ممكن نحاكي بي حقنا زول يقول لينا تلت التلاتة كم مافي
ومافي ود مقنعا يقدر يرفع عينو أو ينتقدنا ويشتكينا لناس "الملكية" الفكرية
مالنا عدمانين ولا صرمانين
ما بي كعبتنا بنيناها بي حقنا
الصفا في والمروة برضو في
الجمرات في والشواطين الطيران الاسرائيلي ما بجيب فيهم خبر
كعبة حدادي مدادي
وفي الساحة الخضراء مكلفانا أكتر من 100 مليون إنتو نسيتوها ولا شنو ؟؟
و"الكلفتة" دفعتا حكومة ولاية الخرطوم براها
ولو دخلت معاها الحكومة الإتحادية يمين كنا سوينا سور الصين العظيم
وبي حقنا
وبدل "خادم القرآن المشير"
تبقى "خادم كعبة الساحة الخضراء"
وبي حقنا
شنو رايك طال "عمرك" ؟؟
موضوع: "خادم القرآن المشير" والله كِدا بقت "تسريحة بُقُجي" طيب لو بقت "خادم كعبة الساحة الخضراء" مالا عيبا لي !! وبي حقنا 
الخميس 10 يناير 2013 - 18:04
