ناس "نجاض" عملو ليهم "كعبة" في الساحة الخضراء لتدريب الحجاج واليومين ديل مضيوفين معاهم "نجاد"

نجاض ونجاد

(( أقامت وزارة التوجية والاوقاف والهيئة العامة للحج والعمرة بولاية الخرطوم مجسما لبيت الله الحرام، على الجزء الشرقي من الساحةالخضراء، وذلك بغرض تدريب الحجاج على كيفية اداء مناسك الحج، وكشفت أن عدد حجاج الولاية بلغ 9522 حاجا وحاجة.

وحذر وزير التوجيه والاوقاف عثمان الكباشي من وصفهم ب"المتنطعين وأنصاف المتفقهين" من استصدار الفتاوي المضللة للحجيج، داعيا أمراء الافواج لجلب الحجاج الى المجسم للتعرف على كيفية أداء المناسك.

وأكد مدير هيئة الحج والعمرة بولاية الخرطوم الدكتور علي شمس العلا أن الهيئة أقامت المجسم بتكلفة 100 ألف جنيه سودانى الغرض منه تعريف الحجاح على كيفية أداء مناسك الحج.)).

تدريب الحجاج على "الحج"
ومع ان الحج عرفة
ومن فاته الوقوف بعرفة فاته الحج
إلا ناس نجاض بدوأ بالتدريبات الخاصة بالسعي
وإمكن السنة الجاية يعملو "عرفات"
وكان علي الصفا والمروة فدي ساهلة
ياربي "الكعبة" دي كلفتـهم كم ؟؟
والدفع القروش منو ؟؟

والله يا المحبوب الموضوع ده طاقة القدر و انفتحت علينا في السودان شوفوا فرص العمل الحتتوفر مطوفين و سواقين حافلات لترحيل الحجيج و بياعين سبح و موية باردة و الكثير الكثير من الفرص

إيناس حبابك والحج السعيد الليلة جابك
والله دي مبالغة وفكرة جهنمية
وعلى فكرة لمن يجتمع نجاد ونجاض لازم يعملوا كدة
الشعارات كلها طلعت زيف والبلدان تعذيب نضيف
والجيران إكتوا بنيران "الكوابيس"
عشان كدة لازم يعملوا نقلة وينزلوا شعارات التدين في أرض الواقع فيهو فيل
بس المحيرني ليه أسقطوا باقي المناسك من البرنامج ؟؟
(( ............وذلك بغرض تدريب الحجاج على كيفية اداء مناسك الحج، وكشفت أن عدد حجاج الولاية بلغ 9522 حاجا وحاجة......)).؟!

لكن الجمرات حا تكون مبالغة
غايتو شواطين السودان يموتو في التدريبات ساي
أها يعملوا ليهم شنو يعني يجدعوهم بي طرور ؟؟
ما لازم حجار وزي ما قلت يا ايناس والله يعيش المساكين في المجانين
بس حا ترتفع أسعار الخرصانة وحا تتجه الكمائن لإنتاج طوب "فلت" تتم تعبئته في شوالات
بس ياربي التدريبات دي لحجاج الخرطوم ولا للحجاج من باقي الولايات التانية ؟؟
غايتو ناس الألقاف خزينة وإتفتحت ليهم وحا يستفيدوا من الإرث الضرايبي ويعملوا رسوم تدريبات
أمال إيه يعني حا تتطوف مجاناً ؟؟ ومن أسي ناوي الحج تعمل حساب التدريبات والله يستر ما تكون إجبارية
بس الحاج لازم يكون تفتيحة وينقش الطريقة من أول طواف لكن لو الواحد قعد يتمحرك إياهو الفايتو الحج الرسمي
تخريمة :
الحجاج يعملوا حسابهم خاصة الشباب
ما يقوموا يتدربوا علي الحج ويتجاروا في الساحة الخضراء يقوموا ناس نجاض يودوهم الدمازين وندخل في عقار وما عقار !

والتدريبات علي الحج حاتشمل كل ربوع السودان ما ممكن تكون للعاصمة بس
لانو ما معقول ناس الخرطوم يحجوا ونكشف ليهم الامتحان والباقيين جايين علي عماهم
أها التدريبات ذاتا بتقتضي تدريب الحجاج على المواقيت المكانية
أهو المواقيت الزمانية بتحددها الوزارة بالتنسيق مع اللجان الحا تنبثق
ودي ذاتا ممكن تنعش إقتصاد المدن وتعيد ليها رونقا
خاصة المدن المتاخمة لحدود الخرطوم من القبل الاربعة
الجيلي للحجاج الجايين من الشمال
وجبل اولياء لحجاج لحجاج النيل الابيض
والعيلفون لحجاج شرق النيل والبطانة
والمسيد لحجاج الجزيرة والنيل الازرق لو بقو معانا شفتو كيف ؟؟

بالله عليكم الناس ديل لو جابوا بروجيكتر ما كانوا وفروا القروش دي لحاجة تانية ؟؟
غايتو كل يوم طالعين بي تقليعة
وللأسف مالاقيين غير مقدسات الشعوب
بعدين منو الإشتكى ليكم من شتارة حجاج ولاية الخرطوم ؟؟
ومنو القالوا ليكم مشى الأراضي المقدسة وجا راجع قال غلبو يحج ؟؟
أسي كان ما بعرف كلو كلو كان باريت الناس ساي ما بحج وبجي في أمان الله ؟؟

اخى المحبوب
السلام عليكم ورحمة الله وبركاته
وزي ماقلت دي طاقة فيها خم لناس ( هيئة الحج والعمرة )
كمان دي فكرة تمام التمام لناس وكالات السفر والسياحة
والسماسرة والوسطاء ان يقوموا بتدريب الناس الماشة حج وزوقة
ويعطوهم تدريبات كيف يتم عمرته او حجته ويكب الزوقة
ويعلموهم فنون الزوقة (وبرضوا برسوم )
وبعدين ياستاذ المحبوب كل سنة بعملوا ليهم برامج
وبقولوا عشان تجود ليهم العمل فى السنة القادمة
ولكن برضو السنة القدمة تطلع عنهم مشاكل والناس
ترجع من الحج وهي غاضبة من هيئة الحج والعمرة
من سوء الخدمات
وربنا يصلح الحال
ودمت
المغربى

الحكومه عملت كعبة فى الساحه الخضراء احمدك يارب اتحلت مشكله وتانى بدل الزحمه فى السعوديه نعمل تخفيض فى رسوم الحج ونضرب السعر ونخلى الناس تجى تحج عندنا وكويس انا مكتبى جمب الساحه اعملو فندق للحجاج واحفر بئر ونبيع مويه زمزم سودانيه والله الحكومه فاتت فرعون ذاتو قال انا ربكم الاعلى ديل بنو الكعبه وبى الحجم الطبيعى لبيك لا شريك لك لبيك ان الحمد والنعمة لك والملك

الصادق المغربى كتب:: اخى المحبوب
السلام عليكم ورحمة الله وبركاته
وزي ماقلت دي طاقة فيها خم لناس ( هيئة الحج والعمرة )
كمان دي فكرة تمام التمام لناس وكالات السفر والسياحة
والسماسرة والوسطاء ان يقوموا بتدريب الناس الماشة حج وزوقة
ويعطوهم تدريبات كيف يتم عمرته او حجته ويكب الزوقة
ويعلموهم فنون الزوقة (وبرضوا برسوم )
وبعدين ياستاذ المحبوب كل سنة بعملوا ليهم برامج
وبقولوا عشان تجود ليهم العمل فى السنة القادمة
ولكن برضو السنة القدمة تطلع عنهم مشاكل والناس
ترجع من الحج وهي غاضبة من هيئة الحج والعمرة
من سوء الخدمات
وربنا يصلح الحال
ودمت

المغربي

بس انا خايفه يامغربي يجي واحد من المتنطعين وأنصاف المتفقهين راكب فيل و يقول داير يهدمها .. نشوف طيور ابابيل فوقنا !!
انشاء السنة الجاية حاج يامغربي بس فى الكعبة الاصلية قول آآآآآآآآآآآآآآآآآآآآآآآآآآآآآآمين

عارف المشكلة وين هسى يا المحبوب محتارين فى رمى الجمرات يرجمو منو والا منو البلد كلها ابالسه

عارف الكعبة بنوها بى كم بى مائة مليون والناس مقاطعه اللحمة

وتانى يا المحبوب افتح خشمك دا وقول الحكومة كعبة تكون اتلومت عديل ديل حيعملوا كعبة عديل مافي حكومة سبقتم عليها

المغربي انا دخلت ليك واسطه مع الجماعة ديل حنشغلك مطوف كيف معاك؟؟؟؟

يا مغربي ما تحسبا بي حيدفعوا ليك كم .. شوف كمية الخلق الانتا حتطوفم من الحصاحيصا و من رفاعة و من شلعوها الخوالدة ده غير بقية الولايات و الدول المجاورة الحكاية فى النهاية اجر والاجر تلاقيط ولا ما كدا

[quote="المحبوب أحمد الأمين"]

لكن الجمرات حا تكون مبالغة
غايتو شواطين السودان يموتو في التدريبات ساي
أها يعملوا ليهم شنو يعني يجدعوهم بي طرور ؟؟
ما لازم حجار وزي ما قلت يا ايناس والله يعيش المساكين في المجانين
بس حا ترتفع أسعار الخرصانة وحا تتجه الكمائن لإنتاج طوب "فلت" تتم تعبئته في شوالات
بس ياربي التدريبات دي لحجاج الخرطوم ولا للحجاج من باقي الولايات التانية ؟؟
غايتو ناس الألقاف خزينة وإتفتحت ليهم وحا يستفيدوا من الإرث الضرايبي ويعملوا رسوم تدريبات
أمال إيه يعني حا تتطوف مجاناً ؟؟ ومن أسي ناوي الحج تعمل حساب التدريبات والله يستر ما تكون إجبارية
بس الحاج لازم يكون تفتيحة وينقش الطريقة من أول طواف لكن لو الواحد قعد يتمحرك إياهو الفايتو الحج الرسمي
تخريمة :
الحجاج يعملوا حسابهم خاصة الشباب
ما يقوموا يتدربوا علي الحج ويتجاروا في الساحة الخضراء يقوموا ناس نجاض يودوهم الدمازين وندخل في عقار وما عقار !

ناس الحكومة ديل قايلين الحج دا لف ودوران حول الكعبة مافي حاجات تانية ومشي بالكرعين يقول ياليل اها دا حيحلوهو كيف،انا خايفة ناس الحكومة ديل يتطوروا يقولو انو الحج بس في الساحة الخضراء ويغني عن السفر للسعودية صراحة يكونوا سهلوا على الناس زاتو مشقة الحج
والله ديل مايسو كعبه ديل ممكن يقولو ليك الحصاحيصا دي المدينة المنوره شي عجيب يبقي عندك مكة والمدينة والذهاب من الخرطوم قصدي من مكة الى المدينة فقط حوالى ساعة ونصف غرائب وعجائب

الشكر كله لكم أحبتي الصادق وايناس
اليوم في خبر منشور في حريات
عن إنهيار مبنى العمليات في مستشفى أم درمان
والمية مليون مش كان أولى بيـها هذا المستشفى
مش أحسن من المجسم القاطعنو من راسن دا ؟؟
يعني زمان يقول ليك فلان حصل ليهو إنهيار وودوهو المستشفى !!
أها أسى المستشفى ذاتو بقى ينـهار يودوهو وين ؟؟
بالله عليكم دي حالة دي ؟؟
يارب تقف مع مرضى المستشفيات

ناس "نجاض" عملو ليهم "كعبة" في الساحة الخضراء لتدريب الحجاج واليومين ديل مضيوفين معاهم "نجاد" 28455588

ناس "نجاض" عملو ليهم "كعبة" في الساحة الخضراء لتدريب الحجاج واليومين ديل مضيوفين معاهم "نجاد" 28455588

كما قال استاذنا ازهري محمد على

كترعوج الكلام والميل
وتحت الجزمه مليون ميل
تحت الازمه
طاحونه حوافر الخيل
سقط تلت البلد عفوا
سقط نص البلد لهوا
سقط كل البلد سهوا
فهل صحاك ضمير الامه
فى هجعه هوايد الليل
يامطلوق
على زبد الغنا الممحوق
شنو الخلاك تنوم تحلم
على خرطه وطن مسروق
وطن فى السوق
وطن اشتر
مرق من ذمة التاريخ
على ذمة كلاب الحر
ينوم بجبة الدرويش
يقوم ببدله العسكر
فيا ويلك فى يوم الويل

إيناس كيفك
والله العظيم بقينا نبكي ونضحك في تمام الوقت
وإنت في أزهري ولا في البقولو

متى ما أردت َ القرب َ مني فنادني ألا يا رسول ُ الله إنيَّ مغرمُ

عليك َ صلاة ُ الله ثم سلامُـهُ ألا يا رسول ُ الله إنيَّ مـُغرَمُ
صببت ُ دموعاً يـشـهد ُ الحزن أنـها أتت من فؤاد ٍ بالغرام ِ متيمُ
وليس له من ذا التتيم ِ مـُـشرِحاً سوى أن يرى معشوقـهُ فيسلمُ
يقول ُ ليَّ المعشوق ُ لا تخشى بعد ذا حجاباً ولا طرداً فعهدي متممُ
متى ما أردت َ القرب َ مني فنادني ألا يا رسول ُ الله إنيَّ مغرمُ

أجيبـُك َ من بعد ٍ وإني جليس ُ من بحبي مشغول ٌ بذكري مترجمُ
حلفـت ُ يميناً أن قلباً يـُحبكم عليه عذاب ُ النار ِ قطعاً محرمُ
فكيف َ لمن قد شامكم كل ساعة ٍ فهذا يقيناً في الجنان ِ يُنعمُ
سلامٌ عليكم وسلامُ يـُنيلـني كمال َ شهود ٍ بالجمال ِ ويـُلهِمُ
لساني تحياتٍ تليق ُ بقدركم أكررها في حييكم واهمهمُ
سلامٌ على رأس ِ الرسول ِ محمدٍ لرأس جليلٌ بالجلال ِ معمعمُ

https://www.youtube.com/watch?v=ftKEKzJGTmE

بالله عليكم أسي الدائر تدريب منو ؟؟
ناس بنضموا جنس النضم دا تاني دايرين ليهم تدريب ؟؟

وكمان نسمع الشيخ علي المبارك في "شوقك شاويني" عشان نعرف من يدرب من !!

https://www.youtube.com/watch?v=kXHHxF7BC08&feature=related

100.000.000 "مية مليون"
الحج ما عندنا فيهو كلام
لكن ياربي تخلف علينا

نكتة نظيف في الحج الظريف

((من النكات التي برع المصريون في نسجها في نظامهم السابق ورئيسه المخلوع حسني مبارك واحدة تقول أن الرئيس مبارك إحتاج ذات مرة لتغيير كمية من العملة المحلية إلى دولارات ولكنه لم يجد دولاراً واحداً لا في البنوك ولا الصرافات ولا حتى السوق، فاستشاط غضباً واستدعى رئيس الوزراء أحمد نظيف وصرخ في وجهه، ليش ما فيش دولارات هل نظفت السوق منها يا نظيف، رد نظيف بكل لطف وأدب، الحج والعمرة يا باشا خلصوا على كل الاحتياطي، قال مبارك وهو ما يزال على هياجه، بقولك إيه، حج إيه وبتاع إيه، من السنة اللي جاية الحج يبقى عندنا هنا في مصر، قال نظيف بصوت خفيض وكسير، إزاي بس يا باشا، رد مبارك بعنف إتصرف ياخي، خرج نظيف من عند الرئيس وهو مهموم ومغموم بسبب هذا الأمر المستحيل، ولكنه بعد يومين عاد إلى الرئيس وقد علا وجهه البشر وبدا على محياه الارتياح وقال للريس بثقة وإعتداد كله تمام يا باشا خلاص الحج حيبقى عندنا، قال الريس طب الكعبة حتعمل فيها إيه، رد نظيف حنعملها في ميدان الحجاز بمصر الجديدة ويبقوا يلفوا حواليها، قال الريس طب والسعي، رد نظيف يا باشا يبقوا يجروا في طريق صلاح سالم لغاية المطار ويرجعوا، قال الرئيس وعرفة، رد نظيف يطلعوا جبل المقطم يا باشا، صمت الرئيس لبرهة ثم قال طب ورجم إبليس يا فالح، وهنا أسقط في يد نظيف وكان قد بلغ به الضيق مبلغاً جعله يتحلى بشيء من الشجاعة فرد بتبرم إتعب معانا شوية بقى يا ريس…

والآن عزيزنا القارئ اذا شهدت في مقبل الايام بأي شارع من شوارع مدن العاصمة الثلاث رهط من الناس وهم في لباس الاحرام يعتلون صهوة بوكس أو دفار أو حافلة يرددون التلبية لبيك اللهم لبيك لا شريك لك لبيك إن الحمد والنعمة لك والملك لا شريك لك، فلا تستغرب أو تظن أن القيامة قد قامت، فهؤلاء حجاج «منتظرون» في طريقهم إلى الساحة الخضراء للتدرب على كيفية أداء مناسك الحج ومنها الطواف على مجسم للكعبة أنشأته خصيصاً لأغراض التدريب وزارة التوجيه والاوقاف بولاية الخرطوم بالاشتراك مع الهيئة العامة للحج والعمرة الولائية بكلفة بلغت مائة ألف جنيه أي مئة مليون بالقديم، ولسنا هنا بصدد المجادلة حول مدى شرعية وجواز مثل هذا العمل من الناحية الفقهية والدينية أو عدم جوازه، فذلك من إختصاص الفقهاء التقاة الثقاة الذين نعلم أنهم إختلفوا حوله، منهم من أباحه ومنهم من حرّمه، كما نعلم أيضاً أن الفكرة ليست من بنات أفكار وزارتنا وهيئتنا الخرطوميتان، وإنما هي قديمة سبقت إليها بعض بلدان الشرق ومنها بلدة حماة بسوريا التي نفذها فيها أطفال روضة «happy home» – هابي هوم- إننا هنا لنسأل بكل صيغ الاستنكار، هل بناء مجسم تدريبي بكل هذه الكلفة العالية من حسن الصنيع ام سفهه في ظل الظروف الاقتصادية الضاغطة التي تعيشها البلاد لدرجة جعلت الحصول على لقمة تقيم الاود وتقي شر الجوع امراً عصياً يحتاج الى مجاهدات ومكابدات، ثم ماذا تفعل البعثة وعشرات الامراء الذين تستحلب نفقات الصرف عليهم من جيوب الحجاج ان لم يكونوا يقومون على ارشاد الحجاج وتوجيههم، ثم ماذا تفعل الوزارة والهيئة في بقية مناسك الحج وشعائره غير الطواف الذي انشأت له مجسم، فماذا تفعل للتدريب على السعي بين الصفاء والمروة، وماذا تفعل في جبل عرفات هل تذهب بهم الى جبال كرري او طورية، وماذا تفعل مع واجبي المبيت بمنى ومزدلفة هل تبيتهم في الساحة الخضراء نفسها، ثم ماذا تفعل مع رمي الجمرات، ان لم تكن الوزارة والهيئة قد اقامتا مجسمات بعدد اركان وواجبات الحج الاخرى فان تدريبها هذا يظل ناقصاً وباطلاً ولا نظير له إلا ما جاء في نكتة نظيف ومبارك التي رويناها )). / حيدر المكاشفي / حريات

يا المحبوب (المحبوب )

موضوع دا زكرني الحلفاوي البقوهو امير حجاج وبقي يشرح ليهم في مناسك الحج
والجماعة يسمعو فيهو باهتمام شديد وتركيز .... ذي عجبو التركيز دا !!!!!
قام قال ليهم :
(والله تسمعو كلامي دا وتوجيهاتي دي نلحق العيد في اهلنا ومع اولادنا )

تاني مافي تدريب للحلاقين باقي عندنا صالون حلاقة ما شغال
اصلو الراس بقي بعشرة الف

اسفين للحلفاوة
الحلفاوي في مني نام ومتوسد حجر وما عندو خيمة المهم ما مرتاح في نومتو اتلفت شمال ويمين
قال : بالله السماني احمد عالم دا كان ببيت وين
كمان يحلف ( والله ما احلي المبيت علي مني ....)

الحج بتاع ناس "نجاض" كان أمبارح على قناة الخرطوم الفضائية
والتدريبات بدأت بالفعل وقام بالشروحات البروفسير صلاح عوض
استغرق البرنامج أكثر من ساعة وسجلوا في شمساً كانت حارة
البروف كان لابس إحرام ومعاهو واحد تاني والبقية بملابسهم العادية
لكن كلهم كانوا برددوا في التلبية حتى المرافقين اللابسين جلاليب وبناطلين
وأغرب حاجة في الطواف كان الرجال ماشين قدام وزي مرتين ماشات في الآخر
وطوال البرنامج فالتركيز على الرجال والعدسة ما جابت المرتين إلا في خيم منى ومزدلفة
مقدم البرنامج إسمو البراء بدر الدين وبذل مجهود جبار مع البروفسير
المجسم بتاع الكعبة الحق بيهو مقام سيدنا ابراهيم وحجر اسماعيل
وجابو ليهم حديدة مدلدلة وقالوا دا الحجر الأسود وبالفعل واحد قبلو
لم أتبين المجسم مصنوع من شنو لكن اللون أقرب للبني من الأسود
حول الكعبة في بلاط زي متر من كل الجهات وأظنو بدون اسمنت
والمساحات الفاضية تراب ساي عملوا فيـها بقية مناسك الحج
الصفا والمروة زي اللافتات البتلقاها في الظلط وإنت داخل الكاملين
لكنهم وضوا كتل صغيرة خرصانية في موقعي الصفا والمروة
وعملوا عراضات زي بتاعة الكورة قالوا ديل العمودين الأخضرين
وعملوا زي تلاتة خيام وشغلوهن مرة منى ومرة مزدلفة
لكن اللفتة في محل الرجم فكان عبارة عن تختة من الحديد
وآخر شي كان الأدوات الصحية ركبوها في خشب يعني حمامات
ونبهوا الناس لطريقة شطف الحمام وإستعمال الماء البارد والساخن
وقالوا لازم الحجاج يبقوا حضاريين في إستعمال هذه الأدوات
وإنتهى البرنامج بالتلبية وقد ظهر الإعياء على البروفسير من الحر والعرق
و إختتمه البراء بالدعاء بأن يتقبل الله حج التدريبات ولا تدريبات الحج ما عارف
نهايتو ربنا يعوضنا خير في المية مليون والجاتنا في مالنا سامحتنا

أختنا الدكتورة سعدية ليك التحية والتقدير
وإن شاء الله ربنا يوعدك بيـها
وكان مالحقت الحجة فالتدريبات

وعلى ما يبدو فإن البناء كان شكلو ثابت
أكان دايرين يشغلوهو عمرة بعد الحج ماعارف

(( جاء في الأخبار أن وزارة التوجيه والأوقاف والهيئة العامة للحج والعمرة بولاية الخرطوم قد أقامتا مجسماً لبيت الله الحرام، على الجزء الشرقي من الساحة الخضراء،
وذلك بغرض تدريب الحجاج على كيفية أداء مناسك الحج، وأكد مدير هيئة الحج والعمرة بولاية الخرطوم أن الهيئة أقامت المجسم بتكلفة 100 ألف جنيه (يعني مية مليون بالقديم) !

يقينى أنها البداية لإنشاء (المعهد العالي لتدريب الحجاج) فقد إكتشف المسئولون(فجأتن) كما يبدو أن الحاج (السوداني) ضعيف في أداء هذه الشعيرة مما إستدعي تدخل الدولة لعلاج هذا الضعف بجعل التدريب إلزامياً لكل من يود أداء هذه الشعيرة ، فالحج كما نعلم مؤتمر إسلامى يضم كل شعوب العالم لذلك لابد من وجود معهد كهذا حتى لا يذهب لهذا المؤتمر من لا يعرف أداء شعائر الحج ويقوم (يجلط ) و(يشرط عينا) !

بالطبع لابد لكل زول (ناوى الحج) أن يقوم بملء أورنيك (تدريب) بالشئ الفلانى ترفق معه (كم صورة) يتم أخذهما بالأستديو الذى إنشئ خصيصاً لذلك ثم يقوم مقدم الطلب بتحديد (عدد اللفات) التى سوف يقوم بهما حول المجسم حتى يستطيع التدرب ومن ثم النجاح فى الإمتحان النهائي للحصول على رخصة (حاج متدرب)!

- أها يا حاج عاوز تلف كم لفة !
- سبعة لفات بس
- يا حاج هسه 7 لفات ديل بتكفيك عشان تتعلم الطواف ؟
- خلاس خليهم عشرة لفات !
- ما بنفع يا حاج .. لازم مضاعفات السبعة يعنى يا 14 يا 21 يا 28 !!
- واللفه بي كم ؟
- بي ملابس أحرام وللا بدون ملابس إحرام
- ليه؟
- لو بدون ملابس أحرام اللفة بي خمسة ألف ولو بي ملابس إحرام اللفة بى ألف واحد بس !
- خلاس دى 14 ألف أدينى 14 لفة بي ملابس إحرام (مواصلاً) وملابس الإحرام دى بي كم؟
- 200 ألف بس يا حاج !

ولأن شعيرة الحج (ما طواف وبس) وحتى يكون التدريب مكتمل الأركان فسوف تقوم إدارة المعهد العالي لتدريب الحجاج باقامة مجسمات لبقية واجبات الحج (لتكتمل المقررات) حيث يتم إنشاء مجسم (لمكة) وآخر لعرفات وثالث لمزدلفة ورابع لمنى حيث (يتمرن) فيه الحاج على كيفية رمي (جمرة العقبة) وأيضاً مجسمين للصفاء والمروة حيث (يتمرن) الحاج علي السعى بينهما ثم التدرب على (رمى الجمرات)!

وإذا علمنا أن (مجسم) الكعبة الشريفة – موضوع هذا المقال - قد تم بتكلفة 100 مليون جنيه فلابد للمجسمات المكملة (للمشروع) أن تتجاوز المليارات .. وكلو يهون في سبيل أن يصبح حاج (المشروع الحضارى) حاج (متدرب) وحائز على شهادة (الأوزو) فى أداء المناسك ! وحتي يصبح الزول (الناوى الحج) لائقاً لممارسة هذه الشعيرة فلابد له الجلوس للأمتحانات العملية التى يجريها المعهد العالي لتدريب الحجاج والنجاح في كل المواد :
- يا جماعة أنا إسمى ما مكتوب مع الناس الناجحين ديل ليه؟
- يا حاج إنتا عندك ملحق في مادة : رمى الجمرات !
- خلاس نمتحنا تااانى
- تمتحنا تانى سااااكت كده ؟
- كيف يعنى؟
- ما لازم تدفع حق (الحصحاص) الح تجدعو ده تاني !

بعد أن تصبح (رخصة حاج متدرب) التى يصدرها (المعهد العالي لتدريب الحجاج) وثيقة هامة وشرطاً من شروط السفر لأداء الحج تثار كثيرا من التساؤلات من بينها سؤال جوهري
هو صلاحية سريان هذه الرخصة وهل يمكن أن يحج الحاج بواستطها الشخص أكثر من موسم حج؟

- (موظف الجوازات) : يا حاج رخصتك دى (مفوته) .. أقرأ هنا تاريخ الصلاحية .. بيقول هذه الرخصة صالحة لثلاث مواسم حج فقط .. وإنتا دى الحجة الرابعه ليك
- يا ولدى أنا إتدربتا .. وحجيت تلاته مرات بعد الرخصة .. يعنى عملتا القصة دى (عملي) تلاته مرات .. معقول أغلط فيها !
- لازم تمشى تتدرب تانى .. يا حاج كل شئ وارد .. مش ممكن يكون جاك (زهايمر) ونسيت القصة دى وكده !

نسبة لأن المسئولين حريصين غاية الحرص على أداء المواطنين لهذه الشعيرة خاصة أولئك الذين لا تسمح لهم ظروفهم (التدريب العملي) فقد تم عمل شهادات (إعفاء من أداء التدريب) يتم إستخراجها من مكاتب المعهد العالي لتدريب الحجاج ! (وكل شئ بي تمنو)!

كسرة :
بعد النجاح المنقطع النظير الذى سوف يجده المعهد العالي لتدريب الحجاج (في تجفيف جيوب الحجاج طبعن) ... يفاجأ المواطنون بإعلان عن قيام المعهد العالي (الإلزامي) للتدريب علي النطق بالشهادتين !

كسرة تااااني :
والله نحنا ما عارفين جدوي مشروع زى ده شنو؟ بينما 240 الف تلميذ فى ولاية الخرطوم ما قاعدين يفطروا .. الناس دى ما نصيحة وللا شنو؟ )) .الفاتح جبرا

» "خادم القرآن المشير" والله كِدا بقت "تسريحة بُقُجي" طيب لو بقت "خادم كعبة الساحة الخضراء" مالا عيبا لي !! وبي حقنا
» الساحة الخضراء في الحصاحيصا (شاهدوا الصور )
» نصر "الحجاج" السلمي ، و"نصر" الحجاج "الثقفي" ، وميلودراما سعيد بن جبير
» الجن بداوة كعبة الاندراوة !!
» عفوا سيدي الحجاج