شباب شارع الحوادث !! كلام أقرب للخيال ولكنه واقع ويستحق التأمل

في ندوة عن (مستقبل التدوين في السودان) عقدت في الأسبوع الماضي وبعد أن فرغت من تقديم ورقتي تقدم شابان في مقتبل العمر نحوي وبعد إلقاء التحية وتقديم نفسيهما قالا لي : يا أستاذ والله نحنا عندنا مشكلة ومحتاجين ليك نقعد معاك وين ومتين؟ أجبتهما بإنو مافي مشكلة ويمكنهما أن يسجلا لي زيارة بالمنزل في اليوم التالي.

جلسا لي في اليوم التالي في منزلنا المتواضع ، إبتدر أحدهما الحديث قائلاً .. نحنا يا استاذ (شباب شارع الحوادث) ، وقبل أن تكتمل دهشتي أكمل لي الشاب الآخر القصة التي سوف أرويها لكم :

بدأت القصة قبل خمسة ستة أعوام .. لا أحد بالضبط يعلم متي بدأت بالتحديد ومن قام بها .. مجموعة من الشباب من الجنسين تشمل مختلف الشرائح طلبة ، عواطلية ،عمال وموظفين يتناوبون الحضور والجلوس في شارع حوادث مستشفي الأطفال على مدار 24 ساعة يقسمونها فيما بينهم مهمتم إستقبال الأطفال المرضى وذويهم وتقديم المساعدة لهم بتوفير الأدوية والفحوصات والأشعة وخلافه .

كيف يتم ذلك ومن أين التمويل .. أقول ليكم :

هؤلاء الشباب أنشأوا لهم صفحة على موقع التواصل الإجتماعي (الفيسبوك) أسموها (شارع الحوادث) وضعوا عليها أرقام هواتفهم تقوم الصفحة بإستقبال الحالات التي تحتاج إلى مساعدة فيقوم قراء الصفحة بالتكفل بنفقات الحالة المعينة بعد تحديدها بالإسم والذهاب لمقابلة هؤلاء الشباب في موقعهم أمام المستشفي لمعاينة الحالة وعمل اللازم .

لهولاء المجموعة من الشباب حسابات (جرورة) بعدد من الصيدليات قاموا بفتحها حتى لا يتعطل الأطفال المرضى (كما قالوا لي) ، وقد علمت منهم أنهم لا يمسكون قرش احمر (في ايدهم) إذ على المتبرع التعامل مباشرة مع المريض الذي يود مساعدته

وعلى من يود دعم عملهم أن يقوم بتسديد جزء من حساب الصيدليات والمعامل وقد علمت منهم أن هنالك الكثير من المواطنين يذهب جزء من مرتبهم شهرياً إلى حساب هذه الصيدليات كما أن هنالك عدداً مقدراً من أرباب المعاشات ميسوري الحال تذهب معاشاتهم شهرياً لنفس الجهات

ولك ان تعلم عزيزي القارئ أن منصرفات الشهر الماضي من دواء وفحوصات وصور مقطعية وخلافه بلغت 300 مليون جنيه (بالقديم) !!

لله دركم أيها الشباب .. لله دركم .. كم أنقذتم من أرواح وكم أزلتم لوعة أباء وأمهات يعانون الفقر والمسغبة والهوان وهم يرون فلذات أكبادهم يإنون من وطأة المرض والألم … لله دركم .. ماذا يمكنني أن أقدم لكم ؟

الحقيقة يا استاذ نحنا جينك عشان قبل كم يوم كده جانا زول معاهو طفلو عمرو زي 9 سنوات عيان ومفروض يرقد في العناية المكثفة عشان يدوهو أوكسجين .. المستوصفات والمستشفيات الخاصة الزول لو ما دفع أمنية 15 ما بدخلوهو وبعد داك اليوم الواحد في العناية المكثفة بي حوالي مليون إلى مليون ونص .. ومستشفى جعفر بن عوف للأطفال فيهو غرفه عناية مركزة واحده وتعبانة وفيها جهاز واحد وبتاع (دم) .. أها ما عرفنا نعمل شنو .. عملنا إتصالات وحاولنا نجمع قروش من بعض لكن يا استاذ المرض ما بينتظر .. والولد مات قدام عيونا !

جيناك يا أستاذ عشان عاوزنك تقيف معانا عشان الناس القاعدة تقرأ ليك كتيرين ولو كل واحد فيهم ساهم معانا بي اقل حاجه ممكن نعمل لينا غرفة عناية مكثفة للأطفال (مكتملة الأجهزة) ونحنا سألنا لقيناها بتكلف حوالى 260 ألف (مليون بالقديم) .

الشعب السوداني شعب عظيم .. العبد لله متأكد إنو ممكن نجمع لينا حق عشرة غرف عناية مكثفة في يومين .. بس المشكلة في كيفية جمع التبرعات .. والشراء (يعني في التنفيذ) … أولادي ديل قالوا ليا نخلي الناس ترسل لحساب المستشفي .. قلتا ليهم كده القروش دي ممكن تروح (مكاتب وستائر وموكيت) عشان كده أدوني فرصة نسأل القراء عشان نشوف إقتراحاتهم شنو؟

فيا أعزائي ورونا أنا والشباب ديل نعمل شنووووو؟

كسرة:

لنقف جميعاً تجلة وإحتراماً لشباب شارع الحوادث ..

الذين بدلاً أن تقوم الحكومة بتشغيلهم ..

إشتغلوا بدلاً عن (الحكومة)

كسرة ثابتة:

أخبار ملف خط هيثرو العند النائب العام شنو(وووو وووو وووو)+(وو). // الفاتح جبرا / حريات // الراي العام

تعليقات القراء في حريات .... 7 تعليق على “الفاتح جبرا يكتب عن شباب شارع الحوادث”

■عزالدين حسن في January 27th, 2013 1:18 pm
” الخير فىّ و فى أمتى إلى يوم القيامة ” صدق الحبيب عليه أفضل الصلاة و التسليم
لله دركم يا شباب و الله أخجلتونا
أرى أن تكون لجنة من هؤلاء الشباب مع من يثقوا به من الكبار و القيام بفتح حسابات بالعملة المحلية و الصعبة لجمع المال و تشيد الغرف و مستشفى سرطان الاطفال بمصر ليس ببعيد عن الأذهان فلنتخذه قدوة و مثالاً

■alsudani في January 27th, 2013 1:28 pm
Any help I am ready, but please make a trust E-mail and Telephone

■عزالدين حسن في January 27th, 2013 1:32 pm
أرجو فى الوقت الحاضر توضيح كيفية إرسال بعض المبالغ من خارج السودان و نيابة عن بعض السودانيين المقيمين بينبع الصناعية السعودية نتعهد بمد يدّ المساعدة بكل ما نملك لهذا المشروع العظيم سوا كان مال أو ادوية و نسأل الله ان يجعل ما تقومون به فى ميزان حسناتكم

■ابو وضاح في January 27th, 2013 1:41 pm
شكرا الاخ الفاتح علي هذه اللفته الجميله وشكرا لشباب شارع الحوادث علي انسانيتهم وطيب معشرهم ……….وانا اقترح ان تسجل كجمعيه خيريه باسم جاذب حتي يثق المتبرعون في صدقيتها واهدافها لان الامر اصبح تجميع لاموال …….وهنالك شباب كثر يمارسون اعمال خيريه منها علي ما اذكر جمعيه نجمع التبرعات لكفاله مرافقي المرضي بالمستشفيات …….وكذلك منتديات تقوم باعمال خيريه لدار المايقوما ودار العجزه .اسال الله التوفيق للجميع …والدال علي الخير كفاعله

■ابومحمد الطيب في January 27th, 2013 3:47 pm
الاستاذ الفاتح جبرة لك كل التجله وانا شخصياً مستعد للتبرع الشهرى بمبلف يعادل 360 جنيه سودانى وكذالك من شخص محسن اخر 360 جنيه سودانى ,,,,,راسلنا على الايميل اعلاه لنرسل لك رقم التلفون,,,,,,
طبيب مغترب
الرياض

■ابو التيمان في January 27th, 2013 4:47 pm
اتمنى لهم التوفيق /واتمنى من الله تعالى ان يتقبل منهم هذه الاعمال الصالحة/ زودينى برقم شخص لكى نشارككم هذا العمل الخيري

■سوداني يتألم في January 27th, 2013 8:53 pm
جزاكم الله خيراً .

» شارع الحوادث الحصاحيصا يستغيث.. ( توجد مأساة )
» (شارع الحوادث) بالحصاحيصا.. توجد حوادث وصور
» حادث حركة مروع قرب قنب تقاطع شارع ودحبوبة مع شارع مدني الخرطوم
» "المطيري السوداني" يطالب بإجبار شباب الولاية الشمالية على الزواج وتهديدهم بإستجلاب شباب أجانب لزيادة النسل
» شوارع الحصاحيصا .. تاني لا بنصدق كلام والي ولا كلام وزير