هذه القصيدة كتبتها منذ زمن بعيد وكنت قد اهديتها لاخي وصديقي المرحوم الفنان مصطفي سيداحمد عندما زارني في ليبيا وبالفعل كان قد بدا في تلحينها بعد ان اختصر منها بعض الابيات نظرا لطول القصيدة ..ولكن الموت كان اقوي منا جميعا فرحل عنا مصطفي وبقيت القصيدة ..فاليكم القصيدة التي اتمني ان تنال رضاكم وهى اول مشاركة لى في منتدي الشعر والشعراء وانا استميحكم عذرا واقوم بدوري باهدائها لاخى وصديقي العزيز ازهري شرشاب
اخوكم محمد طه منصور
1 رحلة وداع
ماجبت سيرتك لا ظلمتك
لا البينى بينك كان علم
مابيدوى صوتى عشان يصحيك
من غفوتك ..... اجمل حلم
كل اللى كان انا بينى بينك
حاجات قديمة اتغيرت
فتشت عنك فى الزمان
فى ضفتك..........
فى عمقك الضحل البعيد
وقفت شان اتخيلك
وقفت خيولى عليك بتصهل
فى مرافيك...................
تسال عليك وعن عفتك
سالت دموع ليلا طويل
اتحجرت فى مقلتك
فرح المكان
ولمن عرف
وصفك وجف
قلبو ارتجف
لامن وقف
لحكايه تاريخه اندثر واتبدلت
لما الحقيقة بقت خداع
مركبنا سارت غير شراع
وكل اللى كان بيناتنا ضاع
وصاحت معاهو سنين هواك
ياقلبى ماتحزن براك
اصبر كمان
خلى الحزن يحزن معاك
بانت حقيقة ريدنا زي وهج الشمس
فتشت عنك واصطفيتك
فى مسامات السحاب
ورهنت ليك باقى العمر
رفضت تفارق نفسك
الارض اليباب
وبحثت عنك فى صبا البلد الهجرتها
ونحنا فى عز الشباب
فتشت عنك فى خلا العتمور
وطيفك زي ضباب
وفضلت اجري وراك سنين
2
ضيعت عمري عليك سراب
ضيعنى ريدك لما جيتك
هارب من الواقع المرير
ضيعت فيك حلمى القبيل
ضيعت فيك حلم الشباب
وكان ظنى فيك لمن اغيب
امشى واجيك
للريده نفتح الف باب
ضاع العشم ياحلوه فيك
انسابت احلاما القبيل
من بين ايدنا بقت سراب
وانا اتظلمت معاك كتير
اديتك احلى سنين هواي
حتى التفاصيل الدقيقة اهديتا ليك
اهديتك اشعاري وغناي
ضجت صحاري هوانا
فى جوانا تبكى
رقصت من الالم الشديد
ريدنا اللى كان نديان زمان
اصبح يباب
لمن حلمته حلمت بيك
لمن جفيت اهلى الزمان
اصبحت اهواك واشتهيك
اشتقت ليك مااشتقت ليك
وهويت لقاك
كان غصب عنك
يوم مشيت
وقفت مشاعري اتجمدت
فلتت خيول ريدى الحبيس
اتجننت دارت تجيك
سرجتها ولجمتها
جفلت خطاها بلا سبب
شان تحتوينى وتحتويك
وخسرت رهانه من البداية
رجعت وراها بلا سبب
ماعرفت اشواك الطريق
فى الساعة ديك
احترت فيك
احترت كيف انساك
وانك فى دماى
كيف اقدر اتناساهو ريدك
3
وانا فى دواخلى اتنفسك
ترجع خطاي
احترت كيف انساك
وانك فى الضمير عايش معاى
كيف انسى روحى بلا الم
ادوس عليها اقدامى ترحل
دون رضاي
رغم انى بتنفس هواك
رغم انى بترك عن قصد
خطواتى تتبع لي خطاك
لكنى برضو غلطت فيك
وشربت من كاسات جفاك
كاسا لذيذ جواهو مر
خلانى انسى الكان زمان
واقعد معاك كل العمر
اذهلنى صبرك فى هواى
وادهشنى انك يوم همومى
ويوم شفاي
والدهشة فرحت من لقاك
ماصدقت انك قريب
عنى وبعيد
ماصدقت انك غريب
فى الريد كمان تبدى وتعيد
وماصدقت بعد الرحيل
ريدتنا ترجع من جديد
لكن رجع وجعى القبيل
خلانى اهرب من هواك
ابعد بعديد واتنفسك
واعشق لقاك
ياريت خداعك يستمر
كل اللى كان مابينى بينك
لمحة من اطول عمر
وانا ماندمت على هواك
مع انو كان زي شتلة
فى هوج الرياح
محكوم عليها تعيش تموت
اهو ده القدر
لحظة وتفوت
وتبقى الجذور
مغروسة فى قلبا كبير
شايل الالم بس مستحيل
ينساكى ياحلمى النبيل
4
فى لحظه كانت زي حلم
هجعت حكاوينا القبيل
وبقينا نتجرع مرارة ريدنا
فى عز الهجير
عزينا بعضنا فى فقيدنا
عانقنا بعضنا للفراق
وفارقنا بعضنا فى الم
لمن خلاص حكم الفراق
بالبين حكم
وجات الحقيقة
ماقدرنا نصبر لو دقيقة
رحلت خطانا بلا وداع
مركب مسافرة بلا شراع
صحت قلوبنا من الوهم
نزفت جروحنا بلا الم
الجانى منك ياهواي
كان شى غريب
ورغم انى كنت انا من زمان
بتوقعو
بس كان عجيب
والله ماكان ده العشم
موضوع: قصيدتي ( رحلة وداع ) 
الثلاثاء 16 أبريل 2013 - 5:13
