حكايات من ايام المسغبة ..

حكايات من ايام المسغبة ..

فى عمق ايام التمكين ، فى بداية التسعينيات، كنت قاعد فى الحلة ، قاعد اتأمل ( الارض اليباب) واقرأ فى ( ابن كثير)..
علمت أن ناس اللجنة الشعبية فى حلتنا ، ذهبوا الى مجذوب ود ابو الحاج وهو فى حالو ، مع الكارو فى طرف حلة دنقلا العجوز ( يخم فى التراب)..!
.. قالوا له : يا مجذوب ، خلى البتسوي فيهو دا ، تعال امشي الجهاد ..
قال ليهم : يا ناس الدقون ، يا الما بتخافوا من الله ، في جهاد اكتر من (خم التراب ) و مكابسة المعيشة فى الخلا ..؟
قالوا له : لا لا أنت مفروض تمشي تشيل السلاح تكاتل قرنق..
قال لهم : انا اكاتل قرنق ، في شنو..؟ قرنق شن سوالي ..؟ انا ما عندي اي غبينة عليهو ، دا زول في خالو وأنا فى حالي الشايفنو دا ،، لا قلع حقى ولا ضايقنى ، ولا سمعت منو شيتن شين ..!! الله يحنن علينا وعليكم اختوني خلوني اشوف معيشة وليداتي ..
قالوا له : انت ما سمعت انو قرنق قال عاوز يجي يشرب الجبنة فى المتمة ..؟
قال لهم : ان شاء الله يجي يشربا مع على حميدة ، فى أم بكول ، أنا ما خساني..خلوا ( اللخبتة)، و امشوا شوفوا ليكم شغلة اقضوها ..
صديقي الصحفي عبدالله الشيخ
آخر رئيس تحرير اجراس الحرية