حسن وراق حسن
 |  موضوع: المطربة ندي القلعة في الحصاحيصا دوت كوم من اليوم التالي  الأحد 16 يونيو 2013 - 5:36 | |
|
ندى القلعة : " أنا عصفورة في قفص " .. وأتحدى أي راجل عندو فضل عليّ 
06-16-2013 06:18 AM
تعبانة وعاوزة امشي السوق أشتري الملاح والقلل والنمالي والفندك.
صديق دلاي
كانت المواعيد سهلة وسريعة، انتظرنا ندى في مكتبها بالطابق الثاني ببناية طرفية بالطائف شارع الشرقي وعلى طريقة الشركات الكبرى تم استقبالنا وقدمت لنا كاسات الموية مع ابتسامة مضيف ودخلنا لصالة اللقاء نتجاذب أطراف متفرقة وقصص مختلفة حتى ظهرت ندى طويلة ولكن ليست كما يشاهدها الجمهور على الشاشة البلورية ، مخلوق سينمائي ضمن بهرجة النور والزعاريد والطعام، هي عادية مع (جدارة ما) لافتة للنظر أقوى من أن يكتشف مرة واحدة بالحدقة المعجبة أو إتقان الملامح (جدارة) تنبع من البنت الكبيرة في بيت من الطبقة الوسطى، ذلك الجيل من بنات السودان، تزوج عن حب من أغنيات(المصير) لإبراهيم عوض و(القيافة) لمحمد عثمان وردي و(البت الحديقة) لمصطفى سيد احمد و(بملامح أقوى) في أغنيات البلابل.
تقدمت نحونا (بخوف النساء) في مشارق الأرض ومغاربها ومع الوجه الرسمي كانت دواخل ندي تقاوم بشاشة ناس الوسط تريد أن تضحك لمجرد السلام وإنهزمت بإبتسامة منزلية ومع إيقاع الونسة الخفيفة اكتسى وجهها جراء الإلفة شلوخاً افتراضية وقالت إنها تربية حبوبات تهوي رقدة الكيعان وقالت أعوس وأفرك واشتري السمن والفندك والنملية وأصنع ملاح الويكاب وفي بيتي العمارة قطية الصادق المهدي.
صوتها بدون ميكرفون يملأ المكان بالأنغام ثمة فخامة تعمرالأذن بذلك الجمال ومع الجرأة والمعلومات والحقائق كنا معتقلين بسيرة فنانة (ملأت الساحة اثارة وأخباراً واعجاباً) وها هي تطلب المستحيل (عاوزة أركب حافلة المواصلات العامة وأتونس وأشاكل وأسامح) أنا عصفورة في قفص ولم نكن بالشجاعة الكافية لنبكي معها تعزية ومؤاساة على فقدها الجلل وتواصل الحوار فتسللت ثقة ومحبة وصرحة، نادراً ما نكسبها مع ضيوفنا ومن تلك الأسارير تحولت ندى إلى لون القمح وإن شئت لون الذهب، امرأة طبيعية وبقليل من الخيال الأديب اكتشفنا أن الاعلام يقود الناس من قرونهم، وعشرات الفلاشات تمر من فوقنا لتجسر المبالغات المحكمية عن ندى وهي تطلب ذلك الحق وكانت بالفعل أو وائل بدون مكياج سيدة وأم بل وربة منزل يغلب عليها الروح والفهم والعفوية، خرجنا منها ووقفنا في الشارع العام تحت ظهرية فبراير مفضوحين بالنهار والواقعية حتى خيل إلينا اننا التقينا امرأة أخرى ليست ندى القلعة..!!
٭ مافي داعي للسؤال التقليدي ( انتي ندى القلعة الفنانة المشهورة؟.
- لا في داعي فأنا ندى محمد عثمان حامد حسين .
٭ ومين القلعة دا؟.
- أول ما ظهرت وأنا في الكلاكلة القلعة.
٭ القلعة ظلمت أبوك لأنو عندو استحقاقات والمفروض يكتب على البوسترات الفنانة ندى محمد عثمان؟ .
ما في سبب واضح أو شىء مرسوم بس جرت العادة على الاختصار على عادة السودانيين وبالمعنى دا ما في مشكلة كبيرة.
٭ انتو أصلا من وين يا أخت ندى؟.
- أنا خلطة من القبائل.. الوالدة شايقية وحلاوية.. وأبوي خلطة أخرى من الشنابلة والشكرية المسلمية وفي ناحية من الجعافرة والحسينية.. وجدي من والدي تركي عديل وأبونا حامد همام هو ذاته شيخ العرب في مسلسل همام جاء للسودان ومن الزمن داك انتشرت (الحمرة اللباها المهدي).
٭ أنا قلت ليك أصلك من وين ؟.
- أسرتي من مدني.. حبوبتي اسمها الحرة قليل وأنا تربية حبوبات نشأت في بيت بسيط جداً وعادي ملتزم بكل القيم السوداينة نحترم الزول الكبير ونعمل زي أمهانتا الراجل راجل والمرأة مرة نهتم بالزوج ونهتم بالبيت.
٭ كيف كانت البت ندى في وسط الحلة والفريق بالفستان والطرحة؟.
- كنت مسكينة.. لكن عندي ذكاء عجيب أي حاجة تشوفهم عيوني ديل بعرف الحاصل لقدام ولبعيد شديد بحلل أي شىء والنتيجة دائما صاح صاح.. وما كان عندي عدائيات وكان شغب لذيذ وكنت محبوبة بين زملائي وزميلاتي وصرت الالفة عشان أحفظ النظام.
٭ هل كان في حب مع الشغب اللذيذ داك ؟.
- دي أحلى الأيام.. حيث البراءة الناس غير والزمن غير والحب غير والمدارس غيرت.. كنا نغني أغاني الاطفال ونرقص ونلعب ما بنوم الليل.
٭ هل كان في حب يا ندى؟.
- حب على أمه.. هو الأصدق والأجمل كنت بقرأ الجواب داخل الحمام نرجف من الخوف وبنرسل المناديل للأحبة بمتعة وأمانة ونكتم الحب ونخاف الخوف السمح داك.
٭ إيه حكاية غير غير غير؟
- قصدي كل شىء جميل راح مع ديك الايام الحلوة.. الحواجز انكسرت بين المعلم والتلميذ وبين الأب وولدو وبتو، الحواجز الربتنا زمان كلها اتكسرت وبقت ما في خوف.
٭ في الزمن دا ذاتو انتي فنانة وجمهورك عريض؟.
- أنا فنانة تحت عنوان معين وتربيت ما قادرة أربي ضفر أصبعي وما عملت كحل إلا وأنا واعية بالحاجات دي.
٭ خلاص أحكي لينا عن زواجك الأول؟.
- زواجي الأول من وليد محمد أحمد حجازي، الله يرحمه رحمة واسعة ياربي.. وكان هو الحب الحقيقي لانو ود الجيران كان عازف أورغن وأنا عمري 17 سنة فقط.
٭ من الذي لفت انتباه ندى لصوتها الجميل منذ الصغر؟.
- من زمن المدرسة كنت بلحن الأناشيد وبحفظ كل شىء وحتى الآن بحفظ بسرعة رهيبة، وما كنت أفكر مجرد تفكير عشان أغني لناس في مسرح ولا كان هوايتي أغني بس وليد زوجي شجعني.
٭ زي عادة المجتمع القديم كان الفن حرام على العوائل.. كيف عبرت هذا المطب الصعب؟.
- عانيت والله العظيم عشان كنت بحب وكنت بهرب من العزوزاب .. أمشي أسمع البروفات وكانت أمي تكتشف دا وتدقني بالخرطوش الأسود داك.. وكانت أمي تحبسني في البيت.
٭ ماهي أول أغنية لك في مكان عام حفلة أو مسرح؟
- كان في مناسبة إجتماعية وغنيت فيها لثنائي العاصمة مين يعصى أمرك ياحلو.. وفي كوبلي أبدله من وديد أقول فيه ليك يا لوليد كل ما تقبلو.
٭ كنتي ثابتة وجريئة أم هناك بعض الخوف والرهبة لأول لحظة مع الميكرفون؟
- كان جسمي يصب عرقاً زي الموية وكنت شايفة الناس رهاب.. الواحد أشوفو عشرة عشرة وكنت بس أعاين لوليد عشان يشجعني شوية وكان بحركة أفهمها كويس كأنه يقول لي انتي ما خائفة أتماسكي شوية.
٭ لليوم دا اتغيرتي كثير ولكن تبدو لي البداية بعيدة جداً ؟.
- أنا احترفت الفن وعمري 22 سنة
٭ أضبط جئتي علىّ انتي يا ندى عمر كم ؟.
- بدون أضبط بتاعتك دي عمري بدقة شهادة الميلاد 38 سنة .
٭ كيف تبدو علاقتك في الوسط الفني ؟.
- ماعندي اية علاقة مميزة بزول معين ولكن تربطني بالمرحوم محمود عبدالعزيز اخوة قوية.. وقف معاي حينما حاربني اولئك، ودافع عني وكثير من الفنانين حضروا مناسبات أولادي .
٭ كيف تقدري صوت هاجر كباشي ؟.
- عندها صوت جميل ولكن أقيف لحدي هنا بس أنا ماعاوزة أتكلم عن أي زول وما دائرة مشاكل وممكن أتكلم ليك عن ندى لحدي الصباح.. ما عندي مشكلة.. بس الآخرين لا.. مع الرجاء والإحترام .
٭ أكيد زوجك المرحوم وليد علمك العزف على الأورغن وممكن العود والطبل والدلوكة كمان؟.
- صدقني أنا لحدي اللحظة دي ما بعرف أعزف على أية آلة موسيقية.
٭ ولا الدلوكة البلدية دي ؟.
- ولا الدلوكة .
٭ وكيف هو زمنك الموسيقي وإيقاعك افتكر دا مهم لاي فنان مبتدي ؟
- زمني كلوا وإيقاعي في رجلي ولو ملاحظ طوالي أنا اعتمد على رجلي في الإيقاع .
٭ ولو...............؟.
- لو انقطعت رجلي خلاص موضوعي مع الغناء انتهى .
٭ تربيتك وعاداتك في الخرطوم فمن أين أتيتي بغناء الحماسة ؟.
- من أهلي من ورا أهل أبوي وحبوباتي .
٭ عشان كدا قلتي الراجل راجل والمرة مرة؟.
- أيوا المرأة مهما عالت لا تعلى على الراجل .
٭ عندك قصص مع الرجال المتزوجين ومعجبين بفنك ؟.
- نعم ، وكثيراً ما أنصح النسوان أن يحافظن على أزواجهن بالثقة والمودة الطيبة وتبادل المشاعر الفاضلة.. والناس لأمن تبقي كبار وعندها وليدات ما في داعي للشكوك.. دي ومرة في عروس اتنفضت من الكوشة ورمت الزهور وقالت للمصور أنا جبتك تصور لي ندى القلعة.
٭ يمكن عندهم حق والغلط مع الرجال مش انتي؟.
- أمهانتا علمتنا الراجل دا طفل كبير تجيهيو على طوعوا وتكوني الزوجة والأخت والأم.. واتذكر حبوبتي قالت لي البعاند الرجال عاند الجبال.
٭ مرات يا ندى المرأة السودانية بخيلة المشاعر على زوجها.. عشان كدا الجماعة يفكروا في الزوجة الثانية.. رأيك شنو؟.
- الاهمال حاصل والزوج عاوز صدر حنين وونسة عادية وشوية اهتمام وبعض الإحتواء.
٭ هل حصلت ليك مشكلة زي دي أثناء غناك في الحفلة ؟.
- حصل وحسمت الموضوع بالميكرفون وقلت رسالة لكل اخت تشوف الناقص ليها مع زوجها شنو وتعملوا.. عشان تحافظ على بيتها وأولادها وأنا مافي راجل بيملأ عيني وزدت وقلت يا نسوان هوي في الأجمل من ندى.
٭ أحياناً مع الطيبة دي تبدين صعبة شوية وحادة ؟.
- ديل أهلي الأتراك أنا في الحتة دي حلبية، ولكن أكمل ليك حكاية النسوان ديل قلت ليهن المفروض المرأة لزوجها تكون عروس على الدوام.. دخان البيت وقميص النوم في مواعيده.. دي الرحمة والمودة تبدأ من جنس المواضيع دي.
- في عقلية غريبة تحصر الزواج في الضيوف وحلة الملاح والمسكين يضيع وسط الجوطة وهو فاقد حنان واهتمام حتى الابتسامة عند الباب في نهاية الدوام تعيد له كثير من النشاط والمحبة للأسف النسوان بينسوا الحاجات دي.
٭ مرات الزواج الثاني دا زي القدر لا مفر منه ؟.
- أنا في قانوني راجل تزوج للمرة الثانية معناه زوجته الأولى ادتو فرصة وقصرت في حقو كتير.. عشان كدا بقى ليها حار.. بعدين بعد ما الفاس وقع في الرأس .
٭ ماهي الأمنية التي ضاعت من بين يديك ؟
- تمنيت أن أكون طبيبة لانو الأسرة كلها دكاترة وأبوي محمد عثمان دكتور كبير عيادته تحت كوبري كوبر ومتخصص في المخ والاعصاب.
٭ عشان كدا رفضوا طريق الفن في الأول؟.
- كانوا متضايقين وفي الزمن داك ما قادرين يتنفسوا وعملت إزعاج لأهلي .
٭ ليس عندك فكرة تحقيق أمنية أن تكوني طبيبة زي أبوك واخوانك؟.
- مفكرة أواصل الدراسة وأقرأ الطب .
٭ بعد رحيل الزوج الأول صاحب أول حب هل دق قلب ندى ولو لمرة واحدة لاي رجل ؟
- بعده لم أحب أبداً لانو ما في زول عاجبني والزمن كلوا ماشي لورا .
٭ من إحساسي الحالي افتكر انتي زولة عادية وبسيطة وجيدة ومع ذلك..؟
- ماتشوف القدامك دي أنا عايشة زي الطيرة في قفص مع الشهرة ما في راحة نفسية.. نفسي مقبوض وعايزة أكون زولة بسيطة أمشي السوق واشتري الملاح والقلل والأزيار والنمالي والفندك.
٭ انتي تعبانة من الوضع الخاص دا؟
- تعبانة شديد عاوزة أمرق للناس بدون أي إهتمام زائد وأحكي ليك قصة طريفة مرة ضربت لصديقتي وقلت ليها أنا عاوزة أركب ركشة وألف براي، وفعلا اتبلمت ولفيت ولفيت ونزلت وأديتو 5 جنيهات قال لي دي بتعمل شنو وعملت معاهو مشكلة مناسب لا ما مناسب كانت شبكة سمحة.
٭ وكيف حليتي المشكلة ؟
- أنا قصدي أعيش عادية وما كل المشاكل ضرب وقتل ودم .
٭ عاوزة تحكي حاجة تانية تفضلي ؟
- ايوة ايوة ايوة مرة ركبت حافلة السوق الشعبي من جنب ديوان الزكاة متبلمة.. كانت أجمل رحلة في عمري الكمساري والناس والونسة والتعارف ناس محترمة صامتة وصابرة في أمان وفي مجاملة بين الناس كدا لله زول طالع وزول نازل في تعاطف وصف لمكان ونكته ويازول طائر بينا وين وأنا متبلمة كنت عاوزة أشاكل الكمساري دي الحياة اللي أنا مفتقدها أنا تربية حبوبات لا أحب البرتوكلات والحراسة.
٭ عندك حرس في كل حفلاتك ؟
- لالا لا أنا محروسة من الله ومن جمهوري الذي يحترمني واحترمه.
٭ قالوا عندك قطية في بيتك العمارة ؟.
- دا صحيح وفيها الزير والمرحاكة أعوس وأفرك زي نسوان البلد والأرياف .
٭ وين نقطة ضعفك ؟.
- نقطة ضعفي النسوان الكبار والشحادين العجائز.. وأنا بقول دا مش عشان يقولوا بتحب المساكين والفشخرة الزي دي لكن بحبهم وذات مرة جبت واحدة مجنونة زوجي شال ولدو ودخل بيهو جوة وقال ليها نومي براك وصدقني نامت وفي الليل قامت تغني وترقص غنيت ورقصت معاها الصباح شربت الشاي ومشت آه ديل ناس الله وأنا بحبهم .
٭ غريبة طبعك كلوا كما يبدو برجوازي جداً ؟.
- مش سمعت المظاهر خداعة والحمد لله علاقتي مع ربي عامرة وطيبة اتناجى معه وأسمع صوته من قلبي من جوه وما بهمني كلام الناس لانو جلدي بقى تخين من الإشاعات وقد فاتت حدها .
٭ متى تبكي ندى ؟.
- أبكي حينما تثبت براءتي أمام الناس ودمعتي ماقاعدة تنزل بالساهل واثقة من نفسي شديد وأقول اللهم زد حسادي عشان حسناتي تزيد من فعائلهم .
٭ نعد معاك حسادك كم ؟
- السودان كلو بيتكلم عن ندى وأنا في صلاتي وأورادي وذنوبي تنمسح بكلام الناس الغلطو في حقي.
٭ في الدنيا الواسعة دي عندك أصدقاء وصديقات حقو يدافعوا عنك؟
- في الدنيا الواسعة دي عندي صديقة واحدة بس.
٭ مين هي ؟؟.
- مستحيل أخبر بها أحد .
٭ ولكن من الغريب أن تكون صديقة وفية لشخص مثلك وهي سر من الأسرار ؟.
- مهما قلت مش حا أقول ليك .
٭ ملاحظتي الثانية انتي زولة عفوية لماذا التعقيد دا ؟.
- فقدت الثقة في ناس كتار قلبي أبيض ولكن علموني سوء الظن وعفويتي جايبة لي المشاكل .
٭ مين خدعك ياندى ؟.
- لدغوني القريبين والبعيدين.. وتعلمت دروس ويادوب أنا قادرة أحمي نفسي .
٭ الغنا سرق حياة ندى الأخرى؟.
- إذا ماغنيت طوالي بمرض.
٭ دخلك كم في الشهر ؟.
- حسب قدرة الزول ولا أتمسك بمبلغ معين .
٭ ثيابك سيرة بين النسوان ؟.
- أنا البس ثوب ب 100 ج.. وألبس توب بخمس مليون واي توب ليهو مكانته .
٭ وإذا عندك حفلة في حي شعبي ؟.
- ما بالفهم دا بالعكس بس سلم على ببشاشة وتعال شوفني بغني بسعادة وكيف في الحفلات الشعبية وأطنقع نسوان.
البرجوازية وعلى ناس الهاي هاي وأتعامل معهم بترفع عشان يفهموا القروش ماكل شيء في الدنيا ولكن الناس والأهل العشرة والعلاقات الطيبة.
٭ اسلوب الحوار وطريق الردود يبعد عنا شبح شريط «الشريف مبسوط مني» ؟
- فعلا أوصفت روح الكلام بينا كلام أمين ومخلص أتمنى الاخراج يكون كويس.. اما بخصوص الشريف مبسوط مني أجيك من الآخر.. مشينا زيارة فنية عادية والجاب الغيرة والحسد والمشاكل أنا غنيت في مكان زي القيادة العامة عندنا هنا والبقية غنت في مكان عام.
٭ ولكن تلقيتي عربة هدية فاخرة من حاكم مقاطعة في نيجيريا ؟.
- شنو يعني والأرزاق بيدالله ومن الله خلقني.. اتحدى راجل وقفت قدامو وسألته مساعدة من أي نوع أنا رأسي مرفوع من زمان وممكن أكل كسرة وقرقوش وما أمد يدي لراجل اتحدى أي راجل عندو عليّ فضل .
٭ يعني انتي مظلومة ؟.
- أقول حسبي الله ونعم الوكيل.. ومرة وقدام المحكمة شهد ضدي رجل فوقع مشلول قدامي وسمعت التكبير وبكيت حمداً وشكراً لله .
٭ كأنما في شيء غلط من فهم الناس ليك ؟.
- أنا أهلي ربوني وبيعرفوني كويس .
٭ ندخل على أم وائل الأم والمربية ؟.
- جيل أولادي صعب ومحير وذات مرة مشيت لمناسبة اجتماعية فنادتني فتاة وقالت لي وين ولدك الطيارة.. بفصاحتي دي كلها اتجهت وقلت ليها تطيري انتي في السماء.
٭ إذا دخلت عليك بتك ود مش اسمها كدا وشفتي في عيونها حب قوي مخفي تحت مكانة ما ؟.
- لالالا بريا بريا بريا بتي من حب الزمن دا أنا بتي محجبة وداساها بعيد من ناس.. وأولاد زي ديل السستم وغيرو وأقول ليك مرة أمي راكبة تاكسي طرحة شافت بت لابسة شين نزلت أدتها كف وواصلت مشوارها نحنا مابنحب الحال المائل .
٭ ستجد بنتك من يدق لها الباب أجلا او عاجلا؟.
- بتي درب الدكان مابعرفو وأنا صاحبتهم بخبروني بكل حاجة تحصل ليهم موعياهم بحال الدنيا والزمن بينا الصراحة والوضوح عشان كدا ما بيغلطوا بوراي.
٭ هل توصي البت والولد يومياً ؟.
- لالالا ولكن كل ما قعدنا في لحظة عائلية نتونس وأدخل حاجاتي من بين الكلام مثل يا ولدي ما تغلط في بت الجيران ولا بت ناس لانو أنا الأم والأب وأمشي معاهم بقانون أبعد البيضة من الحجر .
٭ هل تتذكرين المرحوم سيد احمد خليفة دافع عنك في وقت صعب ؟.
- دا صباح الخير الوحيد الذي أنصفني لانه كان أمين وشجاع وكتب بدون غرض والزيو قليل.
٭ طبعاً انتي هلالابية على السكين كما يقول الأنصاري في أنصاريته؟
- أنا هلالابية وهيثم ما مشى من الهلال بالساهل.
٭ ليه الناس بتحب ندى ؟.
- قهر ياعين قهر .
٭ نسوان الرجال عاوزين كلمة ؟.
- كل مرة تمسك راجلها بالحب والواجب والمحنة وفي ناس بفهموني غلط .
٭ انتي مركزي مع منو ؟.
- مركزي مع حبوباتي ومع عنقريب القد ونوم الكيعان واللت بالكنتوش والقنانة والرايب والحاجات البلدية السمن واللبن والمشاط والضريرة وخمارة الزير ويكاب القصب والعدة الكرور والحلل والتمبل.
٭ هل هناك من كتب فيك شعراً ؟.
- أقرأوا لها بالفقرا كتبها زول كفيف شافني سنة واحدة وعمي وكتب الصبر .
٭ ندى والمكياج ؟.
- أحب المرأة الطبيعية ومزاجي مع اللون الابيض .
٭ طيب ليه عاملة كوفير ؟.
- في نسوان عاوزات كدا يظهرن بمظهري .
٭ قالوا أديتي حرم النور قروش عشان تقيف من الغنا وما تنافسك ؟
- حرم كويسة وعندها غناها الخاص وأنا ما محتاجة أصلا عشان أعمل كدا.
٭ محمود عبدالعزيز رحل ؟.
- سيشكل رحيله فراغاً وأوصي أن لا يتقدم أي زول ليملا هذا الفراغ لان جمهور محمود لن يرضى.
٭ الرأي الدولية تطرح عليك أن تسامحي من اخطأ في حقك؟
- ربنا هو من يسامح في سماؤه والمشاكل ملح الحياة.
صحيفة اليوم التالي | |
|
